“Ate Hë Ni Laka Tro Angeic’ a Mele Hmaca”
“Mekölë hë . . . [la] sine shë ; ngo ini a tro troa ahlë angeice jë qa hna meköl.”—IOANE 11:11.
1. Nemene la ewekë ka ej e kuhu hni Maretha göne la xa i angeic? (Wange ju la pane iatr.)
KOLA hace la hni Maretha, ketre sinee me atre drei Iesu, ke meci hë Lazaro, xa i angeic. Hapeu, hetre ewekë kö ka troa aupunyi angeic? Eje hi. Hnei Iesu hna sisinyi me qaja koi angeic ka hape: “Tro ha mele hmaca la xa i nyipo.” Ngacama tha patre kö la hleuhleu thei angeic, ngo ka mejiune hnyawa Maretha kowe la hna qaja hnei Iesu. Öni angeic: “Ate hë ni laka tro angeic’ a mele hmaca ngöne la ijine melehmaca, ngöne la drai hnapin.” (Ioane 11:20-24) Xecie hnyawa koi angeic laka, tro ha mele hmaca la itre atr elany. Thupene lai, hnei Iesu hna kuca la ketre iamamanyikeu. Hnei nyidrëti hna amele Lazaro ngöne ju kö la drai cili.
2. Pine nemene matre hetre aja i epun troa mejiune tui Maretha?
2 Tha tro kö sa mekune ka hape, tro Iesu maine Keme i nyidrë a amelene hmaca enehila la atr hne së hna hnim. Ngo, ka xecie kö koi epun tui Maretha laka, troa amelene hmaca elanyi
la atr hnei epuni hna hnim? Maine jë, hna mecitriji epun hnene la föi epun, maine thin, maine kem, maine qaqa hmunë, maine nekö i epun. Easa lapa treqene la ijine tro sa haluthi angatr hmaca, me ithanata, me ihnyima me angatr. Matre tro fe sa madrin troa qaja, tui Maretha ka hape: ‘Atre hi ni laka, troa mele hmaca la atr hnenge hna hnim.’ Ngo, loi e tro sa isa thel la itre kepin matre xecie hnyawa lai koi së.3, 4. Drei lo hnei Iesu hna amelene hmaca ekö, nge nemene la aqane acatrene la mejiune i Maretha?
3 Ka mele Maretha ezine la traon e Ierusalema, matre tha öhne kö angeic la Iesu a amelene hmaca lo neköne la sine föe ne Naina e Galilaia. Hnei angeice pe hna hane drei mejen. Maine jë, hnei angeic hna drei mejene fe lo kola amelene la nekö i Iairo hnei Iesu. Hnei nyidrëti hna xepi nyën, me hape: “Jajiny ! Cilejë.” Ame hna mele hmaca lo nekönatr. Ngo atre asë hi la itre atrene la hnalapa laka, “meci hë nyën.” (Luka 7:11-17; 8:41, 42, 49-55) Tha luelue kö Maretha me Maria, trejin me angeic laka, pëkö ejolene koi Iesu troa nyinyine la itre mec. Matre, ame koi nyidro, maine ce Iesu ju me angatr, tha tro kö Lazaro a mec. Ngo, meci hë Lazaro, matre nemene pe hi la hnei Maretha hna lapa treqen? Öni angeic, tro Lazaro a mele hmaca elany, “ngöne la drai hnapin.” Pine nemene matre tha luelue kö angeic? Nge, nemene la kepine matre xecie fe koi epun laka, troa mele hmaca la itre atr ka mec, ene mina fe la atr hnei epuni hna hnim?
4 Nyimu kepine ka anyipicine laka, loi e tro sa mejiune kowe la melehmaca. Tro sa ce wange la itre xa kepin. Tro ha mama koi epuni la itre xa mekun e hnine la Wesi Ula i Akötresie, itre mekun ka tha mama kö koi epuni ekö. Tro lai a acatrene la lapaune i epun laka, tro hë epuni a öhne hmaca la atr hnei epuni hna hnim.
MELEHMACA—KOLA THUE MEJIUNE SË!
