AME la ketre hnaipajö ne Sabath, hnei Kenneth me Filomena, lue ka mel e Curaçao, hna wang la lue trefën ka ini Tusi me nyidro.

Öni Kenneth: “Ame la nyio a traqa, hna thing asë la uma, nge patre kö la loto. Ngo, kösë hetre ewekë ka upi ni troa telefon kowe la föe.”

Hnene la föe hna sa, me qaja ka hape, ka huliwa la föi angeic. Trotrohnine ju hi angeic e cili laka, Kenneth hi me Filomena a cil qëmekene la hnalapa, ene pe canga lö pi angeic troa fe la qëhnelö me hë nyidro.

Canga öhne hi nyidro ka hape, hna treij hnei angeic. Ame hë la kola thith hnei Kenneth göi troa nyiqaane la ini Tus, treije hmaca jë hi la föe. Kenneth me Filomena e cili a hnyingëne koi angeic la kepin matre angeic a treij.

Öni angeic: “Ase hë ni mekun troa hnöjua enehila hnaipajö. Eni pala kö a cinyianyine la tus koi föeng, nge ho jë hi la telefon, nge nyipë la ka hë.” Angeic pë hë a qaja jë koi nyidro la hleuhleu ka ej thei angeic, ame hnei nyidroti xatua angeic jëne la itre xa xötr ne la Tusi Hmitrötr. Celë hi ka akeukawanyi angeic ngöne la ijine cili.”

Öni Kenneth: “Nyio a olen koi Iehova la hna aijijë nyio troa xatuane la föe ka akötr, me upi nyio troa telefone koi angeic. Maine jë, hna eatrongë nyio jëne angela maine jëne la uati hmitrötre i Nyidrë!” *

Hapeu, ka meköti kö tro Kenneth me Filomena a mekune ka hape, hnei Akötresie hna xatua nyidro jëne la ketre angela, maine uati hmitrötre i Nyidrë, ene la mene i Nyidrë? Maine, hnei Kenneth hi hna hë menu ngöne la ijine cili?

Tha nyipi mama kö koi së. Ngo, ame la ka xecie koi së tre, Akötresie a upe la itre angela i Nyidrë troa xatuane la itre atr troa atre Nyidrë. Öni Tusi Hmitrötr, hnene la ketre angela hna eatrongë Filipo kowe la atr ka tru ne Aithiope ka thele la nyipici göi Nyidrë.—Ite Huliwa 8:26-31.

Nyimutre la itre hmi ka mejiune kowe la itre angela. Kola mekun laka, itre angela ka lolo thiina, nge angatr a eatrëne la aja i Akötresie, me isa thupëne la itre atr. Hetre itre atr ka mekune ka hape, ka mel la itre angela, nge ka hetre thangane kowe la mele së la itre huliwa i angatr. Nge, ame koi itre xan, pëkö angela.

Ka mele kö la itre angela? Maine eje hi, ka xulu angatr qa ka? Nemene la pengöne la itre angela? Ka hetre thangane kö la huliwa i angatr kowe la mele së? Tro sa ce wang la itre mekune ka sa la itre hnying celë.