KOLA madrine la itre hlue ke lolo la aqane amekötine Sara la huliwa, nge angatr a huliwa catr. Ketre, eahlo fe a hane ixatua. Pane mekune jë së la eahlo a nango jieji la iwanakoime i eahlo ka akötr. Ame la itre uma mano hna kuca hnei pene gootr ke, kola ha wië qatresi, pine laka hna cinajöne me maniën. Kolo hi lai a amekunë Sara laka, itre macatre ne feke trootro hë angatr. Kola lö la jö, nge kösë kola tho la hnengödrai. Tro Aberahama * lo hmakany, nge kolo pala hi a treqe nyidrëti hnei Sara. Kolo ha troa hejihej, nge fetra pi hi nyidrë, matre eahlo a hnyimahnyima me madrin.

Itre macatre ne Aberahama hë memine la hnepe lapa i nyidrë, ezine la Hneopegejë ne Euferata, nge easenyi ne la nöje Kanana. Tha jole kö troa feke hnei Sara qa Ure kowe la ketre nöje hna thatre, pine laka atre hnyawa hi eahlo la hnëqa ka tru hnei Iehova hna hamë Aberahama. Iehova a troa amanathithine la matra i Aberahama nge tro nyidrëti a keme ne la nöj. Nemene fe la hnëqa i Sara? Ka safëj eahlo, nge 75 hë lao macatre i eahlo. Maine jë eahlo a hnyinge ka hape, ‘Troa eatre tune kaa la hna thingehnaeane hnei Iehova, nge pë pe nekö i nyio?’ Meköti la aqane hnyinge i Sara pine laka, kolo hi a qeje eahlo, nge eahlo a trengeneune la ijine cili.

Maine jë hne së hna thel, ka hape, eu la troa eatr la itre hna thingehnaeane hnei Akötresie. Nyipici laka jole troa xomihni, tune la itre ewekë hne së hna trengeneune catrën. Nemene la ini hne së hna xome qa ngöne la tulu ne lapaune i Sara?

Kolo petre hi a bëeke la hnepe lapa qa Aigupito. (Genese 13:1-4) Hnei angatre hna acile la itre uma mano i angatr e Bethela, götrane hna hëne hnei angetre Kanana, ka hape, Luza. Öhne hi Sara la Nöje Hna Thingehnaean qa cili. Hetrenyi la itre traone i angetre Kanana, me itre gojenyi thatraqane la itre ka ihamë ngöne la itre nöj ka nanyi catr. Ngo ame pe, isapengöne catre la itre götrane cili memine lo nöje i Sara ekö. Hnei eahlo hna tru e Ure, ketre traone ne Mésopotamie, nge 1 900 km la enanyin. Hnei Sara hna nue la itre sinee i eahlo, me itre ewekë ka lolo ne la nöj, tune la itre hna maketr me itre setroa, me iumëtë, nge gaa hetre tim. Ngo maine easa mekune ka hape, ketre föe ka hleuhleu Sara, ke eahlo a mekune lo hnalapa ekö, ke thatre eahlo hnyawa kö hne së.

Hanawange la itre hna cinyihane hnei Paulo aposetolo thupene la 2 000 lao macatre. Hnei angeice hna qaja la lapaune i Sara me Aberahama, me hape, “Maine mekune angate la hlapa hnei angate hna tro qa ngön, maine ateine angate troa hmaca kow.” (Heberu 11:8, 11, 15) Tha hnei Sara kö me Aberahama hna piine lo mele i nyidroti ekö. Maine hnei nyidroti ju hna meku nyidroti hi me itre aja i nyidro, ke tro hë nyidroti a bëeke hmaca. Nge maine bëeke ju nyidroti a tro Ure, tha tro jë kö nyidroti a öhne lo hna thingehnaeane hnei Iehova. Ketre, tro ha thëthëhmi nyidroti hnene la itre atr, nge tha tro jë kö a nyitipune la tulu ne lapaune i nyidro hnene la itre atr ka ala nyim.

Tha hnei Sara kö hna xei hutrö, ngo hna goe pe qemeke i eahlo. Hnei eahlo pala hi hna catre sajuëne la  mekuna i Aberahama. Hna xatua nyidrëti troa feje me acile hmaca la itre uma mano ngöne la ketre götran. Ngo hetre itre jole ka traqa me saze la mele i nyidro. Hnei Iehova hna ahnyipixene la isisinyikeu i Nyidrëti me Aberahama, ngo tha hna qeje Sara pe!—Genese 13:14-17; 15:5-7.

