1-2. (a) Nemene la aqane amenune Satana la itre atr? (b) Nemene la hne së hna troa ce wang ngöne la tane mekun celë?

SATANA la “keme ne la thoi.” Qaane lo hneijine i Adamu me Eva, angeic a amenune la itre atr. (Ioane 8:44) Hnei angeic hna sili trengathoi göne la mec memine la itre ewekë ka traqa thupene la kola meci la atr. Ame la itre xaa hna majemine kuca thatraqane la itre ka mec ke, hna nyitrepene hnene la itre ini ka thoi Satana. Celë hi matre, alanyimu la itre trejin ka “catre isi thatraqane la lapaun,” ngöne la kola meci la ketre atrene la tribu maine ketre sinee i angatr.—Iudra 3.

² Nemene la ka troa xatua së troa mele nyipici, ngacama kola iele së troa xome la itre hna majemine cili? (Efe. 6:11) Nemene la aqane tro sa xatuane la itre trejin, hna ielene troa xome la itre hna majemin, hna xelen hnei Akötresie? Tro sa ce wang ngöne la tane mekun celë, la aqane tro Iehova a xatua së. Tro sa pane ce wang la hna qaja hnei Tusi Hmitrötr göne la mec.

3. Nemene la ethanyine la pane trengathoi?

³ Tha aja i Akötresieti kö ekö, tro la itre atr a mec. Maine aja i Adamu me Eva troa mel epine palua, nyipiewekë tro nyidroti a drengethenge la hna amekötin hnei Iehova, ka hape: “The tro kö eö a xeni qa ngöne la sinöe ne ate hmekune la loi me ngazo; ke tro eö a meci ngöne la drai ne xeni eö qa ngön’ ej.” (Gen. 2:16, 17) Ngo hnei Satana hna iaö nyidro, matre ngazo la pune koi nyidro. Hnei angeice hna iaö Eva jëne la un, me hape: “Tha trojë kö nyipo a mec.” Hnei Eva hna mejiune koi Satana. Hnei angeice hna xeni la wene sinöe me hamën koi Adamu. (Gen. 3:4, 6) Ame hë la pun, ngazo me meci kowe la itre atr.—Rom. 5:12.

4-5. Pine nemene matre alanyimu la itre atr hna iaöne hnei Satana?

 ⁴ Meci hë Adamu me Eva, tune lo hna qaja hnei Akötresie. Ngo tha celë hmekuje kö la trengathoi hna sile hnei Satana göne la mec. Öni angeic mina fe ka hape, e troa meci la atr, ngo mele pe kö la u. Kola amenune la itre atr, hnene la itre trengathoi hna sil göne la mec.—1 Tim. 4:1.

⁵ Pine nemene matre alanyimu la itre atr hna iaöne hnei Satana? Atre hi Satana la mekuna ne la itre atr göne la mec, matre hmaloi koi angeic troa iaö angatr. Eje hi laka, pëkö ka ajane easë troa mec. Hna xupi së hnei Akötresie troa mel. (Ate cai. 3:11) Celë hi matre, hna aceitunëne la mec me ketre ithupëjia.—1 Kor. 15:26.

6-7. (a) Hune ju kö Satana me itre trengathoi angeic? Qejepengöne jë. (b) Nemene la aqane xatua së hnene la Tusi Hmitrötr, matre tha tro kö sa xoue mec?

