1. Nemene la aqane goeëne la huliwa hnene la itre atr?

NEMENE la aqane goeëne la huliwa hnene la itre atr enehila? Ame ngöne la itre xaa nöj, itre atr a huliwa mec, matre pëhë ijine tro angatr a mano, me cememine la itre fami angatr, me thele troa atre Akötresie. (Ate cai. 2:23) Ame pena itre xan, xele kö angatr ma huliwa. Angatr a thele kepin matre tha tro kö a huliwa.—Ite edomë 26:13, 14.

2-3. Nemene la tulu hna hamën hnei Iehova me Iesu göne la aqane troa goeëne la huliwa?

² Isapengöne kö la aqane goeëne la huliwa hnene la itre atr, memine la aqane goeëne Iehova me Iesu. Ka catre huliwa Iehova. Öni Iesu: “Hnene pala hi la Kemeng hna huliwa uti hë enehila, nge tro pala hi ni a huliwa.” (Ioane 5:17) Pane mekune jë la itre hnei Iehova hna xup e celë fen me e koho hnengödrai, tune la itre angela me itre wëtresij me itre planètes. Önine la atre cinyihane la Salamo: “Iehova fe, nyimutepi hë la ite huliwa i cilie! Ase hë cilieti huliwan’ it’ ej’ asëjëihë hnene la inamacan; tiqa ha la fene hnengödrai hnene la tenge nyi cilie.”—Sal. 104:24.

³ Hnei Iesu hna nyitipune la Keme i nyidrë. Hnei Iesu hna ce huliwa me Iehova, ngöne lo ‘Nyidrëti a acatrene la hnengödrai.’ Nyidrëti hi la ka “atreine huliwa.” (Ite edomë 8:27-31) Ame lo Iesu e celë fen, hnei nyidrëti hna catre huliwa. Öni Iesu ka hape, kösë xen koi nyidrëti la huliwa hna ahnithe hnei Iehova. Hnene la itre huliwa i nyidrëti e celë fen hna anyipicine laka, nyidrëti hi la hna upe hnei Akötresie.—Ioane 4:34; 5:36; 14:10.

4. Nemene la ini hna hamën hnei Iehova me Iesu göne la troa pane mano?

 ⁴ Eje hi laka, hnei Iehova me Iesu hna catre huliwa. Ngo hapeu, kolo kö lai a hape, tha ka nyipiewekë kö troa mano? Ohea. Tha ka kucakuca kö Iehova, matre tha nyipiewekë kö tro Nyidrëti a hane mano. Ngo öni Tusi Hmitrötr ka hape, thupene la hnei Iehova hna xupe la hnengödrai me ihnadro, hnei Nyidrëti hna “lapa me mano.” (Eso. 31:17) Hnei Iehova hna pane mano me madrine la itre hnei Nyidrëti hna xup. Hnei Iesu mina fe hna catre huliwa e celë fen. Ngo hnei nyidrëti hna xomi ijine mano, me ce xen memine la itre sinee i nyidrë.—Mat. 14:13; Luka 7:34.

5. Nemene la jol hna cile kow hnene la itre hlue i Akötresie?

⁵ Tusi Hmitrötr a ithuecatre kowe la itre hlue i Akötresie troa catre huliwa, ngo tha tro kö a geny. (Ite edomë 15:19) Maine jë, easa huliwa matre troa hetrenyi la ka ijij kowe la fami së. Ketre, hnëqa së troa catre cainöjëne la maca ka loi. Ngo loi e tro fe sa xomi ijine mano. Hapeu, jole kö koi së troa tuluth la traem hne së hna xom, matre troa huliwa me cainöj me mano? Nemene la ka xatua së troa atreine tuluth la traem hne së hna xom koi maseta me koi ijine mano?

6. Thenge la Mareko 6:30-34, nemene la aqane amamane Iesu laka, ka atreine nyidrëti waiewekë göne la troa huliwa me mano?

