1-2. Kola aceitunë Iesu me drei ngöne 1 Peteru 2:21?

 PANE mekune jë laka, epuni a tro nyipine la itre boob hna kelem, matre nyipiewekë troa xötrethenge hnyawa la itre thupa ca ne la atr ka amamai gojeny. Sesëkötre ju hi epun laka, tha öhnyi nyidrëti hë hnei epun. Ame pe, tha seseu kö epun ke, mama palakö la itre thupa ca i nyidrë.

² Ketre tune la itre nyipi Keresiano, angatr a tro nyipine la fene i Satana. Eloine pe, hnei Iehova hna acili Iesu Keriso troa amamai gojenyi koi së, nge ijije hi tro sa xötrethenge la itre thupa ca i nyidrë. Hnene la ketre ka inamacan hna qejepengöne la 1 Peteru 2:21, ka hape, hetre thupa ca i Iesu ka mama palakö nge ijije hi tro sa xötrethenge itre ej. Ame ngöne la tane mekun celë, easa troa wang la köni hnying hna hape: Nemene la aliene la troa trongëne la itre thupa ca i Iesu? Pine nemene matre nyipiewekë troa xötrethenge nyidrë? Nge tune kaa la aqane tro sa kuca?

3. Nemene la aliene la troa trongëne la itre thupa ca ne la ketre atr?

³ Nemene la aliene la troa trongëne la itre thupa ca ne la ketre atr? Tusi Hmitrötr a qaja la itre hnaewekë “tro” me “waca” matre troa qaja la aqane ujë ne la ketre atr. (Gen. 6:9; Ite edomë 4:26) Ame la tulu hna hamën hnene la ketre atr, tre, ceitune hi memine la itre thupa ca i angeic. Ame la easa trongëne la itre thupa ca ne la ketre atr ke, kolo hi lai a hape, easa xötrethenge la tulu i angeic.

4. Nemene la aliene la troa trongëne la itre thupa ca i Iesu?

 ⁴ Nemene la aliene la troa trongëne la itre thupa ca i Iesu? Kolo hi a hape, troa xötrethenge la tulu i nyidrë. Ame ngöne la xötr ka nyitrepene la tane mekun celë, tre, Peteru a xom la tulu ka lolo hna hamën hnei Iesu göne la troa xomihnine la itre akötr. Ngo nyimutre la itre xaa aqane tro sa xötrethenge la tulu i Iesu. (1 Pet. 2:18-25) Ame asë hi la itre hnei Iesu hna qaja me kuca ke, nyine tulu thatraqai së.

5. Hapeu, ijije kö tro la itre atr ka tha pexeje kö a xötrethenge la tulu i Iesu? Qejepengöne jë.

⁵ Hapeu, ijije kö tro la itre atr ka tha pexeje kö a xötrethenge la tulu i Iesu? Thatreine kö së troa xötrethenge hnyawa la itre thupa ca i Iesu. Ngo ame pe, ijije hi tro sa kuca la hne së hna atrein, matre troa nyitipu nyidrë. E cili, tro hë sa trongëne la hna qaja hnei Ioane aposetolo, ka hape: “Tro thenge jë lo aqane tronge i nyidrë.”—1 Ioane 2:6.

6-7. Pine nemene matre ame la easa xötrethenge la tulu i Iesu, easa easenyi catre koi Iehova?

⁶ Kola easenyi së koi Iehova. Pine nemen? Pine la lue kepin. Ame la hnapan ke, hnei Iesu palahi hna amadrinë Akötresie. (Ioane 8:29) Haawe, maine tro sa xötrethenge la tulu i Iesu, tro hë sa amadrinë Akötresie. Nge ketre, Iehova a easeny memine la itre atr ka ajane troa easenyi me Nyidrë.—Iako. 4:8.

⁷ Ame la hnaaluen ke, hnei Iesu palahi hna xötrethenge la tulu ne la Keme i nyidrë. Celë hi matre, öni nyidrë: “Ame la atre öhnyi ni, ketre öhne fe hë angeic la Kem.” (Ioane 14:9) Tusi Hmitrötr a qaja la aqane utipine Iesu la ketre atr ka lepera, me aqane hnime nyidrë la ketre föe ka  neni madra, me aqane utipine nyidrëti la itre atr ka meci sineen. Ame la easa xomi tulu qa ngöne la aqane ujë i nyidrë koi itre xan, tre, easë fe hi lai a nyitipu Iehova. (Mar. 1:40, 41; 5:25-34; Ioane 11:33-35) Nge e cili, easa easenyi catre koi Iehova.

