1-2. (a) Nemene la Iubeli? (Wange ju la hna eköhagen hna hape, “ Nemene La Iubeli?”) (b) Nemene la hnei Iesu hna qaja ngöne Luka 4:16-18?

AME ngöne la itre xaa nöj, kola feetëne la 50 lao macatre ne musi ne la ketre joxu maine isola. Kola hëne lai, ka hape, Iubeli. Ame ngöne la ijin cili, ijije hi troa feet koi caa drai maine caa wiik maine troa aqeane pena. Ngo tro kö a traqa la ijin troa nyipun, nge troa canga thëthëhmine hnene la itre atr.

² Tro sa ce wang la ketre Iubeli ka sisitria hune la itre Iubeli ekö e Isaraela. Ketre Iubeli ka thepe angetre Isaraela. Pine nemene matre nyipiewekë tro sa atre la pengöne la Iubeli? Pine laka, kola amekunë së la ketre ewekë hna kuca hnei Iehova thatraqai së. Kola qaja la kola thepe së me amele së epine palua. Ijije fe hi tro sa kepe thangane enehila. Hnei Iesu hna qaja la aqane amele së hnei Iehova.—E jë la Luka 4:16-18.

3. Thenge la Levitiko 25:8-12, nemene la thangane la Iubeli thatraqai angetre Isaraela?

³ Eje hi, maine tro sa pane ce wange la Iubeli hna hnëkëne hnei Iehova thatraqane la nöjei Nyidrëti ekö, tha jole kö koi së troa trotrohnine la hna qaja hnei Iesu, göne lo ijine kola amelene la nöj. Öni Iehova koi angetre Isaraela: “Nge tro nyipunie a ahmitötëne la macate ka luate nge luepi (50) me amamane la troa shenge e cailo nöje koi angete lapan’ ej; tro ej’ a Iubeli thatraqai nyipunie; nge tro nyipunie a isa hmaca kowe la ite zi nyipunie, me isa hmaca kowe la ite lapa i nyipunie.” (E jë la Levitiko 25:8-12.) Ame ngöne lo tane mekun hnapan, hne së hna ce wange la itre eloine hna kapa hnei angetre Isaraela, göne la Sabath. Nemene la eloine la Iubeli koi angatr? Pane mekune jë së la atre Isaraela ka tru gufa. Nyipiewekë tro angeic a salemëne la itre götrane zi angeic, matre troa të la itre gufa i angeic. Nge ame ngöne la  ijine kola Iubeli, ke kolo hmaca a hamëne koi angeic “la ite zi” angeic, matre tro pëhë la itre matra i angeic a hetrenyi la götrane cili. Maine jë, tru palaha la gufa ne la ketre trahmany, matre hnei angeic hna sipu salemë angeice kö maine pena ketre nekö i angeic. Ame ngöne la Iubeli, tre, nyipiewekë tro la hlue a bëeke kowe la “lapa i [angeic].” Kola amamane laka, hetre mejiune ne la hlue, ke tha ka cile huti kö la troa nyihlue! Iehova a hnehengazone la nöje i Nyidrë!

4-5. Pine nemene matre nyipiewekë tro sa atrepengöne hnyawa la Iubeli ekö?

⁴ Nemene la ketre eloine la Iubeli? Öni Iehova: “Pëkö ate pë ewekë thei ’ö, ke tro Iehova a nyipi amanathithinyi ’ö ngöne la nöje hnei Iehova Akötesi ’ö hna hamëne koi ’ö nyine zi ’ö mate hetenyi ej.” (Deut. 15:4) Ka isapengöne catr me enehila! Pine laka, itre trenamo palahi a thele mo, nge kolo palahi a tru catr hnei ka puafala.

⁵ Itre Keresiano së, matre tha ka nyipiewekë kö koi së troa drengethenge la wathebo i Mose. Eje hi, tha easë hmaca kö a trongëne la wathebo göne la Iubeli laka, kola nue la itre hna thahluën, me të asë la itre gufa, me hamëne hmaca la itre götrane ne la fami. (Rom. 7:4; 10:4; Efe. 2:15) Ngo nyipiewekë tro sa atrepengöne hnyawa la aliene la Iubeli. Kola amele së me amekunë së la hna kuca ekö hnei Iehova thatraqai angetre Isaraela.