⁶ Nyipiewekë troa atreine waiewekë göi huliwa. Öni Solomona joxu ka hape: “Hete pui ne la . . . nöjei huliwa asë.” Solomona a qaja la kola traa feja, me xupi uma, me treij, me hnyima, me fia, me itre xane ju kö. (Ate cai. 3:1-8) Ngo ame la lue ewekë ka sisitria ngöne la mele së, tre, troa huliwa me mano. Ka atreine waiewekë Iesu göne la troa huliwa me xomi ijine mano. Ame lo ange aposetolo a beëk qa hna cainöj, “pëkö ijine i [angatr] troa pane xen.” Öni Iesu: “Jë fe nyipunie, nge ce tro jë së kowe la ketre götrane gaa pë atr, matre tro sa pane mano.” (E jë la Mareko 6:30-34.) Ame itre xaa ijin, jole koi Iesu me itretre drei nyidrë troa xomi ijine mano. Ngo atre hi Iesu laka, nyipiewekë tro angatr a pane mano.

7. Pine nemene matre nyipiewekë tro sa atrepengöne la Sabath?

⁷ Ame itre xaa ijin, easa ajane troa pane mano maine saze aqane mele pena. Celë hi matre, hnei Iehova hna amekötin kowe la nöje i Nyidrëti ekö troa metrötrëne la Sabath. Tha easë hmaca kö fene la Wathebo i Mose, ngo hetre ini hne së hna xom qa ngöne la Sabath. Celë hi ka troa xatua së troa atreine waiewekë göne la huliwa me ijine mano.

8. Thenge la hna qaja ngöne Esodo 31:12-15, nemene la pengöne la Sabath ekö?

⁸ Tusi Hmitrötr a qaja ka hape, hnei Akötresieti hna umuthe la huliwa ne xupi ewekë e celë fen, thupene la hnaasikisine “drai.” (Gen. 2:2) Ngo aja i Iehova troa huliwa. Hnei Nyidrëti palahi “hna huliwa uti hë enehila.” (Ioane 5:17) Ame la troa metrötrëne la Sabath e nöjei wiik, tre, ceitune hi memine la Iehova a huliwa sikisi lao “drai.” Nge Nyidrëti a mano ngöne la hnaasevenene “drai.” Celë hi matre, hnei Iehova hna qaja koi angetre Isaraela troa mano ngöne la hnaasevenene drai. Ketre drai ka sisitria la Sabath koi Iehova me kowe la nöje Isaraela. Celë hi drai “nyine mano . . . , hmitöte koi Iehova.” (E jë la Esodo 31:12-15.) Hna wathebone kowe la  itre nekönatr me itre hlue me itre öni troa huliwa. (Eso. 20:10) Kola aijijën ekö la nöje Isaraela, troa pane wangatrune la itre huliwa i Iehova.

9. Nemene la itre trengathoi hna sile hnei itre xan göne la Sabath?

⁹ Ka sisitria catr ekö la Sabath kowe la nöje i Iehova. Ame ngöne la hneijine i Iesu, hnene la itre hene ne hmi hna acile menune la itre wathebo, göne la aqane troa metrötrëne la Sabath. Hnei angatr hna qaja ka hape, tha tro pi kö a ukekëth la itre wene qitr e Sabath, maine nyinyine pena la meci ne la atr ka wezipo. (Mareko 2:23-27; 3:2-5) Ngo tha celë kö la mekuna i Iehova. Celë hi matre, hnei Iesu hna qaja amamane la nyipici kowe la itre ka ajane troa drei nyidrë.

