DAVITA a petr, ke kola nyinyap koi angeice la itre sooc, me penyi angeic. Angatr a hmengöhmengöne me xou, me kötre mel qa cili hna isi. Hnauëne la angatr a xou? Casi pala hi la hnaewekë hna drenge hnei Davita. Kolo pala hi a suene la ëjen la ketre atr. Nge ame lai atr cili tre, kola cile hune la hnathup, nge angeice a nyiisine la itre sooc. Ketre ithupëjia lai ka catr nge ka hoea, pë fe kö atr ka tun hna hane öhne hnei Davita.

Goliatha! Angeice hnyawa hi la hna xouene hnene la itre sooc, pine laka ketre atr ka draië catr, tha fene atre kö. Maine troa tuluthi angeice memine la lue xa atr, ke, hace catre kö angeic hui nyidro. Nge maine tha hna liine kö la iheetre ne isi, ketre ceitune pala hi. Kola mama laka, ketre atr ka trene jiane isi, ka tru tengecatr nge ka majemine isi. Kola inyiisi hnei Goliatha. Pane mekune jë së, angeic a sue nge kola mexeme catr hune la itre sasala. Angeic a nyisiin me thaipiëne la trongene isi angetre Isaraela memine la joxu i angatr, ene Saulo. Angeic a nyisiine la ketre sooc troa uti koi angeic troa isi, matre mama jë la ka catre e nyidro!—1 Samuela 17:4-10.

Kola hmengöhmengöne me xou atraqatr hnei angetre Isaraela me Saulo joxu. Atre hnyawa hi Davita, laka casi pala hi la pengöi angatr thupene la ca treu! Goliatha pala hi a nyiisi angatr odrai, nge pëkö ka enij thene la lue trongene isi, ene la trongene isi angetre Filisiti memine la trongene isi angetre Isaraela. Tha lapa hnyawa kö la mekuna i Davita. Nyine hmahmane la kola hmengöhmengöne hnei xou la joxu ne Isaraela memine la köni trejine me Davita ka tru, ka hane sine la trongene isi Saulo! Ame koi Davita ke, ngazo catre pala ha la aqane ahmahmane hnei Goliatha ketre wanaithihlë, la trongene ne isi angetre Isaraela. Angeic a jelë Iehova Akötresi Isaraela! Ngo nemene la hna troa kuca hnei Davita, ngacama ketre thöthi hi angeic? Nge nemene la ini hne së hna troa xome enehila, qa ngöne la lapaune i Davita?—1 Samuela 17:11-14.

Pane mekune hmaca jë së, lo itre treu ka ase hë. Hejiheji hë nge Davita a thupëne hune la sasala la itre mamoe i keme i angeic, tha nanyi kö Betheleema qa cili. Ketre nekö trahmanyi ka mingöming, ke, maine jë thöthi pala kö angeic. Ketre, ka lolo lai iqëmeke i angeic, nge ka mingöminge catr, nge ka macamek angeic. Ame ngöne la itre ijine Davita a thupë mamoe, angeic a nango elo kitara. Angeic a haine la elolone la itre hna xup hnei Akötresie. Nge pine laka itre hawa ne elo miuzike angeic, majemi hë angeic elo. Ngo hna pane thei Davita ngöne la ketre hej, ke, keme i angeic a ajane troa ithanata me angeic.—1 Samuela 16:12.

Traqa Davita a öhnyi Iese keme i angeic, kola nango porotrik me Samuela perofeta, ketre qatre trahmanyi ka mele nyipici. Hnei Iehova hna upi nyidrë troa siëne la ketre neköi Iese trahmany, matre troa joxu ne la nöje i Isaraela! Öhne hë Samuela la sevene lao mama i Davita, ngo hnei Iehova hna qaja koi Samuela ka hape, patre kö thei angatr la hnei Nyidrëti hna iën. Nge ame la kola traqa hnei Davita, öni Iehova jë hi koi Samuela ka hape: “Sië angeice pi, ke angeice hi lai!” Qëmekene la itre mama i Davita, hnei Samuela hna nenge la ketre wakacu ka ketrepengön hune la he i Davita. Ketrepengöne hë la mele i Davita thupene la hna sië angeic. Öni Tusi Hmitrötr ka hape: “Hna traqa hui Davita la Uati Iehova qane la drai cili.”—1 Samuela 16:1, 5-11, 13.

