Nyipici laka tha ka hmaloi kö troa thele la ahnahna, ka troa amadrinëne la ketre atr. Ketre tro kö a mama thei angeic, ka hape, angeice a nyipiewekën maine wangacone lai ahnahna, ke isapengöne kö la aqane goeëne la itre atr la ahnahna.

Ka tune la thöth, maine troa thue mobilisi angeic maine tablet ka hnyipixe, tro hë angeice lai a thupëne hnyawan. Ame pena la ka tru, maine jë tro angeice a kapa madrine la ketre ahnahna qaathene la qaaqa i angeic. Ame ngöne la itre xa nöj, tre, ame la ahnahna ka tru kowe la itre atr ke, manie, pine laka kola aijijë angatr troa kuca la hnei angatr hna ajan.

Eje hi laka tha huliwa ka co kö troa thele ahnahna, ngo ame pe tro lai atr a isin, matre öhne jë la aja ne lai atr hnei angeice hna hnim. Nyipici laka jole troa canga öhne la ahnahna, ngo ijije hi tro sa lapa mekune la itre ewekë ka troa xatua së troa iëne hnyawa. Tro sa ce wange la foa lao aqane troa kuca, matre troa amadrinëne la hni ne lai atr ka kapa.

Aja ne lai atr. Önine la ketre trahmanyi e Belfast, götrane kolopi e Ireland, ka hape, ame la ahnahna ka sisitria catr hnei nyidrëti hna kapa tre, kolo velo hna hamë nyidrë lo nyidrëti petre kö a 10 maine 11 lao macatre. Pine nemen? Öni nyidrë, “Pine laka eje hi lo lai hnenge hna ajane catrën.” Eje hi, ame la ka nyipiewekë, tre, ene la troa pane atre la hna ajane hnene la atr. Pane mekune jë la atr hnei epuni hna mekune troa nyi ahnahna kow. Thele jë la itre hnei angeice hna wangatrun, pine laka itre ewekë lai hnei angeice hna ajan. Ka tune la lue trefëne ka qatre hë, atre hi së laka madrine catre nyidro troa ce memine la itre nekö i nyidro me itre api nyidro. Nge tro nyidroti lai a isine troa iöhnyi lapa me angatr. Haawe pëkö ahnahna ka sisitria catr, hune la troa cememine la itre neköi nyidro me itre api nyidro ngöne la itre ijine mano.

Maine easa pi atre la hna ajane catrëne hnene la ketre atr, ke loi e tro sa drenge hnyawa la angeic a ithanata. Celë hi lai hna ithuecatre koi së hnei Tusi Hmitrötr, lo kola hape, loi e troa “canga deng, me  hnöthe troa ewekë.” (Iakobo 1:19) Haawe, ame la easa porotrik e nöjei drai memine la sinee së, ke, loi e tro sa drei angeic hnyawa. Celë hi ka troa aijijë së troa atre la itre hnei angeic hna ajan, maine hna xelene pena. Nge e cili, ijiji së hë troa nyi ahnahna koi angeic.

Ka nyipiewekë. Ngacama ka co ju hë maine ka co thupene la ahnahna, ngo e ka nyipiewekë kowe lai atr, haawe tro hë angeice lai a wangatrune ej. Ngo tro sa atre tune kaa la ka nyipiewekë koi angeic?

Nyipici laka ame göi itre xa ewekë, tro së lai a canga hnyingë angeic. Ngo ame göi nyi ahnahna, ke tha tro kö së lai a hnyingëne mekötin, wanga mekuhni jë nge tha madrine pi angeic elany. Ketre, ngacama tro hi së lai a canga atre la itre ewekë hnei angeic hna ajan maine hna xelen, ngo ma thatre pë së la ka nyipiewekë koi angeic.

Haawe loi e tro sa goeëne hnyawa me thele troa atrepengöne lai atr. Isapengöne kö la aqane tro sa nyi ahnahna kowe la thöth memine la qatr, me ka faipoipo me ka tha faipoipo kö, me ka sei hna cil, me ka sine föe, me ka huliwa me ka retraite. Maine easa ajane troa nyi ahnahna ke, pane mekune ju së la itre ka nyipiewekë kowe lai atr.

