“Ame la nöjei ahnahna ka loi asë, memine la ite hna hamëne gufane ka lolo asë, te, qa koho thene la Tetetro ine la lai.” (Iakobo 1:17) Kola qejepengöne hnene la xötre celë, la aqane hame i Iehova Akötresie, Tretretro së e koho hnengödrai. Hnei Nyidrëti hna hamëne la ketre ahnahna ka sisitria catre kö hune la itre xan. Nemene la ahnahna cili? Kola sa hnei Iesu ngöne Ioane 3:16, ka hape: “Hnei Akötesieti hna hnime la fene hnengödrai, mate nyidëti a hamëne la Nekö i nyidëti ka cas, mate tha tro kö a meci la kete e angete lapaune koi nyidë, ngo tro ha hetenyi la mele ka tha ase palua kö.”

Haawe mele ne la Neköi Akötresieti hi la ahnahna ka sisitria catre koi së, pine laka eje la ka thepe së qa ngöne la ngazo me mec, me kuca matre tha tro hmaca kö sa qatr. (Salamo 51:5; Ioane 8:34) Maine tha hnimi së ju hnei Akötresie, kuca ju hë së la nöjei ewekë, ngo thatreine kö ketre troa thepe së qa ngöne lai. Hnei Iehova hna upi Iesu Keriso lo Neköi Nyidrëti ka cas, matre nyine thupene mel kowe la itre atr ka drengethenge Nyidrë. Ngo nemene la thupene mel? Nemene la enyipiewekëne ej? Nge nemene la thangane ej koi së?

Ame la ewekë hna aluzin, memine la mele ne la atr hna akalabusin, ke, ka hetre thupen. Tusi Hmitrötr a qaja ka hape, hna xupi Adamu me Eva lo lue pane kem me thine së ekö a lue atr ka pexej, nge tro nyidro me itre neköi nyidro a mele epine palua ngöne la paradraiso e celë fen. (Genese 1:26-28) Ngo pine la tha idrei nyidro, luzi hë lo mele ka loi nge lue atr ka ngazo hë nyidro. Nemene hë la pune lai? Tusi Hmitrötr a sa ka hape: “Traqa ha la ngazo kowe la fene hnengödrai hnene la ate ka cas, nge meci fe pine la ngazo ; tune lai hna traqa la meci kowe la nöjei ate asë, ke ngazo asë hë .” (Roma 5:12) Qa ngöne lai, tha mele ka pexeje hmaca kö la edrö kowe la itre matra i Adamu, ngo ngazo pë hë me mec.

E cili, loi e troa thele la thupene mel ka ihmeku memine lai mele hna aluzin. Pine laka hnei Adamu hna tha drei Akötresie me kuca la ngazo xajawa i Nyidrë, haawe, luzi hë lo mele i angeic ka pexej. Celë hi matre ngazo me mec pë hë la ka musi kowe la itre matra i angeic. Qa ngöne lai, nyipiewekë troa nyithupene mel hnei Iesu ketre atr ka pexej, matre thepe së qa ngöne la ngazo. (Roma 5:19; Efeso 1:7) Ihnimi Akötresieti hi la ka upi Nyidrëti troa hamëne la thupene mel, matre hane aijijë së troa mele ngöne lo paradraiso hna aluzine ekö hnei Adamu me Eva.—Hna Amamane 21:3-5.

Nyipici, ahnahna ka sisitria catre kö la thupene mel hna hamëne hnei Akötresie ke, jëne ej ijije hi tro sa mel epine palua. Ketre eje fe a trongëne lo foa lao mekune hne së hna wange hë ngöne lo tane mekune hnapan.

Aja së. Aja i nöjei atr asë hi troa mel epine palua. (Ate Cainöj 3:11) Nge tro ha eje la aja i angatr, jëne la thupene mel. Öni Tusi Hmitrötr, “Ame la thupene la ngazo, te, mec ; ngo ame la ahnahna i Akötesie,  te, mele ka tha ase palua kö göi Iesu Keriso Joxu shë.”—Roma 6:23.

Enyipiewekëne koi së. Tha ijiji ketre kö troa hamëne la thupene mel, ke öni Tusi Hmitrötr, ka hape: “Tru alamekene la thupene la u i angat, nge tha ’teine kö epine palua .” (Salamo 49:8) Celë hi matre, loi e tro sa thele ixatua thei Akötresie, ke Nyidrëti hmekuje hi la ka atreine troa thepe së qa ngöne la ngazo me mec. Ame la ka aijijë Nyidrëti troa thepe së, tre, ene la “hna itö mele hnei Keriso Iesu .”—Roma 3:23, 24.

Nyipi ijin. Tusi Hmitrötr a qaja ka hape: “Hna elelengë Keriso nyine hna i eëshë, nge ite ka ngazo pete kö shë.” (Roma 5:8) Kola mama e celë la etrune la ihnimi Akötresieti koi së, ke, “ite ka ngazo pete kö shë,” ngo ase hë Nyidrëti hamëne la thupene mel. Celë hi lai matre xomi akötrëne ju hë së la itre thangane la ngazo ngo hetre mejiune së hë.

Nyipi kepin. Kola mama la kepin matre Akötresieti a huujëne la mele ne la Neköi Nyidrë, ngöne la lue xötre celë, kola hape: “Mamapi hi la ihnimi Akötesieti koi shë, ke hnei Akötesie hna upe kowe la fene hnengödrai la Hupuna i nyidëti ka cas, mate melepi shë hnei nyidë. Dei lola ihnim, ka hape ; tha hne shë kö hna aja Akötesie, ngo hnei nyidëti hna hnimi shë.”—1 Ioane 4:9, 10.

Haawe tro epuni a amamane tune kaa la hni ne ole i epun, kowe la ahnahna ka sisitria catre celë? Öni Iesu ngöne Ioane 3:16, ka hape, itre ka “lapaune” koi nyidrëti hmekuje hi la ka troa hetrenyi la mel. Nge kolo fe a qaja ngöne la ketre xötr ne la Tusi Hmitrötr, ka hape, ame la atr lapaun, tre, angeic a “lapa qale kowe la nöjei ewekë hna mejiune kow.” (Heberu 11:1) Maine aja së troa catre lapaun, nyipiewekë tro sa hetrenyi la nyipi wangatrehmekun. Celë hi kepine matre, eahuni a ithuecatre koi nyipunie troa hane xomi ijine troa atrepengöi Iehova Akötresieti hnyawa, lo Atre Hamë “ahnahna ka loi.” Hane jë isine troa hetrenyi la mele ka tha ase palua kö, hna treqene hnene la itre ka lapaune kowe la mele hna huujëne hnei Iesu.

Ijije hi tro epuni a kapa la itre xa ithuemacany, ngöne la site www.pr418.com. Madrine catre la Itretre Anyipici Iehova troa xatua epun. Xecie koi huni laka, maine tro epuni a inine me kepe thangane qa ngöne la ahnahna celë ka sisitria catr, tro hë epuni a qaja ka hape: “Ini a ole koi Akötesie jëne Iesu Keriso Joxu shë!”—Roma 7:25.