1. Nemene la hna ajane hnene la itre hlue i Akötresie, nge pine nemen? (Wange ju la pane iatr.)

HNEI Iesu Keriso hna upe la itretre drei nyidrë ka hape, “tro jë . . . nge inine jë la nöjei atr qa ngöne la nöjei nöj.” (Ma 28:19) Itre hlue i Akötresieti a inine la aqane tro angatr a “eatrëne hnyawa” la huliwa ne cainöj. (2Ti 4:5) Pëkö ketre huliwa ka sisitria ngöne la mele së. Celë hi matre, loi e tro sa canga eatrën. Ngo, tha ka hmaloi kö troa nue traem thatraqane la huliwa ne cainöj.

2. Nemene la itre jol ka sawa la itre trejin troa catre cainöj?

² Easa nue la traem me trengecatre së kowe la itre xaa huliwa ka nyipiewekë. Maine jë, tru la traeme hne së hna nue troa huliwa i maseta, matre hetrenyi la ka ijij thatraqai së me hnepe lapa së. Ame koi itre xan, jole troa xome la hnëqa ngöne la hnepe lapa. Ame pena itre xan, hna tithi angatr hnei mec maine kucakuca. Ame itre xan, jole catr ke, kola uti ipië trootro. Nemene la aqane tro sa catre huliwa i Akötresie, ngacama nyimutre la itre jol?

3. Nemene la hnei Iesu hna qaja ngöne Mataio 13:23?

³ Maine tha ijiji së kö troa catre huliwa i Iehova, tha tro kö sa kucakuca. Atre hi Iesu laka, isapengöne kö la etrune la traem me trengecatre hne së hna isa nue thatraqane la Baselaia. (E jë la Mataio 13:23.) Loi e tro palahi sa catre huliwa i Akötresie ke, tha thëthëhmine kö Nyidrëti la trengecatre hne së hna nue. (He 6:10-12) Ketre, maine jë, tro sa mekun ka hape, ijije hi tro sa catre cainöj. Ame ngöne la tane mekun celë, tro sa ce wang la aqane tro sa amë panëne la huliwa i Akötresie, ene la  troa cainöj me inine la itre atr. Ngo nemene la aliene la hna hape, troa catre huliwa i Akötresie?

4. Nemene la nyine tro sa kuca, e aja së troa catre huliwa i Akötresie?

⁴ Maine easa ajane troa catre huliwa i Akötresie, loi e tro sa kuca asë la hne së hna atreine troa cainöj me inine la itre atr. Tha kolo hmekuje kö a qaja la itre hawa hne së hna kuca. Ngo kolo fe a qaja la kepin matre easa kuca la huliwa cili. Easa catr ngöne la huliwa i Iehova * ke, tru la ihnimi së koi Nyidrë me kowe la itre atr. (Mrk 12:30, 31; Kol 3:23) Maine easa ajane troa catre nyihlue i Iehova, nyipiewekë tro sa nue la mele së me trengecatre së, thatraqane la huliwa i Nyidrë. Eje hi, ketre huliwa ka sisitria la troa cainöjëne la maca ka loi kowe la nöjei atr asë.

5-6. Qaja jë la ketre ceitune ka amamane la aqane tro sa amë panëne la huliwa ne cainöj, ngacama tha tru kö la traeme së.

⁵ Pane mekune jë së la ketre thöth ka lepe guitare. Aja i angeic palahi troa lepe guitare. Hnei angeic hna huliwa ngöne ketre ume tri. Ame e nöjei pune wiik, angeic a lepe guitare e cili. Ngo tha tru kö la hnei angeic hna kapa, matre tha ijije kö troa të la itre gufa. Hnei angeic hna saze huliwa. Angeice ha cilë kees e hnine la ketre setroa, ngöne la drai ka pexej. Angeic a nyiqaan e Thupenehmi utihë Draikatru. Ngo ame pe, ka tru kö koi angeic la miuzik. Aja i angeic troa atreine lepe guitare hnyawa. Ngacama pëkö ijine i angeic, ngo atreine kö angeic thele traeme troa elo miuzik.

