Waea, tha hna qaja kö lai hnei Tusi Hmitrötr, nge tha hna hane kö traqa lai ekö.

Thenge la aqane ujëne la itre xaa Tusi Hmitrötr, itre xan a mekun laka, ame ngöne la hneijine i Paulo, hnene la itre xaa Keresiano hna bapataiso thatraqane la itre ka mec. Celë hi ka mama ngöne la itus hna hape, Traduction Œcuménique de la Bible. Kola hape: “Nemene la aja ne la itre ka nyihnane la itre ka meci hë me bapataiso? Maine tha tro kö a amelene hmaca la itre ka mec, hnauëne laka, kola bapataiso itre xan nyine hnai angatr?”

Hane hi la hna qaja hnene la lue ka inamacan. Öni Gregory Lockwood ka hape, “tha hna nyitrepene kö hnei Tusi Hmitrötr la itre bapataiso celë, nge tha hna majemine kö kuca lai ekö.” Ketre, öni Porofesör Gordon Fee: “Tha hna hane kuca kö la bapataiso cili ekö, nge tha hna qaja kö e hnine la Tusi Hmitrötr ngöne la Isisinyikeu Ka Hnyipixe. Pëkö ka amamane laka, hna kuca la itre bapataiso cili ngöne la itre hmi ka fetra thupene la meci ne la itre aposetolo.”

Tusi Hmitrötr a qaja ka hape, tro la itretre drei Iesu a ‘inine la nöjei atr qa ngöne la nöjei nöj troa xötrethenge nyidrë, me bapataiso angatr.’ (Mat. 28:19, 20) Qëmekene troa bapataiso hnene la ketre atr, loi e tro angeic a pane atrepengöi Iehova me Iesu, me lapaune koi nyidro, me drengethenge nyidro. Thatreine kö la ketre atr ka mec troa kuca la itre ewekë celë. Nge thatreine kö troa nyihnai angeic hnene la ketre Keresiano.—Ate cai. 9:5, 10; Ioane 4:1; 1 Kor. 1:14-16.

Nga nemene la aliene la hna qaja hnei Paulo?

Itre xaa Keresiano ne Korinito a qaja ka hape, pëkö melehmaca. (1 Kor. 15:12) Hnei Paulo hna amamane laka, ka tria la mekuna i angatr. Öni angeic, ‘o drai pala hi angeic a qëmeke kowe la mec.’ Tha xoue Paulo kö troa cile kowe la itre jol. Xecie koi angeic laka, maine tro angeic a mec, troa amele angeic hmaca ngöne la ngönetrei ne hnengödrai me hetre men, tui Iesu.—1 Kor. 15:30-32, 42-44.

Loi e tro angetre Korinito a trotrohnine laka, tro angatr a pane cile kowe la itre jol me mec, qëmekene troa amele angatr hmaca. Ame la “itre hna bapataison göi Iesu Keriso” ke, “hna bapataiso [angatre fe] ngöne la mec i nyidrë.” (Rom. 6:3) Haawe, tui Iesu, tro angatr a cile kowe la nöjei pengöne jol me mec, nge tro ha amele angatr hmaca e hnengödrai.

Thupene la lue macatre ne bapataiso Iesu e hnine la tim, öni nyidrë kowe la lue aposetolo: “Tro fe epon a . . .  bapataiso ngöne la aqane bapataiso ni.” (Mar. 10:38, 39) Iesu a qaja e celë la kola bapataiso nyidrë ngöne la mec. Kolo lai a hape, tro nyidrëti a mele nyipici ngöne la itre jol me mec. Ketre, öni Paulo ka hape, tro la itre Keresiano hna iën a “ce akötre me Keriso matre hane jë fe adraië [angatr] me nyidrë.” (Rom. 8:16, 17; 2 Kor. 4:17) Haawe, tro angatr a pane mec qëmekene troa amele angatre hmaca e hnengödrai.

Haawe, hane hi la aqane troa ujëne la itre trengewekë i Paulo: “Maine tha tro kö a amelene hmaca la itre ka mec, nga tune kaa ju hë kowe la itre ka bapataiso? Nge nyine ue hö la troa bapataiso e meci la pune koi angatr?”