1-2. Nemene la thupene mel, nge pine nemene matre ka nyipiewekë catre ej?

 AME Adramu, tre, ketre atr ka pexej ekö. Ngo hnei angeic hna kuca la ngazo, matre tha ijiji angeice hë me itre matra i angeic troa hetrenyi la mele ka pë pun. Eje hi, tha zö ne la itre matra i Adramu kö ngo zöi angeic ke, hnei angeic hna sipu iëne troa tha drei Akötresie. (Rom. 5:12, 14) Ngo hapeu, hetre hnei Iehova kö hna troa kuca matre tro la itre matra i Adramu a hetrenyi hmaca la mele ka pë pun? Eje hi! Thupene la ngazo i Adramu, hnei Iehova hna amamane la aqane tro Nyidrëti a thapa la itre matra i Adramu qa ngöne la ngazo me mec. (Gen. 3:15) Hnei Nyidrëti hna ami ijine matre troa upe la Nekö i Nyidrëti e celë, matre “hamëne la mele i angeic nyine thupene mel kowe la ka alanyim.”—Mar. 10:45; Ioane 6:51.

² Nemene la thupene mel? Ame ngöne la Itre Hna Cinyihane Qene Geres, kola qaja la thupen hna hamën hnei Iesu matre troa nyihnane la mel hna aluzin hnei Adramu. (1 Kor. 15:22) Ngo pine nemene matre ka nyipiewekë la thupene mel? Pine laka, hnei Iehova hna amekötin ngöne la Wathebo i Mose ka hape, mel thupene mel. (Eso. 21:23, 24) Pine laka, hnei Adramu hna aluzine la mele i angeic ka pexej, matre nyipiewekë tro Iesu a huujëne la mele i nyidrëti ka pexej. (Rom. 5:17) Celë hi matre kola hë Iesu “Kem ka epine palua” kowe la itre ka lapaune kowe la thupene mel.—Is. 9:6; Rom. 3:23, 24.

3. Thenge la Ioane 14:31 me 15:13, pine nemene matre hnei Iesu hna huujëne la mele i nyidrë ka pexej?

³ Hnei Iesu hna huujëne la mele i nyidrë pine laka, tru la ihnimi nyidrëti koi Iehova me kowe la itre atr. (E jë la Ioane  14:31; 15:13.) Hnene la ihnimi cili hna upi Iesu troa mele nyipici me kuca la aja ne la Keme i nyidrë uti hë la nyidrëti a mec. Celë hi ka aijijë Iehova troa eatrëne la aja i Nyidrë kowe la itre atr me ihnadro. Ame ngöne la tane mekun celë, tro sa ce wang la kepin matre hnei Iehova hna nue Iesu troa akötr me mec. Tro fe sa ce wang la aqane amamane hnene la ketre atre cinyihane la Tusi Hmitrötr, la hni ne ole i angeic kowe la thupene mel. Nge tro fe sa ce wang la aqane tro sa acatrene la hni ne ole së kowe la ahnahna cili qaathei Iehova me Iesu.

4. Qejepengöne jë la aqane meci Iesu.

⁴ Pane mekune jë la itre akötr hna melën hnei Iesu ngöne lo drai tixenuë i nyidrëti e celë fen. Ngacama ijije hi tro nyidrëti a sipo ixatua kowe la itre miriade lao angela, ngo hnei nyidrëti hna nue la itre sooce i Roma troa othi nyidrë. (Mat. 26:52-54; Ioane 18:3; 19:1) Hnei angatr hna thaucë Iesu uti hë la kola thupa la itre ijöne i nyidrë. Thupene lai, hnei angatr hna atë hune la ju i Iesu ka eatr, la ketre sinöe ka hace, me upi nyidrë troa ajöne uti hë la hnë troa athipi nyidrë. Ngo pine laka, pëhë trengecatre i Iesu, matre hna upe la ketre atr troa ajöne la isinöe. (Mat. 27:32) E cili, hnei angatr hna jei faone la lue ime me lue ca i Iesu. Matre ame hë la angatr a acile la sinöe, kola zezenyi la ijöne i Iesu ke, hace la ngönetrei nyidrë. Akötre me treije hleuhleu la itre sinee i Iesu me thine i nyidrë. Ngo kola hnyimasai nyidrë hnene la itre hene ne hmi angetre Iudra. (Luka 23:32-38; Ioane 19:25) Eje hi, itre hawa ne akötre i Iesu. Thatreine hë nyidrëti mano hnyawa ke, pëhë trengecatre i nyidrë. Ame pe, hnei Iesu hna thith ka hape, ase hë nyidrëti eatrëne la aja ne la Keme i nyidrë. Thupene lai, nyidrëti a aca si mano me mec. (Mar. 15:37; Luka 23:46; Ioane 10:17, 18; 19:30) Nyipici, hna ahmahmanyi Iesu me axösisi nyidrë. Tru catre la akötre i nyidrë qëmekene troa mec!