Thupene lai, hnei Sara hna mekune troa pane ithanata me Aberahama, me fe la hni eahlo. Pane mekune jë la kola saze la iqëmeke i Sara, eahlo a pi treij me hape, “Musi Iehova la tha hnaho ni .” Hnei eahlo hna sipo Aberahama troa ce meköle me Hagara hlue i eahlo, matre hetre matra i nyidrë. Hace catre Sara la eahlo a sipone lai! Nyipici thatreine kö troa trotrohnine la sipo celë enehila, ngo ame pe hna majemine kuca lai ekö. Ijije hi tro la trahmanyi a ce hnaho memine la ketre föe, matre hetre matra i angeic. * Maine jë Sara a mekune troa eatrëne la aja i Iehova, ene la troa xulu qaathei Aberahama la ketre nöj. Mama hnyawa hi laka, ijiji eahlo hi troa kapa la mekune celë, ngacama jol. Nge tune kaa fe Aberahama? Hnei Aberahama ‘hna drenge thenge la aqane ewekë i Sara.’—Genese 16:1-3.

Hapeu hnei Iehova kö hna upi Sara troa upi Aberahama troa ce hnaho me Hagara? Ohea, sipu mekuna i eahlo kö lai. Hnei Sara hna mekun, ka hape, Akötresieti la qaane la itre jole i eahlo. Tha mekune kö eahlo ka hape, hetre ketre aqane tro Akötresieti a nyinyine la jole cili. Hace me jole la mele i eahlo. Ngo ame pe tha ka pi tru kö la aqane waiewekë i eahlo. Ame la itre atr ka mele ngöne la hneijine cili, tre, itre ka pi mama catr. Angatre a tro pane la sipu aja i angatr, nge pine pë hë itre xan. Ngo isapengö i Sara kö me angatr. Haawe maine tro sa amë panëne la itre aja i Iehova, nge pine pë hë la itre sipu aja së, easë hi lai a nyitipune la aqane lapaune i Sara.

Canga upune hi Hagara. Maine jë angeice a mekune ka hape, ka sisitria catre kö angeice hui Sara. Angeice hi lai a nyiqane methinë Sara, lo atre musinë angeic. Hace catre Sara! E cili hnei Sara hna ahmahmanyi Hagara. Pëkö hna kuca hnei Aberahama, nge ketre, ce Iehova me Sara. Hnahone pi hi Hagara la nekötrahmany, Isamaela la ëjen. (Genese 16:4-9, 16) Ame la kola tro fë la ketre maca qaathei Iehova, ke, 89 hë lao macatre i Sara, nge 99 lao macatre i Aberahama. Nemene jë la maca cili?

Hnei Iehova hna thingehnaeane hmaca koi Aberahama, ehnemu i Nyidrë, ka hape, tro ha mana la itre matra i nyidrë. Nge hnei Iehova hna saze la ëje i nyidrë. Hna majemine hë nyidrëti ekö ka hape, Aberama. Hnei Iehova hna saze la ëje i nyidrë, me hë nyidrëti pena ka hape, Aberahama, ke kolo lai a hape, “Keme ne la ka alanyim.” Ngo ame hë enehila, Iehova  a hane qeje Sara. Hnei Nyidrëti hna hane saze la ëje i eahlo, tha Sarai hmaca kö, ke, kolo lai a hape, iwesitrë. Hna hë eahlo pena ka hape, Sara, lo ëje hne së hna atre hnyawa. Nemene la aliene la ëje cili? “Isola!” Hnei Iehova hna qaja la kepin, matre Nyidrëti a hëne tune lai la föe hna hnim. Öni Nyidrëti ka hape: “Tro ni a amanathithinyi angeic, me hamë eö la nekö trahmanyi qa thei angeic ; nge tro ni a amanathithinyi angeic, nge tro angeic’ a thine ne la nöjei nöj ; nge troa qa thei angeice la ite joxu ne la nöjei nöj.”—Genese 17:5, 15, 16.

Ame lo isisinyikeu i Iehova, ke, troa axulune la ketre matran. Jëne la matrane cili, tro ha manathithi la nöjei nöj asë, nge troa eatre jëne la neköi Sara. Ame la ëje ne la nekönatre trahmanyi hnei Akötresie hna iën, ke, Isaaka, kolo lai a hape, “hnyima.” Ame la kola atre hnei Aberahama, la aja i Iehova troa amanathithi Sara, me aijijë eahlo troa hnaho, ke hnei nyidrëti “hna kei qe ipië, me hnyima.” (Genese 17:17) Aberahama e cili a hnyima me madrin. (Roma 4:19, 20) Nge tune kaa fe Sara?

