1. Nemene la hnei Iehova hna öhne thene la itre hlue i Nyidrë?

 IEHOVA AKÖTRESIETI a “hnime la nöje i nyidë.” (2 A. l. ite jo. 2:11) Drei la itre trengewekë ka akeukawane la hni së! Eje hi, öhne hi Iehova la itre thiina së me itre hne së hna atreine kuca ngöne la huliwa i Nyidrë. Ketre, Iehova la ka eatrongë së koi Nyidrë. Maine tro sa lapa huti thei Nyidrë, tro hë Nyidrëti a ceme easë uti hë epine palua!—Ioane 6:44.

2. Pine nemene matre itre xan a mekun laka, tha hnimi angatre kö hnei Iehova?

² Itre xan a qaja ka hape, ‘Atre hi ni laka, Iehova a hnime la nöje i Nyidrë, ngo hapeu, Nyidrëti kö a hnimi ni?’ Pine nemene matre angatr a hnyinge tun? Öni Oksana, * ketre trejin hna qanangazone ngöne lo angeic a nekönatr: “Eni a madrin ngöne la eni a xomi bapataiso me xome la huliwa ne pionie. Ngo thupene la 15 lao macatre, eni hmaca a mekun lo aqane akötrë ni ekö. Ame koi ni, thatreine kö tro Iehova a kepe ni me hnimi ni.” Ketre tui Yua, ketre pionie hna akötrëne ngöne lo angeic a nekönatr. Öni angeic: “Hnenge hna nue la meleng koi Iehova ke, eni a ajane troa amadrinë Nyidrë. Ngo ame koi ni, thatreine kö tro Nyidrëti a hnimi ni.”

3. Nemene la lue hnying hne së hna troa ce wang?

³ Tune la lue trejin, epuni a hnimi Iehova. Ngo maine jë, epuni fe a luelu göne la ihnimi Nyidrëti koi epun. Pine nemene matre tha tro kö sa luelu? Nge nemene la ka troa xatua së? Tro sa ce wang la itre mekun ka sa la lue hnying celë.

4. Pine nemene matre tha tro pi kö sa luelu göne la ihnimi Iehova koi së?

⁴ Ame la ihnim, tre, celë hi lai ka upi së troa kuca la ketre ewekë. Maine xecie koi së laka, Iehova a hnimi së me xatua së, tro hë së lai a hetre trengecatr troa nyihlue i Nyidrë ngöne la itre jol. Ngo maine tro sa luelu göne la ihnimi Iehova, tro ha paatre trootro uti hë “co hi la tenge cate” së. (Ite edomë 24:10) E cili, tro hë sa canga kei kowe la itre nyinyithiina i Satana.—Efe. 6:16.

5. Nemene la ka traqa kowe la itre trejin ka luelu göne la ihnimi Iehova?

⁵ Ame kowe la itre xaa trejin, tha hnimi angatre kö hnei Akötresie, matre kola nanazij la lapaune i angatr. Öni James, ketre qatre thup: “Eni a huliwa ngöne la Bethela me ixatua ngöne la ekalesia ka qaja la ketre qene hlapa, ngo eni palahi a hnying ka hape, ‘Iehova kö a kapa la itre hnenge hna kuca koi Nyidrë, me drenge la itre thithing?’ ” Öni pena Eva, ketre trejine föe ka cainöj ngöne la drai ka pexej: “Eni a öhne laka, hetre ethan e troa luelu göne la ihnimi Iehova koi së. Pëhë aja së me madrine së troa huliwa koi Nyidrë.” Nge öni Michael, ketre pionie lapa me qatre thup: “Maine tro sa mekun laka, tha hnimi së kö hnei Akötresie, tro hë sa iananyi me Nyidrë.”

