KOLA traqa koi 80 lao macatre i Diana, nge tru catre la akötre i eahlo. Pine laka, ka meci thëthëhmi la föi eahlo, matre hnei nyidrëti hna lapa pital, utihë la nyidrëti a mec. Ketre, meci fe hë la lue nekö i eahlo trahmany, nge hetre meci eahlo ngöne thi. Ngo ka madrine palahi Diana ngöne la itre icasikeu me ngöne la hna cainöj.

Kola traqa koi 43 lao macatre ne John a xome la huliwa ne thupë sirkoskripsio. Tru catre koi nyidrëti la hnëqa cili. Ngo, hnei nyidrëti hna nue la hnëqa cili, matre troa thupëne la ketre sinee i nyidrë ka wezipo. Ame la itre trejin a öhnyi John ngöne la itre asabele ke, tha saze kö nyidrë. Ka madrine palahi nyidrë.

Nemene la kepin matre ka madrine palahi Diana me John? Tro sa madrine tune kaa, nge easë pena a akötr? Nemene la aqane tro sa madrin, ngacama hne së hna nue la ketre huliwa ka tru koi së? Tusi Hmitrötr a sa ka hape: “Tro la ate ka meköti a madi Iehova.” (Salamo 64:10) Tro sa trotrohnine la xötre celë, e hne së hna pane atre la itre ewekë ka thue madrine së, me apatrene la madrine së.

Hetre itre xaa ewekë ka thue madrine së. Pane mekune jë la lue trefën ka xötrei faipoipo, maine ka hnaho. Maine pena, ketre trejin ka kepe hnëqa ngöne la huliwa i Iehova. Itre ewekë lai ka amadrinë së ke, itre ahnahna qaathei Iehova. Nyidrëti la ka acile la faipoipo, nge hnei Nyidrëti hna xupi së matre troa hnaho, me huliwa ngöne la organizasio i Nyidrë.—Genese 2:18, 22; Salamo 127:3; 1 Timoteo 3:1.

Ngo, tha ka cile huti kö la madrin. Maine jë, troa nyixetë maine meci pena la föe së. (Ezekiela 24:18; Hosea 3:1) Ketre, ijije hi tro la itre nekönatr a tha drei keme me thin, nge göi tha drengethenge Akötresieti fe. Maine jë, troa upetröneë nyudren. Drei la ketre ceitun. Tha ka nyihlue i Iehova kö la itre nekö i Samuela trahmany. Nge, tru catr la itre jol ka traqa koi Davita, ngöne la angeic a kuci ngazo me Batheseba. (1 Samuela 8:1-3; 2 Samuela 12:11) Maine  troa traqa la itre ewekë cili koi së, tro ha paatre la madrine së, nge tro pena sa hleuhleu me akötr.

Thatreine kö tro sa lapa huti palahi ngöne la huliwa i Iehova ke, maine jë, troa tithi së hnei mec, maine easë pena a troa thupëne la ketre sinee së. Maine pena, troa saze la ketre ewekë e hnine la organizasio. Nyimutre la itre ka pane nue la hnëqa i angatr. Öni angatr ka hape, angatr a hane pi madrin tune ekö la angatr a huliwa i Iehova.

Eje hi, tha ka lapa huti kö la madrin hne së hna kapa qa ngöne la itre ewekë cili. Ngo hapeu, ijije kö troa lapa huti la madrine së, ngacama hna traqa la itre jol? Eje hi. Ngacama kola traqa la itre jol, ngo ka madrine palahi Samuela me Davita me itre xane fe.

Atrepengöne hnyawa hi Iesu la nyipi madrin. Qëmekene tro nyidrëti a traqa e celë fen, öni Tusi Hmitrötr ka hape, hnei nyidrëti hna “madi xajawa i [Iehova] o ijin’ asë.” (Ite Edomë 8:30) Ngacama nyimutre la itre jol ka traqa koi Iesu lo nyidrëti e celë fen, ngo ame pe, ka madrine palahi nyidrë troa kuca la aja ne la Keme i nyidrë. (Ioane 4:34) Tune kaa fe lo ijine nyidrëti a troa mec? Öni Tusi Hmitrötr: “Ate xomi hnine la [“sinöe,” MN], [ . . . ], ngöne la madine hna amë xajawa i nyidë.” (Heberu 12:2) Hetre ini hne së hna xom qa ngöne la lue ewekë hna melën hnei Iesu.

Ame ngöne la ketre drai, hnene la ala 70 hna traqa qa hna ce cainöj me Iesu. Angatr a madrin ke, hnene la hnei angatr hna kuca, tune la hna helëne la itre dremoni. Ngo öni Iesu koi angatr: “The madine kö qa ngöne la hna dei nyipunie hnene la ite u, loi pe madine jë qa ngöne la hna cinyihane la ite ëje i nyipunie e hnengödrai.” (Luka 10:1-9, 17, 20) Eje hi, pëkö ewekë ka tru catre kö hune la troa kepe së hnei Iehova ke, celë hi lai ka thue madrine së.