6. Pine nemene matre nyipiewekë troa amele së?

⁶ Nyipiewekë troa amele së pine laka, itre atr ka ngazo së, matre kola hnöthi së me thahluë së hnene la ngazo. Celë hi matre, easa qatre trootro me wezipo me mec. Easa öhne lai ngöne la easa goeëne la iqëmeke së ngöne ithulu, maine ngöne la easa wai droketre. Ame itre xaa ijin, easa kucakuca, pine laka, easa kuca la itre ewekë ka ngazo. Öni Paulo aposetolo: “Hna hnöthi [nyidrë], me nue [nyidrë] kowe la wathebo ne la ngazo ka eje ngöne la ngönetre i [nyidrë].” Nge öni nyidrëti fe: “Ekölö pe ni atr ka ngazo, drei la ka troa amele ni qa ngöne la ngönetrei celë ka troa mec?”—Rom. 7:23, 24.

7. Nemene la hna perofetan hnei Isaia göne la aqane troa amelene la itre atr?

 ⁷ Eloine pe, hnei Akötresieti hna kuca la ketre ewekë matre troa amele së qa ngöne la ngazo. Iesu hmekuje hi la ka ijije troa thepe së qa ngöne lai. Ame ngöne lo 700 lao macatre qëmekene troa traqa hnei Iesu e celë fen, hnei Isaia hna perofetan, ka hape, ka sisitria catre kö la aqane troa amelene la itre atr elany, hune lo aqane amele angetre Isaraela ekö jëne lo Iubeli. Öni Isaia: “Eje hunge la Uati Joxu Iehova qa ngöne laka hnei Iehova hna sië ni troa cainöjëne la maca ka loi kowe la ite ka aköt; hnei nyidëti hna upi ni troa atuthe la itete thë fë hni, nge troa thinge mele koi ite po.” (Is. 61:1) Thatraqai drei la hna perofetane celë?

8. Thatraqai drei la hna perofetane hnei Isaia?

⁸ Hna eatre la hna perofetane celë, ngöne lo Iesu a nyiqaane cainöj. Ame lo Iesu a tro kowe la sunago e Nazareta, hnei nyidrëti hna e koi angetre Iudra, la hnei Isaia hna perofetan. Hnei Iesu hna qaja, ka hape: “Eje hung la uati hmitrötr i Iehova, ke hna ië ni troa cainöjëne la maca ka loi koi itre ka pë ewekë. Nge hna upi ni fe troa qaja kowe la itre hna akalabusin ka hape, troa nue angatre hmaca, nge tro ha goe la itre timek, me mele la itre ka akötr, nge hna upi ni fe troa cainöjëne la macatre ne troa amanathithi angatre hmaca hnei Iehova.” (Luka 4:16-19) Nemene la aqane eatr la hnei Iesu hna perofetan?

9. Nemene la hna ajane ekö hnene la itre atr ngöne la hneijine i Iesu?

⁹ Ame ngöne lo hneijine i Iesu, hnei nyidrëti hna e la hna perofetane hnei Isaia, nge alanyimu la itre atr ka kepe thangan. Celë hi matre, ijije hi tro sa hane mejiune kow ke, öni Iesu: “Eatre hë enehila la hna cinyihane celë hnei nyipunie hna dreng.” (Luka 4:21) Alanyimu la itre ka mejiun thei angatr, laka, troa thepe angatr qa ngöne la musi angetre Roma. Maine jë, caasi hi la mekuna i angatr memine la lue trahmany, lo nyidroti a hape: “Eahuni a mejiun laka, tro la atre cili a amele Isaraela.” (Luka 24:13, 21) Ngo atre hnyawa hi së, laka, tha hnei Iesu kö hna upe la itretre drei nyidrë, troa icilekeu memine la musi ka catre i angetre Roma. Hnei nyidrëti pe hna upi angatr troa hamëne “koi Kaisara la ewekë i Kaisara.” (Mat. 22:21) Haawe, nemene la aqane amelene la itre atr hnei Iesu ngöne la hneijine i nyidrë?

