Hnei epuni kö hna e la itre Ita Ne Thup ne la macatre celë? Atreine kö epuni sa la itre hnyinge celë:

Nemene la tulu hnei Iehova hna hamën göne la troa metrötrëne la itre föe?

Ceitune hi koi Nyidrë la trahmany me föe. Nyidrëti a hnime ceitu angatr. Nyidrëti a drei angatr, nge ka tru koi Nyidrë la aliene hni angatr me itre jole ka ej thei angatr. Ketre, Nyidrëti a mejiune koi angatr. Nyidrëti a upi angatr troa eatrëne la itre aja i Nyidrë.​—w24.01, g. 15-​16.

Tro sa trongëne tune kaa la Efeso 5:​7, kola hape: “The ce tro kö me angatr”?

Paulo aposetolo a hmekë së göne la ethanyine troa ce tro memine la itre atr ka tha metrötrëne kö la itre trepene meköti Iehova. Ame la itre sinatronge së, ke tha ene hmekuje kö la itre atr hne së hna porotrike memin e cahu hna tro, ngo memine fe la itre atr hne së hna porotrike memine ngöne Ëternet.​—w24.03, g. 22-​23.

Nemene la itre ithuemacany nyine tro sa hmekën?

Kolo itre ithuemacany hna iupi fë hnene la ketre sinee së, ngo tha hna pane wange kö ka hape, ka nyipici. Maine ketre atr hne së hna thatre a iupi fë la itre ithuemacany ka tria jëne mail. Maine pena ketre atr ka iamenumenu ka thë troa pi drei së göne hi matre ajojezine la mekuna së.​—w24.04, g. 12.

Nemene la hne së hna atre me thatre göne la aqane tro Iehova a ameköti Solomona joxu, memine lo itre ka mec ngöne lo kola apatrenyi Sodroma me Gomora me itre ka mec ngöne lo ijine Iwë Atraqatr?

Tha hna qaja kö ka hape, ase hë Iehova amekötine ka hape, tro angatr a meci palua. Ngo atre hi së laka, öhne kö Nyidrë la nöjei ewekë hna kuca, nge ka tru trenge utipine Nyidrë.​—w24.05, g. 3-4.

Iehova “la Git,” matre nemene la ka xecie koi së? (Dreut. 32:4)

Iehova la hnë zae së, me Atr nyine tro sa mejiune kow, ke ka eatrëne pala hi Nyidrë la itre hnei Nyidrëti hna qaja. Tha ka saze kö Nyidrë. Casi pala hi la pengöi Nyidrë me itre aja i Nyidrë.​—w24.06, g. 26-​28.

Nemene la nyine tro sa kuca la easa saze ekalesia?

Qale jë koi Iehova, tro kö Nyidrëti lai a xatua eö, tune la aqane xatuane Nyidrë la itre hlue i Nyidrëti ekö. The aceitunëne kö la ekalesia i eö hnapan memine la ekalesia i eö ka hnyipixe. Catre jë huliwa ngöne la ekalesia i eö nge nyisineene jë la itre trejin.​—w24.07, g. 26-​28.

Nemene la itre ini hne së hna xom qa ngöne la köni ceitun ka mama ngöne Mataio mekene 25?

Kola amamane hnene la ceitune göne la itre mamoe me itre nani la enyipiewekëne troa mele nyipici. Nge ame la ceitune la itre neköjajiny ka inamacan me itre ka hmo, ke kola qaja la enyipiewekëne troa hnëkë me hmek. Ame pena la ceitune la itre talan, ke kola qaja la enyipiewekëne troa catr huliwa.​—w24.09, g. 20-​24.

Nemene la edraiëne la hnahag hnë lö ne la uma ne hmi i Solomona?

Ame ngöne 2 Aqane lapa itre Joxu 3:​4, itre xaa itus a qaja ka hape “120 kubit” la edraiëne ej, ka ceitu memine la ketre ita ka 53 lao met. Ngo ame ngöne la itre Tusi Hmitrötr Fene Ka Hnyipixe Hna Ujën, ke kola qaja ka hape “20 kubit la edraiën” (9 met). Ka meköti hi lao 20 kubit, ke tha ka hmeköne menu kö la ngöne uma ne la uma ne hmi.​—w24.10, g. 31.

Kola hapeu la tro la atre ixatua a ‘ca föe’? (1 Tim. 3:​12)

Kola hape, tro angeic a faipoipo memine hi la ca föe, nge tha tro kö angeic a kuca la itre huliwa ka sis. Ketre, tha tro kö angeic a wesiwes kowe la itre xaa föe.​—w24.11, g. 19.

Hnauëne la easa qaja ka hape, ame ngöne Ioane 6:​53 tha Iesu kö a acile la ketre tulu göne la Xeni Heji Ne La Joxu?

Ame ngöne Ioane 6:​53, öni Iesu, troa öni la ijön me iji la madra i nyidrë. Nyidrëti a qaja lai lo 32 M.K., e Galilaia kowe la itretre Iudra ka tha lapaune kö koi nyidrë. Ngo, ca macatre thupen e Ierusalema, nyidrëti a acile la Xeni Heji Ne La Joxu. Nge ame e cili, nyidrëti a ithanata kowe la itre atr ka troa ce musi me nyidrë e hnengödrai.​—w24.12, g. 10-​11.