5. Nemene la ewekë ka akötrë Iesu?

⁵ Ame la ka akötrë Iesu ke, tha ene kö la troa humuthi nyidrë, ngo kolo kepin matre kola qanangazo nyidrë uti hë la nyidrëti a mec. Eje hi, hna silitrengathoi Iesu ka hape, hnei nyidrëti hna qajangazo Akötresie, me tha metrötrëne la ëje i Nyidrë. (Mat. 26:64-66) Hnene laka, akötre catre Iesu, matre nyidrëti a ajane tro Iehova a thepe nyidrëti qa ngöne la itupathe cili. (Mat. 26:38, 39, 42) Ngo pine nemene matre Iehova a nue la Nekö hnimina i Nyidrë troa akötr me mec? Tro sa ce wang la köni kepin.

6. Pine nemene matre hna athipi Iesu hune la sinöe ne iaxösisi?

⁶ Ame pane kepin ke, ene la troa amele angetre Iudra qa ngöne la hnëjin. (Gal. 3:10, 13) Hnei angatre lo hna sisinyi troa drengethenge la Wathebo i Akötresie, ngo tha hnei angatre kö hna eatrën. Celë hi lai ka nyixane lo ngazo qaathei Adramu. (Rom. 5:12) Ketre, thenge la Wathebo i Akötresie koi angetre Isaraela, troa humuthe la atr ka kuca la ngazo me athipe la ngönetrei angeic hune la sinöe. Ketre ewekë lai hna hnëjine hnei Akötresie. * (Deu. 21:22, 23; 27:26) Celë hi matre, ame la kola athipi Iesu hune la sinöe ne iaxösisi ke, hnei nyidrëti hna thue la ngazo ne la angetre Iudra. Ngacama angatre lo ka nuetriji nyidrë, ngo ame pe, hnei angatre fe hna kepe thangane la meci nyidrë.

7. Nemene la hnaaluene kepin matre Akötresieti a nue Iesu troa akötr?

 ⁷ Ame la hnaaluene kepin matre Iehova a nue Iesu troa akötr, tre, matre troa hnëkë Iesu göne la hnëqa i nyidrë ne Atre Huuj Ka Sisitria. Atre hi Iesu laka, tha ka hmaloi kö troa drengethenge Akötresie ngöne la easa cile kowe la itre jol ka tru. Pine laka, catrehnine palaha la itre itupath, matre hnei Iesu hna sipo ixatua koi Iehova “jëne la itre xëwe me itre sipo hna sue catre fë me trenge timidra.” Hace me hleuhleu la mele i nyidrë. Celë hi matre, trotrohni së hi hnei Iesu ngöne la easa akötr, nge “ijiji nyidrëti hi troa xatua [së]” ngöne la itre jol. Tru la hni ne ole së koi Iehova ke, hnei Nyidrëti hna acile la Atre Huuj Ka Sisitria ka ‘trotrohnine la itre tria së’!—Heb. 2:17, 18; 4:14-16; 5:7-10.

8. Nemene la hnaakönine kepin matre Iehova a nue Iesu kowe la itre itupath ka tru?

⁸ Ame la hnaakönine kepin matre Iesu a akötr, tre, matre troa sa la ketre hnying ka tru, hna hape: Hapeu, ijije kö tro la itre atr a mele nyipici koi Iehova ngöne la angatr a cile kowe la itre itupath ka tru? Ame koi Satana, itre hlue i Iehova a nyihlue i Nyidrë göi thupen. Nge tui Adramu, tha ka nyipici kö la ihnimi angatr koi Iehova. (Iobu 1:9-11; 2:4, 5) Ngo xecie koi Iehova laka, tro la Nekö i Nyidrëti a mele nyipici. Celë hi matre hnei Nyidrëti hna nue Iesu kowe la itre itupath ka tru. Eje hi, hnei Iesu hna mele nyipici koi Iehova me jelethoi Satana.