⁶ Ketre tu së fe, easa ajane troa catre cainöj, ngo tha ijije kö la traeme së. Ame pe, easa kuca la hne së hna atrein, matre troa catre tro fë la maca ka loi, me ketr la hni ne la itre atr. Eje hi, tru catr hnei huliwa së. Celë hi matre, easa thele la aqane  troa amë panëne la huliwa ne cainöj ngöne la mele së.

7-8. Nemene la aqane tro sa nyitipu Iesu ngöne la hna cainöj?

⁷ Hnei Iesu hna amë panëne la huliwa ne cainöj ngöne la mele i nyidrë. Ame la ka nyipiewekë koi nyidrë, tre, ene la troa cainöjëne la Baselaia i Akötresie. (Ine 4:34, 35) Hnei Iesu hna trongëne la itre kilomet, matre troa cainöj kowe la nöjei atr asë. Hnei nyidrëti hna wai angatr ngöne la itre hnalapa me ngöne la itre götrane gaa tru atr. Mele i Iesu pe hi lai la troa cainöjëne la itre maca ka lolo.

⁸ Easa nyitipu Keriso ngöne la easa thele la itre xaa aqane troa cainöjëne la itre maca ka lolo. Easa amë panëne la huliwa ne cainöj ngöne la mele së, nge pine pë hë la itre sipu aja së. (Mrk 6:31-34; 1Pe 2:21) Hetre itre trejin ka xome la huliwa ne pionie hut, maine pionie lapa, maine pionie ka ixatua pena. Ame itre xan, angatr a inine la ketre qene hlapa, maine fek kowe la ketre nöj ka aja ixatua. Ngacama tha ijiji së kö troa xom la itre huliwa cili, ngo ka nyipiewekë mina fe la trengecatre hne së hna nue kowe la huliwa ne cainöj. Atre hnyawa hi Iehova la itre ifego së, thenge la itre hne së hna isa atreine kuca. Nyidrëti a ajane tro sa madrine troa tro fë ‘la maca ka loi hna ahnithe koi së hnene la Akötresie ka madrin.’—1Ti 1:11; Deu. 30:11.

9. (a) Nemene la aqane amë panëne Paulo la huliwa ne cainöj, ngacama hetre huliwa i nyidrë? (b) Nemene la hna amamane ngöne Itre Huliwa 28:16, 30, 31 göne la aqane goeëne Paulo la huliwa ne cainöj?

⁹ Paulo aposetolo la ketre tulu göne la troa amë panëne la huliwa ne cainöj ngöne la mele së. Ame lo ijine hnaaluene tronge i Paulo a tro Korinito ke, tha tru kö hnei manie i nyidrë. Ame hnei nyidrëti hna ca i uma mano göi troa hetre manie. Ngo tha huliwa cili kö la ka nyipiewekë koi Paulo. Hnei nyidrëti pe hna kuca, matre xatua nyidrëti troa tro fë la itre maca ka lolo koi angetre Korinito, nge “pë thupen” koi angatr. (2Ko 11:7) Maine jë, hnei Paulo hna hane huliwa matre troa hetre manie. Ngo ame pe, hnei nyidrëti palahi hna amë panëne la huliwa ne cainöj, me catre cainöj e nöjei Sabath. Celë hi ka aijijë nyidrëti troa catre cainöj. E cili, ‘hna catrë nyidrë hnene la wesi ula troa amamane koi angetre Iuda, laka Iesu hi la Keriso.’ (Hu 18:3-5; 2Ko 11:9) Thupene lai, hna akalabusi Paulo e Roma koi lue macatre. Ngo tha cile kö nyidrëti cainöj kowe la itre ka wai nyidrë me iupi fë tus. (E jë la Itre Huliwa 28:16, 30, 31.) Tha hnei Paulo pi kö hna nue la ketre ewekë troa sewe nyidrë troa catre cainöj. Öni nyidrë: “Hetenyi hë huni la huliwa celë . . . , tha kucakuca kö hun.” (2Ko 4:1) Loi e tro sa nyitipu Paulo. Ngacama easa huliwa i maseta, ngo ame pe, loi e tro palahi sa amë panëne la huliwa ne cainöj ngöne la mele së.

