1, 2. Nemene la hna upi së troa kuca ngöne Heberu 13:4?

EASË asë hi a ajane troa atrunyi Iehova, nge meköti tro sa atrunyi Nyidrë. Ketre, hnei Nyidrëti hna thingehnaean, laka, tro fe Nyidrëti a atrunyi së. (1 Samuela 2:30; Ite Edomë 3:9; Hna Amaman 4:11) Aja i Nyidrëti fe tro sa atrune la itre xan, tune la itre mus. (Roma 12:10; 13:7) Ngo hetre ewekë palakö nyine tro sa wangatrun. Kola qaja la faipoipo.

² Öni Paulo aposetolo: “Loi e tro nöjei ate asë a nyipine la troa luetefën, memine la göhnë ka pë ethan.” (Heberu 13:4) Paulo a qejepengöne la faipoipo. Nyidrëti a ithuecatre kowe la itre Keresiano troa wangatrune la faipoipo ke, ketre huliwa ka sisitria. Hapeu nyipunie itre trefën, celë kö lai aqane goeëne nyipunie la faipoipo?

3. Nemene la eamo ka sisitria hna hamën hnei Iesu göne la faipoipo? (Wange ju la pane iatr.)

³ Nyipiewekë catr troa wangatrune la faipoipo. Hnei Iesu hna hane wangatrune la faipoipo. Ame la angetre Faresaio a hnying göi seihnacil, hnei Iesu hna amexeje lo hnei  Akötresieti hna qaja, göne lo pane faipoipo. Öni nyidrë: “Qa ngöne hi lai, tro la trahmanyi a nue la keme me thine i angeic, me fede kowe la fö’ i angeic; nge tro nyidoti a cangönetei.” Öni Iesu fe: “Ame la hnei Akötesie hna isilekeun, the tro kö a shenge hnei ate.”—E jë la Mareko 10:2-12; Genese 2:24.

4. Nemene la aja i Iehova göne la faipoipo?

⁴ Atre hi Iesu laka, Akötresieti la ka acile la faipoipo, nge tro ej a cile hut. Ame la Akötresieti a acile la pane faipoipo, tha hnei Nyidrëti kö hna nue Adamu me Eva troa seihnacil. Ame la aja i Nyidrë, tre, tro “nyidoti” a caas utihë epine palua.

5. Nemene la thangane koi lue trefën e meci ju la ketre e nyidro?

⁵ Nyimutre la itre ewekë ka saze, thupene la hna tria hnei Adamu. Ame la ketre, tre, xulu hë la meci kowe la itre atr. Hetre thangane lai kowe la faipoipo. Hnei Paulo aposetolo hna qaja kowe la itre Keresiano, ka hape, meci la ka troa nyipune la faipoipo. Ijije hi troa faipoipo hmaca hnene la ka mele pe.—Roma 7:1-3.

6. Nemene la ini hne së hna xom qa ngöne la Wathebo i Mose, göne la aqane goeëne Akötresieti la faipoipo?

⁶ Ame ngöne la Wathebo hnei Akötresieti hna hamëne koi angetre Isaraela, tre, hetre ithuemacanyi göne la faipoipo. Drei la ketre ceitun. Hna nue kowe la ketre atre Isaraela troa nyimu föe. Ketre ewekë lai hna kuca ha ekö, qëmekene tro Akötresieti a acile la Wathebo. Ngo, ame la Wathebo, tre, ej a thupëne la itre föe me itre nekönatr, matre tha tro kö a qanangazo nyudren. Maine ketre atre Isaraela a faipoipo memine la ketre hlu me xome hmaca la ketre föe, loi e tro angeic a thupëne  hnyawa me metrötrëne la pane föe i angeic. Celë hi aja i Akötresieti kowe la trahmany. (Esodo 21:9, 10) Tha easë hmaca kö fene la Wathebo i Mose. Ngo ame pe, ej a amamane laka, ka tru palahi koi Akötresieti la faipoipo. Celë hi ka xatua së troa wangatrune la faipoipo.

7, 8. (a) Nemene la hna qaja hnene la Wathebo göne la troa seihnacil, thenge la tusi Deuteronomi 24:1? (b) Nemene la mekuna i Iehova göne la troa seihnacil?

