Winston, pane qaja jë la aqane thele Akötresieti nyipë.

Hnenge hna tru ngöne la ketre ferme e Queensland (Australie). Tha ka hmi kö la hnepe lapang ekö. Pine laka, tha tru kö la itre atr ka lapa ezi hun, matre itre atrene hi la hnepe lapang la hnenge hna atre. Kolo petre hi a 12 lao macatreng, nge eni ha thele Akötresie. Hnenge hna thith ke, ajang troa atre la nyipici göi Nyidrë. Hnenge hna tro qa ngöne la hnalapa hun ke, hnenge hna öhne la ketre huliwa e Adélaïde (Sud de l’Australie). Ame lo kola 21 lao macatreng, hnenge hna iöhnyi me Pam e Sydney. Hnei angeic hna qejepengöne koi ni la gurup hna hape, anglo-israélisme. Ketre gurup ka hmi nge ka mejiun laka, ame la itre atre Grande-bretagne, tre, angatre hi la itre matrane lo itre tribu ne Isaraela ka paatr. Angatr a mekun laka, ame lo itre tribu cili, tre, kolo 10 lao tribu ne la Baselaia ne Isaraela, ka po ngöne lo itre macatre 700 M.P.K. Ame lo eni a bëek a tro Adélaïde, hnenge hna ce ithanatane lai memine la ketre sine huliwang ka Temoë Iehova. Tha tru kö la itre hawa ne porotrike i nyio. Thupene jë hi la hnei angeic hna qejepengöne la hmi angeic, eni ha trotrohnine laka, kolo ha sa lo thithing ekö. Atre hë ni la nyipici göne la Atre xup me Baselaia i Nyidrë! Öhne hë ni la “kete penina ka tru alameken.”—Mat. 13:45, 46.

Pam, co petre kö nyipoti lo nyipoti a nyiqane thele la penina cili. Hnei nyipoti hna öhne tune kaa?

Hnenge hna tru e Coffs Harbour (Australie). Ka hmi la hnepe lapang. Kakaa me nenë a hmi ngöne lo gurup anglo-israélisme. Nge ketre tune fe la kem me thine i nenë.  Alaköni eahun, nge hna ce hetru hun memine la itre tresi nenë. Hna ini hun laka, Akötresieti hmekuje hi a kapa la angetre Agele. Ngo tha kapa kö ni la ini cili ke, ka ananyi ni qaathei Akötresie. Ame lo kola 14 lao macatreng, nyimutre la itre hmi hnenge hna wang, tune la uma hmitrötr anglicane, me itre baptiste, me itre adventiste. Ngo pëkö hnenge hna atre göi Akötresie.

Thupene lai, hne huni hna fek a tro Sydney. E cili hi lo hnenge hna iöhnyi me Winston ke, kolo ijine nyidrëti a mano. Tune lo hnei nyidrëti hna qaja, hnene laka, hnei nyio palahi hna qeje hmi, matre hnei nyidrëti hna nyiqane ini tus memine la itre Temoë. Qaane ju hi lai, hnei nyidrëti palahi hna sija la itre xötr ngöne lo nyidrëti a lapa cinyiany koi ni! Eje hi laka, ame ngöne lo xötrei ke, eni a elëhni. Ngo ame hë e thupen, eni ha trotrohnine laka, öhne hë ni la nyipici göi Akötresie.

Ame lo 1962, lo kola 18 lao macatreng, hnenge hna fek a tro Adélaïde matre easenyi koi Winston. Hnei nyidrëti hna sipo Thomas me Janice Sloman, lue trefën ka Temoë, matre tro ni a lapa thei nyidro. Hnei nyidroti hna mesinare e Papousie-Nouvelle-Guinée. Lue ka hni ka menyike nyidro. Hnei nyidroti hna xatua ni troa atrepengöi Iehova hnyawa. Hnenge hna nyiqane ini Tusi Hmitrötr. E cili, mama hnyawa ha koi ni laka, celë hi la nyipici. Thupene la eni me Winston a faipoipo, hnei nyio hna nue la mele i nyio matre troa huliwa i Iehova. Ngacama nyimutre la itre jol, ngo tru palahi la madrine i nyio ke, öhne hë nyio la penina ka tru alameken.

