1-2. Pine nemene matre akötr me hleuhleu la hni Iesu?

AKÖTR me hleuhleu la hni Iesu ngöne lo drai tixenuë i nyidrëti e celë fen. Hna axösisi nyidrë me humuthi nyidrë hnene la itre atr ka ngazo. Ngo tha celë hmekuje kö lai la sipu kepin matre Iesu a hnehengazo. Tru la ihnimi Iesu koi Iehova, nge aja i nyidrëti troa amadrinëne la hni ne la Tretretro i Nyidrë. Atre hi Iesu laka, maine tro nyidrëti a mele nyipici, tro hë nyidrëti a atrune la ëje i Iehova. Ketre, tru mina fe la ihnimi Iesu kowe la itre atr. Maine tro nyidrëti a mele nyipici utihë la mec, haawe, tro hë la itre atr a hetrenyi la mel ka tha ase palua kö.

² Ngacama tru la akötre i Iesu, ngo ka tingeting palahi la hni nyidrë. Öni nyidrëti kowe la itre aposetolo: “Tingetingenge kö la hnenge hna hamë nyipunie.” (Ioane 14:27) Hetrenyi thei Iesu la “tingetinge ka sisitia qa thei Akötesie.” Tingeting la hni Iesu hnene laka, ka lolo palahi la aqane imelekeu i nyidrëti me Iehova. Celë hi matre, tha hnehengazo menu kö nyidrë.—Fil. 4:6, 7.

3. Nemene la hne së hna troa ce wang ngöne la tane mekun celë?

³ Pëkö ala caasi the së ka hane akötre tui Iesu. Ngo ame pe, tro fe a hane akötrën me qanangazone la itre ka xötrethenge nyidrë. (Mat. 16:24, 25; Ioane 15:20) Nge tui Iesu, tro fe a hane hace la hni së. Nemene la nyine tro sa kuca matre tro palahi a tingeting la hni së? Tro sa ce wang la köni ewekë hnei Iesu hna kuca ngöne lo nyidrëti a cainöj. Nge tro fe sa ce wang la aqane tro sa nyitipu nyidrë, ngöne la easa cile kowe la itre jol.

4. Tune la hna qaja ngöne 1 Thesalonika 5:17, qaja jë la itre xaa ceitune ka amamane laka, hnei Iesu hna catre thith ngöne lo nyidrëti e celë fen?

⁴ E jë la 1 Thesalonika 5:17. Hnei Iesu hna catre thith ngöne la drai tixenuë i nyidrë. Ame lo nyidrëti a amamane kowe la angetre dreng, la aqane troa atrune la drai ne meci nyidrë, hnei Iesu hna thith thatraqane la areto me waina. (1 Kor. 11:23-25) Qëmekene troa tro qa ngöne la götrane hnei angatr hna atrune la Paseka, hnei Iesu hna thithi memine la itretre drei nyidrë. (Ioane 17:1-26) Nge ame la angatr a traqa hune la Wetre Elaio ke, hnei nyidrëti hna anyimua thith. (Mat. 26:36-39, 42, 44) Hnei Iesu mina fe hna thith qëmekene tro nyidrëti a mec hune la sinöe. (Luka 23:46) Eje hi, qëmekene tro Iesu a mec, hnei nyidrëti hna catre thithi koi Iehova.

5. Pine nemene matre hna pë trengecatre ne la itre aposetolo?

⁵ Hnei Iesu hna atreine xomihnine la itre akötr ke, ka catr la lapaune i nyidrëti kowe la Tretretro i nyidrë. Hnei nyidrëti hna catre thithi koi Iehova. Ame pena la itre aposetolo ke, tha hnei angatre kö hna catre thith ngöne la jidri cili. Ame la pun, hna pë trengecatre i angatr, nge hnei angatr hna xou me kei kowe la itupath. (Mat. 26:40, 41, 43, 45, 56) Eje hi, maine tro sa xötrethenge la tulu i Iesu me catre “thith,” haawe, tro hë së lai a atreine mele nyipici ngöne la itre jol. Nemene la nyine tro sa sipone ngöne la thith?

