1. Thenge la hna qaja ngöne Efeso 6:10-13, nemene la aqane amamane Iehova laka, Nyidrëti a hnimi së? Qejepengöne jë.

IEHOVA a xatua së troa isi memine la itre ithupëjia me easë ke, Nyidrëti a hnimi së. Ame la itre ithupëjia me easë, tre, Satana memine la itre dremoni. Hnei Iehova hna hmekë së me amamane la aqane tro sa cile koi angatr. (E jë la Efeso 6:10-13.) Maine tro sa thele ixatua thei Iehova me mejiune koi Nyidrë, tro hë sa atreine cile catr koi Diabolo. Ijije hi tro sa lapaune tui Paulo aposetolo. Öni nyidrë: “Maine ce Akötresie me easë, drei la sa i easë?”—Rom. 8:31.

2. Nemene la hne së hna troa ce wang ngöne la tane mekun celë?

² Ame easë itre nyipi Keresiano, tha easë kö a xoue Satana me itre dremoni. Easë pe a thele troa atrepengöi Iehova hnyawa me catre nyihlue i Nyidrë. (Sal. 25:5) Nyipiewekë tro sa atre la itre nyinyithina i Satana ke, celë hi ka troa xatua së troa cile koi angeic. (2 Kor. 2:11) Ame ngöne la tane mekun celë, tro sa ce wang la ketre ewekë hna huliwane hnei Satana me itre dremoni, matre troa amenune la itre atr. Tro fe sa ce wang la aqane tro sa cile catre koi angatr.

3-4. (a) Nemene la aliene la kuci haze? (b) Hapeu, alanyimu kö la itre atr ka mejiune kowe la kuci haze?

³ Satana me itre dremoni a amenune la itre atr, jëne la kuci haze. Önine la itre ka kuci haze, ka hape, atre hi angatr la itre ewekë hna thatre hnene la itre xan. Öni angatr ka hape, atre hi angatr la itre ewekë ka troa traqa elany, jëne la itre  wëtresij. Öni itre xan, angatr a ithanata memine la itre ka mec. Nge itre xan a kuci haze, matre troa angazone la ketre atr. *

⁴ Hapeu, alanyimu kö la itre atr ka mejiune kowe la kuci haze? Thenge la rapport hna kuca ngöne la 18 lao nöj e Amérique latine me Caraïbes, alanyimu catr la itre atr ka mejiune kowe la itre ka kuci haze. Ame koi angatr, ijije hi troa ithanata memine la itre u. Ngo tune la hna amamane hnene la ketre rapport hna kuca ngöne la 18 lao nöj e Afrique, tru catre kö la itre atr e cili ka mejiune kowe la itre ka kuci haze. Ngacama tha easë kö a mel e cili, ngo loi e tro fe sa thupë së qa ngöne la kuci haze. Satana palahi a thele troa amenune la “fen asë.”—Hna ama. 12:9.

5. Nemene la mekuna i Iehova göne la kuci haze?

⁵ Iehova la “Akötesieti ka nyipici.” (Sal. 31:5) Nemene la mekuna i Nyidrë göne la kuci haze? Methi Nyidrëti la kuci haze! Öni Iehova koi angetre Isaraela: “The tro kö a hetenyi thei ’ö la ate ate upe la nekö i angeice trahmanyi me jajinyi troa tro nyipine la eë, me ate nyi haze, me nyinyithiina, me sa xepu, me tene haze, me ate xahmi, me tene u ne ta, me perofeta thoi, me ate ithanata me u ne wezipo. Ke sisi koi Iehova la itete kuca la ite ewekë cili; nge pine la ite ewekë ka sisi cili tro Iehova Akötesi ’ö a helë angate qëmeke i ’ö.” (Deu. 18:10-12) Nyipici laka, tha easë hmaca kö fene lo Wathebo hnei Iehova hna hamëne kowe la angetre Isaraela. Ngo tha saze kö la mekuna i Nyidrë göne la kuci haze.—Mal. 3:6.

