1. Pine nemene matre ka nyipiewekë la troa xomi bapataiso? (Wange ju la pane iatr.)

E NÖJEI macatre, itre thauzane lao ka ini Tusi Hmitrötr a xomi bapataiso. Alanyimu thei angatr la itre thöth, me itre nekönatr hna hiane ngöne la nyipici. Maine eö la ketre, ka lolo catre lai! Ka nyipiewekë tro la keresiano a xomi bapataiso ke, jëne mele hi lai me jëne tro fe a hetrenyi elanyi la mel ka tha ase palua kö.—Mataio 28:19, 20; 1 Peteru 3:21.

2. Pine nemene matre tha tro kö sa luelu troa sa xepu koi Iehova?

² Ame la eö a xomi bapataiso, nyimu aqane amanathithi eö hnei Iehova. Ketre, hnei eö hna kapa la itre xa hnëqa. Ame ngöne la drai ne bapataiso eö, hnene la trejin ka cile fë la cainöj hna hnying ka hape: “Pine laka hnei Iesu hna huujëne la mele i nyidrë thatraqai epun, hnei epuni kö hna ietrane la ngazo i epun me sa xepu koi Iehova matre troa kuca la aja i  Nyidrë?” Nge, hnei eö hna nang me hape, “Eje hi!” Ame la eö a xomi bapataiso, eö hi lai a amamane ka hape, hnei eö hë hna sa xepu koi Iehova. Hnei eö hna sisinyi troa hnimi Iehova, me amë panëne la huliwa i Nyidrë ngöne la mele i eö. Tro kö eö a hace fë e thupene la hnei eö hna sisinyi kow? Ohea! Tha tro pi kö eö elanyi a hace fë la mekun hnei eö hna axeciën, lo eö a nue Iehova troa amekötine la itre jë i eö. Ame la itre ka thatre Iehova tre, itre atrene la fene i Satana. Nge, tha Satana kö a nyipiewekëne la mele i angatr, memine fe la mele i eö. Ame la aja i angeic tre, tro eö a ce xöle me angeic, me nuetriji Iehova matre tha tro kö eö a hetrenyi la mele ka tha ase palua.

3. Nemene la itre manathithi hna kapa qa ngöne la hna sa xepu koi Iehova?

³ Pane mekune jë la aqane amanathithi eö hnei Iehova qaane lo eö a sa xepu me xomi bapataiso. Hnene laka, hnei eö hë hna nue la mele i eö koi Nyidrë, haawe, casi hi la mekuna i eö memine la atre cinyihane la Salamo kola hape: “Xölenge Iehova ; tha tro kö ni a qou ; nemene la ewekë tro ate a kuca koi ni ?” (Salamo 118:6) Pëkö ewekë ka sisitria hune la troa ce xöle me Iehova, me atre laka, easa amadrinë Nyidrë.

4, 5. (a) Pine nemene matre loi e tro sa isa ketre sipu akötrehnine la imelekeu së me Iehova? (b) Nemene la itre jol ka traqa kowe la itre keresiano asë?

⁴ Loi e tro eö a ketre sipu akötrehnine la imelekeu i eö me Iehova, ngacama eö pala kö thei kaka me nenë. Pine nemene matre ka nyipiewekë catre lai? Thatre kö së la ewekë ka troa tupathe la lapaune së elany. Maine jë, hnei eö hna xomi bapataiso lo nekönatre petre kö eö. Ngo, ame enehila, thöthi hë eö, nge saze hë la itre ewekë ka ej e kuhu hni eö, nge hetre itre jol ka hnyipixe ka traqa koi eö. Önine la ketre jajiny: “Ame la nekönatr, xele kö angeic ma xeni gato ne aniverser ke, ame koi angeic, ketre Atre Anyipici Iehova angeic. Ngo, ame ngöne la itre macatre thupen, kola nyiqaane mejë la itre aja ne ngönetrei, matre loi e troa xecie koi angeic ka hape, nyine loi koi angeic la troa trongëne la itre trepene meköti Iehova.”

⁵ Tha itre thöth hmekuje kö la ka qëmeke kowe la itre jol ka hnyipixe. Hna tupathe fe la lapaun ne la itre ka tru hnene la itre jol ka traqa e hnine la hnepe lapa, maine hnei itre sine mec, maine ngöne la hnë huliwa pena. Itre ka tru ju hë së maine thöth, ngo loi e tro së isa ala cas a thel tro palahi a nyipici koi Iehova ngöne la nöjei pengöne itupath.—Iakobo 1:12-14.

