HAPEU, hetre hni ne ole i epuni kö? Nyipiewekë tro sa isa mekune la hnying celë. Tusi Hmitrötr a perofetan laka, ame ngöne la hneijine së, alanyimu la itre atr ka troa “huja nonony.” (2 Tim. 3:2) Maine jë, ase hë së ixelë memine la itre ka mekun laka, meköti hi e tro la itre xan a hamë ewekë koi angatr. Ame koi angatr, tha nyipiewekë kö troa hetre hni ne ole. Eje hi, tha ajane kö së troa ce tro memine la itre atr ka ujë tune lai.

Tha celë kö la aqane ujë ne la itre hlue i Iehova. Hna ini angatr troa “amamane la hni ne ole i [angatr],” me “olene la nöjei ewekë asë.” (Kol. 3:15; 1 Thes. 5:18) Hanawang la itre kepin, matre nyine loi koi së troa hetre hni ne ole.

Ka loi koi së troa hetre hni ne ole ke, kola xatua së troa sipu amadrinë së kö. Ame la easa ole, easa madrin nge madrine fe la atr hne së hna olen. Pine nemen? Drei la ketre ceitun. Ame la ketre atr a xomi ijine koi së ke, angeice lai a amamane laka, angeic a wangatrunyi së. Angeic a nyipiewekë së, matre easa madrin. Celë hi ka traqa koi Rutha. Hnei Boaza hna hnimi Rutha. Nge madrine catre Rutha la eahlo a öhn laka, hetre ka thupë eahlo me wangatrunyi eahlo.—Rutha 2:10-13.

Nyipiewekë tro fe sa hetre hni ne ole koi Akötresie. Maine jë, hne së hna hane mekun la itre manathith hne së hna kapa qaathei Nyidrë. (Deut. 8:17, 18; Itre hu. 14:17) Eje hi laka, easa haine la thiina ka loi Akötresie. Ngo loi e tro fe sa xomi ijin, matre troa lapa mekun la aqane amanathithi së hnei Nyidrë me itre sinee së. Maine tro sa lapa mekun la aqane ham ne la Atre Xupi së, tro ha acatrene la ihnimi së koi Nyidrë. Ketre, tro hë sa mejiun laka, Nyidrëti a hnimi së me wangatrunyi së.—1 Ioane 4:9.

Ngo tha tro hmekuje kö sa mekun la itre manathith qaathei Akötresie; loi e tro fe sa olene koi Iehova la ihnimi Nyidrë. (Sal. 100:4, 5) Eje hi, “ame la easa olene kowe la itre xan, easë hi lai a amadrinë angatr.”

Ka loi koi së troa hetre hni ne ole ke, kola acatrene la aqane imelekeu së memine la itre sinee së. Madrine catre së la kola hnimi së hnei itre xan. Ame la easa olene kowe la ketre atr, kola acatrene la aqane imelekeu së me angeic. (Rom. 16:3, 4) Ketre, ame la itre ka hetre hni ne ole, tre, angatr a xatuane la itre xan. Öhne hi angatr la aqane loi thiina koi angatr, nge celë hi ka upi angatr troa ketre thiina ka loi koi itre xan. Nge easa madrine ngöne la easa xatuane la itre xan. Celë hi lo hna qaja hnei Iesu, ka hape: “Sisitria catre kö la madrine ne la atre ham, hune la atre kapa.”—Itre hu. 20:35.

Hnei Robert Emmons, ketre atre elemekene la Université de Californie, hna ithel göne la aqane troa hetre hni ne ole. Öni nyidrë: “Maine easa ajane troa hetre hni ne ole, nyipiewekë tro sa trotrohnine laka, ame itre xaa ijin, easë la ka hamën, ngo ame e ketre ijin, easë pena la ka kapa.” Eje hi, ka nyipiewekë la hna kuca hnei itre xan, maine easa ajane troa mele madrin. Drei la ketre ceitun. Angatr a hamë xen koi së maine xatua së ngöne la easa wezipo. (1 Kor. 12:21) Ame la atr ka hetre hni ne ole, tre, ka tru koi angeic la hna kuca hnei itre xan. Hapeu, ka majemine kö së olene kowe la hna kuca koi së hnei itre xan?