10-11. Nemene la aqane tro sa catre cainöj, ngacama hna tithi së hnei mec?

¹⁰ Maine jë, tha ijiji së hë troa cainöj ngöne la itre hnalapa trootro ke, easa uti ipië trootro, maine pena hetre sine meci së. Ngo ame pe, hetre itre xaa aqane tro sa cainöj. Hnene la itre pane Keresiano ekö hna cainöj kowe la nöjei atr asë. Hnei angatr hna xome la nöjei pengöne aqane troa cainöj, tune la troa cainöj ngöne la itre hnalapa trootro, maine ngöne la gaa tru atr. Hnei angatr hna thele la itre atr ka  ajan. (Hu 17:17; 20:20) Maine tha ijiji së kö troa tro aqeany, ijije hi tro sa pane lapa ngöne gaa tru atr me cainöj kowe la itre atr. Ijije fe hi tro sa cainöj e cahu hna tro, me cinyianyi tus, maine cainöj jëne mobilis pena. Celë hi lai itre aqane cainöj ne la itre trejin ka qatre hë maine ka wezipo pena. Nge tru catr la itre manathith hnei angatr hna kapa.

¹¹ Ngacama hetre sine meci së, ngo ijije hi tro palahi sa cainöj. Pane mekune hmaca jë lo tulu i Paulo aposetolo. Öni nyidrë: “Ke ngöne la nöjei ewekë asë, hetre trengecatreng qaathene la atre hamë men koi ni.” (Fi 4:13) Ame la ketre ijin, hna tithi Paulo hnene la ketre sine mec, nge e cili, nyipiewekë tro nyidrëti a catr. Öni nyidrë kowe la angetre Galatia: “Hnenge hna xötrei cainöjëne la maca ka loi koi nyipunie, ke eni lo a wezipo.” (Ga 4:13) Ketre tune fe, ngacama easa wezipo, ngo ijiji së palakö troa catre cainöjëne la itre maca ka lolo. Tro sa cainöj kowe la itre droketre, me itre ka ithupë, me itre xane fe. Maine jë, tha hane fe kö angatr drenge la itre maca ka lolo ke, paatre kö angatr qa hnalapa, angatr palahi a huliwa.

12. Nemene la aliene la hna qaja hnei Iesu?

¹² Öni Iesu: “Lamepa ne la ngönetei la alamek; qa ngöne lai e maca la alameke i ’ö, ame hna cengöne laipi la ngönetei i ’ö.” (Ma 6:22) Nemene la aliene la trengewekë i Iesu? Loi e tro sa goeëne hmekuje hi la caa ewekë, nge tha tro kö a nue la itre xan troa ajojezi së. Hnei Iesu hna  amamai tulu ngöne la götrane cili. Hnei nyidrëti hna nue la mele i nyidrë kowe la huliwa i Iehova. Ketre, hnei Iesu hna upe la itretre dreng troa catre nyihlue i Iehova me sajuëne la Baselaia i Nyidrë. Easa nyitipu Iesu, ngöne la easa amë panëne la huliwa ne cainöj ngöne la mele së, me ‘thele la baselaia i Akötesie, me thina ka meköti anganyidë.’—Ma 6:33.

13. Nemene la ka troa xatua së troa amë panëne la huliwa i Iehova?

¹³ Ame la ketre aqane tro sa amë panëne la huliwa i Iehova, tre, ene la troa ahmaloeëne la mele së. E cili, ijiji së hë troa xatuane la itre atr troa atrepengöi Iehova me hnimi Nyidrë. * Maine jë, tro sa sipo maseta troa acone la traeme ne huliwa, matre hetre ijine së troa hane cainöj ngöne la wiik. Loi tro fe sa atreine tuluthe la traeme hne së hna nue kowe la itre nyine iamadrinë.