6. Nemene la nyine tro sa kuca ngöne la easa nyiqane luelu göne la ihnimi Iehova?

⁶ Kola mama ngöne la itre hna melën laka, tha tro kö sa luelu göne la ihnimi Akötresie, wanga troa nanazij la lapaune së. Nemene la nyine tro sa kuca? Loi e tro sa canga lepetrij la itre mekun cili ka ngazo, me sipo Iehova la tingeting matre troa ‘thupëne la itre hni së me mekuna së.’ (Sal. 139:23; Fil. 4:6, 7) Nge loi e tro fe sa atre laka, hetre itre xaa trejin ka hane cile kowe la jole cili, tune la itre hlue i Iehova ekö. Tro sa ce wang la tulu i Paulo.

7. Nemene la itre jol hna cile kowe hnei Paulo?

⁷ Hapeu, tru catre palaha la itre huliwa i epun, matre epuni a mekun laka, thatreine hë epuni eatrëne itre ej? Maine eje hi, caasi hi la mekuna i epun me Paulo.  Tha hnei nyidrëti kö hna hnehengazone hi la caa ekalesia, ngo “itre ekalesia.” (2 Kor. 11:23-28) Hapeu, hna tithi epuni kö hnene la ketre mec ka thapa la madrine i epun? Ame Paulo ke, ‘hetre ka ithinyi ngöne la ngönetrei nyidrë,’ matre hace me akötr la mele i nyidrë o drai. Maine jë, ketre meci lai hnei Paulo hna ajane troa apatren. (2 Kor. 12:7-10) Hapeu, epuni fe kö a kucakuca pine la itre tria i epun? Celë fe hi ka traqa koi Paulo. Ame koi Paulo, “atr ka ngazo” nyidrë ke, tha ka pexeje kö nyidrë.—Rom. 7:21-24.

8. Nemene la ka xatua Paulo troa cile kowe la itre jol?

⁸ Ngacama nyimutre la itre jol hna cile kowe hnei Paulo, ngo hnei nyidrëti palahi hna catre nyihlue i Iehova. Nemene la ka hamë trengecatr koi Paulo? Hnene la lapaune i nyidrë kowe la thupene mel. Xecie hnyawa koi Paulo la hna thingehnaeane hnei Iesu ka hape, tro “la atre amamane la lapaune i angeic koi [Iesu] . . . a hetrenyi la mele ka pë pun.” (Ioane 3:16; Rom. 6:23) Celë hi matre, hnei Paulo hna lapaune kowe la thupene mel. Atre hi Paulo laka, aja i Iehova troa seng la itre ngazo së ngöne la easa ietra.—Sal. 86:5.

9. Nemene la ini hne së hna xom qa ngöne Galatia 2:20?

⁹ Xecie koi Paulo laka, hatrene la ihnimi Akötresieti koi nyidrë la meci Iesu. (E jë la Galatia 2:20.) Kola akeukawane la hni së hnene la hna qaja hnei Paulo ngöne la pune lai xötr, ka hape: “Nekö i Akötresie, atre hnimi ni, me meci pi ni.” Tha hnei Paulo kö hna luelu göne la ihnimi Akötresie, me mekun ka hape: ‘Nyimutre la itre kepin matre Iehova a hnime la itre trejin, ngo hapeu, Nyidrëti fe kö a hane hnimi ni?’ Öni Paulo koi angetre Roma: “Ngacama itre atre ka ngazo pala kö së, ngo hna meci pi së hnei Keriso.” (Rom. 5:8) Eje hi, pëkö ewekë ka atreine troa thepe së qa ngöne la ihnimi Akötresie!

10. Nemene la ini hne së hna xom qa ngöne Roma 8:38, 39?

¹⁰ E jë la Roma 8:38, 39. Atre hnyawa hi Paulo laka, tru catre la ihnimi Akötresieti koi së. Öni nyidrë ka hape, pëkö ewekë ka atreine “troa thepe së qa ngöne la ihnimi Akötresie.” Eje hi, hnei Iehova hna xomihnine la nöje Isaraela. Nge hnei Iehova fe hna hane hnim me utipi Paulo. Celë hi matre, ijije hi tro sa qaja tui Paulo ka hape, ‘Hnei Iehova hna nue la Nekö  i Nyidrë troa meci pi ni. Kolo lai a hape, Nyidrëti a hnimi ni.’—Rom. 8:32.

