EASA madrin ngöne la kola thiina ka loi hnei itre xan. Kola akeukawanyi së la easa atre laka, angatr a wangatrunyi së. Eje hi, easa madrine la itre xan a loi thiina. Ngo nemene la aqane tro fe sa hane loihni?

Ame la atr ka loihni, tre, angeic a wangatrune la itre xan, jëne la aqane ithanata me aqane ujë i angeic. Angeic a hetre hni ka metrötr. Angeic a thiina ka loi koi itre xan ke, angeic a hnimi angatr, nge trotrohnine hi angeic la itre aliene hni angatr. Ame la loihni, tre, ketre igötranene la wene la uati hmitrötre i Akötresie. (Galatia 5:22, 23) Aja i Iehova tro sa loihni. Haawe, tro sa ce wang la aqane loihni Iehova me Iesu, me aqane tro sa nyitipu nyidro.

Iehova a loihni kowe la nöjei atr asë, tune fe la “angete tha ole kö, me ite ka ngazo.” (Luka 6:35) Iehova a “axulune la jö i anganyidë hune la nöjei ka ngazo me ka loi, me upe la manie kowe la nöjei ka meköti me ka tha meköti kö.” (Mataio 5:45) Ame fe la itre atr ka tha mejiune kö koi Iehova, Atre xupi së, tre, angatr a hane kepe thangane qa ngöne la thiina ka loi i Iehova, me madrin.

Hanawang la ketre ceitun. Hnei Iehova hna loihni koi Adamu me Eva. Thupene la nyidroti a kuca la ngazo, “hnei nyidoti hna icanekeune la ite döne hmejienge mate nyi iza i nyido.” Ngo, atre hi Iehova laka, ame e tröne la gatran e Edena, tre, nyidroti a troa ami iheetr ke, tiqa ha la dro hnei “sinöe ka ithinyi me gemegem.” Celë hi matre hnei Iehova hna kuca “la lue ixete kupeine öni” thatraqai nyidro.—Genese 3:7, 17, 18, 21.

Eje hi laka, Iehova a loihni kowe la “nöjei ka ngazo me ka loi.” Ngo Nyidrëti a loihni kowe la itre hlue i Nyidrëti ka mele nyipici. Ame ngöne lo ijine Zakaria a perofeta, hnene la ketre angela hna hnehengazo ke, tha fenesi kö la angetre Isaraela hna xupe la ene i Iehova e Ierusalema. Hnei Iehova hna drenge la angela me sa “hnene la tenge ewekë ka loi, me tenge ewekë nyine akeukawan.” (Zakaria 1:12, 13) Celë fe hi aqane ujë i Iehova koi Elia perofeta. Ame la ketre ijin, tru catre la akötre i Elia, ame hnei angeic hna sipo Iehova troa xome la mele i angeic. Hnei Iehova hna amamane laka, Nyidrëti a wangatrune la itre aliene hni Elia. Hnei Nyidrëti hna upe la ketre angela troa aegöcatrenyi angeic. Hnei Nyidrëti hna akeukawane la hni Elia laka, ce Nyidrëti palahi me angeic. Hnene la aqane loi thiina i Iehova, hna ithuecatre koi Elia tro palahi a xome la hnëqa i angeic. (1 Ite Joxu 19:1-18) Ame thene la itre hlue i Iehova, drei la ka nyitipu Iehova?

Öhne hi la itre atr la thiina ka lolo i Iesu, ngöne lo nyidrëti e celë fen. Tha hnei nyidrëti kö hna qanangazo itre xan, maine upi angatre troa kuca la aja i nyidrë. Iesu a wangatrune la itre xan, öni nyidrë: “Trohemi koi ni, nyipunieti asë ange ka huliwa me hace, nge tro ni a amanonyi nyipunie. . . . Ke uqa la nyine isilikeung.” (Mataio 11:28-30) Hnene laka, ka loi thiina catre Iesu, matre hnene  la itre atr hna xötrethenge nyidrë. Tru catre la hnei Iesu hna utipine la itre atr. Celë hi matre, hnei nyidrëti hna thua i angatr, me nyin la itre meci angatr, me ini angatr la “jei ewekë ka nyimute” göne la Keme i nyidrë.—Mareko 6:34; Mataio 14:14; 15:32-38.