8. Pine nemene matre nyipiewekë troa xötrethenge Iesu, matre troa “ngaane la fen”?

⁸ Kola xatua së troa huliwa i Iehova. Ame ngöne la jidri tixenuë i Iesu e celë fen, öni nyidrë: “Ase hë ni ngaane la fen.” (Ioane 16:33) Kolo lai a hape, tha hna hane kö ajojezi nyidrë hnene la itre aqane mekun, itre aja, me aqane ujë ne la fen. Tha thëthëhmine kö nyidrë laka, hna upi nyidrëti e celë fen matre troa ahmitrötrëne la ëje i Iehova. Nge ame easë ke? Ame ngöne la fene celë, nyimutre la itre ewekë ka troa ajolëne la huliwa i Iehova. Ngo tui Iesu, maine tro sa catre kuca la aja i Akötresie, tro hë sa “ngaane” la fen.—1 Ioane 5:5.

9. Nemene la nyine troa kuca matre troa hetrenyi la mele ka pë pun?

⁹ Kola xatua së troa hetrenyi la mele ka pë pun. Ame la ketre ijin, hnene la ketre ka trenamo hna hnyingë Iesu la aqane troa hetrenyi la mele ka pë pun. Öni Iesu jë hi: “Jë fe, xötrethenge ni jë.” (Mat. 19:16-21) Öni Iesu mina fe kowe la angetre Iudra ka tha lapaune koi nyidrë, ka hape: “Itre mamoeng . . . a xötrethenge ni. Matre tro ni a hamë nyudreni la mele ka pë pun.” (Ioane 10:24-29) Hnei Nikodremo, ketre atrene la hnaakotr ka tru i angetre Iudra hna ajane troa atre la itre ini Iesu. Matre öni Iesu koi angeic ka hape, “tha tro kö a meci la atre amamane la lapaune i angeic kowe la Nekön, ngo tro pe a hetrenyi la mele ka pë pun.” (Ioane 3:16) Easa amamane la lapaune së koi Iesu, ngöne la easa trongëne la itre ini hnei nyidrëti hna hamën, me xötrethenge la tulu i nyidrë. E cili, tro sa hetrenyi la mele ka pë pun.—Mat. 7:14.

10. Tune kaa la aqane tro sa atrepengöi Iesu hnyawa? (Ioane 17:3)

¹⁰ Maine easa ajane troa xötrethenge la itre thupa ca i Iesu, loi e tro sa pane atrepengöi nyidrëti hnyawa. (E jë la Ioane 17:3.) Eje hi laka, thatreine kö së troa canga atrepengöi nyidrëti hnyawa. Celë hi matre, loi e tro sa atre la itre thiina i nyidrë, me aqane mekun, me aqane ujë i nyidrë. Ngacama ka hekö hë së ngöne la nyipici, ngo loi e tro palahi sa thele troa atrepengöi Iehova hnyawa me Iesu.

11. Nemene la hna qaja ngöne la foa lao Evangelia?

¹¹ Hnei Iehova hna amë e hnine la Tusi Hmitrötr la foa lao Evangelia, matre troa xatua së troa atrepengöi Iesu. Itre ej a qaja la mele i Iesu memine la huliwa ne cainöje i nyidrë. Kolo fe a amamane la itre hna qaja  me kuca hnei Iesu, memine la itre aliene hni nyidrë. Itre ej a aijijë së troa mekune hnyawa la tulu i nyidrë. (Heb. 12:3) Jëne la itre Evangelia, kösë easa xötrethenge la itre thupa ca i Iesu. Celë hi matre loi e tro sa inine la itre Evangelia matre troa atrepengöi Iesu hnyawa me nyitipu nyidrë.