⁶ Tha hune ju kö Satana. Mama hnyawa ha la nyipici göne la mec. Alanyimu hë la ka atre me ka qaja amamane la itre ini qa hnine la Tusi Hmitrötr, göne la mec. Nge atre fe hë angatre la mejiune thatraqane la itre ka meci hë. (Ate cai. 9:5, 10; Itre hu. 24:15) Kola akeukawane la itre hni së me xatua së hnene la itre ini cili. Tha easë hmaca kö a xou me luelue ngöne la kola meci la ketre atr. Ame la itre hlue i Iehova, pë hmaca kö ka xouene angatr la mec. Ketre, tha hnehengazo menu kö së pine laka, atre hnyawa hi së laka, pëkö ewekë ka ngazo ka troa traqa kowe la itre sinee së ka mec. Thatreine hmaca kö troa akötrë së hnene la itre ka mec. Kola aceitunë angatr memine la itre ka meköle thatre. (Ioane 11:11-14) Ketre, pëhë hna atre hnene la itre ka mec. Ame la itre xan, tre, ka meci hë angatr qaane ekö. Ngo ame la kola troa amele angatre hmaca elany, tre, kösë kola ahlë angatr qa hna meköl.

⁷ Ka lualai nge hmaloi troa trotrohnine la nyipici göne la mec. Isapengöne hnyawa memine la itre trengathoi hna sile hnei Satana! Itre trengathoi i Satana a amenune la itre atr, me jelethoi Akötresie, Atre Xupi së. Eje hi, Satana la qaane la itre akötre së. Haawe, loi e troa sa la itre hnying celë: Nemene la itre trengathoi hna sile hnei Satana göi Iehova? Pine nemene matre tha mejiune hë la itre atr kowe la thupene mel? Pine nemene matre hleuhleu me akötre la itre atr hnene itre ej?

8. Thenge la hna qaja ngöne Ieremia 19:5, nemene la aqane adrone la ëje i Iehova, hnene la itre trengathoi Satana?

⁸ Kola adrone la ëje i Iehova hnene la itre trengathoi Satana. Kola qaja la nöjei ini ka thoi,  tune la kola hape, troa dreuthi la itre ka meci ngöne la ihueë. Itre ini lai ka adrone la ëje i Akötresie! Tune kaa? Itre ej a amenune la mekun ne la itre atr ka hape, ceitune hi la Akötresieti ka ihnim me Diabolo. (1 Ioane 4:8) Nemene fe la mekuna i epun? Nemene la mekuna i Iehova göne lai? Methi Nyidrëti la nöjei pengöne iakötrë.—E jë la Ieremia 19:5.

9. Nemene la ethane la itre trengathoi Satana göne la thupene mel, hna qaja ngöne Ioane 3:16 me 15:13?

⁹ Kola ajojezine la itre atr hnene la itre trengathoi Satana, matre tha tro kö angatr a hane mejiune kowe la thupene mel. (Mat. 20:28) Öni Satana, ame la kola meci la atr ke, mele pe kö la u i angeic. Nga ka mele palahi angeice lai. E cili, kösë tha nyipiewekë kö la mele hna huujëne hnei Iesu. Ngo tha tro kö sa thëthëhmine laka, hatrene hi la ihnimi Keriso lai kowe la nöjei atr asë. (E jë la Ioane 3:16; 15:13.) Pane mekune jë së la thangane la itre ini cili koi Iehova me Iesu! Kola wangacone la ahnahna ka sisitria catr, ene la thupene mel!

10. Nemene la aqane akötrëne la itre atr hnene la itre trengathoi Satana göne la mec?

¹⁰ Kola akötr me hleuhleu la itre atr hnene la itre trengathoi Satana. Ame la kola meci la nekönatr, tre, hace catr koi kem me thin la kola qaja ka hape, Akötresieti la ka hë nyën, matre troa ketre angela e hnengödrai. Hapeu, kolo kö lai a apujene la akötre i nyidro, maine nyixane pena? Hna eköth ekö la ini ka thoi hna hape, ifereno, matre amenune la itre atr ka hape, troa dreuthe la itre ka icilekeu memine la hmi. Önine la ketre tusi qene Espagnole ka hape, hnene la itre hene ka tru ne la hnaakotr ekö, hna axösisine la itre atr ka icilekeu memine la hmi catholique. Hnene la itre ka amekötin ngöne la hnaakotr, hna dreuthi angatr, matre tro angatr a ietra qëmekene troa mec. E cili, tha tro hmaca kö a dreuthi angatr ngöne la ihueë. Ame ngöne la itre xaa nöj, nyipiewekë troa thili kowe la itre xötrapan me thele manathith thei angatr. Itre xan a thele troa apujene la elëhni ne la itre xötrapan, matre tha tro kö a ahnëjinë angatr. Pëkö eloine la itre ini hna nyitrepene hnene la itre trengathoi Satana. Itre eje pe a ahleuhleune la hni së me axouenyi së.