10. Tune kaa la aqane amelene Iesu la itre atr?

¹⁰ Hnei Iesu, Nekö i Akötresie, hna amelene la itre atr qa ngöne la lue ewekë. Ame la hnapan, hnei Iesu hna amelene la itre atr qa ngöne la itre ini ka thoi ne la itre  hene ne hmi. Ame ngöne la ijine cili, hna musinëne la itretre Iudra troa xötrethenge la itre wathebo i atr memine la itre ini ka thoi. (Mat. 5:31-37; 15:1-11) Ame itre xan, angatr a qaja ka hape, angatr a xatuane la itre atr troa nyihlue i Akötresie, ngo tha pane nyiqane kö angatr thei angatr. Angatr a tune la itre ka timek. Angatr a nuetrije la Mesia memine la nyipici hnei nyidrëti hna tro fë. Celë hi matre, thatre Akötresieti hnyawa kö hnei angatr, nge tha hna nue kö la itre ngazo i angatr. (Ioane 9:1, 14-16, 35-41) Hnei Iesu hna inine la nyipici me amamai tulu. Hnei nyidrëti fe hna amamane kowe la itre ka hni ka ipië la nyine kuca, matre troa thepe angatr qa ngöne la itre ini ka thoi.—Mar. 1:22; 2:23–3:5.

11. Nemene la hnaaluene ewekë hna kuca hnei Iesu matre troa amele së?

¹¹ Ame la hnaaluen, hnei Iesu hna amelene la itre atr qa ngöne la ngazo me mec. Hnei Iesu hna nue la mele i nyidrë thatraqai së. Celë hi matre, Iehova a köletrije la ngazo ne la itre atr ka lapaune koi Nyidrë, me kowe la thupene mel, ene la itre atr ka amamane la lapaune i angatr ngöne la nöjei ewekë hna kuca. (Heb. 10:12-18) Öni Iesu: “Maine tro la nekön a nue xecië nyipunie, ka mele hë nyipunieti lai.” (Ioane 8:36) Ketre aqane iamele ka sisitria catre kö hune lo aqane amele angetre Isaraela ekö ngöne lo Iubeli! Ame la atr hna amelene ngöne lo ijine Iubeli, ke tro hmaca kö a thahluë angeic, nge tro angeic a mec. Ngo ame la atr hna amelene hnei Iesu, ke tro angeic a mel epine palua.

12. Drei la itre ka pane kepe thangane qa ngöne la hna iamele, tune lo hna qaja hnei Iesu?

¹² Ame ngöne lo Penetekos 33 M.K., hnei Iehova hna siëne hnei uati hmitrötr la itre aposetolo me itre trahmany me föe ka mele nyipici koi Nyidrë. Itre nekö i Nyidrëti hë angatr ke, hnei Nyidrëti hna amele angatr matre troa ce musi me Iesu e koho hnengödrai. (Rom. 8:2, 15-17) Angatre hi la itre ka pane kepe thangane qa ngöne la iamele, tune lo hnei Iesu hna e ngöne la sunago e Nazareta. Tha hna othi angatre hmaca kö hnene la itre ini ka thoi ne la itre hene ne hmi angetre Iudra, me itre hna majemin ka ifeketh memine la Tusi Hmitrötr. Ame koi Iehova, pëkö ewekë ka othi angatr, pine laka, hna thepe angatr qa ngöne la ngazo me mec. Hna eatre lai ngöne lo Nyidrëti a siëne la itretre drei Keriso lo macatre 33 M.K, nge troa nyipune thupene la Caa Thauzane Lao Macatre Ne Musi Iesu. Nemene la itre manathith enehila hne së hna kapa utihë  la troa nyipun elany la Musi Iesu Ka Caa Thauzane Lao Macatre?

13-14. Drei la itre xane ka troa kapa la itre manathith, qa ngöne la iamele tune lo hna qaja hnei Iesu?