12. Nemene la nyine tro sa kuca matre troa atrepengöi Iesu jëne la itre Evangelia?

¹² Tha tro hmekuje kö sa e la itre Evangelia, matre troa atrepengöi Iesu hnyawa. Loi e tro fe sa xomi ijine matre troa inine me lapa mekun itre ej. (Wange ju fe la Iosua 1:8.) Tro sa ce wang la lue ewekë ka troa xatua së troa lapa mekun me trongëne la itre ini hna xom qa ngöne la foa lao Evangelia.

13. Tune kaa la aqane troa mekun ajuine la itre Evangelia?

¹³ Ame la hnapan, loi e troa mekun ajuine la itre Evangelia. Pane huliwane jë la mekuna i epun matre troa atre la itre ewekë ka traqa ekö, memine la itre aliene hni ne la itre atr. Nyipiewekë troa pane ithel ngöne la itre itusi së. Loi e troa atre la itre ewekë ka traqa qëmeken me e thupene la hnei epuni hna e. Thele jë la itre ithuemacany göne la itre atr me itre götrane hna qaja. Loi e tro epuni a thele la itre mekun ka isapengöne maine ka ceitu ngöne la itre xaa Evangelia. Eje hi, hetre itre xaa ithuemacany hna amë hnine la ketre Evangelia, nge ka paatre ngöne la itre xan.

14-15. Tune kaa la aqane tro sa trongëne la itre ini hna hamën hnene la itre Evangelia?

¹⁴ Ame la hnaaluen, loi e troa trongëne la itre ini hna hamën hnene la itre Evangelia. Kolo hi lai a hape, tro sa trongëne la itre hne së hna inine göi Iesu. (Ioane 13:17) Thupene la hnei epuni hna inine la ketre Evangelia, loi e tro epuni a isa hnying ka hape: ‘Hetre ini kö hnenge hna xom qa ngöne la hna melën celë? Tune kaa la aqane tro ni a xatuane la ketre atr jëne la hna melën celë?’ Ketre, loi e tro epuni a mekun la ketre atr me iëne hnyawa la ijine troa ce ithanata me angeic la ini cili.

 ¹⁵ Jëne la tulu ne la sine föe ka pë ewekë, tro sa ce wang la lue mekun hna hamën.

16. Qejepengöne jë la ka traqa ngöne Mareko 12:41.

¹⁶ Troa mekun ajuine la hne së hna e. (E jë la Mareko 12:41.) Pane mekune jë la ewekë ka traqa lo 11 Nisan 33 laka, caa wiike pe hi qëmekene troa humuthi Iesu. Nyimutre la itre hawa ne cainöje nyidrë e hnine la uma ne hmi. Ngo tha ka hmaloi kö koi nyidrë ke, itre hene ne hmi a icilekeu memine la musi nyidrë. Ketre, hnei itre xan hna thele troa nyi zöi Iesu me tra thethi nyidrë hnene la itre hnyinge i angatr. (Mar. 11:27-33; 12:13-34) Thupene lai, hnei Iesu hna tro kowe la hnë kuië manie e hnine la uma ne hmi hna hën ka hape, hnahag ne la itre föe. E cili, nyidrëti a lapa me goeëne la itre atr ka traqa troa kuië ahnahna. Alanyimu la itre ka trenamo ka kuië manie atrun, matre drenge hi nyidrëti la kola hmomo la itre pies i angatr.

17. Thenge la Mareko 12:42, nemene la hna kuca hnene la sine föe ka pë ewekë?

¹⁷ E jë la Mareko 12:42. Thupene lai, Iesu a öhne la ketre “sine föe ka pë ewekë.” (Luka 21:2) Ngacama jole catr la mele i eahlo ke, tha tru kö la hnei eahlo hna hetreny, ngo hnei eahlo pe hna kuiëne la lue pies ka co catr. Nge göi tha drenge fe së la kola mala. Ame pe, atre hnyawa hi Iesu la hnei eahlo hna kuiën, ene la lue neköi manie ka co catr ngöne la ijine cili. Eje hi, tha ijiji eahlo kö troa itöne la caa neköi sisi, ketre waco ka co thupene ngöne la ijine cili.