6. (a) Nemene la aliene la hne së hna sisinyi fë koi Iehova? (b) Nemene la ini hne së hna kapa qa ngöne Filipi 4:11-13?

⁶ Hanawange la ketre ewekë ka troa xatua eö troa mele nyipici ngöne la itre itupath. The thëthëhmine pi kö laka, ame la hnei eö hna sisinyi fë koi Iehova, tha nyine tro kö a thë. Kösë hnei eö hna qaja kowe la Kapucatinasë ka hape, trotrije ju hë la nyipici hnene la itre sinee i eö maine keme me thine i eö, ngo tro pala kö eö a nyihlue i Nyidrë. (Salamo 27:10) Sipo ixatua jë koi Iehova matre tro eö a nyipici kowe la hnei eö hna sisiny ngöne la nöjei itupath hnei eö hna cile kow.—E jë la Filipi 4:11-13.

7. Nemene la aliene la troa huliwa catr thatraqane la mele së elany?

 ⁷ Ame la aja i Iehova tre, ene la tro eö a ce sinee me Nyidrë. Ngo, loi e tro eö a catre huliwa matre tro palahi a acatrene la imelekeu i eö me Nyidrë, me isine thatraqane la mele i eö elany. Öni Filipi 2:12, MN: “Catre jë huliwa thatraqane la mele i nyipunie elanyi ngöne la qou me hmengöhmengön.” Loi e tro sa thelejëne matre tro palahi a catre la aqane imelekeu së me Iehova, nge matre tro sa mele nyipici koi Nyidrë ngöne la itre itupath asë. Tha tro kö sa wangahmalohmaloeëne la ewekë cili. The thëthëhmine kö laka, hnene fe la itre ka hekö hë nyihlue i Iehova hna hane kei kowe la ngazo. Nemene la nyine tro sa kuca matre tro sa huliwa catr thatraqane la mele së elany?

8. Nemene la aqane tro sa ini Tusi cas? Pine nemene matre ka nyipiewekë catre lai?

⁸ E aja së troa nyisinee i Iehova, loi e tro sa drei Nyidrë, me ithanata koi Nyidrë. Easa drei Nyidrë la easa inine la Tusi Hmitrötr. Kolo fe a qaja la easa e me mekun ajuine la Wesi Ula i Akötresie, memine la itre itusi së. Ame la easa ini Tusi cas, tha easa kö a inine göne hi matre atre gufane la itre ithuemacany, tune la easa hnëkë troa itupath. Loi e tro pe a ceitu memine la easa ihamë ngöne la ketre götrane laka, kola mama trootro la itre xa pengöi Iehova. Tro hë eö lai a easenyi koi Akötresie, nge ketre  tro fe Nyidrëti a easenyi koi eö.—Iakobo 4:8.

9. Nemene la itre jia ne huliwa ka troa xatua eö ngöne la eö a ini Tusi cas?

⁹ Hetre jia ne huliwa hna hamën hnene la organizasio i Iehova matre troa xatua eö troa ini Tusi cas. Ame ngöne jw.org, hetre activité hna hape, “Explore la Bible !” ngöne la hna hape, “Adolescents.” Tro eö lai a atre la itre ini qa ngöne la itre hna melën e hnine la Tusi Hmitrötr, nge nyine troa trongën. Ketre, hetrenyi fe la hna hape, “Qu’enseigne réellement la Bible? (Fiches d’étude).” Tro lai a acatrene la lapaune i eö kowe la itre ini hnei eö hna mejiune kow, me xatua eö troa qejepengöne itre ej koi itre xan. Tro fe eö a öhne la itre xa ithuemacanyi ngöne la tane mekun, “Les jeunes s’interrogent... Comment trouver du plaisir à lire la Bible ?” ka mama ngöne la Réveillez-vous ! ne Eiperem 2009. Ame la eö a ini Tusi cas, me mekun ajuin la hnei eö hna inin, eö hi lai a huliwa catr thatraqane la mele i eö elany.—E jë la Salamo 119:105.