Winston, pane qaja jë lo nyipëti a nyiqane huliwa i Iehova.

Thupene la hnenge me Pam hna faipoipo, hnei Iehova hna hamë hnëqa koi nyio. (1 Kor. 16:9) Ame la pane hnëqa ke, hnei nyio hna xome la huliwa ne pionie lapa. Jack me Roslyn Porter la ka ithuecatre koi nyio troa xome la huliwa cili. Nyidrëti hi lo atre thupëne la sirkoskripsio. Ame enehila, lue atrene hë nyio la filial e Australasie. Hnenge me Pam hna xome la huliwa ne pionie lapa koi 5 lao macatre. Ame lo kola 29 lao macatreng, hna sipo nyio troa xome la huliwa ne sirkoskripsio. Hnei nyio hna ce huliwa memine la filial e Fiji, me iwai trootro ngöne la itre hnapet e Pacifique Sud. Hnei nyio hna tro Samoa Américaines, Samoa, Kiribati, Nauru, Niue, Tokelau, Tonga, Tuvalu, me Vanuatu.

Ame ekö, tha hna kapa hnyawa kö la itre Temoë Iehova, matre nyipiewekë tro huni a hmek, me thupëne la aqane tro huni a tro. (Mat. 10:16) Tha tru kö la itre ekalesia. Ame itre xaa ijin, pëkö hnë meköle i nyio. Celë hi matre, hnei nyio hna sipone kowe la itre atrene la itre tribu, troa lapa thei angatr. Hnei angatr palahi hna kepe nyio hnyawa.

Winston, hnei nyipëti hna mekun troa ujëne la itre itus. Pine nemen?

Ame lo eni e Tonga, tha tru kö la itre itusi hna ujëne qene Tonga. Hna kuca hi la itre xaa tarak me itre itusi ka co. Ame lo itre trejin a cainöj, angatr a xome la itus, La vérité qui conduit à la vie éternelle qene Papale. Celë hi matre, hnene la köni qatre thup ka sine lo ini thatraqane la itre qatre thup, hna ujëne la itusi cili ngöne la qene Tonga, ngacama tha trotrohnine hnyawa kö angatr la qene Papale. Pam la ka lep ngöne masin. Thupene lai, hne huni hna iupi fë kowe la Bethela e Etazini matre troa fejan. Traqa koi 8 lao wiik ne ujëne la itusi cili. Ngacama tha hna ujëne hnyawa kö la itus, ngo ame pe, nyimutre la itretre Tonga hna xatuane troa atre la nyipici. Tha ka ujë qene hlapa kö ni me Pam, ngo ame pe, ka nyipiewekë la huliwa cili.

Pam, ka ceitu kö la aqane mel ngöne la itre hnapet memine la aqane mel e Australie?

Isapengöne catr! Ame ngöne la itre xaa hnapet ke, hedredrei catr, nge tru la tresitr  me aji. Nyimutre fe la itre sine mec. Nge ame itre xaa ijin, tha tru kö hnei xen. Ngo ame pe, ketre manathith ka tru troa goeëne la hnagejë e nöjei hej qa ngöne la fale, itre uma hna kuca e Samoa, kösë itre ihmelekap. Ame la itre ijine dreumatreu, kola mama hnyawa la itre nu, nge kola melemele la hnagejë hnei treu. Celë hi itre ewekë lai ka upi nyio troa catre thith me lapa mekune la itre huliwa i Akötresie. E cili, paatre hë la itre mekun ka ngazo.