¹³ Ame enehila, itre milio lao atr qa ngöne la nöjei nöj ka hane sine la “itre xa mamoe.” (Ioane 10:16) Eje hi, tha hna ië angatre kö hnei Akötresie, matre troa ce musi me Iesu e hnengödrai. Ngo angatre pe a troa mele epine palua e celë fen. Hapeu, easë kö a hane mejiune kowe lai?

¹⁴ Ngo ijije hi tro sa kepe thangane qa ngöne la itre ewekë hna hetrenyi hnene la itre hna iën. Ijije hi tro sa sipo Iehova troa köletrije la itre ngazo së, pine laka, easa lapaune kowe la thupene mel. Celë hi matre, kola kepe së hnei Akötresie, nge tingetinge hë la mele së. (Efe. 1:7; Hna ama. 7:14, 15) Loi e tro palahi sa mekune la itre manathith pine laka, kola thepe së qa ngöne la itre ini ka thoi. Celë hi matre, öni Iesu: “Tro hë nyipunieti a atre la nyipici, nge tro la nyipici a nuamele nyipunie.” (Ioane 8:32) Drei la madrine së, pine laka, hna amele së!

15. Nemene la itre manathith hne së hna troa kapa elany?

¹⁵ Easenyi hë troa amele së. Iesu a troa apatrene la hmi ka thoi memine la itre musi ka kuca la itre ewekë ka tha meköti kö. Ketre, tro Iehova Akötresieti a thupëne la ka “ala nyimu atraqatr” ka nyihlue i  Nyidrë, nge tro angatr a kapa la itre manathithi ngöne la paradraiso e celë fen. (Hna ama. 7:9, 14) Ketre, alanyimu la itre atr hna troa amelene hmaca, nge troa thepe angatr qa ngöne la ngazo i Adamu.—Itre hu. 24:15.

16. Nemene la manathithi hna troa kapa hnene la itre atr elany?

¹⁶ Ame ngöne la Musi Iesu Ka Caa Thauzane Lao Macatre, tro nyidrë memine la itre ka ce musi me nyidrë a xatuane la itre atr, matre tro angatr a pexej me acatrene la aqane imelekeu i angatr me Iehova. Ame la ijine cili, ke, kösë tune lo Iubeli ekö e Isaraela. Kolo lai a hape, troa pexeje la nöjei hlue i Iehova ka mele nyipici, nge tha tro kö angatr a kuca la ketre ewekë ka ngazo.

17. Nemene la hna qaja ngöne Isaia 65:21-23, göne la hna troa kuca hnene la nöje i Iehova? (Wange ju la pane iatr.)

¹⁷ Kola qejepengöne la mel elany, hnene la tusi Isaia 65:21-23. (E jë.) Ngo tha kolo kö lai a hape, tro hi sa lapa nge pëkö hne së hna troa kuca. Kola qaja hnei Tusi Hmitrötr ka hape, tro la nöje i Iehova a madrine troa huliwa. Ame la kola troa nyipune la Musi Iesu Ka Caa Thauzane Lao Macatre, easa mejiune laka, “tro ha nuamacane la itre atr qa ngöne la hna othe hnene la ka hnyeqetr, kowe la hna nue gufane ka hadrehadreu ne la itre nekö i Akötresie.”—Rom. 8:21.

18. Pine nemene matre easa mejiune laka, tro sa madrin elany?

¹⁸ Eje hi, hnei Iehova ekö hna aijijë angetre Isaraela troa huliwa me mano. Tro fe Nyidrëti a hane kuca tune lai koi së fene la Musi Iesu Ka Caa Thauzane Lao Macatre. Nge tro fe a nue ijine koi së troa atrunyi Iehova. Ketre ewekë lai ka sisitria, nge ka troa thue madrine së. Tro la nöjei atr a atrunyi Iehova ngöne la fene ka hnyipixe. Tro ha madrin elany fene la Musi Iesu Ka Caa Thauzane Lao Macatre, pine laka, easa madrine troa huliwa me nyihlue i Akötresie.