Öni Paulo aposetolo koi Timoteo ketre qatre thup ka hape: “Haawe, qëmeke i Akötresie, me Keriso Iesu, me itre angela hna iën, eni a upi eö troa trongëne la itre ewekë celë, nge the tro kö a imekuhni, maine ië hna hnim.”​—1 Tim. 5:​21.

Tro sa pane ce wang ka hape, drei la “itre angela hna iën.” Tha kolo kö a qaja lo ala 144 000. Pine laka, ame lo Paulo a cinyany koi Timoteo, tha ase pala kö amelene la itre hna iën e hnengödrai. Tha itre angela pala kö la ange aposetolo me itre xaa hna iën. Matre tha angatre kö la itre “angela hna iën” hna qaja hnei Paulo.​—1 Kor. 15:​50-​54; 1 Thes. 4:​13-​17; 1 Ioa. 3:2.

Nge tha kolo kö a qaja la itre angela ka tha idrei ngöne lo ijine Iwë Atraqatr. Angatre hi lo ka nyixölei Satana. Itre dremoni hë angatr enehila, nge hnei Iesu hna icilekeu me angatr. (Gen. 6:2; Luka 8:​30, 31; 2 Pet. 2:4) Ame elany, troa umë angatr ngöne la hnaop ka jui nge ka thatrehmekun koi 1 000 lao macatre. Nge e thupen troa ce apatrenyi angatr me Diabolo.​—Iud. 6; Hna Am. 20:​1-3, 10.

Ame la itre “angela hna iën” hna qaja hnei Paulo ke, kolo itre angela ka mele nyipici koi Akötresie me koi Iesu Keriso. Thenge la hna qaja ngöne la xötr, angatr a ce huliwa me nyidro.

Traqa koi itre thauzane la itre angela ka mele nyipici. (Heb. 12:​22, 23) Matre tha tro kö Iehova lai a hamën la ca huliwa koi angatr asë. (Hna Am. 14:​17, 18) Eje hi, hnei Nyidrë hna up la ca angela troa humuth la 185 000 lao sooc i angetre Asuria. (2 It. Jo. 19:35) Maine jë tro Nyidrëti a up la itre xaa angela matre troa “xawane me trije qa ngöne la Baselaia i [Iesu], la itre atr ka kuca la ngazo.” (Mat. 13:​39-​41) Nge hnëqa i itre xan troa acasine la itre hna iën e koho hnengödrai. (Mat. 24:31) Nge hna upi itre xan troa ‘thupë së ngöne la nöjei jë së.’​—Sal. 91:11; Mat. 18:10; wange ju fe la Mataio 4:​11; Luka 22:43.

Easa trotrohnine laka, ame la “itre angela hna iën” hna qaja ngöne 1 Timoteo 5:​21 ke, itre angela hna acil matre troa thupëne la itre ekalesia. Ame ngöne la mekene cili, Paulo a ithuecatre koi së troa metrötrëne la itre qatre thup ne la ekalesia. Ketre, Paulo a upe la itre qatre thup troa cilëne hnyawane la itre hnëqa i angatr, nge tha tro kö a “ihmeku hni maine ië hna hnim.” Nge tha tro kö angatr a canga xomi mekun, maine ameköti ewekë nge tha hna pane mekune hnyawa kö. Paulo e thupen a qaja la kepine matre loi e tro la itre qatre thup a trongëne la eamo celë. Eje hi, angatr a “cil qëmekei Akötresie, me Keriso Iesu, me itre angela hna iën.” Haawe, easa trotrohnine laka, hnëqa ne la itre xaa angela troa thupëne la itre ekalesia. Ame itre xan, angatr a thupëne la itre trejin, maine iujine la huliwa ne cainöj, maine thuemacanyi Iehova la itre hnei angatr hna öhn.​—Mat. 18:10; Hna Am. 14:6.