Tru catre la ihnimi nyio kowe la itre nekönatr. Nyudreni a sesëkötr la kola xötrei öhne la itre kamadra. Ame la nyio e Niue, hnene la ketre nekönatr hna jieji la wanakoime i Winston, me hape: “Kösë pi lo itre pene waco.” Nyëne petre hi lai a hane öhne la ketre wanakoime ka tune lai, matre nyën a hain!

Tru catre la hnei nyio hna mekune la itre atr ke, itre ka puafala nge jole catre la mele i angatr. Eje hi laka, ka mingöming la hnapete i angatr, ngo ame pe, pëkö droketre nge tha tru kö la tim. Ngo tha seseu kö la itre trejin. Ame koi angatr, tha celë kö lai la ka nyipiewekë. Angatr a madrin ke, ce angatr memine la itre hnepe lapa i angatr. Ketre, hetrenyi angatr la ketre hnë icasikeu matre troa atrunyi Iehova. Ka lolo catre la tulu i angatr. Kola xatua nyio troa lapa mekun la itre ewekë ka sisitria me ahmaloeëne la mele i nyio.

Pam, ame e itre xaa ijin, hnei nyipoti hna ketre sipu thele tim me kuci xen. Hnei nyipoti hna kuca tune kaa?

Kemeng la ka xatua ni. Hnei nyidrëti ekö hna ini ni troa athi eë matre troa kuci xen. Hnei nyidrëti fe hna ini ni troa mel memine hi la ka ijij. Ame e Kiribati, ka co hi la hnalapa i nyio. Hna hla jezin, nge hna ami wanahmahnyaj, nge hna acili babu nyine ngöne uma. Hnenge hna sihnaop hnë troa athi eë me kuië inono. Nge ame göi tim, eni a ce tro memine la itre xaa föe troa tha tim. Hne huni hna xome la ketre sinöe ka qea me hnö enon, tune la ketre hajujuny. Tha hnei angatre kö hna nyi geen, ngo hnei angatre pe hna hnö mook. Itre föe a nuenu la imook e hnine la hnaop, nge ame hë la kola hetre alien, angatr a hul. Öning palakö ka hape, tha ka jole kö. Ngo anyimua kuiëne ni la imook, ngo pëkö alien, eje hi a manij! Ase jë hi angatr hnyimasai ni, tro pi la ketre föe a xatua ni. Ka ixatua nge ka ihnimi la itre atr e cili.

Tru catre la madrine i epon troa huliwa ngöne la itre hnapet. Hetre ewekë hnei epone hna pi qaja koi hun?

Winston: Tha canga trotrohnine kö nyio la aqane mele i angatr. Ame la ketre ijin, hnene la itre trejin hna ihë troa ce xen, angatr a amë hune laulau la nöjei xeni hnei angatr hna hetreny. Ame ngöne lo xötrei, thatre kö nyio laka, thatraqai huni asë hi la xen. Hnei nyio hna xeni asë la hna hamën, pëkö munën! Ame hë lo nyio a trotrohnin e thupen, nyio ha ce xeni me angatr. Hnene palahi la itre trejin hna thiina ka menyik koi nyio. Madrine catr angatr troa iöhny me nyio ngöne la ijine nyio a wange la ekalesia i angatr. Pëkö xaa trejine trenyiwa ngo nyio caasi hi.

Hnene la itre xaa atr hna ce öhnyi hun nge hna ketri angatr. Nyimutre la itre ka mekun laka, itre trejin la ka acile la hmi cili. Ngo ame la angatr a öhne la itre xaa trejin trenyiwa e traqa troa wange la itre trejin e cili, angatr ha trotrohnine hnyawa la hmi së, nge angatr a hain.

Pam: Ame e Kiribati, tha alanyimu kö la itre trejin, matre caasi hi la ekalesia. Caasi hi la qatre thup, Itinikai Matera la ëje i nyidrë, nge ka lolo la aqane kepe nyio hnei nyidrë. Ame la ketre drai, hnei nyidrëti hna hamë nyio la caa neköi wakuja. Öni nyidrë, “Koi epone lai.” Tha tru kö hnei wakuja ekö. Nyio a madrine la ahnahna i nyidrë.