Ame la ketre kepin matre, ka loi koi së troa hetre hni ne ole ke, celë hi ka xatua së troa mekune hi la ka loi. Ame la itre mekuna së, tre, ceitune hi memine la nyine pase kofi. Itre ej a apatrene la itre mekun ka ngazo, nge lapa pe hi la itre mekun ka loi. Easa lapa mekun la itre ewekë ka hamë madrine koi së, nge tha nyipiewekë hë la itre jol. Maine tro sa hetre hni ne ole, tro hë sa öhn la itre ewekë ka loi, nge celë hi ka troa acatrene hmaca la hni ne ole së. Maine tro sa thele kepin matre troa ole, tro hë lai a xatua së troa kuca lo hna qaja hnei Paulo aposetolo, ka hape: “Madrine jë thei Joxu.”—Fil. 4:4.

Ame la easa hetre hni ne ole, tre, kola thupë së qa ngöne la itre mekun ka ngazo. Eje hi, jole catre troa hetre hni ne ole, e easa meciun, maine hleuhleu, maine elëhni pena. Ketre, tha ka hni koi manie kö la itre ka hetre hni ne ole. Angatr a mejihnine la hna hetreny. Tha angatre kö a thele catrëne la itre mo.—Fil. 4:12.

Ame easë itre Keresiano, atre hi së laka, Satana a ajane tro sa hleuhleu me kucakuca, pine la itre jol hne së hna cile kow, ngöne la itre drai hnapin. Tro angeic a madrin, e tro sa eetr me xom la ketre aqane ujë ka ngazo. E cili, tro ha jole kowe la itre atr troa drei së ngöne la easa tro fë la maca ka loi. Ame la easa hetre hni ne ole, easë hi lai a eënyine la wene la uati hmitrötre i Akötresie. Eje hi, easa madrin ngöne la easa öhn la hna kuca hnei Akötresieti koi së, nge easa lapaune kowe la itre hnei Nyidrëti hna thingehnaean.—Gal. 5:22, 23.

Ame easë itre hlue i Iehova, easa jelenyipicine la hna qaja ngöne la tane mekun göne la troa hetre hni ne ole. Ngo trotrohnine fe hi së laka, tha ka hmaloi kö troa hetre hni ne ole me mekune hi la ka loi. Ngo the kucakuca kö. Ijiji së hi troa hetrenyi la thiina cili. Tro sa tune kaa? Tro sa xomi ijin e nöjei drai, matre troa mekune la itre ewekë nyine tro sa olen. Tro hë sa hetre hni ne ole me madrin. Isapengöne kö memine la itre atr hna trany hnei jol. Pane mekune jë la itre ewekë hna kuca hnei Akötresie me itre xan, matre troa ithuecatre koi së, nge ka amadrinë së. Maine jë, tro sa sija ngöne pepa la itre ewekë cili. Tro sa sija e nöjei drai, la luetre maine köni ewekë hne së hna ajane troa olen.

Önine la itre ka inamacane ka hape, ame la easa majemine olene koi itre xan, kola saze la mekuna së. Nge easë ha mele madrin. Ka madrine la itre ka hetre hni ne ole. Haawe, pane mekune jë së la itre manathith hne së hna kapa, nge madrine jë, nge catre jë hetre hni ne ole! Tha tro kö sa mekun ka hape, meköti tro sa kapa la itre manathith cili. Loi e tro pe sa ‘ole koi Iehova, ke ka lolo Nyidrëti.’ Eje hi, “olene jë la nöjei ewekë asë.”—1 A. l. ite jo. 16:34; 1 Thes. 5:18.