11. Nemene la aqane troa iele së hnene la itre atrene la hnepe lapa së, matre kei thenge la mekuna i angatr?

¹¹ Easa drengethenge Akötresie ke, tru la ihnimi së koi Nyidrë me kowe la Wesi Ula i Nyidrë. Tha easë kö a kei thenge la mekuna ne la itre atrene la hnepe lapa së, ngöne la angatr a iele së troa xome la itre hna majemine kuca kowe la itre ka mec. Tha ka ihmeku kö la itre hna majemine cili memine la hna qaja hnei Tusi Hmitrötr. Maine jë, tro angatr a ahmahmanyi së me qaja ka hape, tha easë kö a hnim maine metrötrëne pena la itre ka mec. Maine pena, tro angatr a qaja ka hape, hnene la aqane ujë së, matre tro lai a akötrë së hnene la sinee së ka mec. Nemene la aqane tro sa sajuëne la nyipici qa hnine la Tusi Hmitrötr? Tro sa ce wang la itre aqane tro sa trongëne la itre trepene meköt.

12. Nemene la itre ini ka thoi, ka tha ihmeku kö memine la Tusi Hmitrötr?

¹² Loi e tro sa “iananyi” memine la itre ini me itre hna majemine ka tha ihmeku kö memine la hna qaja hnei Tusi Hmitrötr. (2 Kor. 6:17) Nyimutre la itre atr e Caraïbes ka mekun, ka hape, e meci hë la atr ke, mele pe kö la u. Tro lai u a qanangazon la itre atr ka akötrë angeic, ngöne lo mele petre kö angeic. Kolo fe a qaja ka hape, ijije fe hi tro la u i angeic a akötrëne la itre atrene la tribu. Ame pena e Afrique, ke hna majemine hakuthe la itre ithulu hnei mano ngöne la uma ne la ka mec, me ujëne la itre iatr matre troa qëmeke pena kowe la ngöne uma. Nemene la kepin? Matre tha tro kö a goeë angatr hnene la atr ka mec! Ame easë, itre hlue i Akötresie, tha easë hmaca kö e hnine la itre huliwa  cili ka sajuëne la itre ini ka thoi Satana!—1 Kor. 10:21, 22.

13. Maine easa luelu göne la ketre hna majemine kuca, nemene la nyine tro sa kuca, thenge la Iakobo 1:5?

¹³ Maine easa luelu ke, thatre pengöne hnyawa kö së la itre qenenöj, maine hna majemine kuca pena, loi e troa sipo Iehova la inamacan ngöne la thith. (E jë la Iakobo 1:5.) Thupene lai, loi e troa ithel e hnine la itre itusi së, maine sipo ixatua pena thene la itre qatre thup. Eje hi laka, tha angatre kö a amekötin la aqane tro sa axecië mekun, ngo angatre pe a troa hamën la itre trepene meköti ne la Tusi Hmitrötr, tune la hne së hna ce wang e celë. Nyipici laka, maine tro sa majemine huliwane la “hni” së, haawe, tro hë sa atreine “wangate hmekune la loi me ngazo.”—Heb. 5:14.