5. Pine nemene matre ka mejiune hnyawa Maretha laka, troa amele Lazaro hmaca?
5 Tha hnei Maretha kö hna qaja ka hape: ‘Eni a ajan troa mele hmaca la xang.’ Öni angeic: “Ate hë ni laka tro angeic’ a mele hmaca ngöne la ijine mele hmaca, ngöne la drai hnapin.” Pine nemene matre ka mejiune hnyawa Maretha kowe lai? Pine laka, hetre atre hë ekö hna amelene hmaca. Ini lai hnei angeic hna kapa lo co petre kö angeic, qaathene la keme me thine i angeic, me ngöne la hnë hmi. Tro sa ce ithanatane la köni melehmaca hna amexeje hnei Tusi Hmitrötr.
6. Nemene la iamamanyikeu hna atre hnyawa hnei Maretha?
6 Hna traqa lo pane melehmaca lo ijine Akötresie a aijijë Elia troa kuca la itre iamamanyikeu. Ame e Sarepeta, ketre traon i angetre Sidona, hnene la ketre sine föe ka pë ewekë hna kepe Elia ngöne la hnalapa i nyiidro. Hnei Iehova hna kuca la ketre iamamanyikeu. Hnei Nyidrëti hna thupëne matre tro palahi a hetre falawa me oele i nyiidro. Celë hi ka amele nyiidro me nekö i nyiidro. Thupene lai, hna wezipo hnene la nekönatr, me mec. (1 Ite Joxu 17:8-18) Ame hnei Elia hna xatuane la sine föe. Hnei nyidrëti hna xepe la nekönatr, me thithi koi Iehova ka hape: “Akötresieng, epi ahmacane ju la mele ne la nekönatre ce.” Nge celë hi ka traqa! Hnei Akötresieti hna kapa la sipo i Elia, ame hna mele hmaca la nekönatr. (E jë la 1 Ite Joxu 17:19-22, MN.) * (Wange ju la ithuemacany.) Celë hi pane melehmaca hna qaja hnei Tusi Hmitrötr. Atre hnyawa hi Maretha la hna melëne cili.
7, 8. (a) Nemene la aqane akeukawane Elisaia la ketre thin ka akötr? (b) Jëne la iamamanyikeu, nemene la ka mama göi Iehova?
7 Ame lo hnaaluene melehmaca hna qaja e hnine la Tusi Hmitrötr tre, hna kuca hnei Elisaia perofeta. Hetrenyi la ketre föe ne Isaraela ka pë nekön ngöne la traon e Sunema. Hnei nyiidro hna majemine kepe Elisaia, ame hnei Iehova hna aijijë nyiidro me föi nyiidro ka qatre hë troa hetre nekönatr. Ngo, ame hë e thupen, hna mec la nekönatr. Pane mekune jë la akötr ka ej thene la thin! Tru palaha la hace i nyiidro, ame hnei nyiidro hna trongëne la 30 lao kilomet matre troa thei Elisaia ngöne la wetre Karemela. Hnei Elisaia hna upi Gehazi troa tro pa Sunema eë matre troa amelene la nekönatr, ngo tha mele ju kö nyën. Hna traqa pë hë e thupene hnei Elisaia memine la thine ne la nekönatr.—2 Ite Joxu 4:8-31.
Akötresie a amamane laka, atreine hi Nyidrë amelene hmaca la itre ka mec
8 Ame la kola traqa hnei Elisaia kowe la hnalapa, hnei nyidrëti hna thith. Nge, hnei Iehova hna kapa la thithi Elisaia, me amelene hmaca la nekönatr. Atraqatre la madrine ne la föe la kola öhne la nekönatr a mele hmaca ha! (E jë la 2 Ite joxu 4:32-37.) Hnei nyiidro hna mekune hmaca lo thithi Hana. Pëkö nekö i Hana, ngo hnei Iehova hna hamë angeice la nekönatr, ene Samuela. Thupene lai, hnei Hana hna atrunyi Iehova, Atre “autinge hedis [maine, hua] eë, me adraiëne hmaca.” (1 Samuela 2:6) Jëne la hna amelene hmaca la nekö ne la föe ne Sunema, Akötresieti lai a amamane ka hape, ijiji Nyidrë troa amelene hmaca la itre atr ka mec.
