Ame ngöne Deuteronomi 22:25-27, kola qaja la ketre wathebo. Tha hna kuca kö la wathebo celë matre troa anyipicine laka, zöi trahmany ke, atre hi së ka hape, zöi angeic. Hna kuca pe matre troa cilëgöline la jajiny. Hanawang la ka traqa.

Ame ngöne la itre pane xötr, kola qaja la ketre trahmany ka ce meköl memine la ketre jajiny ka troa faipoipo “ngöne la lapa.” Hna upezöne la trahmany ka hape, angeic a nyixetë ke, kösë ka faipoipo hë la jajiny. Tune kaa koi jajiny? “Tha hnei nyëne hna hoköt, nge eje ngöne la lapa.” Maine hnei angeic hna sue, troa drei angeic hnene la itre xan nge angatr a troa isigöli angeic. Ngo pine laka, tha hnei angeice kö hna sue, matre hnei angeice fe hna nyixetë. E cili, zöi nyidroti hi.—Deut. 22:23, 24.

Hanawang la ketre ewekë hna qaja ngöne la Wathebo: “Nge maine kete trahmany’ a öhne ngöne la hnehlapa la jajinyi ka hmala kete, me xölehuji angeice hnene la trahmany, me ce meköle me angeic, tro hi a meci hmekuje la trahmany’ ate angazo angeic; ngo tha tro kö a kuca la kete ewekë kowe la jajiny; pëkö ngazo i jajinyi mate meci fe; ke ame la ewekë celë, te, tune la ate kola shepëpi kowe la ate lapa eashenyi nyëne me humuthi angeic; ke hnei nyëne hna öhnyi angeice ngöne la hlapa, nge hna hoköte hnene la jajinyi ka hmala la kete, ngo pëkö ate troa amele angeic.”—Deut. 22:25-27.

E cili, itretre huuj a mejiune kowe la jajiny. Kola hapeue lai? Angatr a mejiune laka, “hna hoköte hnene la jajiny [...], ngo pëkö ate troa amele angeic.” Haawe, tha hnei angeice kö hna nyixetë. Ngo trahmanyi la ka angazone la jajiny me nyixetë ke, hnei nyidrëti hna “xölehuji angeic [...], me ce meköle me angeic.”

Haawe, hnene la wathebo cili hna cilëgöline la föe, me upezöne la trahmany ka hape, ka angazo föe me nyixetë. Eje hi, hnene la itretre huuj hna “thele hnyawa” me axecië mekun thenge la itre hna amekötin hnei Akötresie.—Deut. 13:14; 17:4; Eso. 20:14.