Hnenge hna nyiqaane iananyi me Iehova lo eni a jajiny. Eni a öhn laka, itre sinee ining a kuca la itre hnei angatr hna ajan nge pëkö ka hnöthe la mele i angatr. Eni a piine la mele i angatr. Ame ngöne la hnalapa, hnei kaka me nenë hna acili wathebo, ngo hace catr itre ej koi ni. Nge kösë ketre ehnefe hë koi ni la huliwa i Iehova. Ngacama atre hi ni laka, Akötresi ka mele Iehova ngo hnenge hna iananyi me Nyidrë.

Tha ketre Keresiano ka nanazije kö ni. Ngo tha tru hmaca kö la hnenge hna kuca koi Iehova. Tha eni kö a hnëkë qëmekene troa cainöj, matre thatreine kö ni troa nyiqaan maine sisedrëne la porotrik memine la ketre atr. Pë hë madrineng troa cainöj, matre öning: “Hnauëne laka, pëkö thangane la huliwang e nöjei wiik me treu?”

Ame hë la kola 17 lao macatreng, hnenge hna trotrije la hnalapa me fek a tro Australie. Hace catre koi kaka me nenë. Nyidroti a hnehengazo ngo nyidroti fe a mejiune laka, tro palahi ni a lapa ngöne la nyipici.

 Ame e Australie, kola ngazo trootro la meleng. Tha sine lapa hë ni la itre icasikeu. Eni a ce tro memine la itre xaa thöth ka sine la itre icasikeu, ngo e thupen, eahuni a iji menu la kahaitr me tro kowe la itre hnë fia jidr. Akötr me hleuhleu la meleng ekö ke, caa wangacang ngöne la nyipici nge caasi ngöne la fene i Satana.

Thupene la lue treu, eni a iöhnyi memine la ketre trejine föe. hnei eahlo hna xatua ni troa pane mekune la meleng. Eni a ce mel memine la foa lao xaa trejine föe ngöne la ketre uma. Hne huni hna hëne la atre thupëne la sirkoskripsio me föi nyidrë, Tamara, matre troa ce lapa me eahuni ngöne la wiik. Maine nyidrëti a iwai ngöne la ekalesia, eahuni pë hë lapa me Tamara. Madrine catre hun, ke lolo la thiina i eahlo matre tha eahuni kö a xou troa ithanata. E cili, eni trotrohnin laka, ijije hi tro sa madrin tui eahlo me catre huliwa koi Iehova.

Ketre, ka madrin palahi Tamara. Hnene la ihnimi eahlo kowe la nyipici me aja i eahlo troa cainöj, matre eni a ajane troa nyitipu eahlo. Hnei eahlo hna catre huliwa koi Iehova, matre madrin me tingetinge la mele i eahlo. Ngo ame pe ni, tha tru kö la hnenge hna kuca matre hleuhleu me akötr la meleng. Jëne la tulu i Tamara, eni a trotrohnine laka, ame la ka sisitria catre koi Iehova tre, ene la troa nyihlue i Nyidrë ce “memine la madin” me tro “fë la nyima.”—Sal. 100:2.

Eni a ajane troa hane madrin tui Tamara. Ngo loi e tro ni a pane saze la aqane meleng. Ngacama hmitr ngo hnenge hna nue trengecatre göne lai. E cili, hnenge hna hnëkë qëmekene troa cainöj me xom e itre xaa ijin la huliwa ne pionie ka ixatua. Hetre thangane hë la huliwa ne cainöjeng. Tha eni hmaca kö ni a hnehengazo menu. Ketre, eni palahi a huliwane hnyawa la Tusi  Hmitrötr. E cili, hnenge hna mekun troa xome la huliwa ne pionie e nöjei treu.

Hnenge fe hna ce tro memine la itre trejin ka kuca la hnei angatre hna atreine koi Iehova. Hnene la tulu i angatr, matre eni a thele troa amë panëne la huliwa i Iehova me iëne la itre hna majemine ka loi. Hnenge fe hna xome la huliwa ne pionie lapa ke, eni a ajan troa catre cainöj. Nyipici, nyimutre la itre macatre ne eni ngöne la nyipici, ngo kösë eni petre hi a öhn laka, hetre göhneng e hnine la ekalesia. Thatreine kö ni qaja la madrineng!

Thupene la caa macatre, eni a iöhnyi me Alex, ketre trejin ka hnimi Iehova me loi thiina nge ka wangatrune la huliwa ne cainöj. Ketre atre ixatua nyidrë, nge sikisi hë lao macatre ne xome nyidrëti la huliwa ne pionie. Hnei Alex hna cainöj e Malawi, ke kola aja ixatua e cili. Ketre, hnene la tulu ne la itre mesinare hna ithuecatre koi nyidrë troa amë panëne la huliwa ne la Baselaia.