Trotrohnine hi Iesu la itre aliene hni ne la itre atr, nge nyidrëti a loihni me menyike koi angatr. Ame itre xaa ijin, tha ijiji nyidrëti kö troa xatuane la itre atr, ngo ame pe, nyidrëti a xomi ijine troa xatuane la itre ka wai nyidrë. (Luka 9:10, 11) Pane mekuna la ka traqa kowe la föe ka neni madra. Aja i nyiidro troa loi la meci nyiidro. Celë hi matre hnei eahlo hna ketr la ixetre i Iesu. Ngo tune la hna qaja ngöne la Wathebo i Mose, tha tro jë kö nyiidroti a kuca la ewekë cili ke, ka sisi nyiidro. (Levitiko 15:25-28) Nemene la hna kuca hnei Iesu? Tha hnei nyidrëti kö hna qajangazo nyiidro. Öhne hi nyidrëti laka, nyiidroti a xou, nge nyidrëti a utipi nyiidro ke, 12 hë lao macatre ne nyiidroti a akötr. Öni nyidrëti koi nyiidro: “Nekönge fe, melë hë nyipo hnene la lapaune i nyipo ; trojë memine la manathith, melë hë nyipo qa ngöne la meci nyipo.” (Mareko 5:25-34) Ka loihni Iesu!

Jëne la itre ceitun hne së hna ce wang, trotrohnine hë së laka, ame la atr ka thiina ka loi, tre, angeic a xatua itre xan. Hnei Iesu hna amamane la enyipiewekëne la troa loihni, ngöne la nyidrëti a hamëne la ceitune la Atre Samaria. Hetre itre atr ka atrekënö la ketre atre Iuda. Hnei angatr hna lepi angeic, me nue angeice pe troa mec ezine la gojeny. Traqa pi hi la ketre atre Samaria a öhnyi angeic me utipi angeic. Ame ekö, angetre Iuda a methinëne la angetre Samaria. Ngo hnene la atre Samaria hna thiina ka loi, celë hi matre hnei angeic hna xatuane la atre Iuda. Hnei angeic hna atuthe la itre eatre ne la atre Iuda me tro sai angeic kowe la ketre hôtel. Hnene la atre Samaria hna nyithupene la trene uma, matre troa thupëne hnyawa la atre Iuda, nge goi nyithupene fe angeice la itre xaa ewekë.—Luka 10:29-37.

Ame la thiina ka loi, tre, celë hi ka upi së troa imeku me ithuecatr. Tro lai a mama ngöne la aqane ujë me aqane ithanata së. Öni Tusi Hmitrötr: “Ame la hleuhleu e kuhu hni ne la ate, te, ate agenyin; ngo ate amadinën’ eje la tenge ewekë ka loi.” (Ite Edomë 12:25) Ame la easa thiina ka loi me ithuecatre kowe la itre xan, tre, easë hi lai a amadrinë angatr. * (Wange ju la ithuemacany.) Troa mama qa ngöne la hne së hna qaja aloinyi itre xan laka, easa wangatrunyi angatr, nge hmaloi koi angatr troa cile catr qëmekene la itre jol.—Ite Edomë 16:24.

Ijiji së asë hi troa loihni ke, hnei Akötresieti hna xupi së hnaiji Nyidrë. (Genese 1:27) Drei la ketre ceitun. Iulio la ketre tane isi angetre Roma. Angeic la ka tro sai Paulo aposetolo e Roma. Nge “loi la thina i Iulio koi Paulo, me nue nyidëti troa tro kowe la ite sine i nyidë troa kapa la ihnim,” e Sidona. (Itre Huliwa 27:3) Ame lo kola lö la he i Paulo me itre xan, tre, hnei angetre Melita “hna hnimi” angatr me athi eë. (Itre Huliwa 28:1, 2) Ka lolo catre la hnei angatr hna kuca. Eje hi, maine easa ajane troa amadrinë Iehova, loi e tro palahi sa loihni.

Iehova a ajane tro sa loihni, nge loi e troa mama ngöne la nöjei götrane la mele së. Celë hi kepin matre, Nyidrëti a upi së troa ‘xetëne’ la thiina ka loi. (Kolose 3:12) Ngo eje hi laka, tha ka hmaloi kö e itre xaa ijin. Pine nemen? Maine jë, easa xou maine tha mejiune kö së koi itre xan, maine easa pena pi mama. Ketre, tha ka hmaloi kö troa thiina ka loi kowe la itre atr ka qanangazo së. Ngo maine tro sa sipone la uati hmitrötre i Iehova ngöne la thith, me catre thele troa nyitipu  Nyidrë, tro hë Nyidrëti a xatua së troa hetrenyi la thiina ka loi.—1 Korinito 2:12.

