1-3. (a) Nemene la ka amamane ka hape, ka tru kowe la itre keresiano troa itronyi lapa? (Wange ju la pane iatr.) (b) Nemene la hne së hna troa ithanatan ngöne la tane mekune celë?

KOLA 17 lao macatre i Corinna, nge hna xome la thine i angeic a tro kowe la ketre götrane gaa nany, hnë ifolosa. Ame hë e thupen, hna hane xomi Corinna fe a tro Sibérie, a itre thauzane lao kilomet qa lai. Ame e cili, hnei angeic hna thupë öni, nge hna thahluë angeic. Ame itre xa ijin, kola upi angeic troa lapa e kuhu trön ngöne gaa lepany, nge tha ijiji kö la hna heetre i angeic troa akeukawanyi angeic. Ngo ame pe, ka eje e kuhu hni Corinna me ketre trejine föe troa sine la itre icasikeu.

² Öni Corinna: “Nyiho a tro qa lai e jidr me tro kowe la hnë xomi train, traqa koi 25 lao kilomet la enanyin. Kola tro hnei train e 2 h e hmahmakanyi nge nyiho a të koi 6 lao hawa me ut, me trongëne hmaca kö la treen lao kilomet kowe la hnë icasikeu.” Tru la madrine i Corinna troa trongëne la itre gojenyi gaa nanyi. Öni angeic: “Eahuni a ce ithanatane la Ita Ne Thup ngöne la icasikeu, me thinge la itre nyima koi Iehova.  Ketre ixatua ka tru koi nyiho la hnei nyiho hna melën.” Ame la nyidroti a bëeke hmaca thupene la köni drai, ke tha wange atrehmekune fe kö la tane huliwa ka hape, hnei nyidroti hna patr.

³ Tru la aja ne la itre hlue i Iehova troa itronyi me cas. Ame ekö, lo hneijine ne la itre pane keresiano, hnei angatre fe hna itronyi lapa göi troa atrunyi Iehova, me thele troa atrepengöi Nyidrë. (Ite Huliwa 2:42) Ketre tune mina fe, tru la aja së troa tro kowe la hna icasikeu, ngo eje hi laka, tha ka hmaloi kö troa tro lapa. Maine jë, easa huliwa la drai ka pexej, nge nyimu jole së matre easë a kucakuca. Nemene la ka troa xatua së troa isin pala hi troa sine la itre icasikeu? ^[1] (Wange ju la ithuemacanyi e kuhu pun.) Tro sa xatuane tune kaa la hnainin me itre xane ju kö, troa sine lapan la itre icasikeu? Tro la tane mekune celë a ithanatane la köni kepin matre troa sine la itre icasikeu, (1) nyine loi koi së, (2) ixatua koi itre trejin, me (3) nyine amadrinë Iehova. ^[2]—Wange ju la ithuemacanyi e kuhu pun.

4. Nemene la aqane kapa së la itre ithuemacanyi göi Iehova ngöne la itre icasikeu?

⁴ Itre icasikeu a ini së. E nöjei ijine easë a icasikeu, easë pala hi a atrepengöi Iehova. Tha ekö catre kö lo kola inine la itus, Approchez-vous de Jéhovah hnene la itre xa ekalesia ngöne la ijine Ini Tusi Hmitrötr Ne La Ekalesia. Nemene la ka cia e kuhu hni epuni ngöne lo easë a ce ithanatane la itre thiina ka lolo i Iehova, me aqane ketre fe la hni ne la itre xa trejin? Eje hi laka, kola kökötre e kuhu hni epuni la ihnimi koi Iehova. Easë fe a hane kapa la itre xa ithuemacanyi qa hnine la Tusi Hmitrötr, ke hne së hna drenge hnyawa la itre cainöj hna cile fë, me itre iamacany, memine fe la kola e la Tusi Hmitrötr. (Nehemia 8:8) Nge the qaja kö la nöjei ewekë hnei epuni hna inin e nöjei wiik ngöne la epuni a isa hnëkëne la itre nyine e hnine la Tusi Hmitrötr, memine fe la epuni a drenge la itre mekune hna hamën hnene la itre xa trejin.