11. Pine nemene matre xecie koi Paulo laka, Iehova a hnimi nyidrë ngacama tru la itre ngazo i nyidrëti ekö, tune la hna qaja ngöne 1 Timoteo 1:12-15?

¹¹ E jë la 1 Timoteo 1:12-15. Maine jë, hnei Paulo hna mekun la mele i nyidrëti ekö. Nge ame koi nyidrë, pëkö ketre atr ka kuca la itre ewekë ka ngazo tui nyidrë! Qëmekene tro Paulo a atre la nyipici, hnei nyidrëti hna axösisine la itre Keresiano ngöne la nöjei traon, me akalabusi angatr, me kapa troa humuthi angatr. (Itre hu. 26:10, 11) Nge maine jë, hnei Paulo hna iöhnyi e thupen memine la neköne la ketre Keresiano hna humuth. Pane mekune jë la aliene hni Paulo. Maine jë, hnei Paulo hna akötr pine la itre hnei nyidrëti hna kuca ekö. Atre hi Paulo laka, thatreine kö nyidrëti troa köletrij la ngazo hna kuca. Ame pe, xecie koi Paulo laka, hnei Keriso hna meci thatraqai nyidrë. Celë hi matre, öni nyidrë: “Pine la ihnimi gufa i Akötresie, aposetolo fe hë ni.” (1 Kor. 15:3, 10) Nemene la ini koi së? Loi e xecie koi së laka, hnei Keriso hna mec thatraqai së isa ala caas. Nge jëne la meci nyidrë, ijije hi tro sa acatrene la aqane imelekeu së me Iehova. (Itre hu. 3:19) Ketre, tha Iehova hmaca kö a mekun la itre tria së ekö qëmekene tro sa atre la nyipici, maine e thupen pena. Ame la ka sisitria catr koi Iehova, tre, ene la itre ewekë hne së hna kuca enehila me itre hne së hna troa kuca elany.—Is. 1:18.

12. Maine easa mekun laka, tha ka nyipiewekë kö së, nemene la aqane troa xatua së hnene la hna qaja ngöne 1 Ioane 3:19, 20?

¹² Maine jë, hnei epuni fe hna mekun laka, tha ijiji epuni kö troa kapa la ahnahna cili, ene la thupene mel. Pine  nemen? Pine laka, tha ka pexeje kö së matre kola iaö së hnene la hni së. Easë fe a mekun laka, tha ka nyipiewekë kö së matre tha ijije kö troa hnimi së. (E jë la 1 Ioane 3:19, 20.) Loi e tro pe sa mekun laka, “draië kö Akötresie hune la itre hni së.” Haawe, tha luelue kö së laka, atraqatr la ihnimi Iehova koi së, nge aja i Nyidrë troa nue la itre ngazo së. Celë hi matre, nyipiewekë tro sa catre inine la Tusi Hmitrötr, me catre thith, me cememine la itre hlue i Iehova. Pine nemen?

13. Nemene la thangan e tro sa inine la Tusi Hmitrötr e nöjei drai? (Wange ju la hna eköhagen hna hape, “ Aqane Xatua Angatr Hnei Tusi Hmitrötr.”)

¹³ Troa inine la Tusi Hmitrötr e nöjei drai. E cili, tro hë sa atrepengöi Iehova hnyawa memine la itre thiina i Nyidrë, me öhne la etrune la ihnimi Nyidrëti koi së. Ketre, loi e tro sa lapa mekun la itre xötr hne së hna e, matre troa “xom amekötine la nöjei ewekë” ngöne la hni së me mekuna së. (2 Tim. 3:16) Öni Kevin, ketre qatre thup ka mekun laka, pëkö eloi angeic: “Hnenge hna e me lapa mekun la Salamo 103. Celë hi ka amekötine la itre mekunang, me aijijë ni troa öhne la etrune la ihnimi Iehova koi ni.” Nge öni Eva: “Ame e hej, eni a lapa mekun la itre mekuna i Iehova me itre thiina i Nyidrë. Celë hi ka akeukawane la hning me acatrene la lapauneng.”