Tha qea ju kö nge traqa pi hi la köni trahmanyi trenyiwa kowe la uma mano hna lapa ngön hnei Aberahama. Kolo ijine kola hedredrei, nge hnene la lue trefëne ka qatre hë hna canga ixelë me angatr me kepe angatr. Hnei Aberahama hna qaja koi Sara ka hape, “Lolojë troa xomi falawa ka loi köni sea, xupexupejë, me deu ite nene areto.” Ketre huliwa ka tru la troa hnimi trenyiwa ekö. Tha hnei Aberahama kö hna nue la föe i nyidrëti troa kuca casine la huliwa. Hnei nyidrëti hna canga nyinyape matre troa humuthe la ketre neköi kau me canga hnëkëne ej me itre xa xeni ju kö me nyine ij. (Genese 18:1-8) Ame la “itre trahmanyi” cili, tre, itre angela i Akötresieti hi! Maine jë hnei Paulo aposetolo hna mekune lai, lo angeice a cinyihane ka hape, “The thëthëhmine kö troa hnimi ite tenyiwa ; ke hnene lai hna kapa ite angela hnei ite xane nge tha ’te kö.” (Heberu 13:2) Hapeu ijiji së kö troa nyitipune la aqane ihnimi trenyiwa i Aberahama me Sara?

Ame la ketre angela a amexeje koi Aberahama la hna thingehnaeane hnei Iehova, laka tro Nyidrëti a aijijë Sara troa hnahone la ketre nekö trahmany, eahlo e tröne la uma mano, kola nango zae me dreng. Eahlo a mekune ka hape, qatre föe hë eahlo nge tha ijiji eahlo hmaca kö troa hnaho. Hnyima jë hi eahlo me hape, “Huni kö, tro ni a hetenyi la nyine amadin, nge qatë hë ni, nge kete qatë hë la joxung ?” Ngo hnene la angela hna wenë amekötine la mekuna i Sara, me hnyinge ka hape, “Hape u, hete ewekë hna tha ’teine hnei Iehova ?” Ngo kolo hi a mama e celë, ka hape, eahlo a xou me hmek. Ketre aqane mekuna i atr lai. Öni eahlo jë hi ka hape, “Tha qange kö hna hnyima!” Önine la angela e sa, “Ohe, hnei ’ö hna hnyima.”—Genese 18:9-15.

Hapeu pëkö lapaune i Sara la eahlo a hnyima? Ohea. Öni Tusi Hmitrötr, “Hnene la lapaune Sara fe a hete egöcate troa upune ame hna hnahonepi la nekönate hnei nyido nge qatë hë, ke hnei nyidoti hna mekune, laka nyipici nyidëti ate thinge hnaean.” (Heberu 11:11) Atre hnyawa hi Sara, laka, tro kö Iehova a eatrëne la hnei Nyidrëti hna qaja. Hapeu tha ajane kö së troa acatrene la lapaune së? Loi e tro sa catre thele troa atre hnyawa lo Akötresie ne la Tusi Hmitrötr. Tro sa ce wange laka, ijije Sara hi troa lapaun. Iehova, la Akötresieti ka nyipici, nge ka eatrëne la itre hna thingehnaean. Ketre ijiji Nyidrëti hi troa asesëkötrë së maine amadrinëne la hni së!

Ame la kola 90 lao macatre i Sara, ke, kolo hi a kapa la aja i eahlo. Ka tru catre ngöne la mele i eahlo, pine laka ketre ijine lai hna lapa treqen. Hnei eahlo hna lapa fë la nekö i Aberahama, nge ca hadredre macatre i nyidrëti hë! Hnei Aberahama hna hëne la medreng, ka hape, Isaaka, kola hape, “hnyima” tune lo hna qaja hnei Akötresie. Pane mekune jë së la Sara a hnyima nge kucakuca catre eahlo, ngo tru la madrine i eahlo. Öni eahlo jë hi ka hape, “Hnei Akötesieti hna ahnyima ni, nge tro angat’ asë angete deng’ a ce hnyima me ini.” (Genese 21:6) Ketre ahnahna lai ka tru qaathei Iehova, ka amadrinëne la hni eahlo uti hë la eahlo a mec. Ngo ame pe, hnëqa ka tru lai.

