Hnei Iehova hna upe la angetre Isaraela troa hmitrötr. Aja i Nyidrë troa xatua angatr, matre öni Nyidrë: “The tro kö eö a ixöjetiji agö nyipine la nöje i ’ö; nge the tro kö eö a cile troa thoi mate meci la ate lapa eashenyi ’ö; Iehova ni.”—Lev. 19:2, 16.

Hna ujëne hnyawa la hnaewekë “cile troa thoi” qa ngöne la qene Heberu. Ngo kola hapeue lai? Kola qaja hnene la ketre itus ka qejepengöne la tusi Levitiko, ka hape: “Tha ka hmaloi kö troa trotrohnine la xötre celë ke, ketre aqane ithanata i angetre Heberu. Nge kola hape, ‘the easenyi kö, maine the tro kö.’”

Önine la itre xaa ka inamacan ka hape, ka ce tro la xötr celë memine la xötr qëmeken, hna hape: “The tro kö nyipunie a kuca la ka qali ngöne la amekötin; the tro kö eö a iwangate hmekunyine la ate pë ewekë, nge the metötëne kö la tena mo; ngo qâ i ’ö troa amekötine la ate lapa eashenyi’ö ngöne la meköt.” (Lev. 19:15) Ame la hna qaja ngöne la xötre 16 ka hape, tha tro kö a “cile troa thoi” koi ketre ke, kolo lai a hape, tha tro kö la atre Isaraela a huliwa thoi göi thupen, me qanangazone la itre sine huliwa i angeic ngöne la hnakootr, ngöne la kola itö ewekë, maine ngöne la fami. Eje hi, tha tro kö sa kuca la itre ewekë cili. Ngo hetre ketre aqane tro sa trotrohnine la xötre 16.

Tro sa pane ce wang la aqane nyiqaane la xötr. Akötresie a qaja kowe la itre hlue i Nyidrë ka hape, tha tro kö a ixöjetrij agö. Tha kolo hmekuje kö a qaja la troa qeje ketre. (Ite Edomë 10:19; Ate cai. 10:12-14; 1 Tim. 5:11-15; Iako. 3:6) Kolo fe a qaja la troa thoi me qaja la itre trengewekë ka akötr, matre troa adrone la ëje i angeic. Celë hi lo ka traqa koi Nabotha, matre hna tranyi angeic hnei etë. (1 Ite jo. 21:8-13) Eje hi, tune la hna qaja ngöne la pune la xötre Levitiko 19:16, hetre ethane la troa thoi me qaja angazone la ketre atr. Ijije hi troa humuthi angeic.

Ketre, ame la atr ka thoi matre akötrëne la itre xan ke, ka imethinë angeic nge ngazo catr la hni angeic. Kola qaja ngöne 1 Ioane 3:15, ka hape: “Ame la atre methinëne la trejin me angeic, atre ihumuthi lai, nge atre hë nyipunie ka hape, pëkö atre ihumuth ka troa kapa la mele ka pë pun.” Hnei Akötresie hna qaja thupene la xötre 16 ka hape: “The tro kö eö a methinën’ e kuhu hni ’ö la tejine me eö.”—Lev. 19:17.

Haawe, kola hmekë së hnene la hna qaja ngöne Levitiko 19:16. Tha tro pi kö sa thoi me qaja angazone la ketre atr. Ame la ka “cile troa thoi” göne la ketre atr me qaja angazo angeic ke, ka imethinë la atr cili. Tha aqane ujë kö lai ne la itre Keresiano.—Mat. 12:36, 37.