1-2. Nemene la hna ini së hnene la hna melën hnei Angelito?

HAPEU, ka nyihlue i Iehova la kem me thine së? Maine eje hi, tha tro kö sa mekun ka hape, lue sinee i Iehova nyidro, matre tro fe hë sa sinee i Iehova. Ka nyihlue i Iehova ju hë la kem me thine së maine pëkö, ngo isa qanyi së kö thel la aqane tro sa easenyi catre koi Nyidrë.

² Hane hi la hna melëne hnei Angelito qa Asie. Itretre Anyipici Iehova la kem me thine i angeic. Ngo ame lo angeic a co, kösë tha catrecatre kö la aqane imelekeu i angeic me Iehova. Öni angeic: “Eni a nyihlue i Iehova ke, eni a ajane troa nyitipune la faming.” Ngo hnei Angelito hna xomi ijine troa e me lapa mekun la trengewekë i Akötresie, me catre thithi koi Iehova. Nemene la thangan? Öni Angelito: “Maine eni a ajane troa easenyi catre koi Iehova, loi e tro ni a sipu thele troa atrepengöi Nyidrëti hnyawa.” Kola amekunë së la itre hnying celë ka sisitria: Nemene la eisapengönene la troa atre la itre ewekë göi Iehova, me atrepengöi Nyidrëti hnyawa? Nge nemene la nyine tro sa kuca matre troa atrepengöi Iehova hnyawa?

3. Nemene la eisapengönene la troa atre la itre ewekë göi Iehova memine la troa atrepengöi Nyidrëti hnyawa?

³ Maine jë tro sa mekun ka hape, atrepengöi Iehova hnyawa hi së ke, atre hi së la ëje i Nyidrë memine la itre hnei Nyidrë hna qaja me kuca. Ngo tha eje kö lai. Hetre nyine tro palakö sa kuca. Loi e tro sa catre thel troa atre Iehova memine la itre thiina ka lolo i Nyidrë. Tro hë sa trotrohnine la kepin matre, Nyidrëti a qaja maine kuca la ketre ewekë. Celë hi ka troa xatua së troa atre laka, Iehova kö a kapa la itre  mekuna së me itre hne së hna kuca. E cili, tro hë sa kuca thenge la aja i Nyidrë.

4. Pine nemene matre nyipiewekë tro sa ce wang la tulu ne la itre hlue i Iehova ekö?

⁴ Ame itre xan, angatr a thele troa ahmahmanyi së ke, easa nyihlue i Iehova. Angatre fe a icilekeu ngöne la easa nyiqaane sine la itre icasikeu. Ngo maine tro sa catre lapaune koi Iehova, tha tro jë kö Nyidrëti a nuaxöji së. Tro ha catrecatre la aqane imelekeu së me Nyidrë. Hapeu, ijije hi tro sa atrepengöi Iehova hnyawa? Eje hi! Celë hi hna amamane hnene la itre hlue Iehova ekö, tui Mose me Davita Joxu. Tro sa ce wang la itre hnei nyidroti hna kuca, matre troa sa la lue hnying celë: Nemene la hnei nyidroti hna kuca matre troa atrepengö i Iehova hnyawa? Nge nemene la ini hne së hna xom qa ngöne la tulu i nyidro?

5. Nemene la hna iën hnei Mose?

⁵ Hnei Mose hna iën troa nyihlue i Iehova Akötresie. Ame ngöne lo nyidrëti a 40 lao macatre, hnei Mose hna ce xöle me angetre Isaraela, nöje i Iehova, hune la troa hë nyidrë, “nekö i Farao jajiny.” (Heb. 11:24) Hnei Mose hna nuetrije la ketre göhnë ka tru me nyixöle i angetre Isaraela. Kola elëhni hnei Farao. Ketre Joxu ka catr Farao, nge ketre akötresie angeic koi angetre Aigupito. Ngo catrecatre kö la lapaune i Mose koi Iehova! Celë hi kepin matre, ka catrecatre la aqane imelekeu i Mose me Iehova.—Ite edomë 3:5.

6. Nemene la ini hne së hna xom qa ngöne la tulu i Mose?

⁶ Nemene la ini koi së? Tui Mose, nyipiewekë tro sa isa axecië mekune hnyawa tune la: Hapeu, tro kö sa nyihlue i Iehova me ce xöl memine la nöje i Nyidrë? Maine jë, tru la trengecatre hne së hna kuca koi Iehova, maine tro pena a icilekeu me easë hnene la itre ka thatre Iehova. Ngo tha tro pi kö sa luelu, tro kö Nyidrëti a ceme së!