Ketre maine easa ajane troa nyi ahnahna koi ketre, ke loi e tro sa sipo ixatua koi itre xan. Tro hë angatre lai a qaja koi së la ka ijij me ka nyipewekë troa xom, nge ma hna thatre hnei itre xan. Nge aqane tro hi së lai a iëne la ahnahna ka nyipiewekë, nge ka isapengöne kö me itre xan.

Ijin. Kola qaja hnei Tusi Hmitrötr, ka hape: “Ame la tenge ewekë ngöne la ijin’ eje, te, nyipi loi!” (Ite Edomë 15:23) Haawe, hetre thangane catr troa qaja la itre trengewekë ngöne la nyipi ijin, nge ketre tune fe la itre hne së hna kuca. Ceitune hi la ahnahna memine la ithanata ka lolo. Maine troa hamëne ngöne la nyipi ijin, tro hë lai a amadrinëne la hni ne la atr ka kapa.

Tru catre la itre ijine ne nyi ahnahna. Tune la itre ijine faipoipo i ketre, kola tro koi uma ne ini ka tru hnei ketre, kola troa mala la neköne la lue trefën. Celë hi matre hune la idrai, itre xan a canga sija ju la itre drai cili. Aqane kuca hi lai, matre troa canga hnëkëne la ahnahna thatraqane la ijine cili. *

Tha tro kö sa nyi ahnahna hmekuje hi ngöne lo itre ijine feet. Hetre itre xa ijine kö. Ngo ca ewekë nyine tro sa thupën. Hanawange la ketre ceitun. Maine kola nyi ahnahna hnene la ketre trahmanyi kowe la ketre föe, ngo pëkö kepin, ke tro hë lai föe a mekune ka hape, kolo hi lai a pi iatre me angeic. Maine tha celë kö lai mekuna i trahmany, tre, ijije hi tro lai föe a mekune menune koilo, nge jole koi nyidro. Celë hi matre nyipiewekë troa sa ce wange la itre kepin, matre kola nyi ahnahna.

Kepin. Tune lo hne së hna wange ngöne lo ceitun, loi e tro sa thupën, wanga meku hni menu së jë hnene la aqane nyi ahnahna së. Celë hi matre nyipiewekë tro la atr ka nyi ahnahna a pane mekune la kepin, matre angeice a kuca lai. Qaja ju hë itre xan, ka hape, angatr a nyi ahnahna e nöjei macatre hnene la hni angatr ka ajan. Ngo ame pe, angatr a kuca pine laka hna goeë itre xan. Nge the qaja kö lo itre xan ka nyi ahnahna göi thupen.

Tro sa atre tune kaa ka hape, ka loi hi la aqane nyi ahnahna së? Öni Tusi Hmitrötr, ka hape: “Kucajë la nöjei ewekë asë i nyipunie ngöne la ihnim.” (1 Korinito 16:14) Eje hi laka maine ihnimi la ka upi së troa nyi ahnahna, ke tro hë lai a canga öhne hnene lai atr ka kapa, me amadrinë angeic. Nge ketre tui easë, tro fe hë sa hane madrin. Ame la ewekë hna kuca qa kuhu hni, tre, kolo hi lai amadrinëne la hni ne la Tretretro së. Hnei Paulo aposetolo hna qaja aloine la itre Keresiano ne  Korinito, pine la aqane ham me aqane xatuane angatr la itre Keresiano ne Iuda. Öni Paulo koi angatr, ka hape, “Aja i Akötesie la ate hamëne madin.”—2 Korinito 9:7.

Haawe maine tro sa trongëne la itre mekune hna qaja e caha hun, tro hë së lai a hamëne la itre ahnahna ka troa amadrinë itre xan. Aqane kuca i Akötresieti hi lai, matre tro la nöjei atr a kapa la ahnahna ka sisitria catr. Tro kö lai tane mekune thupen a qejepengöne koi epun.