18. Thenge la Mareko 12:43, 44, nemene la hna qaja hnei Iesu göne la ahnahna hna kuiëne hnene la sine föe?

¹⁸ E jë la Mareko 12:43, 44. Iesu a haine la hna kuca hnene la sine föe. Celë hi matre, hnei nyidrëti hna hëne la itretre drei nyidrë me qaja koi angatr ka hape: “Tru catre kö la hna kuiëne hnene la sine föe celë ka pë ewekë hnine la hnë kuië mani, hune la itre xan.” Thupene lai, öni nyidrë: “Hnei angatr asë hi [itre ka trenamo] hna kuiën qa ngöne la trengamo i angatr, ngo hnei eahlo pe hna hamëne la hnepe hnei eahlo hna hetreny, nge nyine mele i eahlo.” Eje hi, hnei eahlo hna hamën asë la hnei eahlo hna hetrenyi ngöne la drai cili. Nge eahlo pë hë a catre mejiune kowe la ixatua i Iehova.—Sal. 26:3.

19. Nemene la ini ka tru hne së hna xom qa ngöne la hnei Iesu hna qaja göne la sine föe?

¹⁹ Nyipiewekë tro sa trongëne la hne së hna inin. Loi e tro sa isa hnying ka hape: ‘Nemene la ini hnenge hna xom qa ngöne la hnei Iesu hna qaja göne la sine föe?’ Pane mekune jë laka, epuni la sine föe. Maine jë, ajane fe eahlo troa hamën atrune koi Iehova, ngo hnei eahlo hi hna hamën la hnei eahlo hna hetreny. Atre hi Iesu laka, ka tru koi Iehova la ahnahna i eahlo. Eje hi, hetre ini ka tru nyine tro sa xom qa ngöne la hna melën celë, ka hape: tru la madrine i Iehova la easa hamën la hne së hna hetreny, me nyihlue i Nyidrë hnene la hni së ka pexej, me mekuna së ka pexej. (Mat. 22:37; Kol. 3:23) Nyidrëti a madrine la easa kuca asë la hne së hna atrein koi Nyidrë! Kola qaja la traeme së me trengecatre hne së hna nue matre troa cainöj me sine la itre icasikeu.

20. Tune kaa la aqane tro sa trongëne la ini hne së hna xom qa ngöne la hna melën hnene la sine föe? Qaja jë la ketre ceitun.

²⁰ Tune kaa la aqane tro sa trongëne la ini hna xom qa ngöne la hna melën celë? Maine tro sa amamane kowe la itre trejin laka, Iehova a madrine kowe la itre ahnahna  hnei angatr hna kuca, tro hë lai a ithuecatre koi angatr. Maine jë, hetre ketre trejine föe ka qatre hë nge ka kucakuca pine laka, pëhë trengecatre i eahlo troa catre cainöj tune ekö. Maine pena, hetre ketre trejin trahmany hna tithi hnei mec nge ka kucakuca pine laka, tha sine hë nyidrëti la itre icasikeu. Ijije hi tro sa ithuecatre koi angatr jëne la itre “trenge ka loi nyine xupe draiën.” (Efe. 4:29) Loi e tro sa ce ithanatane me angatr la ini hne së hna xom qa ngöne la hna melën hnene la sine föe. E cili, tro ha xecie koi angatr laka, Iehova a madrine la easa hamë Nyidrëti la ka sisitria. (Ite edomë 15:23; 1 Thes. 5:11) Ame la easa qaja aloine la itre ka hamëne koi Iehova la hna hetreny ngacama ka co hi ke, easë hi lai a trongëne la itre thupa ca i Iesu.

21. Nemene la nyine tro sa kuca?

²¹ Drei la madrine ka tru troa atre la itre ithuemacanyi göne la mele i Iesu, jëne la itre Evangelia! Itre ej a aijijë së troa nyitipu Iesu me xötrethenge la itre thupa ca i nyidrë. Eje hi, loi e tro sa inine la itre Evangelia ngöne la easa ini tusi caas me ngöne la easa kuca la hmi ne la fami. maine easa ajane troa kepe eloine qa ngöne la ini tusi së, nyipiewekë tro sa mekun ajuine me trongëne la itre hne së hna e. Ketre, loi e tro sa nyitipune la itre hnei Iesu hna kuca, me dreng mina fe la itre hnei nyidrëti hna qaja. Ame ngöne la ketre tane mekun, tro pë hë sa ce wang la itre ini hne së hna xom qa ngöne la itre trengewekë i Iesu qëmekene tro nyidrëti a mec.