Eje hi, hetre angela ka ngazo. Ka xulu angatr qa ka? Hnei Akötresie hna xup ekö la itre angela cememine la atreine troa ketre sipu ië ewekë. Ngo, hnene la ketre angela ka pexej hna huliwane menune lai. Matre angeice hi la qaane la icilekeu e celë fen ke, hnei angeic hna iaö Adamu me Eva, lo lue pane atr hna xup, troa icilekeu me Akötresie. (Genese 3:1-7; Hna Amamane 12:9) Tha hnei Tusi Hmitrötre kö hna qaja lo ëje i angeic maine götrane qa i angeic e hnengödrai qëmekene tro angeic a icilekeu. Ngo, thupene hë la hna icilekeu, Tusi Hmitrötr a hë angeic ka hape, Satana, kola hape, “Ka Icilekeu,” me Diabolo, “Atre Ixöjetrij.”—Mataio 4:8-11.[1]

Ngazo pe, tha hna hmaca kö e cili. Ame ngöne la hneijine i Noa, hnene la itre xa angela hna “nue tije la nyipi hnalapa i angat” thene la lapa i Akötresie e hnengödrai. Hnei angatr a uti kowe la fen, me xome la pengöi atr matre troa kuca la itre huliwa ka sis, ngo tha ka ihmeku pe memine la sipu pengöne la mele i angatr.—Iuda 6; Genese 6:1-4; 1 Peteru 3:19, 20.[2]

Ekaa ha la itre angela ka ngazo? Ame la Akötresie a axulune la Iwë matre troa apatrene la itre atr ka ngazo, hnene la itre angela cili hna elë hmaca a tro hnengödrai, me nue pe la ngönetrei angatr. Ngo, tha hnei Akötresieti kö hna nue angatr troa xome hmaca la göhne i angatr ekö. Hnei Nyidrëti pe hna ami angatr ngöne “la jidi ka epine palua.” Kolo lai a hape, tha angatr hmaca kö ngöne la lai i Akötresie ka ej thene la lapa i Nyidrë e hnengödrai. (Iuda 6) Matre, angatre hë a lapa fene la musi Satana Diabolo, ene la “tixene la nöjei demoni,” nge ka “sipu ujë nyëne kö nyine angela ka lai.”—Mataio 12:24; 2 Korinito 11:14.

Tusi Hmitrötr a amamane ka hape, ame la Baselaia i Akötresie e hnengödrai tre, hna acile lo 1914. * Thupene lai, hna ukapië Satana memine la itre dremoni angeic qa hnengödrai a tro celë fen. Matre, kola kökötr la iangazo memine la itre huliwa ka sis hna kuca enehila e cailo fen ke, tru catr la trenge elëhni angatr.—Hna Amamane 12:9-12.

Hnene laka, kolo palahi a kökötr la iangazo memine la itre huliwa ka sis, haawe, kola mama laka, easenyi hë la pun la itre huliwa i angatr. Thupene la hna musi elanyi hnene la Baselaia i Akötresie ngöne la Paradraiso koi 1 000 lao macatre, tro ha nue koi angatr la hnepe ijine hi troa tupath la itre atr. Thupene lai, tro ha apatrenyi angatr epine palua.—Mataio 25:41; Hna Amamane 20:1-3, 7-10.