5. Nemene la aqane xatua epuni hnene la itre icasikeu troa trongëne la hnei epuni hna inine me maca troa cainöj?

⁵ Kola ini së ngöne la itre icasikeu la aqane troa trongëne hnyawa la itre trepene meköti ngöne la mele së. (1 Thesalonika 4:9, 10) Hapeu la epuni a sine la icasikeu Ini Ita Ne Thup, hna hane ketri epuni fe kö e cili, me upi epuni troa huliwa catr hmaca kö koi Iehova, me amacane la itre thithi epun, me nue pena la ngazo i ketre? Ame pena la icasikeu ne la wiik tre, kola ini së la aqane tro sa cainöjëne la maca ka loi. Kolo fe a ini së la aqane troa xatuane la itre atr troa trotrohnine la nyipici qa hnine la Tusi Hmitrötr.—Mataio 28:19, 20.

6. Kola thuecatre me akeukawanyi së tune kaa hnene la itre icasikeu?

⁶ Itre icasikeu a ithuecatre koi së. Fene i Satana a thele troa ananazijëne la lapaune  së, me thele tro së a seseu menu me hace hni. Ngo itre icasikeu a ithuecatre koi së, me hamëne la trenge catr ka ijij matre tro pala hi sa nyihlue i Iehova. (E jë la Ite Huliwa 15:30-32.) Ame itre xa ijin, easë a ce ithanatane la itre hna perofetan hnei Tusi Hmitrötr. Kolo fe hi lai a acatrene catrëne la mejiune së laka, tro pala kö a eatr elanyi la itre hna thingehnaean hnei Iehova. Kolo fe a thuecatre së hnene la itre trejin ngöne la angatr a cile fë cainöj me qeje mekun, me hane nyima catr troa atrunyi Iehova. (1 Korinito 14:26) Ketre, kola akeukawane la hni së la easa ce ithanata me angatr qëmekene me thupene la icasikeu. Easë hi lai a öhn e cili laka, nyimutre la itre sinee së ka hane meku së.—1 Korinito 16:17, 18.

7. Pine nemene matre nyipi ewekë tro sa sine lapane la itre icasikeu?

⁷ Ame ngöne la itre icasikeu, easë a kepe thangane la mene ne la uati hmitrötr. Iesu a xomiujine la itre ekalesia jëne la uati hmitrötre. Öni nyidrëti koi së, “Dengeju la hna ulatine hnei [u]a kowe la ite ekalesia.” (Hna Amamane 2:7) Uati hmitrötr la ka xatua së troa cile catr ngöne la itupathi me catre cainöj. Kolo fe a xatua së troa atreine axecië mekun. Celë hi kepine matre, tro asë hi së a isine troa sine la itre icasikeu, matre troa kepe thangane la mene ne la uati hmitrötr.

8. Nemene la thangane la hne së hna sine la itre icasikeu, me qeje mekun, me nyima catr kowe la itre trejin? (Wange ju la itre mekune hna eköhagen, “Keukawa Pala Hi La Hni Nyidrë Thupene La Hna Icasikeu.”)

⁸ Ame ngöne la itre icasikeu, easë a amamane la ihnimi së kowe la itre trejin. Ala nyimu e angatr la itre ka cile kowe la itre itupathi ka tru. Öni Paulo aposetolo: “Tro sha imekunekeune.” (Heberu 10:24, 25) Ame la easa sine la itre icasikeu me ithuecatrekeu, easë hi lai a amamane laka, easa meku angatr. E nöjei ijine easa tro koi hna icasikeu, easa amamane laka, ka tru koi së troa ce me angatr, me ithanata me angatr, nge ka tru fe koi së la itre mekun hnei angatr hna lapa fë. Ketre, easë fe a akeukawanyi angatr ngöne la easa hamë mekun, me nyima catr.—Kolose 3:16.

9, 10. (a) Nemene la aqane xatua së hnene la hna qaja ngöne Ioane 10:16 troa trotrohnine la kepine matre tro sa itronyi me itre trejin ngöne la hna icasikeu? (b) Nemene la thangane la hne së hna sine lapane la itre icasikeu kowe la trejin hna xele ma wang hnene la sipu lapa i angeic?