 Pam, itre macatre thupen, hna uthith la nekö i nyipo. Nemene la ka xatua nyipo?

Hnenge hna upune lo 1973, lo nyio e Pacifique Sud. Hnei nyio hna bëek a tro Australie. Thupene la foa lao treu, hna uthithi la upuneng. Hace catre Winston. Kola tro la itre drai nge kola paatre trootro la akötreng. Ame e thupen, hne huni hna kapa lo Ita Ne Thup ne 15 Eiperem 2009. Ame ngöne lo “Questions des lecteurs,” hetre hnying ka hape: “Si un bébé meurt dans le ventre de sa mère, peut-on espérer qu’il ressuscite ?” Hna akeukawane la hni nyio laka, Iehova kö la ka troa amekötin ke, ka meköti Nyidrë. Nyidrëti a troa apatrene la nöjei ewekë ka akötrë së ngöne la fene celë. Hnei Iehova hna upe la Nekö i Nyidrë troa ‘apatrene la itre huliwa i Satana.’ (1 Ioane 3:8) Ketre, kolo fe a xatua së troa wangatrune la “penina” së, ene la troa hane sine la nöje i Iehova! Maine paatre ju la mejiune celë, tro kö a hetre aliene la mele së?

Thupene la hna meci la nekö i nyio, hnei nyio hmaca hna huliwa ngöne la drai ka pexej koi Iehova. Itre treu ne nyio a pane huliwa ngöne la Bethela e Australie, me xome la huliwa ne sirkoskripsio. Hnei nyio hna cainöj e Nouvelle-Galles du Sud me e Sydney. Ame hë lo 1981, hna hë nyio troa huliwa ngöne la Bethela e Australie, nge utihë enehila.

Winston, nyipëti la ketre atrene la filial e Australasie. Nemene la thangane la itre hnei nyipëti hna melën ekö ngöne la itre hnapet ne Pacifique Sud, kowe la huliwa i nyipëti enehila?

Eje hi, nyimu aqane xatua ni. Ame la hnapan, tre, hna sipone kowe la filiale ne Australie troa thupëne la Samoa Américaine me Samoa. Thupene lai, hna acasine la filiale ne Nouvelle-Zélande memine la filiale ne Australie. Ame hë enehila, filiale ne Australasia la ka elemekene la huliwa ne cainöj e Australie, Samoa Américaine me Samoa, Iles Cook, Nouvelle-Zélande, Niue, Timor-Leste, Tokelau, me Tonga. Hnenge hna hane tro kowe la itre xaa nöje cili, matre troa wang la itre ekalesia. Eje hi, hnenge hna ce huliwa memine la itre trejin ka mel ngöne la itre hnapete cili. Nge celë hi ka xatua ni troa xome hnyawa la huliwang ngöne la filial.

Trotrohnine hë ni me Pam laka, tha itre ka tru hmekuje kö la ka thele Akötresie. Itre thöthi mina fe a ajane la “penina ka tru ala meken.” Tui nyio, angatr a thele la penina cili, ngacama tha ka hmi kö la hnepe lapa i angatr. (2 Ite jo. 5:2, 3; 2 A. l. ite jo. 34:1-3) Eje hi, Iehova la Akötresieti ka ihnim, nge aja i Nyidrëti tro la nöjei atr, itre qatr me itre thöth, a hetrenyi la mel!

Ame lo eni me Pam a nyiqane thele Akötresie laka, 50 hë lao macatre enehila, thatre kö nyio la hnei nyio hna troa öhn. Eje hi, ketre penina ka tru alamekene la nyipici göne la Baselaia! Pëkö ketre ewekë ka troa thapa qaathei nyio la penina cili!