10. Nemene la hna qaja ngöne Mataio 12:9-12, göne la aqane goeëne Iesu la Sabath?

¹⁰ Hnei Iesu memine la itretre drei nyidrë hna pane mano ngöne la Sabath. Angatr a metrötrëne lo wathebo i Mose ekö thatraqane la nöje Isaraela. * Ngo hnei Iesu hna qaja me amamane laka, tha ka ngazo kö troa kuca la itre ewekë ka loi me xatua itre xan ngöne la Sabath. Öni nyidrë: “Meköt e troa kuca la loi ngöne la drai Sabath.” (E jë la Mataio 12:9-12.) Eje hi, ame koi Iesu, ijije hi tro sa kuca la loi e Sabath. Hnei Iesu hna amamane ngöne la nöjei huliwa i nyidrë, laka, trotrohnine hi nyidrëti la kepin matre Akötresieti a upe la nöj troa pane  mano e Sabath. Angatr a mano ngöne la Sabath, matre troa atrunyi Akötresie. Ame la hnepe lapa i Iesu, tre, hnei angatr hna metrötrëne la Sabath. Hane hi la hna qaja göi Iesu lo nyidrëti e Nazareta, kola hape: “Hna hetru [Iesu] ngön, nge nyidrëti a lö jë hnine la sunago tune lo hnei nyidrëti hna majemine e drai Sabath, me cile troa e la itre hna cinyihan.”—Luka 4:15-19.

11. Drei la ka amamai tulu ka lolo koi Iesu, göne la aqane troa catre huliwa?

¹¹ Hnei Iosefa hna ini Iesu troa tratrau sinöe. Hna ini nyidrëti fe la aqane goeëne Akötresieti la huliwa. (Mat. 13:55, 56) Hnei Iesu hna öhne la Iosefa a huliwa catr e nöjei drai thatraqane la hnepe lapa i nyidrë. Celë hi matre, öni Iesu kowe la itretre drei nyidrë: “Tro kö la atre huliwa a kapa la thupe i angeic.” (Luka 10:7) Eje hi, ka huliwa catre Iesu ekö.

12. Nemene la itre xötr ka amamane ka hape, troa huliwa catr?

¹² Ame Paulo aposetolo, tre, ketre ka huliwa catre nyidrë. Eje hi laka, ame la huliwa ka sisitria catr koi Paulo, tre, ene la troa qaja kowe la itre atr la pengö Iesu memine la itre ini qaathei nyidrë. Ngo hnei Paulo mina fe hna huliwa thatraqane la mele i nyidrë. Atre hnyawa hi angetre Thesalonika, laka, hnei Paulo “hna huliwa catre e lai me jidr matre tha tro kö a nyi ehnefe i ketre.” (2 Thes. 3:8; Itre hu. 20:34, 35) Paulo a qaja la huliwa i nyidrë, ene la troa kuci itat. Hnei nyidrëti hna pane lapa e Korinito thei Akula me Perisila, me “ce huliwa me nyidro, ke itre ka cai itat.” Ketre, hnei Paulo hna huliwa “lai me jidr.” Ngo tha kolo kö lai a qaja ka hape, hnei nyidrëti hna cai itat utihë e Sabath. Ngo hnei nyidrëti pe hna cainöj koi angetre Iudra ka tha huliwa kö e Sabath.—Itre hu. 13:14-16, 42-44; 16:13; 18:1-4.

13. Nemene la ini hne së hna xom qa ngöne la tulu i Paulo?

¹³ Paulo aposetolo la ketre tulu ka lolo. Hnei nyidrëti hna huliwa thatraqane la mele i nyidrë, me catre sine la “huliwa ka hmitrötr troa tro fë la maca ka loi i Akötresie.” (Rom. 15:16; 2 Kor. 11:23) Hnei nyidrëti palahi hna ithuecatre troa catre cainöj. Eje hi, hnei Akula me Perisila hna ce huliwa me Paulo ke, itre “sine huliwa [i nyidrë] thei Iesu Keriso.” (Rom. 12:11; 16:3) Hnei Paulo fe hna ithuecatre koi angetre Korinito, “tro pala hi a tru hnei huliwa i [angatr] koi Joxu.” (1 Kor. 15:58; 2 Kor. 9:8) Ketre, hnei Iehova hna upi Paulo aposetolo troa cinyihan, ka hape: “Maine ketre a xele ma huliwa, tha tro kö angeic a xen.”—2 Thes. 3:10.