14. Nemene la nyine tro sa kuca, matre tha tro kö sa athixötrëne la itre atr?

¹⁴ “Kuca asë jë nyine atrunyi Akötesie. The nyi nyine athixötë kö.” (1 Kor. 10:31, 32) Ame ngöne la easa mekune troa xome la ketre huliwa ne qenenöj maine hna majemine kuca pena, loi e tro sa pane hnying, ka hape, “Hapeu, tha tro jë kö ni lai a athixötrëne la mekuthetheu ne la itre xaa Keresiano?” Nyipici laka, tha ajane kö së troa athixötrë ketre! (Mar. 9:42) Tha ajane kö së troa athixötrëne la itre ka tha nyihlue i Iehova kö. Celë hi matre, ihnim la ka troa upi së troa ithanata cememine la metrötr, matre troa atrunyi Iehova. Eje hi laka, tha easë kö a troa thele iwesitrë memine la itre atr, maine qaja angazone pena la itre ini hnei angatr hna mejiune kow. Tha sihngödri kö koi së la emenene la ihnim! Maine tro sa catre amamane la ihnimi së, tro ha nanazije la elëhni ne la itre ka icilekeu me easë.

15-16. (a) Pine nemene matre loi e tro sa canga thuemacane la xan, göne la itre hne së hna mejiune kow? Qaja jë la ketre ceitun. (b) Pine nemen matre thatraqai së la hna qaja ngöne Roma 1:16?

¹⁵ Loi e troa amamane kowe la itre atrene la tribu së laka, Itretre Anyipici Iehova së. (Is. 43:10) Nyipici laka, tro la itre atrene la hnepe lapa së me itre ka lapa ezi së, a elëhni pine laka tha hane kö së xome la itre hna majemine kuca, ngöne la kola meci la ketre sinee së. Celë hi matre, nyipiewekë tro sa canga thuemacanyi angatr me qejepengöne la itre ini hne së hna mejiune kow. Hnei Francisco ka mel e Mozambique, hna cinyihan ka hape: “Ame ngöne lo eni me Carolina a atre la nyipici, ke, hnei nyio hna canga thuemacane la fami nyio ka hape, tha nyio hmaca kö a troa hane atrune la itre ka  mec. Hna tupathe la lapaune i nyio, ngöne la kola meci hnene la mama i Carolina. Ame la ketre huliwa hna majemine kuca, tre, troa siën me hmine lai atr ka mec. Thupene lai, tro la ketre sipu sinee ne lai ka meci a meköle koi köni drai, e cili hmekune la hna nenge la tim hna siëne la ka mec. Hna majemine kuca lai, matre troa nyihnyawane la u ne la ka mec. Ame kowe la fami Carolina, tre tro angeic a kuca thenge la itre hna qaja.”

¹⁶ Nemene la aqane ujë i nyidroti e cili? Öni Francisco: “Hnene laka ka tru la ihnimi nyio koi Iehova me aja i nyio troa amadrinë Nyidrë, matre tha hnei nyio kö hna xom la itre hna majemine kuca, thatraqane la itre ka mec. Kola elëhni la fami Carolina. Hnei angatre hna qaja ka hape, pëkö metrötre i nyio kowe la itre ka mec. Hnei angatre fe hna qaja ka hape, tha tro hmaca kö angatr a wai nyio me xatua nyio. Ngo pine laka, hnei nyio hna canga qaja ekö la pengöi nyio göne la itre ka mec, matre tha ithanatane hmaca kö nyio me angatr, ngacama tru la elëhni angatr. Thupene lai, hnene la itre sinee i Carolina hna thele troa iloi hmaca me nyio. Hetre itre xan ka traqa troa sipo itusi thei nyio.” Epi tha tro kö sa hmahma, troa catre sajuëne me wangatrune la itre ini qa hnine la Tusi Hmitrötr, göne la itre ka mec.—E jë la Roma 1:16.