6. Nemene la aqane tro la lapaune së a xatua së troa tingeting?

⁶ Tro sa thithi koi Iehova, matre troa ‘nyi xane la lapaune së.’ (Luka 17:5; Ioane 14:1) Nyipiewekë tro sa acatrene  la lapaune së ke, Satana palahi a thele troa tupathe la itre ka xötrethenge la tulu i Iesu. (Luka 22:31) Nemene la aqane tro la lapaune së a xatua së troa tingeting, ngacama kola traqa itrai la itre jol? Maine tro sa kuca la hne së hna atreine matre troa cile kowe la itre jol, tro la lapaune së koi Iehova a xatua së matre tha tro kö sa hnehengazo. Tha luelu kö së laka, Iehova hmekuje hi la ka ijij troa nyinyin la itre jole së. Celë hi matre, tingetinge la hni së me mekuna së.—1 Pet. 5:6, 7.

7. Nemene la hna ini së hnene la hna melën hnei Robert?

⁷ Kola xatua së hnene la thith troa mele tingeting, ngacama tru ju hë la itre jol. Hanawang la tulu i Robert, ketre qatre thup ka 80 lao macatre, nge ka catre mele nyipici. Öni nyidrë: “Hna xatua ni hnene la xötre Filipi 4:6, 7, ngöne la kola traqa itrai la itre jol, tune la itre jol göi manie. Hna pane ami ni qa ngöne la hnëqa ne qatre thup.” Ngo nemene la ka xatua Robert, matre tro palahi a tingeting la hni nyidrë? Öni nyidrë: “Ame la eni a hnehengazo ke, eni a catre thith, nge öhne ju hi ni laka, tingetinge hë la hning.”

8. Thenge la hna qaja ngöne Ioane 8:29, pine nemene matre ka tingeting palahi la hni Iesu?

⁸ E jë la Ioane 8:29. Ngacama hna qanangazo Iesu ekö, ngo ka tingeting palahi la hni nyidrë. Atre hi nyidrëti laka, nyidrëti a amadrinëne la hni Iehova. Hnei Iesu hna drengethenge Iehova, ngacama jol e itre xaa ijin. Nge, hnei nyidrëti  hna amë panëne la aja i Iehova ngöne la mele i nyidrë ke, tru la ihnimi nyidrëti koi Iehova. Qëmekene tro Iesu a traqa e celë fen, hna hë nyidrëti ekö ka hape, “ate xup” i Akötresie. (Ite edomë 8:30) Ame hë lo nyidrëti e celë fen, hnei Iesu hna inine la pengöi Iehova kowe la itre atr. (Mat. 6:9; Ioane 5:17) Drei la ketre huliwa ka amadrinëne la hni Iesu!—Ioane 4:34-36.

9. Pine nemene matre troa tingeting la hni së e hne së hna cainöj?

⁹ Easa nyitipu Iesu ngöne la easa drengethenge Iehova, me “cate troa huliwa i Joxu pala hi.” (1 Kor. 15:58) Ame la easa “cat” ngöne la huliwa ne cainöj, tre, kola xatua së matre tha tro kö sa hnehengazo menu ngöne la kola traqa koi së la itre jol. (Itre hu. 18:5) Maine jë, tru catre kö la itre jole ne la itre atr hne së hna cainöj kow. Ame la angatr a inine troa hnimi Iehova me trongëne la itre hnei Nyidrëti hna amekötin me saze, angatre ha madrin. Kola acatrene la mejiune së laka, tro kö Iehova a thupë së, nge tro hë sa tingeting. Celë hi la hna melën ekö hnene la ketre trejine föe ka sipu wangaconyi eahlo kö. Öni eahlo: “Ame la eni a catre cainöj ke, kola acatrene la aqane imelekeung me Iehova. E cili, atreine hë ni xomihnine la itre aliene hning, matre hetre madrineng.”