 ⁹ Ame ngöne la itre icasikeu, easë a casi memine la itre trejin. (E jë la Ioane 10:16.) Hnei Iesu hna aceitunë nyidrë me atre thupë mamoe, nge ame itretre dreng, tre hnënge mamoe hna ce axöj. Pane mekune jë: Maine lue mamoe a cil hune la ketre wetr, nge lue xan e kuhu hnathup, nge ketre pena ngöne la ketre götran, hapeu, meköti kö e tro sa qaja ka hape, hna ce axöj lai ala faif? Ohea, ke ame la itre mamoe hna ce axöj, ke casi hi nyudren ngöne la götrane ka cas, nge nyudren a ce xötrethenge la atre thupë nyudren. Ketre tune mina fe, e tro sa nuetrije la itre icasikeu, ke tha easë hmaca kö lai a ca lapa memine la itre trejin. Matre nyipi ewekë tro pala hi sa itronyi me angatr, matre troa sine la “hna axö mamoe,” me hane xötrethenge la “ate thupën.”

¹⁰ Itre icasikeu a acasi së ceitu me ketre lapa ka ihnim. (Salamo 133:1) Hna helëne la itre xa trejin hnene la itre atrene la hnalapa i angatr, hnei keme me thin, maine hnene la itre xa trejin me angatr. Ngo hnei Iesu hna thingehnaeane ka hape, tro pena ha kepe angatr, me hnimi angatr hnene la ketre lapa. (Mareko 10:29, 30) Maine tro epuni a sine lapane la itre icasikeu, tro hë epuni a ketre keme maine thin, maine trejin koi ketre e hnine la ekalesia. E hne së hna mekune hnyawane la itre ewekë celë, eje hi laka, tha tro jë pi kö së lai a triane la ca icasikeu!

11. Nemene la aqane hamëne së koi Iehova la ewekë i Nyidrë ngöne la itre icasikeu?

¹¹ Ame ngöne la itre icasikeu, easë a hamë Iehova la ewekë i Nyidrë. Pine laka Nyidrëti la Atre xupi së, haawe tro sa hetre hni ne ole, me atrunyi Nyidrë me qaja aloinyi Nyidrë. (E jë la Hna Amamane 7:12.) Easë a ujë tune lai ngöne la itre icasikeu, ene lo ijine easa thithi koi Iehova, me nyima koi Nyidrë, me ithanata Nyidrë. Drei la ketre ijine ka lolo catr e nöjei wiik troa atrunyi Iehova!

12. Nemene la hna mekun hnei Iehova la easa sine la itre icasikeu?

¹² Iehova la ka xupi së matre, loi e tro sa drengethenge Nyidrë. Nyidrëti hi la ka upi së troa itronyi lapa, nge sisitria pala kö enehila ke easenyi catre hë la pun. Haawe, ame la easa trongëne la hna ahnithe hnei Iehova, easë hi lai a amadrinë Nyidrë. (1 Ioane 3:22) Öhne kö Nyidrë la aja ka eje the së troa sine la itre icasikeu, nge Nyidrëti fe a wang atrune la trenge catr hne së hna kuca troa sine itre ej.—Heberu 6:10.

13, 14. Tune kaa la aqane troa xatua së hnene la itre icasikeu troa qale catre koi Iehova me Iesu?

¹³ Ame ngöne la itre icasikeu, easë a amamane koi Iehova la aja së troa qale catre koi Nyidrë me nekö i Nyidrë. Ame ngöne la itre icasikeu, Iehova la ka ini së jëne la Wesi Ula i Nyidrë, ene la Tusi Hmitrötr. (Isaia 30:21) Ame mina fe la itre ka xötrei traqa, mama hnyawa hi koi angatr laka, ‘the së la Akötresie.’ (1 Korinito 14:23-25) Iehova la ka xomiujine la itre icasikeu jëne la uati hmitrötre i Nyidrë, nge qaathei Nyidrëti la itre ini hne së hna kapa e cili. Celë hi matre, easa drenge hnyawa la itre hna qaja hnei Iehova ngöne la itre icasikeu. Ketre, kola mama koi së e cili la etrune la ihnimi Nyidrëti koi së, nge kolo fe a aeasenyi së catre koi Nyidrë.