9. Nemene la ini hne së hna xom qa ngöne la tulu i Ioane?

⁹ Hnene la itre ini göne la thupene mel hna acatrene la lapaunene la itre Keresiano. Celë hi ka xatua angatr troa catre cainöj me xomihnine la itre jol ka tru, ngacama qatre catre hë angatr. Tro sa ce wang la tulu i Ioane aposetolo. Hnei nyidrëti hna catre cainöjëne la nyipici göi Iesu me göne la thupene mel, koi 60 lao macatre. Ame hë la kola traqa koi 100 lao macatre i Ioane, hna akalabusi nyidrëti ngöne la hnapet e Patamo. Easa öhne la aqane xoue Ioane hnene la musi angetre Roma. Nemene la ngazo i Ioane? Hnei nyidrëti “hna qeje Akötresie me anyipici Iesu.” (Hna ama. 1:9) Drei la ketre tulu ne lapaune me xomihni!

10. Nemene la aqane amamane Ioane la hni ne ole i nyidrëti kowe la thupene mel?

¹⁰ Ame ngöne la itre tusi hna cinyihane hnei Ioane, hnei nyidrëti hna qaja la etrune la ihnimi nyidrëti koi Iesu, me hni ne ole i nyidrëti kowe la thupene mel. Traqa koi 100 lao qaja nyidrëti la thupene mel memine la itre eloine ej. Hnei Ioane hna cinyihane ka hape: “E traqa ju ketre kuca la ngazo, hetre ixatua thene la Kem. Iesu Keriso la ixatua, ene lo atre ka meköt.” (1 Ioane 2:1, 2) Ketre, hnei Ioane hna qaja la enyipiewekëne “troa anyipicine göi Iesu.” (Hna ama. 19:10) Eje hi, tru la hni ne ole i Ioane kowe la thupene mel. Nge tune kaa fe së?

11. Nemene la ka troa xatua së troa mele nyipici ngöne la itupath?

¹¹ Troa mele nyipici ngöne la itupath. Ame la ka pë hni ne ole kowe la thupene mel, angeic a qaja ka hape: ‘Tha nyipiewekë kö troa mele nyipici ngöne la itupath. Maine tro ni a kuca la ngazo, ijijinge hi troa canga ietra.’ Ngo ame pe së, easa qaja ka hape: ‘Waea! Tha tro kö ni a kuca la ewekë cili. Thatreine kö ni thëthëhmine la aqane  hnimi ni hnei Iehova me Iesu.’ Celë hi matre loi e tro sa sipo ixatua koi Iehova ka hape: ‘The troxomi huni kö kowe la itupath.’—Mat. 6:13.

12. Nemene la aqane tro sa trongëne la hna qaja ngöne 1 Ioane 3:16-18?

¹² Troa hnime la itre trejin. Celë hi ketre aqane tro sa amamane la hni ne ole së kowe la thupene mel. Pine nemen? Pine laka tha hnei Iesu kö hna meci thatraqai së hmekuj, ngo thatraqane fe la itre trejin. Kolo lai a hape, ka sisitria catre angatr koi nyidrë. (E jë la 1 Ioane 3:16-18.) Celë hi matre, loi e troa mama la ihnimi së koi angatr ngöne la aqane ujë së. (Efe. 4:29, 31–5:2) Maine jë, tro sa xatua angatr ngöne la angatr a cile kowe la itre jol, tune la kola tithi angatr hnei mec me lepi angatr hnei hulö. Ngo nemene la aqane ujë së ngöne la kola akötrë së hnene la ketre trejin?