14. Nemene la hna kuca hnene la lue trefën matre troa catre cainöj?

¹⁴ Celë hi hna kuca hnei Elias, ketre qatre thup, me ifënekö i nyidrë. Öni nyidrë: “Ngacama tha ijiji nyio palakö troa xome la huliwa ne pionie, ngo ame pe, ijiji nyio hi troa cainöj atruny. Hetre itre ewekë hnei nyio hna saze. Hnei nyio hna thupëne matre tha tro kö a itö menu. Hnei nyio fe hna tuluthe la traeme hna nue kowe la itre nyine iamadrinë. Ketre, hnei nyio hna sipone la lue maseta troa acone la hawa ne huliwa. E cili, ijiji nyio hë troa hane cainöj e hej. Ame hë enehila, alanyimu la itre ka ini tusi me nyio. Ame ngöne la treu ke, alua cainöje nyio e nyipine la wiik. Tru catr la madrine i nyio!”

15-16. Thenge la hna qaja ngöne 1 Timoteo 4:13, 15, nemene la ka troa xatua së troa maca ngöne la hna cainöj? (Wange ju fe la hna eköhagen hna hape, “Ixatua Matre Troa Maca Ngöne La Huliwa Ne Cainöj.”)

¹⁵ Ame la ketre aqane troa amë panëne la huliwa i Iehova, tre, ene la troa maca ngöne la huliwa ne cainöj. Ame la atr ka huliwa ke, angeic a pane ini, matre maca ngöne la huliwa. Ceitune hi lai memine la itre ka cainöjëne la maca ne Baselaia. Loi e tro palahi sa thel troa maca ngöne la hna cainöj.—Ite edomë 1:5; e jë la 1 Timoteo 4:13, 15.

¹⁶ Nemene la aqane tro sa maca ngöne la hna cainöj? Nyipiewekë troa xötrethenge la itre hna amekötin hna hamën ngöne la icasikeu e nyipine la wiik. Ame ngöne la icasikeu cili, easa kapa la itre ini ka lolo nge ka nyipiewekë. Itre ej a xatua së troa maca ngöne la hna cainöj. Ijije hi tro sa xomi ini qa ngöne la ixatua hna hamën hnene la ciaman kowe la ka cile fë hnëqa. Ketre, ijije hi tro sa sipo ixatua thene la atre thupëne la gurupe së maine ce cainöj me nyidrë. Ijije fe tro sa ce cainöj memine la itre trejin ka maca, tune la itre pionie maine atre thupëne la sirkoskripsio. Eje hi, maine tro palahi sa thele troa maca ngöne la aqane troa huliwane la itre jiane huliwa, tro ha acatrene la aja së troa catre cainöj me inine la itre atr.

17. Nemene la thangan e tro sa catre cainöj?

¹⁷ Drei la ketre manathith ka tru laka, hnei Iehova hna aijijë së troa ‘ce huliwa me Nyidrë’! (1 Kor. 3:9) Maine tro sa “tupathe la nöjei ewekë ka isa pengöne kö” me catre xome la huliwa ne Keresiano, tro hë sa ‘nyihlue i Iehova cememine la madrin.’ (Fi 1:10; Sal. 100:2) Tro kö Iehova a hamë së la trengecatr, matre troa catre cainöj, ngacama hetre itre hne së hna thatreine kuca. (2 Kor. 4:1, 7; 6:4) Maine tru maine co la itre hne së hna atreine kuca troa cainöj, ngo ijije hi tro sa “hetenyi la nyine amadine” ngöne la huliwa cili. (Ga 6:4) Ame la easa catre cainöj, easë hi lai a amamane la ihnimi së koi Iehova me kowe la itre atr. “Maine eö a kuca lai tro eö a amele eö kö, me angate fe hna dei ’ö.”—1Ti 4:16.