14. Nemene la thangan e tro sa thithi e nöjei drai?

¹⁴ Troa thith e nöjei drai. (1 Thes. 5:17) Maine easa ajane troa nyisineene la ketre atr, loi e tro sa ithanata me angeic e nöjei drai. Celë fe hi aqane tro sa acatrene la aqane imelekeu së me Iehova. Ame la easa qaja koi Iehova la itre mekuna së, me itre aliene hni së, me itre hne së hna hnehengazon, easë hi lai a amamane laka, easa mejiune koi Nyidrë. Ketre, xecie hnyawa koi së laka, tru la ihnimi Nyidrëti koi së. (Sal. 94:17-19; 1 Ioane 5:14, 15) Öni Yua: “Ame la eni a thith, tha eni hmekuje kö a qaja koi Iehova la itre hnenge hna kuca ngöne la drai. Eni fe a fe la itre aliene hning koi Nyidrë. Trotrohnine hë ni laka, tha ketre maseta kö Iehova, ngo ketre Kem ka tru ihnimin.”—Wange ju la hna eköhagen hna hape, “ Hnei Epuni Kö Hna e La Tusi Celë?”

15. Nemene la aqane amamane Iehova laka, Nyidrëti a wangatrunyi së?

¹⁵ Troa cememine la itre trejin. Ame angatr ke, itre ahnahna qaathei Iehova. (Iako. 1:17) Iehova a wangatrune la itre hlue i Nyidrë, celë hi matre hnei Nyidrëti hna aijijë së troa sine la fami Nyidrë ka ihnim “o ijin’ asë.” (Ite edomë 17:17) Ame ngöne la itusi Paulo koi angetre Kolose, hnei nyidrëti hna qaja ka hape, hna  “akeukawanyi” nyidrë hnene la itre xaa trejin. (Kol. 4:10, 11) Ketre tui Iesu, hna xatua nyidrë hnene la itre sinee i nyidrë, itre angela me itre atr.—Luka 22:28, 43.

16. Nemene la aqane tro la itre trejin a xatua së troa easenyi koi Iehova?

¹⁶ Maine jë, easa xou troa kapa la ixatua ne la itre xaa trejin. Ngo maine tro sa fe la itre aliene hni së me sipo ixatua kowe la ketre trejin ka macaj, tro hë lai a hetre thangane ka loi koi së. Öni James: “Hnene la ixatua ne la itre trejin ka macaj hna aijijë ni troa cile catr ngöne la kola traqa la itre mekun ka ngazo. Hnei angatr hna drei ni, me amamane la ihnimi angatr koi ni. Jëne la itre nyipi sineeng, mama hnyawa ha koi ni laka, Iehova a meku ni me hnimi ni.” Haawe, nyipiewekë tro sa acatrene la aqane imelekeu së memine la itre trejin!

17-18. Drei la hne së hna troa drengethenge, nge pine nemen?

¹⁷ Aja i Satana troa sewe së troa kuca la loi. Ketre, angeic a ajane tro sa mekun laka, tha hnimi së kö hnei Iehova nge tha aja i Nyidrëti kö troa amele së. Ngo tune la hne së hna ce wang, itre trengathoi lai.

¹⁸ Iehova a hnimi epun, nge ka sisitria catr epun koi Nyidrë. Tui Iesu, maine tro epuni a drengethenge Nyidrë, tro hë epuni a ‘lapa fene la ihnimi nyidrë’ uti hë epine palua. (Ioane 15:10) Haawe, the drei Satana kö memine la itre aliene hni epun ka iaö. Loi e tro pe epuni a drengethenge Iehova, Akötresie ka öhne la ka loi thei epun. Loi e xecie koi epun laka, Iehova a “hnime la nöje i nyidë,” nge Nyidrëti fe a hnimi epun!