 Hapeu, ame la kola sië Davita troa joxu, hnei angeice kö hna pi mama? Ohea, hnei angeic pe hna treqene hnyawa tro la uati hmitrötre i Iehova a amamane koi angeic, la ijine tro angeice a xome la hnëqa ka tru cili. Nge ame ngöne la ijine cili, ka thupë mamoe pala hi angeic. Tha hnei angeice kö hna sixele troa xome la huliwa cili, nge ketre, pëkö hnei angeic hna xouen. Alua thele troa öni la itre mamoe ne la keme i angeic. Cas hnene la liona nge ame la ketre, hnene la bea. Tha hnei Davita kö hna sengöne ju hi lai lue öni ka ses. Ngo hnei angeice pe hna sesë troa lepe humuthe lue ej. Ame ngöne la lue ijine cili, ke, pëkö ka ce uti me Davita troa humuthe la lue öni cili, angeice casi hi!—1 Samuela 17:34-36; Isaia 31:4.

Ame ngöne la ketre ijin, hna traqa hmaca troa thei Davita, ke, drenge hë Saulo joxu la hna kuca hnei Davita. Ngacama ketre sooce ka catr angeic, ngo tha hnei Saulo kö hna trongëne la itre trepene meköti Iehova, matre hnei Iehova hna nuetriji angeic. Hnei Iehova hna xometrije qaathei Saulo la uati hmitrötre i Nyidrë, nge ame hë e cili, pë hë eloine la mele i angeic, nge angeic a lapa fë elëhni me hmekuhni, me pi isi. Ame la ijine ngazo Saulo, ka loi troa elo miuzik matre troa apujene la elëhni angeic. Celë hi matre qeje Davita jë hnene la itre hlue i angeic ka hape, ketre thupëtresij ka atreine elo miuzike hnyawa nge ka atreine isi. Celë hi kepin matre hna thei angeic matre troa hane sine la itre ka troa elo miuzik koi Saulo, me hane xome la itre jiane isi nyidrë.—1 Samuela 15:26-29; 16:14-23.

Itre thöthi fe, ijije hi tro epuni a xomi ini qa ngöne la aqane lapaune i Davita. Pane mekune jë lo itre ijine Davita a thele la itre ewekë ka troa aeasenyi angeice koi Iehova. Ketre, hnei angeice hna eköthe la atreine angeic, matre maca troa kuca la itre ewekë, nge canga atreine hi angeice huliwane itre ej. Ngo ame la ka sisitria catr, ke, hnei angeice hna hmalahnine troa nue la uati hmitrötre i Iehova troa eatrongë angeic. Drei la ketre ini ka lolo catr koi së asë!—Ate Cainöj 12:1.

Ame ngöne lo Davita a nyihlue i Saulo, hnei angeice hna bëeke e itre xa ijin troa thupëne la itre mamoe ne la keme i angeic. E cili, angeic a nango lapa aqeany. Ame la ijine cili, hnei Iese hna upi Davita troa pane waipengöne la köni mama i angeic, itre ka sine la trongene isi Saulo. Canga kapa hi Davita la sipo i keme i angeic. Hnei angeic hna tro fë ane la itre trejine me angeic, nge tro meköti kowe la hnathupe Ela. Ame la kola traqa hnei Davita e cili, hleuhleu catre angeic, ke, angeic a traqa me öhne la kola isa cile la lue trongene isi, tune lo hne së hna ce wange hë. Lue eje a iqëmekekeu ezine la lue la hnathup.—1 Samuela 17:1-3, 15-19.

Tha madrine kö Davita la ewekë celë. Hnauëne laka tro la trongene isi Iehova, Akötresie ka mel, a kötr me xouene la wanaithihlë? Mama cile hnyawa hi koi Davita laka, Goliatha a jelë Iehova. Celë hi matre angeic a qaja cememine la aja ka catre la aqane troa ngaa Goliatha. Drenge asë hi Eliaba, mama i Davita, la kola ithanata hnene la jini angeic. Angeic a elëhni me ithanata akökötrenyi koi Davita, me qaja koi angeice ka hape, ame la traqa Davita, ke, kolo hi a pi goeë isi. Ngo öni Davita jë hi e sa ka hape: “Nemene la hnenge hna kuca? hape u, pëkö ewekë ?” Thupene lai, hnei Davita hna qaja xeciëne la aqane troa ngaa Goliatha. Drenge jë hi Saulo, ame hnei angeic hna iupi troa thei Davita.—1 Samuela 17:23-31.

Ame hnei Davita hna qeje Goliatha kowe la joxu me ithuecatr koi nyidrë, ka hape: “The qou kö la hni ne la kete ate göi nyën .” Tru catre la xou e Goliatha hnei Saulo me itre sooce i nyidrë. Maine jë hnei angatr hna  mekune menune ka hape, tru catre kö Goliatha hui angatr, ke ame la angatr a goeë Goliatha, kösë ha neköi xejë angatr. Nge aca tro hi angeice a lepe apatrenyi angatr. Ngo tha celë kö la mekuna i Davita. Tune la hne së hna troa ce wang, ka ketre pengöne kö la aqane goeëne angeic la jole cili. Tha hnei angeice kö hna treqen, ngo mejë jë hi angeic me cile troa isi me Goliatha.—1 Samuela 17:32.