9. Qejepengöne jë la hnaakönine melehmaca hna qaja e hnine la Tusi Hmitrötr.
9 Ame la hnaakönine melehmaca tre, hna traqa fe jëne Elisaia. Hnei nyidrëti hna perofeta i Iehova koi 50 lao macatre, nge “hna tithi [nyidrë] hnene la meci,” ame hna meci pi nyidrë. Nyimu macatre thupene lai, hna traqa la itre ithupëjia ngöne la nöj. Nge, ame ngöne la ijine cili, kola troa keleme la ketre atr. Hnene la angetre Isaraela hna thel troa kötr, matre angatre pë hë a kuiëne pi pe lai ka mec e hnine la hua i Elisaia laka, trepe june pe hi. Öni Tusi Hmitrötr: “Eatë hë la wezipo [ene la ka mec] me kete la trawa june i Elisaia, nyën’ a melejë me cil.” (2 Ite Joxu 13:14, 20, 21) Haawe, mama hnyawa hi koi Maretha ka hape, hetre mene i Akötresie troa amelene hmaca la itre atr ka mec. Tro fe a xecie koi epun laka, ka tru la mene i Akötresie.
MELEHMACA—IJINE I ANGE APOSETOLO
10. Nemene la hna kuca hnei Peteru?
10 Kolo fe a mama ngöne la Itre Hna Cinyihane Qene Heleni la itre hna amelene hmaca hnene la itre hlue i Iehova ekö. Kolo fe a qaja lo ijine Iesu a amelene hmaca lo lue atr, ngöne la traone Naina me thei Iairo. Thupene lai, hnei Peteru aposetolo hna amele Doreka hmaca, hna hëne fe ka hape, Tabitha. Hnei Peteru hna lö kowe la hnahag ne la ka mec, me thith, me hape: “Tabitha fe, cilejë!” Ame hnei angeic hna mejë, nge Peteru a nue angeice pi kowe la itre xa keresiano ka traqa. Hna ketr la itre atr ngöne la traon matre “ala nyimu angete hane lapaune koi Joxu.” Hnei angatre pë hë e thupen hna hane ce thawa la maca ka loi göi Iesu, me qaja kowe la itre atr asë ka hape, hetre mene i Akötresie troa amelene la itre ka mec.—Ite Huliwa 9:36-42.
11. Nemene la aqane qejepengöne Luka la kola amelene hmaca la ketre thöth, nge nemene la thangane lai kowe la itre xan?
11 Hetre atr hna amelen hmaca, nge hna öhn hnei itre xan. Ame ngöne la ketre ijin, Paulo aposetolo a cile fë cainöj ngöne la ketre hnahag e Troas, kolo götrane kolopi ne Turquie enehila. Hnei Paulo hna ithanata utihë la nyipine la jidr. Nge, kola të hune la mamalama hnei Eutiko, ketre thöth, me drenge la cainöj. Kolo ha fefenedrem hnei angeic, ame hnei angeic hna kei qa ngöne la hnahag hnaakönin. Maine jë, Luka la atr ka pane traqa troa wai Eutiko ke, droketre angeic. Luka a öhne e cili laka, pëkö eatre i angeic, ngo tha enije hë. Meci hë angeic! Paulo fe a ut me haluthi Eutiko, nge thupene lai, öni Paulo: “Eje kö la mele e kuhu hni angeic.” Hnene la itre atr ka öhne la ewekë ka traqa hna haine la iamamanyikeu cili. Mama hnyawa hi koi angatr laka, hna amele Eutiko hmaca, ame “hnei angate hna madin’ atraqat.”—Ite Huliwa 20:7-12.
KETRE MEJIUNE KA CATR
12, 13. Thenge la itre hna amelene hmaca ekö, nemene la itre hnying hna amejën?