⁷ Nemene la hna qaja hnene la Wathebo göne la troa seihnacil? Eje hi laka, tha Iehova kö a ajane tro la lue trefën a seihnacil. Ngo hnene la Wathebo hna nue kowe la atre Isaraela troa seihnacil, e “hna öhne thei nyëne la kete ngazon.” (E jë la Deuteronomi 24:1.) Tha hna qejepengöne kö e hnine la Wathebo la hnaewekë hna hape, “kete ngazon.” Ngo maine jë, kola qaja la ketre ewekë nyine hmahman, maine ketre ngazo ka tru. (Deuteronomi 23:14) Ame ngöne lo hneijine i Iesu, nyimutre la itretre Iuda ka seihnacil “pine la nöjei ewekë asë.” (Mataio 19:3) Tha aja së fe kö troa hane tui angatr.

⁸ Ame ngöne lo hneijine i Malaki perofeta, alanyimu la itre ka seihnacil. Hnei angatr hna xome pena la itre jajiny ka tha nyihlue i Iehova. Hnei Akötresieti hna qaja amamane la mekuna i Nyidrë, göne la troa seihnacil. Öni Nyidrë: “Methinge troa tiji fö.” (Malaki 2:14-16) Tha saze kö la mekuna i Akötresie göne la faipoipo. Öni Nyidrëti lo ka hape, tro la trahmany a “fede kowe la fö’ i angeic.” (Genese 2:24) Nge celë hi aqane mekuna i Iesu. Öni nyidrëti göne la faipoipo: “Ame la hnei Akötesie hna isilekeun, the tro kö a shenge hnei ate.”—Mataio 19:6.

9. Nemene la aliene la itre trengewekë i Iesu ngöne Mareko 10:11, 12?

⁹ Hetre itre ka hnying ka hape, ‘Ijije kö tro la ketre trejin a seihnacil matre tro hmaca angeic a faipoipo?’ Hanawang la hna qaja hnei Iesu. Öni nyidrë: “Ame la ate tije la fö’ i angeic, me xome hmaca la kete, angeic a angazo nyido. Nge maine tro kete föe a tije la fö’ i nyido, me hmala kete, nyidoti a nyi xetë.” (Mareko 10:11, 12; Luka 16:18) Eje hi, ka tru koi Iesu la faipoipo, nge aja i nyidrë tro la itre xan a waiewekë tui nyidrë. Maine ketre atr a trotrij la föi angeic ka mele nyipici me xome pena la ketre föe, angeice hi lai a nyixetë. Ceitune hi lai memine la föe ka seihnacil. Haawe, ame la troa seihnacil nge pëkö nyipi kepin, tre, tha celë kö la ka nyipune la faipoipo. Aja i Iehova palahi tro la lue trefën a “ca ngönetei.” Ketre, öni Iesu, maine ketre atr a seihnacil nge pë pe nyipi kepin, kösë angeice hi lai a upe la föi angeic troa nyixetë. Tune kaa? Maine jë, tro la föi angeic a thele troa faipoipo memine la ketre trahmany, göi manie. Angeice hi lai a nyixetë.

10. Nemene la nyipi kepin matre kola nue la Keresiano troa seihnacil me faipoipo hmaca?

 ¹⁰ Öni Iesu ka hape, caasi hi la kepin matre troa seihnacil. Öni nyidrë: “Ini a qaja koi nyipunie, ka hape, ame la ate tije la fö’ i angeic, nge tha ka kuci ngazo kö, me xomi kete, te, kola nyi xetë lai.” (Mataio 19:9) Celë hi lai hnei nyidrëti hna qaja ngöne la Cainöj Hune La Wetr. (Mataio 5:31, 32) Ame ngöne la lue ijine cili, hnei Iesu hna qaja la “kuci ngazo.” Ame la kuci ngazo, tre, kolo fe a qaja la itre ka nyixetë, maine nyi föe ne gojeny, maine ce meköle la lue trahmany maine lue föe, maine ce meköl memine la itre öni. Maine hna kuci ngazo hnene la ketre trahmany, ijije hi tro la föi angeic a seihnacil. E cili, tha ka meköti hmaca kö nyidro xajawa i Akötresie.

11. Pine nemene matre xele kö la itre xaa trejin troa seihnacil ngöne la kola nyixetë la föi angatr?

¹¹ Tha hnei Iesu kö hna qaja, ka hape, e traqa ju ketre nyixetë ke, tro hë ketre a seihnacil. Ijije hi tro la föe a lapa memine la föi eahlo, ngacama hnei nyidrëti hna nyixetë. Pine nemen? Eahlo palahi a hnimi nyidrë, matre eahlo a nue la ngazo hna kuca, me thel troa acatrene la faipoipo i nyidro. Ketre, ka tru ejolene la troa seihnacil nge troa lapa caas. Tune kaa göi manie, me göi troa ce meköl? Tro kö eahlo a lapa caas? Nemene la ethane lai kowe la itre nekönatr? Hapeu, ijije kö troa hiane caasine la itre nekönatr ngöne la nyipici? (1 Korinito 7:14) Nyipici laka, tru catre la itre jole hna troa cile kow hnene la ka seihnacil.