Hnei nyio hna faipoipo lo 2003. Qaane ju hi la macatre cili, hnei nyio palahi hna huliwa koi Iehova ngöne la drai ka pexej. Nyimutre la itre ini ka lolo hnei nyio hna xome ngöne la itre macatre, nge nyimu aqane amanathithi nyio fe hnei Iehova.

Ame lo 2009, hna upi nyio troa mesinare e Timor-Oriental, ketre nöj ka co e Indonésie. Nyio a sesëkötr me madrin ngo nyio mina fe a xou. Thupene la faifi lao treu, nyio a traqa ngöne la ketre traon hna hape, Dili.

Hnenge me Alex hna saze la aqane mele i nyio, tune la itre hna majemin me qene hlapa me xen. Ka puafala me thatre tusi la itre  atr. Angatre fe a xou me akötr ke, kolo palahi a isi me iakötrë. *

Eni a haine la huliwa ne cainöj e celë! Ame la ketre drai, hnenge hna iöhnyi me Maria, * ketre jajiny ka 13 lao macatre. Hna mecitriji nyën hnene la thine i nyën, nge nyëne hi a iöhnyi e itre xaa ijin me keme i nyën. Maria a hnehengazo ke, thatre kö nyëne la pengöne la mele i nyën elany. Ame la ketre ijin, hnei nyën hna treij me fe la itre aliene hni nyën. Tha trotrohnine kö ni ke, thatre hnyawa palakö ni la qene hlapa. Celë hi matre, hnenge hna sipo Iehova troa xatua ni troa ithuecatr me akeukawane la hni nyën. E cili, hnenge hna e koi nyën la itre xötr ne la Tusi Hmitrötr. Itre macatre thupen, hnei Maria hna saze la aqane ujë i nyën me aqane heetr me xomi bapataiso. Ame enehila, hetre itre ka ini tusi me nyën. Nyën ha sine la lapa ka cahae i Iehova, matre nyimu sinee i nyëne hë ka hnimi nyën.

Hnei Iehova hna amanathithine la huliwa ne cainöj e Timor-Oriental. Ngacama itre trejin ka xötrei bapataiso, ngo hetre itre ka pionie me atre ixatua me qatre thup. Ame itre xan, angatr a huliwa ngöne la itre uma ne ujë qene hlapa. Angatr a ujëne la itre itus ngöne la itre qene hlapa e cili. Tru la madrineng troa drei angatr e thinge la itre nyima ngöne la hna icasikeu me öhnyi angatr e hnyimahnyima me canga kökötre ngöne la nyipici!

Tha ceitu kö la mel e Timor-Oriental me Australie. Ame pe, lolo catre kö la meleng e cili. Ame itre xaa ijin, eni me Alex a ce ti kar memine la itre ka qa hna maketr ka itö ie hna pekën me itre sil. Hnei nyio hna ini tusi e hnine la itre neköi uma ka hedredrei me menyik, nge hetre gutu ka nyinyap e hnin. Ngo öning: “Madrine catre ni!”

Tru la hni ne oleng koi kaka me nenë ke, hnei nyidroti hna trongëne la hna qaja ngöne Ite Edomë 22:6. Hna xatua ni troa atrepengöi Iehova hnyawa, ngacama hnenge hna akötrë nyidro, ngöne lo eni a jajiny. Ketre, madrine catre nyidro koi ni me Alex ke, nyio palahi a catre huliwa koi Iehova. Qaane lo 2016, nyio a iwai trootro ngöne la itre teritoar ne la filial ne Australie.

Tha madrine kö ni ke, hnenge hna qaja ekö ka hape, ketre ehnefe la huliwa ne cainöj. Ngo ame enehila, madrine catre ni troa cainöj. Trotrohnine hë ni laka, ngacama easa cile kowe la nöjei pengöne jol, ngo loi e tro sa catre nyihlue i Iehova. E cili, tro ha tingeting me lolo la mele së. Celë hi lai hnenge hna öhn me Alex ngöne la 18 lao macatre ka ase hë. Caasi hi la mekunang me Dravita lo nyidrëti a qaja koi Iehova ka hape: “Tro angat’ asë angete lapaune koi cilie a madin; tro pala kö angat’ a hë madin . . . Tro angete hnine la atesiwa i cilie a madi cilie.”—Sal. 5:11.