 Ame la kola faifi lao macatre i Isaaka, hnene la hnepe lapa i nyën hna kuca la ketre pui ne xeni ka tru, ke ase hë triji thi nyën. Ngo hetre ewekë ka traqa. Kola qaja e celë ka hape, kola “öhne” thei Sara la ketre aqane ujë ka ketrepengön. Ame Isamaela, lo neköi Hagara ka 19 lao macatre, ke hnei angeice hna hnyimasai Isaaka. Ngo ngazo pala ha la aqane hnyimasai Isaaka hnei Isamaela. Ame thupen, hnei Paulo aposetolo hna hën la aqane ujë i Isamaela, ka hape, aqane ujë ne ka icilekeu. Nge tha hnei Sara kö hna wangacone lai. Ame koi eahlo ke, troa hetre ethane lai kowe la nekö i eahlo. Atre hnyawa hi eahlo ka hape, ka tru la hnëqa i Isaaka. Hnei Iehova hna athipe koi Isaaka la ketre hnëqa ka tru. Celë hi matre hnei eahlo hna triji xoue me tro meköti troa wai Aberahama. Hnei eahlo hna sipo Aberahama troa helë Hagara me Isamaela.—Genese 218-10; Galatia 4:22, 23, 29.

Nemene la aqane sa Aberahama? Kola hape, “Aköte atraqate Aberahama ngöne la ewekë cili göi nekö i nyidë.” Hnimi Isamaela catre hnei Aberahama nge jole koi nyidrëti troa axecië mekun. Ngo mama cile hnyawa koi Iehova la aqane nyinyine la jole cili, matre hnei Nyidrëti hna kuca la ketre ewekë. Kola qaja ka hape, “Ame hnei Akötesieti hna ulatine koi Aberahama, ka hape, The aköte kö eö pine la nekönat, memine la föe hna itöne hnei ’ö ; ngo cengöne denge thenge ju la hna qaja koi ’ö hnei Sara ; ke tro ha qaja la matra i ’ö qa thei Isaaka.” Hnei Iehova hna qaja koi Aberahama ka hape, tro kö Nyidrëti a thupë Hagara me Isamaela. Hnei Aberahama hna catre lapaune koi Iehova me kapa la mekun.—Genese 21:11-14.

Ka mele nyipici Sara koi Aberahama, nge ka ixatua eahlo. Ketre tha hnei eahlo kö hna qaja la itre hna pi dreng hnei Aberahama. Ame la Sara a öhne laka hetre jole ka ketr la hnepe lapa i eahlo me kowe la itre drai elany, ke, hnei eahlo hna canga ithanatane me qaja mekötine kowe la föi eahlo. Tha aqane ujë ne ka pë metrötre kö. Ka faipoipo fe Peteru aposetolo. Hnei nyidrëti hna qeje Sara, ketre tulu ka lolo kowe la itre föe, ke hnei eahlo hna metrötrë Aberahama. (1 Korinito 9:5; 1 Peteru 3:5, 6) Maine tha canga qaja ju Sara koi Aberahama la mekuna i eahlo, pëkö metrötre i eahlo. Ka loi la mekuna i eahlo ke, hetre eloine koi Aberahama me kowe la hnepe lapa. Hnei Sara hna qaja la mekuna i eahlo cememine la ihnim.

Nyimutre la itre föe ka xome la tulu i Sara. Angatre a xome la aqane ithanata i eahlo ka pë thoi ngön, me ka metrötr. Ame la itre xa föe, ke angatr fe a ajane tro Iehova a kapa la itre mekuna i angatr, tui Sara. Ngo ame pe, angatr a xomi ini qa ngöne la aqane lapaune i Sara, me aqane ihnim, me aqane xomihni eahlo.

Ngacama hnei Iehova hna hë Sara, ka hape, “Isola,” ngo tha hnei eahlo kö hna thele troa nyi isola. Tha sesëkötre kö së la Aberahama a “teije latesi pi Sara,” * ngöne lo eahlo a mec nge 127 lao macatre. (Genese 23:1, 2) Hleuhleu catre nyidrëti la kola meci la “Isola,” hnimina i nyidrë. Ketre tui Iehova, tru la hnei Nyidrëti hna meku Sara, ketre föe ka mele nyipici. Tha tro jë kö Nyidrëti a thëthëhmi eahlo. Nyidrëti a troa amele eahlo hmaca elany, ngöne la paradraiso e celë fen. Mele ka tha ase palua kö me mele ka madrin, la hna treqene hnei Sara me itre ka xötrethenge la aqane catre lapaune i eahlo.—Ioane 5:28, 29.