17. Nemene la ka troa xatua së troa ketre enehmu, ngöne la kola meci la sinee ne la trejin Keresiano?

¹⁷ Ame ngöne la kola meci la sinee ne la ketre trejine Keresiano, ke, loi e tro sa ketre nyipi ‘enehmu . . . , me jini angeic ngöne la akötr.’ (Ite edomë 17:17) Nemene la aqane tro sa ketre “enehmu,” ngöne la kola icilekeu hnene la fami ne la trejin ka meci sineen? Tro sa ce wange la lue trepene meköti qa hnine la Tusi Hmitrötr, ka troa xatua së troa akeukawane la hni ne la itre ka meci sineen.

18. Pine nemen matre hnei Iesu hna treij, nge nemene la ini koi së?

¹⁸ “Ce teijejë me angete teij.” (Rom. 12:15) Maine jë jole koi së, troa ithanata memine la ketre atr ka hleuhleu me akötr. Ame itre xaa ijin, ngacama thatreine kö së ithanata, ngo öhne hi angatr laka, easa ce treije me angatr. Öhne hi angatr laka, trotrohnine hi së la akötre ka eje thei angatr. Ame la kola meci hnei Lazaro, sinee i Iesu, ke hnei Maria me Maretha  me itre xan hna treije pine la sinee i angatr. Thupene la foa lao drai, kola traqa hnei Iesu. Hnei nyidrëti hna “treij,” ngacama nyidrëti hi a troa amele Lazaro hmaca. (Ioane 11:17, 33-35) Ngo kola amaman la pengöi Iehova göne la mec, hnene la treije i Iesu. Ketre, ame la itre sinee i Iesu a öhne la itre trenge tihmidra i nyidrë, ke angatr a trotrohnin e cili la etrune la ihnimi Iesu koi angatr. Celë hi ka akeukawane la hni Maria me Maretha. Eje hi, ame la easa amamane kowe la itre trejin, la etrune la ihnimi së koi angatr, me catre xatua angatr, easë hi lai a akeukawane la itre hni angatr. Ketre, tha tro hmaca kö angatr a mekun, ka hape, angatre caas. Itre nyipi sinee hë së koi angatr.

19. Nemene la aqane tro sa trongëne la Ate Cainöj 3:7, ngöne la easa xatuane la ketre trejin ka meci sineen?

¹⁹ “Ijine lapa thaupu, me ijine ewekë.” (Ate cai. 3:7) Ame la ketre aqane tro sa xatuane la trejin Keresiano ka meci sineen, tre, ene la troa drei angeice hnyawa. Tro sa nue angeic troa fe la hni angeic. Maine “menu hë la ite trengewekë” i angeic, tha tro sa elëhni. (Iobu 6:2, 3) Maine jë, angeic a hnehengazo ke, itre sinee i angeic ka tha hmi kö a icilekeu me angeic. Ce thithi jë me angeic. Thithi jë kowe la ‘Atre drenge la thith,’ matre troa hamëne la trengecatr me itre mekun ka lolo. (Sal. 65:2) Nge maine ijij, ce e Tusi Hmitrötre jë me angeic, maine ketre tane mekun pena ka ihmeku memine la hnei angeic hna melën.

20. Nemene la hne së hna troa ce wang ngöne la tane mekun thupen?

²⁰ Drei la ketre manathithi ka tru troa atre la nyipici göne la mec, memine la mejiune hna troa kapa elany hnene la itre ka meci hë! (Ioane 5:28, 29) Haawe, loi e troa mama ngöne la itre trengewekë së me itre huliwa së laka, easa sajuëne la nyipici qa hnine la Tusi Hmitrötr. Loi e tro fe sa ce thawa me itre xan la nyipici cili. Ame ngöne la tane mekun thupen, tro sa ce wang la kuci haze, ketre ewekë hna huliwane hnei Satana, matre troa juetrëne la nyipici. Tro fe sa ce wang la kepin, matre nyipiewekë tro sa thipëne la itre nyine iamadrinë ka amamane la kuci haze me kötrene la huliwa cili.