12, 13. (a) Nemene la ka traqa ngöne la faipoipo i Hosea? (b) Pine nemene matre hnei Hosea hna xomi Gomera hmaca, nge nemene la hna ini së göne la faipoipo?

¹² Hetre ini hne së hna troa xom qa ngöne la hna melëne hnei Hosea perofeta. Kola troa amamane la mekuna i Akötresie göne la faipoipo. Hnei Akötesieti hna upi Hosea troa xomi Gomera, ketre “föe ne gojeny,” nge ka trene “nekö ne gojeny.” Hnei Gomera me Hosea hna hnahone la trahmany. (Hosea 1:2, 3) Thupene lai, hnei Gomera hna hnahone la ketre jajiny me ketre trahmany, ngo tha lue sipu nekö i Hosea kö. Ngacama hnei Gomera hna anyimua nyixetë triji Hosea, ngo hnei nyidrëti palahi hna ce lapa me nyiidro. Gomera la ka trotriji Hosea, matre ketre hlue pena ha nyiidro. Ngo hnei Hosea hna nyithupene matre tro Gomera a bëeke hmaca. (Hosea 3:1, 2) Jëne la tulu i Hosea, hnei Iehova hna amamane la aqane anyimua nue Nyidrëti la ngazo ne la angetre Isaraela, ene la nöje i Nyidrë ka tha mele nyipici kö, me ka thili koi idrola. Nemene la ini hne së hna xom qa ngöne la faipoipo i Hosea?

¹³ Maine hna nyixetë hnene la ketre trejin Keresiano, tro la föi angeic a axecië mekun. Öni Iesu ka hape, ijije hi tro angeic a seihnacil me faipoipo hmaca. Ngo ketre, tha ngazo kö e angeic a iëne troa nue la ngazo ne la föi angeic. Hnei Hosea hna xomi Gomera hmaca. Thupene kola bëeke hmaca hnei Gomera koi Hosea, hnei nyidrëti hna qaja koi eahlo, ka hape, tha tro hmaca kö eahlo a ce meköle memine la itre xaa trahmany. Nge hnei Gomera hna lapa treqen a nyimu drai.  (Hosea 3:3) Ngo hnei Hosea hmaca hna ce meköle me Gomera. Kola nyihatrene la ijine Akötresie a kepe angetre Isaraela hmaca, me acatrene la aqane imelekeu i angatr. (Hosea 1:11; 3:3-5) Nemene la hna ini së göne la faipoipo enehila? Ngacama hna nyixetë hnei ketre, ngo e ce meköle trefën hmaca nyidro, ke, kolo hi lai a hape, ase hë nue la ngazo hna kuca. (1 Korinito 7:3, 5) E cili, tha nyipiewekë hë troa seihnacil. Thupene lai, loi e tro la lue trefën a ce huliwa me itö ixatua, matre tro hmaca a wangatrune la faipoipo, tui Akötresie.

14. Tune la hna qaja ngöne 1 Korinito 7:10, 11, nemene la ka traqa ngöne la faipoipo?

¹⁴ Loi e tro la itre Keresiano a wangatrune la faipoipo, tui Iehova me Iesu. Ngo ame itre xaa ijin, jole troa wangatrune la faipoipo ke, itre ka tha pexeje kö së. (Roma 7:18-23) Haawe, tha sesëkötre kö së laka, hna traqa la itre jol kowe la mele ne faipoipo ne la itre pane Keresiano ekö. Hnei Paulo hna cinyihan ka hape, “the tro kö la fö’ a tro tije la trahmany.” Ngo tha hna metrötrëne kö.—E jë la 1 Korinito 7:10, 11.

15, 16. (a) Nemene la aja ne la lue trefën ngöne la kola traqa la itre jol e hnine la faipoipo, nge pine nemen? (b) Tune kaa e tha ka hmi kö la föe hmunë?