14. Nemene la aliene la hna qaja hnei Iesu ngöne Ioane 14:12?

¹⁴ Ame la ka sisitria catre koi së enehila, ke troa cainöj me inine la itre atr. Hnei Iesu hna qaja kowe la itretre drei nyidrë, ka hape, tro kö a tru catr la itre huliwa hnei angatr hna kuca, hune la itre huliwa i nyidrë! (E jë la Ioane 14:12.) Eje hi, tha kolo kö lai a hape, tro angatr a hane kuca la itre iamamanyikeu tui nyidrë. Ngo tro la itretre dreng a cainöj kowe la itre atr e cailo fen ngöne la itre macatre ka nyimutre.

15. Nemene la itre hnying nyine tro sa xom, nge pine nemen?

¹⁵ Maine easa huliwa i maseta, loi e tro sa isa hnying, ka hape: ‘Hapeu, eni kö la ketre atr ka huliwa catr? Eni kö a umuthe la huliwa ngöne la drai hna sa, me kuca hnyawane la huliwa?’ Maine eje hi, tro ha mejiune koi së hnei maseta, nge tro la itre sine huliwa së a hane drenge la easa cainöj koi angatr. Loi e tro fe sa isa hnying, göne la aqane cainöj me inine së la itre atr, ka hape: ‘Hapeu, eni kö la ketre atr ka huliwa  catr? Eni kö a hnëkë hnyawa ngöne la eni a kuca la xötrei iöhny? Eni kö a canga bëeke troa wange la itre atr ka ajane troa ini tus? Nge eni kö a hane kuca la nöjei aqane troa cainöj?’ Maine eje hi, tro hë sa maca me madrine ngöne la huliwa ne cainöj.

16. Nemene la aqane goeëne Iesu memine la itre aposetolo la troa mano, nge pine nemene matre ka isapengöne kö memine la itre atr enehila?

¹⁶ Nyipiewekë troa pane mano hnei Iesu memine la itretre drei nyidrë. Ngo ceitune hi enehila la itre atr memine lo atre trenamo hna qaja hnei Iesu. Hnei angeic hna sipu qaja, ka hape: “Mele jë, xeni jë, iji jë, nge madrine jë.” (Luka 12:19; 2 Tim. 3:4) Ame la ka nyipiewekë koi angeic, tre, ene la itre ewekë ne la mel, tune la troa mano memine la itre nyine iamadrinë. Ngo tha celë kö la mekuna i Iesu memine la itre aposetolo i nyidrë.

17. Maine tha easë kö a huliwa i maseta, nemene la aqane tro sa huliwane la traeme së?

¹⁷ Ame fe enehila, easa tui Iesu. Easa tuluthe hnyawa la traeme së matre tro sa pane mano me kuca la itre ewekë ka loi koi itre xan, me sine la itre icasikeu. Nyipiewekë tro sa ini Tusi Hmitrötr memine la itre atr me sine la itre icasikeu. Celë hi matre, easa kuca itre ej, ke itre huliwa i Iehova lai. (Heb. 10:24, 25) Ame ngöne la easa ihamë, loi e tro fe sa hane sine la itre icasikeu me cainöj kowe la itre atr e cili.—2 Tim. 4:2.

18. Nemene la aja i Iesu Keriso koi së isa ala caas?

¹⁸ Tru la hni ne ole së koi Iesu Keriso Joxu së, pine laka, tha nyidrëti kö a musinë së troa kuca la itre ewekë hne së hna thatreine kuca. Ngo nyidrëti pe a xatua së troa atreine waiewekë, göne la huliwa memine la troa mano! (Heb. 4:15) Iesu a ajane tro sa pane mano hnyawa. Nyidrëti fe a ajane tro sa huliwa catr thatraqane la mele së, me catre xome la huliwa ka hamë madrine koi së, ene la troa cainöj me inine la Tusi Hmitrötr kowe la itre atr. Ame ngöne la ketre tane mekun, tro sa ce wang la hna kuca hnei Iesu matre troa thepe së qa ngöne la ketre ithahluë ka tru, nge ka akötrën la mele së.