Ngo kola sewe angeice hnei Saulo me hape: “Tha ’teine kö eö troa tro kowe lai ate Filisiti mate ishi me nyën, ke nekönat’ eö, ngo ate ishi nyën’ e nekönate pete kö.” Ngo hapeu, nekönatr Davita? Ohea, maine nyipici laka tha ijiji angeice kö troa hane sine la trongene isi, ke, ka co petre kö angeic, ngo ame pe, atre Davita hnyawa hi hnei angatr laka, ketre nekötrahmanyi ka catre isi nge tha thöthi hmaca kö angeic.—1 Samuela 16:18; 17:33.

Hnei Davita hna ithuecatre koi Saulo me amexeje hmaca lo ijine angeic a humuthe la liona me bea. Hapeu angeice kö lai a sipu selë angeic? Ohea. Tha sihngödri kö koi Davita la kepine matre angeic a ngaane la itre ithupëjia me angeic. Öni angeic ka hape: “Hnei Iehova hna amele ni qa ngöne la ime ne la liona memine la bea, nge tro nyidëti a amele ni qa ngöne la ime ne lai ate Filisiti.” Matre hnei Saulo hna kei thenge la mekuna i Davita, me hape: “Trojë, nge qâ i Iehova troa ce me eö.”—1 Samuela 17:37.

Ceitune kö la lapaune i epun me Davita? Ame la lapaune i Davita tre, nyipi lapaun. Ame laka lapaune jë angeic, tre, hnene la hnei angeice hna thele troa atre Akötresie, nge ketre, öhne hë angeic la ixatua qaathei Nyidrë. Atre hnyawa hi angeic la aqane hnim me thupë angeic hnei Iehova; ketre, hnei Nyidrëti pala hi hna eatrën la itre hnei Nyidrëti hna thingehnaean. Maine aja së troa hane lapaune tui Davita, nyipiewekë tro sa catre inine la pengöi Akötresie e hnine la Tusi Hmitrötr. Maine tro sa mele thenge la itre hne së hna inin, tro hë sa kepe manathithi ka loi nge tro lai a acatrene catrëne la lapaune së.—Heberu 11:1.

Hnei Saulo hna pane hetrë Davita la iheetre ne isi angeic. Ceitu hi la iheetre ne isi Saulo me Goliatha, hna kuca me kopa, nge hna petrëne la itrapetre kopa, me hetrëne la iheetre ne isi fao. Ngo hnei Davita hna tupathe troa tro fë la hnahetre cili, ngo hace pala ha koi angeic. Ketre, tha ka hane kö angeice inine troa isi, matre atrein troa tro fë la ihnahetre ne isi ka tune lai. Kolo hi a qaja la ihnahetre i Saulo, ketre thupëtresij ka tru matrane ngöne la nöje i Isaraela! (1 Samuela 9:2) Angeice a una trije la hnahetre ne isi cili, xome la hnahetr hnei angeice hna majemine hetrën, ene lo hnahetre ne thupë mamoe.—1 Samuela 17:38-40.

Hnei Davita hna xome la tö i angeic, me fena la sine watreng, me xome la trehle i angeic. Ame enehila ka pë pengöne la trehle, ngo ketre jiane isi lai ka lolo catr. Ame la trehle, ke, hna nyi trapol me lue engen nge celë hi ketre jiane isi ka lolo catre lai hna xome hnene la atre thupë mamoe. Angeic a hnaane lai trehle, me jumejume me hna mekötine kowe la he i Goliatha. Pine laka tru hnei tha ne la jiane ne isi cili, haawe, tha sesëkötre kö së la kola hane wangatrune la itretre tha trehle ngöne la itre tronge ne isi.

Ase hë angeice xome la itre jiane isi angeic, ame hnei angeic hna nyinyape nyimenyim, troa ixelë memine la ithupëjia me angeic. Pane mekune jë së la itre thithi Davita, ngöne lo angeice a pane cile me thili troa iëne la faife lao wene etë ka jijia qa ngöne lo hneopegejë. Thupene jë hi lai, angeic a nyinyape kowe la hna isi!

