Ohea. Tha hnei Diabolo kö hna qaja ka hape, maine tro Eva a xen la wene sinöe, tro angeic a mec nge tro palakö la u a mel (kolo ini ka hape, e meci hë la atr, mele pe kö la u.) Öni Satana jëne la un ka hape, maine tro Eva a xen la wene sinöe, ‘tha tro jë kö angeic a mec.’ Hnei Satana hna thoi ka hape, tro palakö Eva a mele madrin e celë fen, nge tha tro hmaca kö angeic a lapa fene la musi Akötresie.—Gen. 2:17; 3:3-5.

Tha hna nyiqane kö e Edena la ini ka hape, e meci hë la atr, mele pe kö la u. Haawe, drei la qaane la ini cili? Thatre kö së. Atre hi së laka, hna lep apatren la nöjei hmi ka thoi hnene la Iwë Atraqatr, ngöne lo ijine i Noa. Pëkö ini ka thoi ka lapa pe thupene la Iwë Atraqatr. Noa hi me hnepe lapa i nyidrë la ka mel, matre hna lapa pe hi la nyipi hmi.

Haawe, hna nyiqane qaja la ini cili thupene la Iwë Atraqatr. Ame lo Akötresieti a amenune la itre qene hlapa e Babela, hna “aisa ijenyi [la itre atr] qa lai e cailo fene hnengödrai asë.” Maine jë, ka mejiune hë angatr kowe la ini cili. (Gen. 11:8, 9) Thatre kö së la qaane la ini cili. Ngo xecie hnyawa koi së laka, Satana Diabolo, “keme ne la thoi,” la ka nyiqan, nge madrine catr angeic ke, hna haöthe la fen asë hnene la ini cili.—Ioane 8:44.