KA QA NGÖNE ICETRÖN | HUNE JU KÖ—LA TUSI HMITRÖTR
Tha Hnyqetre Ju Kö La Tusi Hmitrötr
ETHANYIN: Ame la itre pane ewekë hna xome hnene la itre ka cinyihan me fejane la Tusi Hmitrötr, tre, hna hëne ka hape, papyrus nge hna xome fe la itre kupeine öni. * (2 Timoteo 4:13) Nemene la engazone la itre ewekë cili, e kola mekune troa xome itre ej, matre troa cinyihane me fejane ngön la Tusi Hmitrötr?
Ame la Papyrus, ke, ka canga zezeny, me canga wië qatresi, nge nyimenyime hi fitr. Kola qaja hnene la ketre atr ka thele la aqane mele ne la itretre Aigupito, ka hape: “Ka canga qaqacil, nge pine laka, ka hmelele catr, canga mudromudro hi. Ame la kola xeene la itus hna ewath, canga tro hi a qia me hnyeqetr ke, gaa menyike menu pala ha, maine pena troa xen hnene la itre neköi öni ka co, tune la itre neköi xejë ka wië, maine pena troa kelem ej.” Ame pena itre xa papyrus, tre, ame la kola öhne itre ej, kola xeene ngöne la ketre götran gaa menyik, nge ka hetre laam ngo lai menu pala ha, matre canga hnyeqetre hi.
Ka catre kö la parchemin hune la papyrus, ngo ka canga ethitr e ngazo la aqane ea, maine hna amë pena ngöne gaa menyike pala ha maine ngöne gaa qaqacil catr. * Ame la parchemin, tre, hna pi ji lapane hnei itre neköi öni ka co. Celë hi matre, kola qaja ngöne la itus, Everyday Writing in the Graeco-Roman East, göne lo itre tus hnapan ka hape, “canga ethitre hi me patr la itre itusi ekö.” Maine patre ju ekö la Tusi Hmitrötr, ce patre hi eje memine la maca hna tro fë.
HUNE JU KÖ LA TUSI HMITRÖTR: Hnene la wathebo i angetre Iuda hna amekötine kowe la nöjei joxu, troa “fejane la wathebo celë thatraqai angeice qa ngöne la tus”, lo faifi lao pane tusi ne la Tusi Hmitrötr. (Deuteronomi 17:18) Ketre, nyimutre la itre itusi hna fejane hnene la itretre cinyihane ngöne lo hneijine i Iesu, nge hna öhne la Itre Hna Cinyihane cili, ngöne la itre sunago e Isaraela me e Makedonia mina fe! (Luka 4:16, 17; Ite Huliwa 17:11) Ngo hnauëne laka, tha patre ju kö la itre hna cinyihane cili?
Ame la itre itusi hna hëne ka hape, Tusi Hna Ewathe Ne La Mer Morte, tre, itre hna amë e hnine la itre ge dro me ngöne la itre ngönemenyi me ngöne la itre götrane gaa qaqacil
Öni Phillipe W. Comfort, ketre atr ka inamacan ka hape, “Hnei angetre Iuda ekö hna majemine amë acone la itre itusi hna ewath, ke, hna cinyihane e hnin, la itre xötr ne la Tusi Hmitrötr. Hnei angatr pala hi hna amë itre ej e hnine la itre inege maine hnine pena la itre ge i angatr”. Nge ketre, hna majemine kuca pala pë hë e thupen, hnene la itre Keresiano ekö. Celë hi matre hna öhne e hnine la itre ge dro, lo itre itusi hna fejane ngön, la itre xötr ne la Tusi Hmitrötr me e hnine la itre iseif nge e hnine fe la itre ngönemenyi me ngöne la itre götrane gaa qaqacil.
ELOINE LA HNA THUPËN: Nyimutre la itre xötr ne la Tusi Hmitrötr hna fejan ekö, kola mama laka 2000 hë lao macatre nge itre eje pala hi la. Pë fe kö ketre tusi hna fejan ka tune lai.
^ par. 3 Ame la Papyrus tre, ëje ne feja ka cia hnine tim, nge hna xom ej matre troa cinyanyine me fejane la Tusi Hmitrötre ngön. Ame pena itre parchemins, tre, hna kuca hnei kupeine öni.
^ par. 5 Tune la tusi göi Déclaration d’indépendance e Etazini, hna fejane ej ngöne la ketre parchemin. Ame hë enehila, 250 lao macatre thupen, kola hnyeqetr nge tha öhne hë së lo itre matai tus nge jole hë troa e.