10. Nemene la hna ini së hnene la hna melën hnei Brenda?

¹⁰ Hanawang la tulu i Brenda. Hna tithi eahlo me nekö i eahlo hnene la ketre mec ka pë nyin. Kucakuca catre Brenda, nge thatreine hë eahlo tro, matre eahlo a ti ikaatr. Maine ijij, eahlo a cainöj ngöne la itre hnalapa trootro. Ngo eahlo palahi a cainöj jëne cinyianyi tus. Öni Brenda: “Trotrohnine hë ni laka, tha tro kö a loi la mecing ngöne la fene celë. Celë hi matre, pëkö ketre huliwa ka sisitria koi ni, hune la huliwa ne cainöj. Ame la eni a cainöj, tha mekune hë ni la itre akötreng. Eni pe hi a mekun me thele la aqane troa xatuane la itre atr hnenge hna cainöje kow. Nge eni fe a lapa mekun la itre manathith hnenge hna troa kapa elany.”

11-13. (a) Nemene la aqane amamane la itre aposetolo me itre xan laka, itre nyipi sinee i Iesu angatr? (b) Nemene la aqane xatua Iesu hnene la itre sinee i nyidrë?

¹¹ Ame la itre aposetolo, tre, angatre hi la itre nyipi sinee i Iesu. Hnei angatr hna anyipicine la hna qaja hnei Tusi Hmitrötr, ka hape: “Hete ate ihnimi kola fede cate hune la hnei tejin.” (Ite edomë 18:24) Ka tru angatr koi Iesu. Ame lo Iesu a cainöj, pëkö sipu trejin me nyidrë ka lapaune koi nyidrë. (Ioane 7:3-5) Ame la ketre ijin, hnei angatr hna jele hmo nyidrë. (Mar. 3:21) Tha ceitune kö memine la itre aposetolo. Ame lo jidr qëmekene tro Iesu a mec, öni nyidrëti koi angatr: “Nyipunie la angete cile huti thenge ngöne la hna tupathi ni.”—Luka 22:28.

¹² Nyipici laka, hnene la itre aposetolo hna hane akötrë Iesu. Ngo tha celë kö la aqane goeëne nyidrë. Hnei nyidrëti pe hna wangatrune la lapaune i angatr. (Mat. 26:40; Mar. 10:13, 14; Ioane 6:66-69) Ame lo jidr qëmekene troa humuthi nyidrë, öni Iesu kowe la itre aposetolo: “Hnenge hna hape, ate sinenge nyipunie, ke ame la nöjei ewekë asë hnenge hna denge qa thei Kaka, ase hë ni amamane koi nyipunie.” (Ioane 15:15) Eje hi, hnei angatr hna aegöcatrenyi Iesu. Hnene la ixatua i angatr ngöne la hna cainöj, matre tru la madrine i Iesu.—Luka 10:17, 21.

¹³ Hetrenyi la itre xaa sinee i Iesu,  trahmanyi me föe, ka xatua nyidrë ngöne la hna cainöj. Ame la itre xan, hnei angatr hna ihë troa xen. (Luka 10:38-42; Ioane 12:1, 2) Ame la itre xan, hnei angatr hna ce cainöj me nyidrë me ce thawa la itre ewekë i angatr me nyidrë. (Luka 8:3) Angatr a xatua nyidrë ke, atre hi angatr laka, tro fe kö nyidrëti a xatua angatr. Hnei Iesu palahi hna kuca la loi kowe la itre sinee i nyidrë, nge atre hi nyidrëti la itre ifego i angatr. Ketre atr ka pexeje Iesu, ngo ame pe, ka tru koi nyidrë la ixatua ne la itre sinee i nyidrë ka tha pexeje kö. Eje hi, hnene la ixatua i angatr, matre ka tingeting palahi la hni nyidrë.

14-15. Nemene la aqane tro sa öhnyi nyipi sinee, nge nemene la aqane tro angatr a xatua së?