7-8. Nemene la hnei Mose hna thele troa atrepengöne hnyawa?

⁷ Hnei Mose hna thele troa atrepengöne hnyawa la itre thiina i Iehova me kuca la aja i Nyidrë. Ame ngöne lo Iehova a ahnithe koi Mose troa xome la nöje i Nyidrë qa Aigupito, hnei nyidrëti hna qaja ka hape, tha ijiji nyidrëti kö, nge nyidrëti a luelu. Kola mama la ihnimi Iehova ngöne la aqane xatua Mose hnei Nyidrë. (Eso. 4:10-16) Tha hnei Mose kö hna xou troa qaja la itre maca ne iameköti koi Farao. Hnei nyidrëti hna öhn la mene i Iehova, ngöne lo Iehova a amele angetre Isaraela, me lepi Farao memine la itre trongene isi angeic, ngöne la Hnagejë Ka Palulu.—Eso. 14:26-31; Sal. 136:15.

⁸ Thupene la Mose a eatrongëne la nöje Isaraela qa Aigupito, hnei angatr palahi hna eetr. Hnei Mose hna öhne la aqane xomihni ahoeanyi Iehova la nöje i Nyidrë, hna thapa qa ngöne la ithahluë. (Sal. 78:40-43) Hnei Mose mina fe hna öhne la aqane hni ka ipië Iehova. Hnei Mose hna sipo Iehova matre tha tro kö a apatrene la nöje i Nyidrë, nge hnei Nyidrëti hna dreng.—Eso. 32:9-14.

9. Thenge la Heberu 11:27, tune kaa la aqane imelekeu i Iehova me Mose?

⁹ Thupene la tronge i angetre Isaraela, catrecatre la aqane imelekeu i Mose me Iehova, kösë öhnyi Iehova hi hnei Mose. (E jë la Heberu 11:27.) Öni Tusi Hmitrötr göne la aqane imelekeu i nyidro: “Hnei Iehova hna itö ineqë me Mose tune lo ate a ithanata memine la sine i angeic.”—Eso. 33:11.

10. Nemene la nyine tro sa kuca matre troa atrepengöi Iehova hnyawa?

 ¹⁰ Nemene la ini koi së? Maine easa ajane troa atrepengöi Iehova hnyawa, nyipiewekë tro sa atre la itre thiina i Nyidrë, me kuca la aja i Nyidrë. Iehova a ajane tro “la nöjei pengön atr a mel, me atrehmekune hnyawa la nyipici.” (1 Tim. 2:3, 4) Ame la ketre aqane tro sa kuca la aja i Iehova, tre, troa inine la itre atr la pengöi Nyidrë.

11. Pine nemene matre easa atrepengöi Iehova hnyawa ngöne la easa inine la itre atr?

¹¹ Ame la easa inine la pengöi Iehova kowe la itre xan ke, easë hi lai a atrepengöi Nyidrëti hnyawa. Easa öhne la aqane utipine Iehova, ngöne la Nyidrëti a upi së kowe la itre ka thele Nyidrë. (Ioane 6:44; Itre hu. 13:48) Ketre, ka hetre menene la Tusi Hmitrötr ke, ej a xatuane la itre ka ini tus troa xometrije la itre thiina ka ngazo me saze. (Kol. 3:9, 10) Ketre, Iehova a xomihni ahoeane la itre atr ne la teritoare së. Nyidrëti palahi a upi së troa xatua angatr troa atrepengöi Nyidrëti hnyawa, me amele angatr.—Rom. 10:13-15.

12. Thenge la Esodo 33:13, nemene la hna sipone hnei Mose, nge pine nemen?

¹² Hnei Mose hna wangatrune la aqane imelekeu i angeic me Iehova. Hnei Iehova hna aijijë Mose troa kuca la itre huliwa ka tru. Celë hi matre, atrepengöi Iehova hnyawa hi hnei Mose. Ngo hnei Mose palahi hna sipo Iehova troa xatua angeic troa atrepengöi Nyidrëti hnyawa. (E jë la Esodo 33:13.) Traqa koi 80 lao macatre i Mose lo angeic a sipone lai koi Iehova. Ame pe, atre hnyawa hi angeic laka, hetre nyine tro palakö angeic a inine göi Iehova.