Ame la ketre ijin, hnei Iesu hna cainöj kowe la ka alanyim. Hna haine la aqane hamë ini i nyidrë hnene la ketre föe ne Iuda. Öni eahlo ka hape,  maine jë troa madrine hnene la thine i Iesu. Öni Iesu jë hi e sa: “Sisitia pe la manathithi ne la angete denge la wesi ula i Akötesie, me trongën’ ej!” (Luka 11:27, 28) Ame la easa qaja aloine la itre nekö së, tre, celë hi ka thue madrine i nyudren. Ngo tro kö a lapa hut la madrin, e hne së hna drengethenge Iehova me imelekeu hnyawa me Nyidrë.

Easa madrine ngöne la easa atre laka, easa amadrinë Iehova. Ngacama traqa ju hë la itre jol, ngo ka madrine palahi së. Kola elitrauje la madrine së ngöne la easa mele nyipici ngöne la itre jol. (Roma 5:3-5) Ketre, Iehova a hamëne la uati hmitrötr kowe la itre ka lapaune koi Nyidrë. Nge ame la madrin, tre, ketre götranene la wene la uati hmitrötr. (Galatia 5:22) Trotrohnine hë së la kepin matre kola qaja ngöne Salamo 64:10, ka hape: “Tro la ate ka meköti a madi Iehova.”

Celë fe hi la kepin matre ka madrine palahi Diana me John, ngacama nyimutre la itre jol. Öni Diana: “Hnenge hna thele ixatua thei Iehova, tune la ketre nekönatr koi kem me thin. Drenge hi ni laka, Nyidrëti a amanathithi ni me xatua ni tro palahi a madrin troa cainöj.” Nemene la ka xatua John tro palahi a madrin me catre cainöj, ngacama hna pane nue la hnëqa i nyidrë? Öni nyidrë: “Ame lo macatre 1998, hna hë ni troa hane sine la Ini Thatraqane La Itre Trejine Trahmanyi Ka Tha Faipoipo Kö. Tru catre la hnenge hna pane ini tusi caas.” Öni nyidrëti ka hape, hmaloi koi nyidrëti me föe i nyidrë troa kapa la hnëqa ke, aja i nyidro troa kuca la aja i Iehova. Öni nyidrë: “Madrine catre nyio la hnei nyio hna kuca.”

Nyimutre la itre trejin ka jelenyipicine la hna qaja ngöne Salamo 64:10. Hanawang la ketre tulu. Hnene la lue trefën hna huliwa koi 30 lao macatre ngöne la Bethela e Etazini. Hna upi nyidroti troa pionie hut. Öni nyidro: “Eje hi laka, akötre koi së la kola upi së troa nue la ketre huliwa ka tru koi së. Ngo tha ka cile huti kö la akötre cili.” Tha hmitre ju kö thupene la nyidroti a xome la hnëqa ka hnyipixe, nge nyidroti ha nyiqane cainöj memine la ekalesia. Öni nyidro: “Hnei nyio hna catre thithi koi Iehova, nge öhne hi nyio la aqane sa i Nyidrëti la itre thithi nyio. Celë hi ka ithuecatre me thue madrine nyio. Thupene la nyio a traqa, nyimutre la itre trejin ka xome la huliwa ne pionie, nge kola kökötre lolo la lue atr ka ini tusi me nyio.”

Eje hi, tha ka hmaloi kö tro palahi a madrin. Hetre ijine laka, easë pena a akötr. Ngo Iehova a akeukawane la hni së jëne la hna qaja ngöne Salamo 64:10. Xecie hnyawa koi së laka, maine tro sa mele nyipici ngöne la itre jol, tro palahi sa “madine koi Iehova.” Ketre, easa trengeneune la ijine tro Iehova a xupe “la hnengödrai ka hnyipixe me fene hnengödrai ka hnyipixe.” E cili, tro ha pexej asë la itre atr, nge angatr a troa ‘madrine’ la nöjei ewekë hna kuca hnei Iehova.—Isaia 65:17, 18.

Pane mekune jë së la mel elany! Easa troa hlë e hmakany nge ka egöcatre hnyawa së. Ngacama troa traqa la nöjei pengöne jol ka troa akötrë së, ngo ame pe, tha ka cile huti kö la akötre cili. Iehova a akeukawanyi së laka, “tha tro hmaca kö a mekune la hnapan, me xulu e kuhu hni at.” Easa troa kapa la itre sinee së ka meci hë. E cili, easa troa mekun tune lo kem me thin ne la neköjajiny ka 12 lao macatre, hna amelen hnei Iesu. ‘Hnei nyidro hna canga hain atraqatr.’ (Mareko 5:42) Tro ha meköti asë la nöjei atr e cailo fen, me “madine koi Iehova” epine palua.