Tusi Hmitrötr a qaja ka hape, ame Goliatha tre, “cangemene la o kubite nge ca iwanakoime la ehoeanyi nyën.” (1 Samuela 17:4) Nyimutre la itre atr ka qaja ka hape, ame Goliatha ke, tha ka qea kö angeic. Ngo ame enehila, ke, hetrenyi fe la ketre trahmanyi ka 2 met 7 la eqean. Hapeu, nyipici kö ka hape, ame Goliatha tre, ka qea catr pala kö angeic? Atre Refai angeic, nge ka hlemu la itre atrene nöje cili hnene la eqea i angatr. Kola qaja hnene la ketre itus e Aigupito ka he lo 1200 M.P.K. ka hape, hetrenyi la itre atr ka isi ngöne la nöje Kanana, 2 met 4 la eqea i angatr. Celë hi matre, tha jole kö troa anyipicine ka hape, ka qea catre kö Goliatha.

Hnene la itre ka inamacan hna thele troa qaja ka hape, tha ka mele fe kö Davita Joxu, ngo kola ifejicatren. Jole catr tro angatr a anypicine la mekuna i angatr. Hna öhne hnene la itre archéologues lo itre hna sija hna hape, “lapa i Davita”. Ketre, ame koi Iesu Keriso, ka mele Davita ekö. (Mataio 12:3; 22:43-45) Hna qeje Iesu ka hape, Mesia, nge hna jelenyipicine lai hnene la lue xötr atr. Kola amamane hnene la lue xötr atr cili, ka hape, matra i Davita Joxu nyidrë. (Mataio 1:6-16; Luka 3:23-31) Kola mama hnyawa ka hape, ka mele Davita ekö.

Kola qaja hnei Tusi Hmitrötr, ka hape, hna isi ekö ngöne la hnathup e Ela. Ngo eje mina fe a qaja hnyawane ka hape, hnene la angetre Filisiti hna hunuma ngöne la hnathupe nyipine la lue traon, ene Soko me Azeka. Hnei angetre Isaraela hna lapa ngöne la ketre götran ne la hnathup. Tune kaa la itre götrane hna isi ngön ekö, itre ifejicatre?

Drei la hna qaja hnene la ketre atr ka ihamë, öni nyidrë: “Ame la atr ka ihamë sai hun, tre, tha ka hmi kö; hnei nyidrë hna tro sai hun kowe la hnathup e Ela. Hne huni hna xötrëne la gojenyi ne tro kowe la sasala, me elë kowe la gaa draië. Eahuni a cile me goeëne la hnathup, nge angeice a e jë koi huni la 1 Samuela 17:1-3. Thupene lai, angeic a amamane la hnathup, me qaja ka hape: ‘Ame ngöne la götrane mi epun, tre, kolo hi lo thupen la traon hna hape, Soko.’ Nge angeic a ujë me hape: ‘Ame ngöne la götrane maca i epun, tre, kolo hi lo thupen la traon e Azeka. Hna hunuma hnene la angetre Filisiti e nyipine lai lue traone cili, hmekune kohi lo itre sasala. Easë hnyawa hi la, hmekune lo hna hunuma hnei angetre Isaraela.’ Eni a pane mekune lo kola cile ekö e celë hnei Saulo me Davita. Thupene jë hi lai, eahuni a uti pi kowe la hnathup, me tro sasaithe la ketre tim ngo ijine ej a qaqacil, matre eahuni a tro hune la itre wenetë. Meku Davita jë hi ni lo e hlem la faifi lao wene etë ka jijia, memine lo wenetë hna hna koi Goliatha.” Ame asë hi la itre ka ihamë, ke, angatr a haine la enyipicine la itre hna qaja hnei Tusi Hmitrötr.

Xecie hnyawa koi së laka, ka nyipici la hna qaja hnei Tusi Hmitrötr, göne la aqane trongene la itre ewekë ekö. Ketre tune mina fe la itre atr memine la itre götran. Ame la ka nyipiewekë catr, ke, itre ewekë lai hna cinyihane e hnine la Tusi Hmitrötr; haawe, ka xulu itre ej qaathene la Akötesie ka nyipici, Nyidrëti hi lo “ka tha’teine thoi.”—Tito 1:2; 2 Timoteo 3:16.