13. Nemene la ketre aqane tro sa amamane laka, easa wangatrune la aqane imelekeu së me Iehova?

¹³ Nemene la ini koi së? Ngacama ekö hë së nyihlue i Iehova, ngo tha tro pi kö sa mekun ka hape, atrepengöi Iehova hnyawa ha së. Ame la ketre aqane tro sa wangatrune la aqane imelekeu së me Iehova, tre, ene la troa catre ithanata me Nyidrë ngöne la thith.

14. Pine nemene matre ame la easa thith, easa atrepengöi Iehova hnyawa?

¹⁴ Maine easa ajane troa nyisineene la ketre atr, nyipiewekë tro palahi sa ithanata me angeic. Celë hi matre, easa acatrene la aqane imelekeu së me Iehova ngöne la easa catre thith. Easa qaja asë la itre mekuna së me itre aliene hni së. (Efe. 6:18) Öni Krista qa Turquie: “Ame la eni a qaja koi Iehova ngöne la thith la itre mekunang, me öhne la aqane xatua ni hnei Nyidrë, tre, kola kökötre la ihniming nge kolo fe a acatrene la lapauneng koi Nyidrë. Catrecatre la aqane imelekeung me Iehova ke, Nyidrëti la Kemeng me Sineeng.”

15. Nemene la hna qaja hnei Iehova göi Dravita Joxu?

¹⁵ Hna hnaho Dravita joxu ngöne la ketre nöje ka nyihlue i Iehova. Ngo tha celë kö la kepin matre Dravita a hane atrunyi Iehova. Hnei Dravita hna ketre sipu thel troa acatrene la aqane imelekeu i nyidrëti me Iehova. Nge tru la ihnimi Iehova koi Dravita. Hnei Iehova hna qaja ka hape, Dravita la “atre amadrinëne la hni [Nyidrë].” (Itre hu. 13:22) Pine nemene matre catrecatre la aqane imelekeu i Iehova me Dravita?

16. Nemene la hna ini Dravita göi Iehova hnene la itre hna xup?

¹⁶ Hnei Dravita hna thel troa atrepengöi Iehova, jëne la itre hna xup. Ame lo Dravita a thöth, nyidrëti palahi ngöne la hnapapa matre troa thupëne la itre mamoe ne la  keme i nyidrë. Maine jë, hnei nyidrëti e cili hna lapa mekun la itre ewekë hna xup hnei Iehova. Ame la Dravita a gala draië, nyidrëti a goeëne la itre thauzane lao wëtresij, me öhne la itre thiina ne la Atre Xup. Öni Dravita: “Kola amamane la lolo i Akötesie hnene la hnengödrai; nge ame la ngöne ka ishaisha, te, ate amamane la huliwa ne la lue themie i nyidë.” (Sal. 19:1, 2) Ame la Dravita a goeëne la aqane xupe la atr, nyidrëti a öhn la inamacane i Iehova. (Sal. 139:14) Ketre, nyidrëti fe a öhn laka, ka draië catre kö Iehova hui nyidrë.—Sal. 139:6.

17. Nemene la hne së hna troa inine qa ngöne la itre hna xup?

¹⁷ Nemene la ini koi së? Loi e tro fe sa goeëne la itre hna xup. Loi e tro sa xomi ijin, matre troa goeëne me hain la nöjei ewekë hna xup hnei Iehova. Tro sa thele troa atrepengöi Iehova jëne la itre hna xup, tune la itre feja me itre öni me itre atr. Tro hë sa atre me easenyi catre trootro koi Iehova. (Rom. 1:20) Nge tro fe ha kökötre la ihnimi së koi Iehova.

18. Thenge la Salamo 18, nemene la hna atrehmekune hnei Dravita?

¹⁸ Xecie hnyawa koi Dravita laka, Iehova palahi a xatua nyidrë. Atre hi Dravita laka, Iehova la ka xatua nyidrë troa humuth la liona me bea ka thel troa öni la itre mamoe. Ketre, öhne fe hi Dravita laka, ce Iehova me nyidrë ngöne lo nyidrëti a ngaa Goliatha. (1 Sam. 17:37) Nge atre hi Dravita laka, ce Iehova me nyidrë ngöne lo nyidrëti a kötre Saulo joxu. (Sal. 18, texte de présentation du Psaume) Maine ka pi tru ju Dravita, tro nyidrëti a qaja ka hape, nyidrëti a kuca la itre ewekë cili jëne la sipu trengecatre i nyidrë. Ngo pine laka ka hni ka ipië Dravita, atre hi nyidrëti laka, Iehova la ka thupëne la mele i nyidrë—Sal. 138:6.