10. Pine nemene matre ka nyipiewekë la thith kowe la keresiano?

¹⁰ Ame la eö a ini Tus, eö hi lai a drei Iehova. Nge ame la eö a thith, eö hi lai a ithanata koi Nyidrë. Tha tro kö sa goeëne la thith ceitu me ketre ewekë hna majemine hi kuca, maine ketre hatrene manathith. Ame la eö a thith, eö hi lai a ithanata kowe la Atre Xupi së. Hetre aja i Iehova troa dreng la hnei eö hna qaja! (E jë la Filipi 4:6.) Matre, ame la eö a hnehengazone la ketre ewekë, öni Tusi Hmitrötr, “Nue pi koi Iehova la ehnefe i eö.” (Salamo 55:22, MN) Hnene la itre milio lao trejin hna qaja ka hape, celë hi ka xatua angatr. Tro fe lai a hane xatua eö!

11. Pine nemene matre loi e tro palahi eö a ole koi Iehova?

¹¹ Ngo, tha tro hmekuje kö së a thithi koi Iehova la easa aja ixatua. Öni Tusi Hmitrötr, loi e tro sa “olene pala hi.” (Kolose 3:15) Ame itre xa ijin, tru palaha la hne së hna hnehengazo matre tha öhne hë së la itre ewekë ka lolo ka traqa koi së. Pane mekune ju e nöjei drai la köni ewekë ka lolo hnei eö hna kapa qaathei Iehova, nge olene jë koi Nyidrë. Öni Abigail, hna bapataisone lo kola 12 lao macatre, ka hape: “Ame koi ni, Iehova hmekuje hi la nyine tro sa ole kow. Loi e tro sa olene koi Nyidrë la nöjei ahnahna hne së hna kapa qaathei Nyidrë.”

12, 13. Nemene la aqane tro eö a ketre sipu öhne laka, ka lolo Iehova, nge pine nemene matre nyipiewekë tro eö a wangatrune lai?

¹² Hnei Iehova hna xatua Davita joxu troa cile kowe la itre itupath ka nyimutre. Matre, jëne la itre hnei angeic hna melën, öni angeic: “Dreme ju, nge atre jë laka, ka lolo Iehova ; manathithi la atre lapaune koi nyidrë.” (Salamo 34:8, MN) Haawe, loi e tro sa ketre sipu öhne laka, ka lolo Iehova. Ame la eö a e Tusi Hmitrötr, memine la itre itusi së, me sine la itre icasikeu, eö a atre la aqane xatuane la itre atr hnei Iehova matre troa mele nyipici koi Nyidrë. Ngo loi e  tro eö a ketre sipu öhne la aqane xatua eö hnei Nyidrë. Hapeu, hnei eö hë hna hane öhne laka, ka lolo Iehova?

¹³ Hna isa öhne hë hnene la itre keresiano laka, ka lolo Iehova ngöne la mele i angatr. Iehova a upi së troa easenyi koi Nyidrë, me kowe la nekö i Nyidrë. Öni Iesu: “Pëkö ate ateine tro koi ni, e tha hna e angeice kö hnei Tetetro ate upi ni.” (Ioane 6:44) Ame koi eö, Iehova kö a e eö koi Nyidrë? Maine eö a mekun ka hape, ‘Nyidrëti a e kaka me nenë, nge eni pe hi a ixötrethenge.’ The thëthëhmine kö laka, ame la eö a sa xepu, me xomi bapataiso, kolo lai a amamane laka, hetre imelekeu i eö hë me Iehova. Öni Tusi Hmitrötr: “Maine ketre atr a hnimi Akötesie, haawe, atre angeice hë hnei Nyidrë.” (1 Korinito 8:3, MN) Matre, loi e tro palahi eö a wangatrune la pengöi eö e hnine la organizasio i Nyidrë.

14, 15. Troa catr tune kaa la lapaune i eö?

¹⁴ Hnei eö hna öhne laka, ka lolo Iehova la Nyidrëti a hamë trengecatre i eö troa ce thawa la hnei eö hna mejiune kow, ngöne la hnë cainöje trootro, me ngöne la hna ini. Tha ka hmaloi kö troa cainöje kowe la itre sine ce ini me eö. Tro eö lai a xouene la aqane tro angatr a ujë. Nge, the qaja ha e troa ithanatane la mejiune i eö qëmekene la ka alanyim. Nemene la nyine tro eö a kuca?

¹⁵ Pane mekune jë la kepine matre eö a lapaun kowe la itre ini hnei eö hna kapa. Maine hetrenyi lo itre Fiches d’étude ngöne la site së, nge ngöne la qene hlapa i eö, huliwane jë itre ej. Tro itre eje lai a xatua eö troa sine thel la itre ini hnei eö hna kapa, memine la kepin matre eö a mejiune kow. Nge tro fe itre ej a xatua eö troa qejepengöne lai koi itre xan. E xecie hnyawa lai koi eö, nge ka hnëkë hnyawa eö, haawe, hetre aja i eö hë troa qeje Iehova.—Ieremia 20:8, 9.