¹⁴ Öni Iesu, tane la ekalesia, ka hape: “Ame la hnei ala lue maine ala köni hna icasikeu ene ngöne la ëjenge, te, ini hi lai e nyipi angat.” (Mataio 18:20) Öni Tusi Hmitrötre fe, Iesu a “tro nyipine” la itre ekalesia. (Hna Amamane 1:20–2:1) Haawe, mama hnyawa hi laka, Iehova me Iesu a ce me easë, me akeukawanyi së ngöne la itre icasikeu. Pane mekune jë la pengöi Iehova la Nyidrëti a goeëne la hne së asë hna isa kuca matre troa qale catre koi Nyidrë me nekö i Nyidrë.

15. Nemene la ka amamane ka hape, easa a ajane troa drengethenge Akötresie?

¹⁵ Easë a amamane koi Iehova la aja së troa drengethenge Nyidrë la easa sine la itre icasikeu. Tha Iehova kö a musinë së troa kuca la aja i Nyidrë. (Isaia 43:23) Matre, ame la easa trongëne la itre hna ahnithe hnei Nyidrë, ene la troa sine la itre icasikeu, easë hi lai a amamane la ihnimi së koi Nyidrë. Ketre, easë fe hi lai a sajuëne laka, meköti Nyidrë troa musi koi së. (Roma 6:17) Maine jë tro la maseta së elanyi a upi së troa huliwa atrun, matre tha sine hë së la itre icasikeu. Maine pena, tro la musi elanyi a tranyi së, maine akalabusi  së maine axösisi së pena ke hne së hna sine la itre icasikeu. Nge ame itre xa ijin, easë hi a pi kuca la ketre ewekë nge ijine icasikeu pena. Ame ngöne la nöjei ijine celë, isa qanyi së kö isa axecië mekun. (Ite Huliwa 5:29) Ngo eje hi laka, ame la nöjei ijine easa axeciëne troa drengethenge Iehova, easë hi lai a amadrinë Nyidrë.—Ite Edomë 27:11.

16, 17. (a) Kola mama tune kaa ka hape, ka nyipi ewekë catre la itre icasikeu ekö kowe la itre pane keresiano? (b) Nemene la mekuna i George Gangas göne la itre icasikeu?

¹⁶ Thupene lo icasikeu ne lo Penetekos macatre 33, tha mano hë la itre keresiano itronyi lapa troa atrunyi Iehova. Hnei “angate pala hi [hna] cate kowe la hna inine hnei ang’ aposetolo, me ce hni, me thupe areto, me thith.” (Ite Huliwa 2:42) Ngacama hna akötrë angatr hnene la musi Roma me itre tane i angetre Iudra, ngo tha hmaca pi kö angatre icasikeu. Nyipici laka, tha ka hmaloi kö, ngo hnei angatre pala hi hna isine troa traqa kowe la hna icasikeu.

¹⁷ Enehila fe, tru la madrine ne la itre hlue i Iehova troa sine la itre icasikeu. Öni George Gangas, ketre atrene la Lapa Ne Xomi Meköt koi 22 lao macatre, ka hape: “Ame koi ni, ame la troa ce me itre trejin ngöne la hna icasikeu, tre, ketre madrine ka tru, pëkö madrine ka ceitu memin, nge ka aegöcatrenyi ni. Pi tro pala hi ni a traqa pa, me tro pi qa ngöne la Uma Ne Baselaia! Ketre madrine ka tru koi ni la troa ithanata memine la itre hlue i Akötresie. Ame la eni e nyipi angatr, kösë eni kö ngöne la hnalapang, cememine la hnepe lapang.” Öni angeice hmaca jë: “Kola lapane la mekunang me hning la troa sine pala hi la itre icasikeu.”

18. Nemene la mekuna i epuni göne la itre icasikeu, nge nemene la aja ka catre thei epun?

¹⁸ Hapeu epuni fe kö a hane mekune tui George? Maine eje hi, isine jë troa sine pala hi la itre icasikeu matre ce memine la itre trejin, ngacama tha ka hmaloi kö. Amamane jë koi Iehova ka hape, casi hi la mekuna i epuni me Davita Joxu, lo kola hape: “Iehova fe, hnenge hna ajane la hne ne la ēnē i cilie.”—Salamo 26:8.