12 Tro la itre hna melëne e caha a thue
mejiune së tui Maretha. Kola qaja la mejiune ka ej the së laka, tro Akötresie, Qeqe ne la mel, a amelene hmaca la itre atr ka mec. Ame ngöne la ijine Iehova a aijijëne la itre iamamanyikeu, tune la melehmaca tre, hetrenyi e cili la itre hlue i Iehova, ene Elisaia, me Iesu, me Peteru. Matre, tune kaa lo itre ka mec, ngöne la itre xa ijine kö? Hnene kö la itre hlue i Akötresie hna mejiune kowe la melehmaca elany? Hnei angatre kö hna mejiun tui Maretha me hape: “Ate hë ni laka tro angeic’ a mele hmaca ngöne la ijine mele hmaca, ngöne la drai hnapin”? Pine nemene matre ka catre la mejiune i Maretha, nge tune kaa fe epun?13 Kola mama jëne la itre xa hna melën e hnine la Wesi Ula i Akötresie laka, hetre hlue i Nyidrëti ekö ka mejiune kowe la melehmaca. Tro sa ce ithanatane la itre xan e angatr.
14. Nemene la hne së hna inine göi Aberahama?
14 Pane mekune jë la ewekë hnei Iehova hna upi Aberahama troa kuca. Öni Iehova: “Xomejë la nekö i ’ö, nekö i ’ö ka cas, ene Isaaka hnimina i ’ö, nge tro fë jë kowe la nöje Moria ; nge hujë nyëne jë e cili nyine huje ne deuth.” (Genese 22:2) Nemene la pengöi Aberahama la kola drenge lai? Hnei Iehova lo hna sisinyi koi angeic ka hape, troa nöje atraqatre la matra i angeic, nge troa amanathithi angatr. (Genese 13:14-16; 18:18; Roma 4:17, 18) Ketre, troa traqa la matran “qa thei Isaaka.” (Genese 21:12) Ngo, hapeu, tro kö lai a eatr e huujë Isaaka jë hnei Aberahama? Öni Paulo, ka mejiune Aberahama laka, atreine Akötresie amele Isaaka hmaca qa hna mec. (E jë la Heberu 11:17-19.) Tha hnei Aberahama pi kö hna mekun ka hape, e tro angeic a drei Iehova, tro Nyidrëti a amele Isaaka ngöne la itre hawa, maine itre drai, maine itre wiik thupen. Thatre kö Aberahama la ijine troa amelene hmaca la nekö i angeic. Ngo, ame la ka xecie koi angeic tre, ene la tro Iehova a amele Isaaka hmaca.
15. Nemene la mejiune i Iobu?
Iobu 14:7-12; 19:25-27) E troa meci la atr, thatreine kö angeice troa sipu amele angeice kö. (2 Samuela 12:23; Salamo 89:48) Ngo, tha kolo kö lai a qaja ka hape, thatreine kö Akötresie amelene hmaca la atr. Mejiune hnyawa Iobu laka, hetre ijine tro Iehova a amele angeic hmaca. (E jë la Iobu 14: 13-15, MN) * (Wange ju la ithuemacany.) Nyipici laka, thatre kö Iobu la ijine troa amelene hmaca la itre atr. Ngo xecie hnyawa koi angeic laka, tro la Atrekë Ewekëne La Mel a meku angeic, me amele angeice hmaca.
15 Ka mejiune fe Iobu kowe la melehmaca elany. Atre hi angeic laka, e troa sa la ketre sinöe, tro hmaca eje lai a cia, me nyi ketre sinöe ka hnyipixe. Ngo, tha celë kö pengöne la atr. (16. Nemene la aqane thuecatre i Daniela hnene la angela?
16 Pane mekune jë la pengöi Daniela. Hnei angeic hna nyihlue i Iehova ngöne la mele i angeic, nge hnei Iehova hna xatua angeic. Hnene la ketre angela hna hë Daniela ka hape “ate hna hanyin” me qaja ka hape, “tingetingeju eö,” nge “catejë.”—Daniela 9:22, 23; 10:11, 18, 19
17, 18. Nemene la hnei Iehova hna sisinyi koi Daniela?