6. (a) Nemene la aqane amenune la itre atr hnei Satana? (b) Thenge la hna qaja ngöne Ate Cainöj 9:5, nemene la pengöne la itre atr ka meci hë?

⁶ Iehova a hmekë së göne la kuci haze ke, atre hi Nyidrëti laka, ketre jëne tro hi Satana a akötrëne la itre atr. Jëne la kuci haze, Satana a amenune la itre atr me sili trengathoi ka hape, e meci hë la atr ke, mele pe kö la u. (E jë la Ate Cainöj 9:5.) Satana mina fe a thele troa axouene la itre atr me ananyi angatr qaathei Iehova. Angeic a ajane tro la itre ka kuci haze a mejiune kowe la itre u ka ngazo, me nuetriji Iehova.

7. Nemene la itre hnei Iehova hna qaja amë koi së?

⁷ Ase hë Iehova qaja la itre nyine troa kuca, matre troa atreine cile catr kowe la itre nyinyithina i Satana me itre dremoni. Tro sa ce wang la itre aqane tro sa isi me Satana me itre dremoni.

8. (a) Nemene la aqane tro sa cile catre kowe la itre dremoni? (b) Nemene la aqane jelethoine hnene la tusi Salamo 146:4, la trengathoi hna sil hnei Satana göne la itre ka meci hë?

⁸ Troa e me lapa mekune la Wesi Ula i Akötresie. Celë hi aqane tro sa thipetrije la itre trengathoi hna sil hnene la itre dremoni. Ceitune hi la Wesi Ula i Akötresie memine la ketre taua ka idrei. Ej a jelethoine la itre trengathoi Satana. (Efe. 6:17) Drei la ketre ceitun. Tusi Hmitrötr a amamane laka, thatreine kö tro sa ithanata memine la atr ka meci hë. (E jë la Salamo 146:4.) Eje fe a amamane laka, Iehova hmekuje hi la ka atreine qaja la mel elany. (Is. 45:21; 46:10)  Maine tro sa catre e la Wesi Ula i Akötresie me mekun ajuin, tro hë sa atreine thipetrije la itre trengathoi hna sil hnene la itre dremoni.

9. Nemene la itre huliwa nyine tro sa thipetrij?

⁹ Troa thipetrije la nöjei pengöne kuci haze. Itre nyipi Keresiano a thipetrij me methinëne la kuci haze. Tha easë kö a wang la itre trene iöni, maine thele pena troa ithanata memine la itre ka mec. Tune la hna amamane hnene la tane mekun hnapan, tha easë kö a sine la itre hna majemine kuca ngöne la itre hnëmec, e hna nyitrepene hnene la ini ka hape, mele kö la u ne la atr ka meci hë. Ketre, tha easë kö a wang la itre ka thele ewekë jëne la itre wëtresij maine itre ka kuci haze, matre troa atre la mel elany. (Is. 8:19) Atre hnyawa hi së laka, loi e tro sa thupë së qa ngöne la itre huliwa cili ke, kola aeasenyi së koi Satana me itre dremoni.

10-11. (a) Nemene la hna kuca hnene la itre pane Keresiano ekö ngöne la angatr a atre la nyipici? (b) Thenge la hna qaja ngöne 1 Korinito 10:21, pine nemene matre loi e tro sa xötrethenge la tulu i angatr, nge nemene la aqane tro sa kuca?

¹⁰ Trije pi la itre ewekë hna xome göi kuci haze. Ame ekö thene la itre pane Keresiano e Efeso, alanyimu la itre ka kuci haze. Ngo ame la angatr a atre la nyipici, tre, angatre ha axecië mekun. “Ala nyimu fe thene lo itre ka kuci haze ka traqa fë la itre itusi i angatr, me dreuthetrije qëmekene la ka ala nyim.” (Itre hu. 19:19) Hnei angatr hna kuca asë la hnei angatr hna atrein, matre troa cile kowe la itre dremoni. Ngacama ka tru thupen ekö la itre itusi ne kuci haze, ngo tha hnei angatre kö hna hamën maine salemëne pena. Hnei angatre pe hna dreuthetrij. Ame koi angatr, tha nyipiewekë kö la thupene la itre itusi cili. Aja i angatr troa amadrinë Iehova.