16. Nemene la hna kuca hnene la ketre trejin matre troa hetre trengecatre i angeic troa ce thawa la nyipici?

¹⁶ Nyipici laka, ame itre xa ijin, ka hnëkë hnyawa eö, ngo tro palahi eö lai a xou troa ce thawa me itre xan la itre hnei eö hna mejiune kow. Önine la ketre jajinyi ka 18 lao macatre, nge hna bapataisone lo kola 13 lao macatre, ka hape: “Ka mama hnyawa koi ni la itre ini hnenge hna mejiune kow, ngo ame itre xa ijin, thatreine ju hi ni qaja la mekunang.” Matre, angeic a thele troa qaja la nyipici, nge tha tro kö a xou. Öni angeic: “Hnene la itre sine ce ini me eni hna majemine ithanatane la hnei angatr hna kuca. Matre, loi e tro fe eni a hane ujë tun. Tro ni a amexeje la ketre ijin tune la, ka hape, ‘Eni a ini Tusi Hmitrötr me ketre atr, nge, . . . ’ Thupene lai, eni pë hë a hane qaja la itre xa hnenge hna kuca. Ngacama tha eni kö a qeje Tusi Hmitrötr, ngo hetre itre xan ka pi atre la aqane trongene la ini Tus, matre angatr a hnying. Hnenge palahi hna kuca tune lai, nge kolo palahi a hmaloi koi ni. Hetre madrinenge palahi qa ngön!”

17. Nemene la ka troa xatua eö troa ce thawa la lapaune i eö me itre xan?

¹⁷ E mama kowe la itre atr ka hape, eö a nyipiewekë angatr, me metrötrë angatr, tro  hë angatr a metrötrë eö, memine la itre ini hnei eö hna mejiune kow. Öni Olivia ka 17 lao macatre, nge ka xomi bapataiso lo nekönatr petre kö angeic ka hape: “Hetre xoung troa fe Tusi Hmitrötr la eni a porotrik me itre xan, wanga jele hmo ni jë.” Eni a mekune jë troa saze la aqane ujëng, matre öning: “Alanyim la itre thöth ka thatre pengöne kö la Itretre Anyipici Iehova. Nge, eahun pena hi la Itretre Anyipici Iehova hnei angatr hna atre. Matre, tro la aqane ujë hun a hetre thangane kowe la aqane mekune i angatr göi së. Ngo, tune kaa e traqa ju së hmahma, maine cile hnö troa isigölin la lapaune së? Tro angatre lai a mekun ka hape, tha madrine kö së la pengö së. Nge tro hë angatr a akötrë së, ke, easa nango cile hnö. Ngo, e tro sa qaja amamane la lapaune së kösë easa porotrik, haawe, tro hë angatre lai a metrötrë së.”

18. Nemene la nyine tro eö kuca matre troa huliwa catr thatraqane la mele i eö elany?

¹⁸ Hne së hna ce wang laka, ketre hnëqa ka tru la troa huliwa catr thatraqane la mele i eö elany. Tro eö a eatrëne lai, e hnei eö hna e me mekun ajuine la Wesi Ula i Akötresie, me thithi koi Nyidrë, me mekune hnyawa la nöjei aqane xatua eö hnei Nyidrë. E tro eö a ujë tune lai, tro ha mama koi eö laka, ame Iehova, Ehnemu i eö. Tro ha hmaloi koi eö troa ithanatane koi itre xan la itre ini hnei eö hna mejiune kow.—E jë la Salamo 73:28.

19. Pine nemene matre loi e tro eö a huliwa catr thatraqane la mele i eö elany?

¹⁹ Öni Iesu: “Maine kete ate a ajane troa xöte thenge ni, loi e tro angeic’ a xele angeice kö, me xome la [“sinöe ne iaxösisi, MN”] i angeice kö, me xöte thenge ni fë.” (Mataio 16:24) Eje hi laka, e ajane la atr troa xötrethenge Iesu matre troa ketre keresiano, loi e tro angeic a sa xepu koi Iehova, me xomi bapataiso. Angeice hi lai a nyiqaane la ketre mele ka loi enehila, nge ka troa tro xomi angeic kowe la mele ka tha ase palua kö ngöne la fen ka hnyipixe. Haawe, isine jë tro pala hi a huliwa catr thatraqane la mele i eö elany!