17 Ame lo kola 100 lao macatre i angeic, nge easenyi hë tro angeic a mec, angeic a hnehengazone la pengöi i angeic elany. Daniela kö a mejiune laka, troa amele angeice hmaca? Eje hi! Öni Akötresie koi angeic ngöne la pune la tusi angeic ka hape: “Trojë eö uti hë la pun ; ke tro eö a mano.” (Daniela 12:13) Atre hë angeic laka, ame la itre ka mec, angatr a mano, nge “pëkö . . . wangate hmekun, me inamacan, ngöne la hua.” (Ate Cainöj 9:10) Ngo, tha celë kö la pun koi Daniela. Hnei Iehova hna hamë angeic la ketre mejiun ka lolo catr.
18 Önine la angela i Iehova koi angeic: “Tro eö a . . . cile ngöne la edö i ’ö e tixenuë hë la ite drai.” Thatre kö Daniela la ewekë ka troa traqa. Ngo, ame la hnei angeic hna atre, tro angeic a mec, me mano. Ngo, ame la Akötresie a qaja ka hape, “Tro eö a . . . cile ngöne la edö i ’ö,” kola anyipicine koi Daniela laka, troa amele angeice hmaca elany. Tro lai a eatr, “e tixenuë hë la ite drai,” kola hape, thupene la itre macatre ka nyimutre ne meci hë angeic.
Tui Maretha, loi e xecie koi epun ka hape, troa mele hmaca la itre atr ka mec (Wange ju la paragarafe 19, 20)
19, 20. (a) Nemene la aqane ce tro la itre hna melën ekö memine la hna qaja hnei Maretha? (b) Nemene la hne së hna troa ce wang ngöne la tane mekun ka troa xulu?
19 Nyimu kepine matre Maretha a mejiune laka, troa “mele hmaca [la trejin me angeic, ene Lazaro], ngöne la drai hnapin.” Tro la hna qaja hnei Iehova koi Daniela, memine la aqane lapaune i Maretha a acatrene la mejiune së laka, troa mele hmaca la itre atr ka mec.
20 Hne së hna ce wange la itre hna melën ekö ka amamane ka hape, troa mele hmaca la itre atr ka mec. Hne së fe hna ce ithanatane la itre hlue i Iehova ekö ka mejiune kowe la melehmaca elany. Ngo, hapeu, hetre ka anyipicine kö ka hape, troa hetre melehmaca elany? Maine eje hi, tro lai a acatrene catrëne la mejiune së kowe la melehmaca elany. Eu la ijine troa traqa lai? Tro sa ce ithanatane ngöne la tane mekun ka troa xulu.
^ par. 6 1 Ite Joxu 17:19-22, MN: “Nge öni angeice koi nyiidro, ka hape, ‘Awepi koi ni la nekö i nyipo.’ Ame hnei angeice hna xomi nyëne qa ngöne ha imano i nyiidro, me elë sai nyëne kowe la hnahag e koho, hnei angeice hna meköle ngön, me ami nyëne hune la göhne i angeic ; ame hnei angeice hna hë koi Iehova, me hape, ‘Iehova fe, Akötresieng, hapeu, hnei Cilie hna axulune fe la ngazo kowe la sine föe lo hnenge hna lapa then, matre humuthe la nekö i nyiidro ?’ Nge angeic a akönia meköle hune la nekönatr, me hë koi Iehova, me hape, ‘Iehova fe, Akötresieng, epi ahmacane ju la mele ne la nekönatre ce.’ Nge Iehova a dreng la trenge ewekë i Elia ; ame hna hmaca la mele ne la nekönatr, matre melë hë.”
^ par. 15 Iobu 14:13-15, MN: “Epi tro Cilie a juetrë ni ngöne la hua, me asihngödri ni utihë patre hë la elëhni Cilie ; epi tro Cilie a sa draing me meku ni. Maine meci hë la atr, hapeu, tro angeic a mele hmaca ? Tro ni a treqene la itre drai asë ne la huliwang ka hace utihë la troa amejë ni. Tro Cilieti a hë, nge tro ni a sa koi Cilie ; tro Cilieti a lapa treqene la huliwa ne la lue ime i Cilie”