¹⁴ Itre nyipi sinee a xatua së troa catre mele nyipici koi Iehova. Ngo maine easa ajane troa öhnyi nyipi sinee, loi e tro sa pane amamane laka, ketre nyipi sinee fe së. (Mat. 7:12) Tusi Hmitrötr a ithuecatre koi së troa nue la traem me trengecatre së, matre troa xatuane la itre xan, tune la itre ka “pë ewekë.” (Efe. 4:28) Hapeu, hetre trejine kö e hnine la ekalesia ka aja ixatua? Ijije kö tro sa komisio kowe la itre trejin ka kucakuca, tune la itre qatr maine itre ka wezipo? Ijije kö tro sa itö xen thatraqane la itre hnepe lapa ka hetre jol göi manie? Ijije kö tro sa xatuane la itre trejin ka thatreine huliwane la sit jw.org^® maine la application JW Library^®? Ame la easa xatuane la itre xan, tre, kola thue madrine së.—Itre hu. 20:35.

¹⁵ Tro la itre sinee së a xatua së troa cile kowe la itre jol, matre tro sa mele tingeting. Hnei Elihu ekö hna drenge hnyawa  la Iobu a qaja la itre akötre i nyidrë. Ketre tu së fe, itre sinee së a drei së ngöne la easa fe la itre hni së. (Iobu 32:4) Tha easë kö a nue la itre sinee së troa axecië mekun koi së. Ngo easë pe a drenge la itre eamo hnei angatr hna hamën jëne la Tusi Hmitrötr. (Ite edomë 15:22) Hnei Davita ekö hna kapa la ixatua ne la itre sinee i nyidrë. Ketre tu së fe, loi e tro sa hetre hni ne ipië me kapa la itre eamo hna hamën hnene la itre sinee së. (2 Sam. 17:27-29) Eje hi, itre ahnahna qaathei Iehova la itre nyipi sinee së.—Iako. 1:17.

16. Thenge la hna qaja ngöne Filipi 4:6, 7, nemene la aqane tro sa hetre tingeting? Qejepengöne jë.

¹⁶ E jë la Filipi 4:6, 7. Pine nemene matre Iehova a qaja ka hape, tro sa hetre tingeting jëne “Keriso Iesu”? Tha ijije kö troa tingeting la itre mekuna së me itre hni së, e tha hne së kö hna pane lapaune kowe la itre hnei Iesu hna kuca thenge la aja i Iehova. Jëne la mele hna huujën hnei Iesu, ijije hë troa nuetrije la itre ngazo së. (1 Ioane 2:12) Hapeu, tha kolo kö lai a akeukawane la itre hni së? Iesu la Joxu ne la Baselaia i Akötresie, nge nyidrëti a troa apatrene la nöjei akötre hna kuca hnei Satana memine la fene i angeic. (Is. 65:17; 1 Ioane 3:8; Hna ama. 21:3, 4) Drei la ketre mejiune ka mingöming elany! Eje hi laka, tha ka hmaloi kö la huliwa hnei Iesu hna ahnithe koi së. Ngo ame pe, ce nyidrëti palahi me easë, nyidrëti a xatua së ngöne la itre drai hnapin. (Mat. 28:19, 20) Celë hi ka thue trengecatre së me aegöcatrenyi së! Maine easa ajane troa mele tingeting, nyipiewekë tro sa catre mejiun.

17. (a) Nemene la aqane tro sa mele tingeting? (b) Tune la hna qaja ngöne Ioane 16:33, nemene la hne së hna troa atreine kuca?

¹⁷ Haawe, nemene la aqane tro sa mele tingeting ngacama kola traqa itrai la itre jol? Loi e tro sa nyitipu Iesu. Ame la hnapan, thithi jë nge the mano kö. Ame la hnaaluen, drengethenge Iehova jë me catre cainöj, ngacama tha ka hmaloi kö. Nge ame la hnaakönin, sipo ixatua jë thene la itre nyipi sinee. E cili, tro la tingeting qaathei Akötresie a thupëne la itre hni së me itre mekuna së. Nge tui Iesu, tro hë sa atreine xomihnine la nöjei pengöne jol.—E jë la Ioane 16:33.