Hnauëne la Iesu a amexeje la hna qaja hnei Dravita ngöne Salamo 22:1, qëmekene troa mec?

Qëmekene tro Iesu a mec, hnei nyidrëti hna qaja ngöne Mataio 27:46, ka hape: “Akötresie, Akötresinge fe, hnauëne la nyipëti a nue ni?” Hnei Iesu hna amexeje lo itre trengewekë i Dravita ngöne Salamo 22:1. (Mar. 15:34) Tha kolo kö lai a hape, nyidrëti a kucakuca maine pë lapaune pena. Atre hi Iesu la kepin matre nyidrëti a mec, nge aja i nyidrëti troa nue la mele i nyidrë. (Mat. 16:21; 20:28) Ketre, atre hi Iesu laka, tro Iehova a huletrije la “ekö hage xötreithi” nyidrë, ngöne la kola troa humuthi nyidrë. (Iobu 1:10) Hnei Iesu hna amamane laka, tro nyidrëti a mele nyipici, ngacama nyidrëti a troa mec.—Mar. 14:35, 36.

Hnauëne la Iesu a amexeje la itre hna qaja ngöne Salamo? Thatre hnyawa kö së, ngo hetre kepin. *

Iesu a amexeje la itre trengewekë cili, matre troa amamane laka tro la Keme i nyidrë a nue nyidrëti troa mec. Nyipiewekë tro Iesu a huujëne la mele i nyidrë, nge tha tro kö a amele nyidrëti hnei Iehova. Hnei nyidrëti hna traqa e celë fen matre troa “tupathe la mec thatraqane la nöjei atr asë.”—Heb. 2:9.

Iesu a qaja la itre trengewekë cili, matre troa amexeje la Salamo 22. Hnei angetre  Iudra ekö hna majemine inin me hnehene la itre xötr ne la tusi Salamo. Maine tro sa qaja la ketre xötr ne la tusi Salamo, tro hë angatr a thele la itre mekun ka tru ne la meken. Matre, Iesu e celë a xatua angetre Iudra troa lapa mekun lo itre hna perofetan ngöne la tusi Salamo göne la meci nyidrë. (Sal. 22:7, 8, 15, 16, 18, 24) Ame ngöne la itre xötr tixenuë ngöne Salamo 22, kola atrunyi Iehova ka hape, tro Nyidrëti a Joxu uti hë la cane la fene hnengödrai.—Sal. 22:27-31.

Iesu a amexeje la itre trengewekë cili, matre troa amamane laka, pëkö engazo i nyidrë. Qëmekene troa mec, hna kootrë Iesu me silitrengathoi nyidrë. (Mat. 26:65, 66) Hnene la itre atrene la Hnakootre Ka Tru hna upezö nyidrë. Tha hnei angatre kö hna trongëne la itre hna amekötin. (Mat. 26:59; Mar. 14:56-59) Iesu e celë a amamane laka, tha ka meköti kö la itre hna kuca koi nyidrë.

Iesu a amamane laka, hnei Iehova hna nue Dravita, lo atre cinyihan la tusi Salamo, troa akötr. Ngo tha kolo kö lai a hape, tha kepe angeice hmaca kö hnei Nyidrë. Tha hnei Dravita kö hna hnying pine laka, ka nanazije lapaune i angeic. Kola qaja ngöne la tusi Salamo ka hape, angeic a mejiun laka, tro Iehova a thupë angeic me amanathithi angeic. (Sal. 22:23, 24, 27) Ketre tune fe koi Iesu, “Nekö i Dravita,” ngöne lo nyidrëti a akötr hune la sinöe ne iaxösisi. Tha kolo kö lai a hape, tha kepe nyidrëti hë hnei Akötresie.—Mat. 21:9.

Iesu a ajane troa qaja la akötre i nyidrë pine laka, tha hnei Iehova kö hna amele nyidrë me nue nyidrëti troa mele nyipici. Ame ngöne la qaan, tha hnei Iehova kö hna mekun laka, tro la Nekö i Nyidrëti a akötr me mec. Hnei Iesu hna cile kowe la itre jol cili ke, hna tha idrei hnei Adramu me Eva. Ngacama pëkö engazo i Iesu, ngo hnei nyidrëti hna akötr me mec, matre troa sa koi Satana me huujëne la mele i nyidrë nyine thupene mel matre itöne la hna aluzin hnene lo pane atr. (Mar. 8:31; 1 Pet. 2:21-24) Ngo nyipiewekë tro Iehova a nue Iesu troa pane akötr.

Hnei Iesu hna xatuane la itretre drei nyidrë troa trotrohnine la kepin matre Iehova a nue nyidrëti troa mec tune lai. * Atre hi Iesu laka, nyimutre la itre ka troa elëhni pine la hna qanangazo nyidrë me athipi nyidrë hune la sinöe ne iaxösisi, ceitu me ketre atr ka ngazo. (1 Kor. 1:23) Ngo maine tro la itretre drei nyidrëti a trotrohnine la kepin matre nyidrëti a mec, tro hë angatr a wangatrune la itre hnei nyidrëti hna kuca. (Gal. 3:13, 14) Tro hë angatr a goeë Iesu ceitu me atre iamele, ngo tha tune kö me atr ka ngazo.

Ngacama nyimu kepin matre Iesu a qaja la itre trengewekë cili, ngo trotrohnine hi nyidrëti laka, aja i Iehova tro nyidrëti a akötr. Celë hi matre, thupene la nyidrëti a amexeje lo itre hna qaja ngöne la tusi Salamo, öni nyidrë: “Ase hë ni kuca la nöjei ewekë hnei nyipëti hna amekötine koi ni!” (Ioane 19:30; Luka 22:37) Nyipici, hnene laka tha hnei Iehova kö hna amele Iesu koi hnepe ijine hi, matre hna aijijë Iesu troa eatrëne la hnëqa i nyidrë e celë fen. Ketre, kola eatr “la nöjei ewekë asë hna cinyihane ngöne la wathebo i Mose, me nöjei perofeta, me ite Salamo” göi Iesu.”—Luka 24:44.