¹⁵ Tha hnei Paulo kö hna qaja la itre kepin, matre kola isa lapa la lue trefën. Ngo maine jë tha hnene kö laka, hna nyixetë hnene la trahmany. Maine ju tro hi la föe a seihnacil me faipoipo hmaca me ketre. Hnei Paulo hna qaja, ka hape, ame la föe ka isa lapa memine la föi eahlo, tre, loi e tro eahlo a ‘lapa cas, maine iloi me trahmany.’ Ka faipoipo palahi nyidro xajawa i Akötresie. Öni Paulo ka hape, nyimutre la itre jol ka traqa kowe la lue trefën. Ngo maine pëkö ka kuci ngazo e nyidro, loi e tro nyidroti a thele troa iloi me ce lapa. Loi e tro nyidroti a sipo ixatua thene la itre qatre thup. Tha tro kö angatr a troa nyixöle i ketre, ngo angatre pe a troa hamë eamo qa hnine la Tusi Hmitrötr.

¹⁶ Ngo, tune kaa e tha ka hmi kö la föe ne la ketre trejin? Ame la kola traqa la itre jol e hnine la faipoipo, hapeu, tro kö nyidroti a isa lapa? Tune la hna qaja hnei Tusi Hmitrötr, ame la nyipi kepin matre troa seihnacil, tre, kuci ngazo. Ngo tha hnei Tusi Hmitrötre kö hna qaja la itre kepin, matre tro la lue trefën a isa lapa. Öni Paulo: “Ame la föe ka hete föene ka tha lapaune kö, nge aja i angeice troa ce lapa kö me nyido, the tro kö nyidoti a tro tiji angeic.”  (1 Korinito 7:12, 13) Tha saze kö la hna amekötine celë koi së enehila.

17, 18. Pine nemene matre hnene la itre xaa trejin hna ce lapa memine la itre föi angatr, ngacama tru catre la itre jol?

¹⁷ Ngo ame itre xaa ijin, xele hë la trahmany “ka tha lapaune kö” troa “ce lapa” memine la föe i angeic. Ame itre xan, angatr a qanangazone la itre föe i angatr, uti fe hë la angatr a troa humuthi nyudren. Ketre, tha angatre kö a thupëne la hnepe lapa i angatr. Angatr a sawa la itre föe troa nyihlue i Akötresie. E cili, ijije hi tro la trejine föe a mekun ka hape, xele kö la föi eahlo troa “ce lapa” me eahlo, matre nyipiewekë tro nyidroti a isa lapa. Ngo hetrenyi kö la itre trejin ka ce lapa memine la itre föi angatr. Hnei angatr hna xomihnine la itre jol, me thele matre tro palahi a cile huti la faipoipo. Pine nemene matre angatr a lapa?

¹⁸ Ijije hi tro la lue trefën a isa lapa pine la itre ewekë cili. Ngo tha kolo kö lai a hape, tha lue ka faipoipo hmaca kö nyidro. Tro palakö nyidroti a cile kow la itre jol hna qaja e caha hun. Hnei Paulo aposetolo hna qaja la ketre kepin, matre loi e tro la lue trefën a ce lapa. Öni nyidrë: “Hna ahmitötëne la trahmanyi ka tha lapaune kö hnene la föe, nge hna ahmitötëne fe la föe ka tha lapaune kö hnene la trahmany; maine pëkö, te, maine sisi la ite nekö i nyipunie; ngo enehila hmitöte angat.” (1 Korinito 7:14) Alanyimu la itre trejin ka mekun troa ce lapa memine la itre föi angatr ka tha hmi kö. Ngacama tha ka hmaloi kö, ngo tru la madrine ne la itre trejin ke, ame hë e thupen, itre xaa ka Anyipici Iehova fe hë la itre föi angatr.—E jë la 1 Korinito 7:16; 1 Peteru 3:1, 2.

19. Pine nemene matre lolo la mele ne la itre ka faipoipo e hnine la itre ekalesia?

¹⁹ Hnei Iesu hna hamë eamo, göne la troa seihnacil. Nge hnei Paulo aposetolo hna hamë eamo, göne la troa isa lapa. Aja i nyidroti tro la itre hlue i Akötresieti a wangatrune la faipoipo. Ame enehila, lolo la mele ne la itre ka faipoipo e hnine la itre ekalesia e cailo fen. Eje hi, nyimutre la itre trefën e hnine la ekalesia ka madrin ngöne la mele ne trefën. Itre trahmanyi a hnime la itre föi angatr, nge itre föe a metrötrëne la itre trahmany. Angatr a amamane laka, ijije hi troa cile huti la faipoipo. Madrine catre së laka, itre milio la etrune la itre trefëne Keresiano ka anyipicine la hna qaja hnei Akötresie, lo Nyidrëti a hape: “Qa ngöne lai tro ha la trahmanyi a nue la keme me thine i angeic, me fede kowe la fö’ i angeic, mate tro nyidoti a ca ngönetei.”—Efeso 5:31, 33.