¹¹ Nemene la aqane tro sa nyitipune la itre pane Keresiano ekö? Loi e tro sa trij asë la  nöjei ewekë hna xom matre troa kuci haze. Kola qaja la itre drösinöe nyine ithupë, me itre drösinöe ne ihanyi, me itre nyine isi, me itre nyine iangazo me itre xane ju kö.—E jë la 1 Korinito 10:21.

12. Nemene la itre nyine tro sa isa hnyingëne göne la itre nyine iamadrinë?

¹² Loi e tro sa iëne hnyawa la itre nyine iamadrinë. Loi e tro sa isa hnying ka hape: ‘Eni kö a e la itre itus me itre zonal ka qeje kuci haze ngöne Ëternet? Nge tune kaa la itre miuzik me film me itre jeux video? Itre eje kö a amamane la kuci haze, maine vampires me zombies? Itre eje kö a amamane la kola kuci magie me itre nyine isi maine iangazo?’ Eje hi, hetre itre xaa nyine iamadrinë laka, tha ka qeje kuci haze kö. Celë hi matre, loi e tro sa iëne hnyawa la itre nyine iamadrinë. Loi e tro sa atreine waiewekë, me iananyi memine la itre ewekë hna sisin hnei Iehova. Easa ‘isin matre tha tro kö la mekuthetheu së a upe zö së” xajawa i Akötresie.—Itre hu. 24:16. *

13. Nemene la nyine tro sa thupën?

¹³ Tha tro pi kö a ithanatane la itre huliwa ne la itre dremoni. Loi e tro sa nyitipu Iesu. (1 Pet. 2:21) Qëmekene tro Iesu a traqa e celë fen, hnei nyidrëti hna mel e koho hnengödrai. Celë hi matre, atre hnyawa hi nyidrëti la pengö i Satana me itre dremoni. Ngo ame pe, tha hnei Iesu kö hna lapa qeje angatr, memine la itre hnei angatr hna kuca. Ame la aja i Iesu, tre, troa qeje Iehova kowe la itre atr. Tui Iesu, loi e tro sa thupëne la itre hne së hna qaja. Tha tro pi kö sa qaja la itre hna  kuca hnene la itre dremoni. Loi e tro pe sa qaja la nyipici ‘qa ngöne la hni së.’—Sal. 45:1.

14-15. (a) Pine nemene matre tha tro pi kö sa xouene la itre u ka ngazo? (b) Nemene la ka amamane laka, Iehova palahi a thupëne la nöje i Nyidrëti enehila?

¹⁴ Tha tro kö sa xouene la itre u ka ngazo. Ame enehila, ijije hi troa hane traqa koi së la itre ewekë ka ngazo. Maine jë, troa hnai së ngöne loto, maine tithi së hnei mec, maine tro pena sa mec. Ngo tha tro pi kö sa canga mekuhnine ka hape, hnene la itre dremoni. Tusi Hmitrötr a qaja ka hape, “ame la ijine memine la ewekë ka xulu,” tre, kola traqa koi së asë. (Ate cai. 9:11) Hnei Iehova hna amamane hnyawa laka, ka catre kö Nyidrëti hune la itre dremoni. Hnei Nyidrëti lo hna wathebo Satana troa humuthi Iobu. (Iobu 2:6) Ame ngöne lo hneijine i Mose, hnei Iehova mina fe hna amamane la mene i Nyidrë kowe la nöjei magoi e Aigupito. (Eso. 8:18; 9:11) Ketre, hnei Iehova hna hamë Iesu la men, matre troa musi hui Satana me itre dremoni. Thupene lai, hnei Iesu hna ukapië angatr e celë fen. Nge easenyi hë, matre kuië angatre pi kowe la hnaop ka thatre hmekun. E cili, thatreine hmaca kö angatr troa iaöne la itre atr.—Hna ama. 12:9; 20:2, 3.