13. Pine nemene matre nyipiewekë tro sa nue la ngazo hna kuca koi së?

¹³ Hapeu, jole kö troa nue la ngazo hna kuca koi së hnene la ketre trejin? (Lev. 19:18) Maine eje hi, loi e tro sa trongëne la eamo celë, ka hape: “The mano kö nyipunie ixomihnikeu me inualoinekeun, ngacama kola ngazo koi nyipunie. Nge loi e tro fe nyipunieti a nyitipune la aqane nue Iehova la itre ngazo i nyipunie.” (Kol. 3:13) Ame la easa nue la ngazo i itre xan, easë lai a amamane koi Iehova la hni ne ole së kowe la thupene mel. Nemene la aqane tro sa acatrene la hni ne ole së kowe la ahnahna cili qaathei Akötresie?

14. Nemene la ketre aqane tro sa acatrene la hni ne ole së kowe la thupene mel?

¹⁴ Troa olene koi Iehova la thupene mel. Öni Joanna, ketre trejin qa Inde ka 83 lao macatre: “Ame koi ni, nyipiewekë troa thithi o drai matre troa olene koi Iehova la thupene mel.” Ame la easa thith, loi e tro sa sipo Iehova troa nue la itre ngazo së. Nge maine hne së hna kuca la ketre ewekë ka ngazo catr ke, loi e tro sa sipo ixatua kowe la itre qatre thup. Tro angatr a drei së me hamë eamo qa hnine la Tusi Hmitrötr. Tro fe angatr a ce thithi me easë me sipo Iehova troa nue la itre ngazo së. E cili, tro hmaca a kepe së hnei Iehova.—Iako. 5:14-16.

15. Pine nemene matre nyipiewekë tro sa e me lapa mekun la itre itusi së ka qejepengöne la thupene mel?

¹⁵ Troa lapa mekun la thupene mel. Öni  Rajamani, ketre trejine föe ka 73 lao macatre: “Eni a treije la eni a e la ketre tus ka qaja la itre akötr hna melën hnei Iesu.” Maine jë, hna hane fe ketri epun ngöne la epuni a lapa mekun la itre akötre i Iesu. Maine tro palahi epuni a lapa mekun la thupene mel, tro ha acatrene la ihnimi epun koi Iesu me kowe la Keme i nyidrë. Haawe, loi e tro sa lapa mekun la thupene mel ngöne la easa ini tusi caas.

16. Nemene la thangan e tro sa qejepengöne la thupene mel koi itre xan? (Wange ju la icetrön.)

¹⁶ Troa qejepengöne koi itre xan la thupene mel. Aqane tro hi së lai a amamane la hni ne ole së kowe la ahnahna cili. Nyimutre la itre jiane huliwa ka xatua së troa qaja la kepin matre hnei Iesu hna meci thatraqai së. Ame ngöne la mekene 4 ne la boroshür Itre Maca Ka Lolo Qaathei Akötresie! hetrenyi la ini hna hape, “Drei Lae Iesu Keriso?” Ijije fe tro sa xome la mekene 5 ne la itus Nemene La Hna Ini Së Hnei Tusi Hmitrötr? ngöne la ini hna hape, “Thupene Mel—Ahnahna i Akötresie Ka Sisitria.” Ketre, easa amamane la hni ne ole së kowe la thupene mel, ngöne la easa sine e nöjei macatre la Drai Ne Amekunën la meci Iesu, me hëne la itre xan troa hane atrune me easë la drai cili. Drei la ketre madrine ka tru qaathei Iehova, troa hane qeje Iesu koi itre xan!

17. Pine nemene matre ahnahna ka tru qaathei Akötresie la thupene mel?

¹⁷ Nyimutre la itre kepin matre easa amamane la hni ne ole së kowe la thupene mel. Jëne la ahnahna cili, ijije hi tro sa nyisinee i Iehova, ngacama itre atr ka tha pexeje kö së. Nge ijije fe troa apatrene la itre nyinyithiina i Satana. (1 Ioane 3:8) Ketre, jëne la thupene mel, tro Iehova a eatrëne la aja i Nyidrëti e celë fen. Tro ha aparadraisone la ihnadro, nge tro ha hnimi Iehova me nyihlue i Nyidrë hnene la nöjei atr asë. Haawe, catre pi së amamane la hni ne ole së kowe la thupene mel, ahnahna ka tru qaathei Akötresie!