19. Nemene la ini hne së hna xom qa ngöne la tulu i Dravita?

¹⁹ Nemene la ini koi së? Tha tro hmekuje kö sa sipo ixatua koi Iehova. Loi e tro fe sa atrehmekune la ijin me aqane xatua së hnei Nyidrë. Maine tro sa hni ka ipië, tro hë sa trotrohnin laka, Iehova la ka xatua së. Thatreine kö së troa kuca la nöjei huliwa asë ke, hna nyi ifegone la hne së hna atrein. Eje hi, ame la nöjei ijin, easa öhn la ixatua i Iehova, tro hë lai a acatrene la aqane imelekeu së me Nyidrë. Celë hi hna öhne hnei Isaac, trejin me easë qa Fidji, nge ka nyihlue i Iehova a nyimu macatre hë enehila. Öni angeic: “Ame la eni a goeëne la meleng, atre hnyawa hi ni laka, hnei Iehova hna xatua ni, qa ngöne lo eni a nyiqaane ini tus utihë enehila. Xecie hnyawa koi ni laka, ka mele Iehova Akötresie.”

20. Nemene la ini hne së hna xom qa ngöne la aqane imelekeu i Dravita me Iehova?

²⁰ Hnei Dravita hna xome la itre thiina i Iehova. Hnei Iehova ekö hna xupi së hnaiji Nyidrë. Celë hi matre, ijije hi tro sa nyitipu Nyidrë. (Gen. 1:26) Eje hi, maine tro sa thele troa atrepengöne hnyawa la itre thiina i Iehova, tro hë sa atreine nyitipu Nyidrë. Atre hnyawa hi Dravita ekö la pengöi Iehova, Keme i nyidrëti e koho hnengödrai. Celë hi matre, hnei Dravita hna nyitipu Iehova ngöne la nyidrëti a nyihnyawane la mele ne la itre xan. Hanawang la ketre ceitun. Nyipici laka, hnei Dravita hna ngazo xajawa i Iehova. Hnei nyidrëti a nyixetë me Batheseba me nyijëne matre troa humuthe la föi eahlo. (2 Sam. 11:1-4, 15) Ngo hnei Iehova hna hnimi Dravita ke, hnei nyidrëti hna hnime la itre xan. Catrecatre la aqane imelekeu i Dravita me  Iehova. Celë hi matre, nyidrëti hi la ketre Joxu hna hnime hnei angetre Isaraela. Nge hnei Iehova hna upe la itre xaa joxu troa xötrethenge la tulu i Dravita.—1 Ite jo. 15:11; 2 Ite jo. 14:1-3.

21. Thenge la hna qaja ngöne Efeso 4:24 me 5:1, nemene la thangane e tro sa “nyitipu Akötresie”?

²¹ Nemene la ini koi së? Loi e tro sa “nyitipu Akötresie.” Nyipici laka, hetre thangane e tro sa nyitipu Nyidrë. Easa amamane laka, easë palahi a thel troa atrepengöi Iehova hnyawa. Nge ame la easa eënyine la itre thiina i Nyidrë, easa amamane koi itre xan, laka, easë la itre nekö i Akötresie.—E jë la Efeso 4:24; 5:1.

22-23. Nemene la thangan e tro palahi sa thel troa atrepengöi Iehova hnyawa?

²² Ijije hi tro sa atrepengöi Iehova hnyawa jëne la nöjei ewekë hnei Nyidrëti hna xup, me jëne la Tusi Hmitrötr. Nyimutre la itre tulu hna amë e hnine la Tusi Hmitrötr, tui Mose me Dravita, nge ijije hi tro sa nyitipu angatr. Hnei Iehova hna kuca la hnëqa i Nyidrë. Celë hi matre, loi e tro fe sa kuca la hnëqa së, me thele troa atrepengöi Nyidrëti hnyawa.

²³ Loi e tro palakö sa thele troa atre Iehova hnyawa. (Ate cai. 3:11) Ame la ka nyipiewekë ke, tha ene hmekuje kö la hne së hna atre göi Iehova, ngo ene la hne së hna kuca matre troa atrepengöi Nyidrëti hnyawa. Maine tro sa trongëne la itre hne së hna inin, me thele troa nyitipu Iehova, Keme së ka tru ihnimin, tro hë Nyidrëti a easenyi catre koi së. (Iako. 4:8) Jëne la itre trengewekë i Nyidrë, Iehova a qaja kowe la itre ka thele Nyidrëti ka hape, tha tro jë kö Nyidrëti a nuetriji angatr.