Nemene jë la mekuna i Goliatha, ngöne la angeic a öhne la atr ka nyinyape troa isi me angeic? Kola qaja ngöne la xötr, ka hape, “Nyën’ a sixa angeic, ke nekönat’ angeic, nge ka madra me lolo qëmek.” Sue jë hi Goliatha hnei elëhni me hape: “Vailai ni, mate traqa fë hmunë la ite tö koi ni ?” Goliatha a öhnyi Davita e nyinyape fë la sine tö, ngo tha tha öhne pë hë angeice la trehle i Davita. Angeic a eji Davita ngöne la ëje ne la itre haze ne Filisiti me qaja catrëne ka hape, ame la ngönetei Davita tre, tro angeic a hamëne matre ithue önine la itre öni ka sesë, me itre öni ne hnitr.—1 Samuela 17:41-44.

Kola mama hnyawa la lapaune i Davita ngöne la aqane sa i angeic koi Goliatha. Pane mekune jë së lo aqane sue la nekötrahmanyi koi Goliatha, ngöne la angeic a hape: “Hmunë a traqa fë koi ni la taua, me jo, me wanajo ; ngo ini a traqa koi hmunë ngöne la atesiwa i Iehova ne sabaoth, Akötesi ne la ite ishi angete Isaraela lo hnei hmunë hna iehnaean.” Atre hnyawa hi Davita laka pëkö pengöne la atr memine la itre jiane isi. Pine laka tha hnei Goliatha kö hna metrötrë Iehova Akötresie, haawe tro kö Iehova a sa koi angeic. Celë hi lai kepine matre qaja jë Davita ka hape, “ishi Iehova la.”—1 Samuela 17:45-47.

 Tha ka sihngödri kö koi Davita la eqea i Goliatha, nge öhne hnyawa hi angeice la itre jiane isi. Ngo tha hnene kö la itre ewekë cili hna axouenyi Davita. Tha hnei Davita kö hna tui Saulo me trongene isi angeic. Tha hnei Davita kö hna thele troa itupa me Goliatha. Ngo hnei angeice pe hna nue Iehova troa itupa me Goliatha. Ka qea catre kö Goliatha hune la itre xa atr, kola troa traqa koi 3 met la eqea i angeic. Ngo nemene angeic kowe la Atre Xupe la hnengödrai memine la fene hnengödrai? Ceitu angeice hi memine la nöjei atr, kösë ketre xejë nyine tro Iehova a hnyija!

Davita a nyinyape kowe la ithupëjia me angeic, me xome la ketre wene etë qa hnine la watrenge i angeic. Davita a hnaan la trehle i angeic me emothe ej, nge kola qez la trehle. Goliatha a tro meköti troa ixelë me Davita, maine jë hetre ka ajöne la petre i angeic. Pine laka ka qea catre Goliatha nge hopatre pë hë lo lai ka ajöne la petre i angeic, haawe, mama kö la he i Goliatha, matre tha jole kö koi Davita troa tha trehlene la göpadri Goliatha. Tha tria ju kö, tro meköti hi la wene etë kowe la göpadri Goliatha.—1 Samuela 17:41.

Ame la Davita a tha trehle Goliatha, pëkö ca mej, wene etë hi la ka keciqa ngöne la göpadri Goliatha. Hnei Iehova hna kuca matre tha tro ju kö Davita a hnaane la hnalueene wene etë. Tro meköti hi lo lai wene etë a lapa nyipine la göpadri Goliatha. Kei qene ipië pi hi Goliatha me susu! Ame lo ka ajöne lo petre i Goliatha ke, so ju pe hi la dro, kola kötre mel. Ame hna tro pi hnei Davita me xome la taua i Goliatha me thupatrije la he i angeic.—1 Samuela 17:48-51.

Ame hë e cili, pëhë xou thei Saulo me itre sooce i angeic, matre angatr a siej me weje la angetre Filisiti. Eatre hnyawa lo hna qaja hnei Davita koi Goliatha lo kola hape: “Tro Iehova . . . a hamë nyupuni koi hun.”—1 Samuela 17:47, 52, 53.

Ame enehila, tha kolo hmaca kö a hane lö hnine la itre isi hnene la itre hlue i Akötresie. Ase hë lo lai itre ijine cili. (Mataio 26:52) Ngo nyipiewekë pala pë hë tro sa lapaune tui Davita. Loi e tro sa goeë Iehova ceitu me Akötresie ka mel, nge Akötresie nyine tro sa nyihluen, me xouen. Ame itre xa ijin, maine jë tro sa mekun, ka hape, thatreine kö së troa cile kowe la ketre jol, ke, ka tru menu pala ha. Ngo, tha tro pi kö sa thëthëhmine laka, ame la mene Iehova tre, ka pëkö ifegon. Maine tro sa atrunyi Iehova me lapaune koi Nyidrë tui Davita, haawe pë hmaca kö jol me ewekë hne së hna troa xouen. Nga drei la sa i Iehova?