Hnei Paulo aposetolo hna qejepengöi Iehova * tune la “Akötesieti ate akeukawan’ asë; Lo ate akeukawa huni ngöne la aköte huni asë.” (2 Korinito 1:3, 4) Celë hi matre, Tusi Hmitrötr a ithuecatr koi së ka hape, pëkö ketre atr ka atreine troa sewe Akötresie troa xatua së, nge ketre, atrein asë hi la Tretretro së troa akeukawane la itre hni së, ngacama catrehnine ju hë la itre akötre së.

Nyipici, maine easa aja ixatua qaathei Akötresie, nyipiewekë tro sa kuca la ketre ewekë. Ketre tune la droketre, maine tha hne së kö hna isapui me nyidrë, tro nyidrëti a xatua së tune kaa? Öni perofeta Amosa ka hape: “Hape u, tro ha ce tro la ala lu e tha ce hni nyidoti kö?” (Amosa 3:3) Matre kola ithuecatre koi së hnene la itre Hna Cinyihan ka hape: “Eashenyijë koi Akötesie, nge tro nyidëti a eashenyi koi nyipunie.”—Iakobo 4:8.

Nemene la ka amamane hnyawa koi së laka, aja i Akötresie troa easenyi koi së? Ame la hnapan, tre, kola mama laka anyimua qaja Nyidrëti koi së ka hape, aja i Nyidrë troa xatua së. (Wange ju la itre mekune hna eköhagen.) Ame la hnaaluen, tre, kola anyipicine hnene la aqane xatuane Akötresieti la itre atr ekö me enehila.

Ame enehila, nyimutre la itre atr ka thele ixatua thei Akötresie, ketre tui Davita joxu, hnei angeic hna sipo ixatua ngöne la angeic a cile kowe la itre akötr. Öni angeic: “Shamatineju la sipong’ e ini a hë cilie”. Hapeu hnei Akötresieti kö hna kapa la sipo i angeic? Eje hi. Öni Davita mina fe ka hape: “Hna xatua ni; nge nyipi madine la hning.”—Salamo 28:2, 7.

Hnei Akötresie hna upi Iesu troa xome la ketre hnëqa ka tru göi troa ixatua. Ame ngöne la itre xa hnëqa hna hamëne koi Iesu, kola qaja la “troa atuthe la itete thë fë hni” memine la “troa aupunyi angete teij’ asë.” (Isaia 61:1, 2) Tune lo hna ahnithe hë, hnei Iesu hna hane wangatrune hnyawa la “ange ka huliwa me hace.”—Mataio 11:28-30.

Hnei Iesu hna xatuane la itre atr jëne la itre eamo ka lolo i nyidrë, nge hnei nyidrëti fe hna nyihnyawa angatr me aloine la itre meci angatr. Ame ngöne la ketre ijin, hnene la ketre lepera hna sipo ielene koi Iesu ka hape: ‘Maine enëtilai a ajan, epi tro enëtilai a aloinyi  ni.’ Hnene la ihnimi Iesu, matre öni nyidrëti jë hi e sa ka hape: “Ini a ajan, loi hë eö.” (Mareko 1:40, 41) Nge loi pi hi la lepera.

Ame enehila, tha Iesu hmaca kö e celë fen, matre troa xatua së isa ala caas. Ngo ame la Keme i nyidrëti ene Iehova, lo “Akötesieti ate akeukawan’ asë,” tre, Nyidrëti pala hi a nyipiewekëne la itre atr ka aja ixatua. (2 Korinito 1:3) Tro sa pane ce wange la foa lao ixatua hnei Akötresie hna hnëkën.

• Tusi Hmitrötr. “Ame la nöjei ewekë hna cinyihan’ ekö, hna cinyihane nyine ini shë, mate hete mejiune shë hnene la xomi hni me keukawa qa ngöne la ite hna cinyihan.”—Roma 15:4.

• Uati Hmitrötr. Thupene la meci Iesu, hna tingetinge hnene la itre Keresiano asë ne la ekalesia. Pine nemen? “Angat’ a tro ngöne la qouene la joxu memine la keukewa qa thene la [u]ati [h]mitöt.” (Ite Huliwa 9:31) Ame la uati hmitrötr, ke, trengecatre i Akötresieti hi lai, nge ka hetre menen. Ijije hi tro Akötresieti a huliwane ej, matre troa akeukawane la ketre atr ngöne la nöjei götran.

• Thith. Kola ithuecatre koi së hnei Tusi Hmitrötr ka hape, “The kuke hnine kö la kete ewekë”. Nge eje fe a qaja ka hape, “loi e cengöne amamane koi Akötesie la ite aja i nyipunie . . . nge tro ha thupëne la ite hni nyipunie me ite mekune i nyipunie . . . hnene la tingetinge ka sisitia qa thei Akötesie.”—Filipi 4:6, 7.

• Itre Keresiano. Ijije hi tro angatr a itre nyipi sinee ngöne la itre ijine akötr. Hnei Paulo aposetolo hna qaja la itre sinee i angeic ka hape, hnei angatr hna “amadi” angeic ngöne la itre ijine “pë ewekë me aköte.”—Kolose 4:11; 1 Thesalonika 3:7.

Ngo maine jë tro epuni a hnyingëne la itre aqane troa kuca lai. Tro sa pane ce wange la tulu ne la itre atr ka hane cile kowe la itre jol cili. Ijije hi tro sa hane tui angatr, me atrepengöne la aqane eatrëne Akötresie la hna thingehnaean ka mingöminge celë, hna hape: “Kola aupune la nekönate hnei thin, kete tune tro ni a aupunyi nyipunie.”—Isaia 66:13.