Nemene la nyine tro sa saze matre troa thiina ka loi? Isa hnyinge jë: ‘Eni kö a drenge la itre xan, me thele troa trotrohnine la aliene hni angatr? Canga öhne hi ni la angatr a aja ixatua? Eu la ijine eni a thiina ka loi kowe la ketre atr, ka tha sineenge kö?’ Isa mekune jë la nyine troa eatrën, tune la troa atre hnyawa la itre trejin ne la ekalesia. E cili, tro sa atre la itre jole hnei angatr hna melën me ajan. Thupene lai, thele jë tro palahi a kuca la loi koi itre xan, tune la hne së hna ajane troa kuca koi së. (Mataio 7:12) Sipo ixatua jë thei Iehova. Tro kö Nyidrëti a amanathithine la trengecatre hne së hna isa kuca, matre troa hetrenyi la thiina ka loi.—Luka 11:13.

Hnei Paulo aposetolo hna qaja trongëne la itre kepin matre ketre hlue ka maca nyidrë ngöne la hna cainöj. Hnei nyidrëti fe hna qaja la thiina ka loi. (2 Korinito 6:3-6) Tru la hna hnimi Paulo ke, hnei nyidrëti hna qaja me kuca la itre ewekë ka lolo. Nge öhne hi la itre atr laka, nyidrëti a wangatrunyi angatr. (Itre Huliwa 28:30, 31) Ketre tu së fe, ame la easa loihni, tre, kola thue aja kowe la itre atr troa hane atre la nyipici. Maine tro sa loihni kowe la nöjei atr, tune fe lo itre ka qanangazo së, haawe, tro lai a ketr la hni angatr. Nge tro hë angatr a saze. (Roma 12:20) Nge maine jë, angatr a troa hane inine la Tusi Hmitrötr.

Ame ngöne la Paradraiso, tro ha thiina ka loi la nöjei atr asë. Tro sa thiina ka loi kowe la itre hna troa amelene hmaca. Maine jë ame itre xan, angatr petre hi a öhne la pengöne la troa thiina ka loi. Tro hë lai a thue aja i angatr tro fe a hane thiina ka loi koi itre xan. Thatreine troa mel fene la Baselaia i Akötresie, la ketre atr ka ngazo thiina me ka xele ma xatua itre xan. Ame la ka troa mel utihë epine palua e hnine la Paradraiso, tre, kolo hmekuje hi la itre ka loihni. (Salamo 37:9-11) Tro ha tingeting me lolo la mel elany! Ngo, qëmekene troa traqa la ijine cili, hetre thangane hne së hna troa kapa qa ngöne la hna loihni. Tune kaa?

Öni Tusi Hmitrötr: “Ame la ate ka ihnim, te, kola thina ka loi koi angeice kö.” (Ite Edomë 11:17) Pi tro catre la itre atr troa ce lapa memine la atr ka loihni, nge angatr a hane loihni koi angeic. Öni Iesu: “Ame la aqane tuluthe hnei nyipunie, te, tro pena a tuluthe koi nyipunie.” (Luka 6:38) Haawe, hmaloi kowe la atr ka loihni troa öhne la itre nyipi sinee, me imelekeu hnyawa me angatr.

Hnei Paulo aposetolo hna upe la ekalesia ne Efeso troa ‘ihnimi ipitö, nge iutipinekeun, kola inu’ aloinekeun.’ (Efeso 4:32) Maine ka loihni me utipine la itre trejin, tre, kola acatrene la lapaun memine la caas e hnine la ekalesia. Tha ajane kö së troa qajangazone la itre trejin, me qeje angatr, maine qaja la itre trengewekë ka akötr, ngacama kola ihnyima. Loi e tro pe sa qaja la itre trengewekë ka ixatua me ka ithuecatr. (Ite Edomë 12:18) E cili, tro ha madrine la ekalesia troa nyihlue i Iehova.

Tune la hne së hna ce wang, troa mama la loihni qa ngöne la aqane ithanata ma aqane ujë së. Ame la easa loihni, easë hi lai a nyitipu Iehova, Akötresie ka ihnim me ka ham. (Efeso 5:1) Ketre, kola acatrene la lapaunene la ekalesia, nge kola ithuecatre koi itre xan tro fe a hane nyihlue i Nyidrë. Haawe, catre pi së amamane koi itre xan laka, itre atr ka loihni la Itretre Anyipici Iehova!