MAINE nyipici laka, ka nyipi ewekë catre la huliwa ne cainöje koi së, ngo tha celë kö la mekuna ne la itre atr hne së hna cainöje kow. Ame la itre xa atr, itre ka ajane hi troa atre la hna qaja hnei Tusi Hmitrötr, ngo ame koi angatr, tre tha nyipi ewekë kö troa inine la Tusi Hmitrötr me easë.

Tro sa wange la pengöi Gavin. Angeic a sine la itre icasikeu, ngo tha ajane kö angeic troa ini Tusi Hmitrötr. Öni angeic, pëkö hnei angeice hna atre e hnine la Tusi Hmitrötr, matre hmahma angeic troa atre hnei itre xan. Tha ajane kö angeice troa lö kowe la ketre hmi, ke wanga amenu angeice jë. Nemene la mekuna i epun? Ijije kö troa xatua Gavin? Pane mekune ju la eloine la itre ini ne la Tusi Hmitrötr kowe la ketre atr. Öni Iehova kowe la angetre Isaraela: “Tro ha trotro la tenge ewekënge tune la lepany, . . . nge tune la hnemuhnemu hune la hnënge haö.” (Deuteronomi 31:19, 30; 32:2) Tro sa ce wange la itre xa pengöne la wene lepany, me eceitunene ej memine la huliwa ne cainöje së. Tro hë së lai a maca göi troa xatuane “la nöjei ate asëjëihë.”—1 Timoteo 2:3, 4.

Ka menyike la wene lepany. Ame la wene lepany, tre, kola mama e sine hmakany qa ngöne la xaxapo e jidr, nge kola lapan asë la hune i haö. Hnei nemene matre ceitune hi la itre trenge ewekë i Iehova memine la “lepany”? Hnei Nyidrëti hna ithanata kowe la nöje i Nyidrë cememine la ihnim, me menyik. Easë a nyitipu Iehova ngöne la easë a metrötrëne la itre hna lapaune kow hnene la itre atr. Easë fe a xatua angatr troa ketre isa sipu thele ewekë, me isa axecië mekun. E tro sa amamane la ihnimi së tune lai, tro hë la itre atr a kapa la itre ini hne së hna tro fë, nge tro fe hë a hetre thangane la hne së hna cainöj.

Ka hamë trenge catr la wene lepany. Ka hamë trenge catre la huliwa ne cainöje së, ke hne së hna mekune la nöjei pengöne aqane troa xatuane la itre atr troa atre la nyipici. Hnei Chris, ketre trejine trahmanyi hna hnyingë Gavin, maine aja i angeice kö troa inine la Tusi Hmitrötr. Tha hnei angeice pi kö hna iele Gavin, hnei angeice pe hna thele la nöjei jëne matre, tha tro kö Gavin a xou troa porotrikë Tusi Hmitrötr. Öni Chris koi Gavin, hetre ketre maca ka tru hna qaja trongëne e hnine la Tusi Hmitrötr, nge e tro angeic a atre lai maca cili, tro hë angeic a trotrohnine hnyawa la aliene la itre icasikeu. Thupene lai, Chris a amamane jë ka hape, hnene la itre hna perofetan e hnine la Tusi Hmitrötr hna anyipicine koi angeic ka hape, ka nyipici la Tusi Hmitrötr. Ame hë e thupen, nyimutre la itre hna perofetan ka eatre hë hnei nyidroti hna ithanatan. Hnene la itre ijine porotrike i nyidro hna hamë trenge catre i Gavin, me thue aja i angeic troa inine la Tusi Hmitrötr.

Ka hamë mele la wene lepany. Ame ngöne la ijine hedredrei me qaqacil e Isaraela, nyimu treu ne tha mani. Matre e pëkö wene lepany, tre, tro lai a qaqacile me meci la itre feja. Hnei Iehova ha hna perofetan göne la hneijine së laka, kösë ketre ijine qaqacil laka, tro la itre atr a pi ij, ene la troa pi “drenge la Wesi Ula i Iehova.” (Amosa 8:11, MN) Hnei Nyidrëti hna perofetane laka, tro la itre hna iën a “tune la lepanyi qa thei Iehova” ngöne la angatre a cainöjëne la maca ka loi ne la Baselaia, nge troa xatua angatr hnene la “ite xa mamoe.” (Mika 5:7; Ioane 10:16) Ame la maca hne së hna cainöjën, tre, ketre ewekë lai hna hnëkëne hnei Iehova matre mele pi la itre ka ajane catrëne la nyipici. Ka tru kö koi epuni la maca cili?

Manathithi qaathei Iehova la wene lepany. (Deuteronomi 33:13) Ketre manathithi la huliwa ne cainöj kowe la itre ka kapa. Ketre manathithi fe koi Gavin la angeic a inine la Tusi Hmitrötr ke, celë hi aqane öhne angeic la itre mekune ka sa la nöjei hnyinge i angeic. Nyimenyime hi angeic kökötre ngöne la nyipici, me hane fe xomi bapataiso. Ame hë enehila angeice ha cainöjëne la maca ka loi me Joyce, föi angeic.

Hnene fe la eceitunene la huliwa ne cainöj memine la wene lepany hna xatua së troa trotrohnine laka, ka nyipi ewekë catre la isa aqane catre së cainöje trootro. Maine nyipici laka, hetre elolone la ca wene lepany, drei jë kö la elolone la itre milio ka lapane la ihnadro. Ketre tune mina fe, ame la hne së hna isa kuca ngöne la hna cainöj, maine jë tha tru kö e tro sa wang. Ngo e hna ce amë memine la itre hna kuca hnene la itre milio lao hlue i Iehova, haawe, ijije tro sa qaja ka hape, hna cainöjëne la maca ka loi kowe “la nöjei nöj.” (Mataio 24:14) Matre, ame la huliwa ne cainöj, tre, ketre manathithi hi lai qaathei Iehova kowe la itre atr. Ceitune hi la maca së memine la wene lepanyi laka, ka menyik, me ka hamë trenge catr, me ka hamë mel!