¹⁵ Ame fe enehila, mama hi laka, Iehova palahi a thupëne la nöje i Nyidrë. Easa cainöj me inine la itre atr ngöne la nöjei götran ne la fen asë. (Mat. 28:19, 20) Easa qaja amamane la itre nyinyithina i Satana. Maine ijiji Satana ju troa acilëne la huliwa ne cainöj, tre, troa pë huliwa ne cainöj enehila. Ngo ame pe, thatreine kö angeic. Haawe, tha tro pi kö sa xouene la itre dremoni. Atre hnyawa hi së laka, “kola nyenyape agöne la ite nöj’ asë hnene la lue xajawa i [Iehova] troa xomexatuane la ite ka meköti hni koi nyidë.” (2 A. l. ite jo. 16:9) Eje hi, maine tro sa nyipici koi Iehova, tha tro kö la itre dremoni a amenu së.

16-17. Qaja jë la ketre ceitune ka amamane ka hape, nyipiewekë troa catr matre troa isi memine la itre dremoni.

¹⁶ Nyipiewekë tro sa catr, matre troa isi memine la itre dremoni. Ame itre xaa ijin, itre sinee së a upi së troa hane kuci haze.  Ame koi angatr, tro lai a thupëne la mele së. Ngo ame pe, Iehova a amanathithine la itre ka cile catr. Hanawang la tulu i Erica, ketre trejin ka mel e Ghana. Ame lo kola 21 lao macatre i angeic, hnei angeic hna nyiqaane inine la Tusi Hmitrötr. Ame pe, ka kuci haze la keme i angeic, matre ame la aja i nyidrë, tre, tro fe Erica a hane sine la itre hna majemine ka ngazo. Tro angeic a öni miitr hna huujën thatraqane la itre haze. Ngo tha kuca kö Erica. Hnene la itre sinee i angeic hna dreng akötrën me elëhni koi angeic. Ame koi angatr, Erica a pi tru kowe la itre haze. Nge tro hë lai a tithi angatr hnei mec, me hnëjin.

¹⁷ Hnene la hnepe lapa i Erica hna musinë angeic troa xötrethenge la itre hna majemine cili. Atre hi angeic laka, troa helë angeic qa ngöne la hnalapa, ngo tha hnei angeice kö hna drei angatr. Hnene la itre xaa trejin hna kepe angeic. Eje hi, hnei Iehova hna amanathithi Erica. Hnei Nyidrëti hna aijijë Erica troa sine la ketre lapa, ene la itre trejin. (Mar. 10:29, 30) Ngacama hna helë Erica me dreuthetrije la itre ewekë i angeic, ngo hnei angeic palahi hna mele nyipici koi Iehova. Hnei Erica hna xomi bapataiso, nge ketre pionie ka ixatua hë angeic enehila. Tha hnei angeice kö hna xouene la itre dremoni. Öni Erica göne la hnepe lapa i angeic: “Eni palahi a thithi sai angatr, matre tro angatr a hane atre Iehova, me nuamacanyi angatr qa ngöne la itre ini ka thoi, me nyihluene la Akötresie ka tru ihnimin.”

18. Nemene la itre manathith hne së hna troa kapa, e tro sa catre mejiune koi Iehova?

¹⁸ Tha ka ceitu kö la itre jol hne së hna cile kow. Ngo ame pe, loi e tro asë hi sa cile kowe la itre dremoni, me catre mejiune koi Iehova. E cili, tro hë sa kapa la itre manathith ka nyimutre. Nge tha tro kö sa kei kowe la itre nyinyithina i Satana. Ketre, tha tro kö sa xouene la itre dremoni me nue angatr troa sewe së troa nyihlue i Iehova. Loi e tro pe sa acatrene la aqane imelekeu së me Iehova. Hnei Iakobo hna cinyihane ka hape, “Drengethenge Akötresieti ju, nge icilekeu ju me Diabolo, nge tro hë angeic a ananyi nyipunie. Easenyi Akötresieti jë, nge tro nyidrëti a easenyi koi nyipunie.”—Iako. 4:7, 8.