1. Nemene la ka troa thue madrine koi së?

 IEHOVA a ajane tro sa madrin ke, celë hi lai ketre igötranene la wene la uati hmitrötre i Nyidrë. (Gal. 5:22) Eje hi, sisitria catre la madrin e troa ham hune la troa kapa. Celë hi matre, easa madrin ngöne la easa catre cainöj me xatuane la itre trejin.​—Itre hu. 20:35.

2-3. (a) Thenge la Galatia 6:4, nemene la lue ewekë ka troa xatua së tro palahi a madrin ngöne la huliwa i Iehova? (b) Nemene la hne së hna troa ce wang ngöne la tane mekun celë?

² Ame ngöne Galatia 6:4, hnei Paulo aposetolo hna qaja la lue ewekë nyine tro sa kuca matre tro sa madrin. (E jë.) Ame la hnapan, loi e tro sa hamëne la ka sisitria koi Iehova. Maine tro sa kuca la hne së hna atreine koi Nyidrë, tro hë së lai a madrin. (Mat. 22:36-38) Ame la hnaaluene ke, tha tro kö sa goeëne la hna huliwa hnei ketre. Ngacama easa uti ipië trootro me wezipo, maine hetre hne së pena hna thatreine kuca, ngo loi e tro palahi sa hetre hni ne ole koi Iehova. Eje hi, qaathei Nyidrë la itre hne së hna atreine kuca. Celë hi matre, maine ka maca la itre xaa trejin troa cainöj, loi e tro sa madrin koi angatr. Tha angatre kö a pi mama fë la itre hnei angatre hna atrein. Ngo angatre pe a huliwane itre ej koi Iehova. Ketre, tha tro kö sa zalu maine meciune pena la itre hnei angatr hna atreine kuca. Ngo loi e tro pe sa xomi ini qa ngöne la tulu i angatr.

³ Ame ngöne la tane mekun celë, tro sa ce wang la nyine tro sa kuca ngöne la easa kucakuca pine laka, hetre ifego së nge tha ijije kö tro sa catre huliwa koi Iehova. Tro fe sa ce ithanatane la aqane tro sa huliwane la itre hne së hna atrein me xomi ini qa ngöne la tulu ne la itre xan.

4. Pine nemene matre itre xaa hlue i Iehova a kucakuca? Qaja jë la ketre ceitun.

⁴ Ame la itre xaa hlue i Iehova, angatr a kucakuca pine laka,  angatr a uti ipië trootro me wezipo. Thatreine hë angatr huliwa catr koi Iehova tune ekö. Celë hi lai ka traqa koi Carol. Ame ekö, hnei eahlo hna cainöj ngöne la itre götran gaa aja ixatua. Hnei eahlo hna inine la Tusi Hmitrötr memine la 35 lao atr me xatua angatr troa xomi bapataiso. Eje hi, hetre thangane catr la huliwa ne cainöje i Carol! Ngo thupene lai, hnei Carol hna wezipo, matre eahlo pë hë a umë ngöne la hnalapa. Öni Carol: “Eni a kucakuca ke, ame koi ni, ka loi kö la itre xaa trejin hui eni. Thatreine hë ni huliwa catr tune ekö. Nge thatreine hë ni kuca la hnenge hna ajan koi Iehova.” Eje hi, Carol a ajane troa kuca la hnei eahlo hna atreine koi Iehova. Ngo xecie koi së laka, Iehova a madrin me wangatrune la itre trengecatre i Carol.

5. (a) Nemene la nyine tro sa lapa mekun ngöne la easa kucakuca pine la itre ifego së? (b) Thenge la itre iatr, nemene la hna kuca hnene la ketre trejin matre hamëne la ka sisitria koi Iehova?

⁵ Maine jë easa hnehengazo me kucakuca pine laka, thatreine hë së huliwa catre koi Iehova tune ekö. Ngo loi e tro sa isa hnying ka hape, ‘Nemene la hnei Iehova hna ajane tro ni a kuca?’ Eje hi, Nyidrëti a ajane tro sa kuca la hne së hna atrein. Pane mekune jë së la ketre trejin qatre föe ka 80 lao macatre. Eahlo a kucakuca pine laka, thatreine hë eahlo catre cainöj tune ekö lo eahlo a 40 lao macatre. Eahlo a mekune laka, tha ka nyipiewekë kö maine tha madrine kö Iehova kowe la itre hnei eahlo hna kuca enehila. Ngo hapeu, ka nyipici kö lai? Maine hnei eahlo hna catre huliwa koi Iehova ngöne lo eahlo a 40 lao macatre uti hë la eahlo a 80 lao macatre, kolo lai a amamane laka, eahlo palahi a thele troa hamën la ka sisitria koi Iehova. Haawe, maine jë tro sa mekune laka, tha easë kö a kuca la ka ijije koi Iehova. Ngo tha tro kö sa thëthëhmine laka, Nyidrëti hmekuje hi la ka troa amekötine la ka loi koi Nyidrë. Celë hi matre, catre pi së kuca la hne së hna atrein, nge tro Iehova a madrin!​—Wange ju fe la Mataio 25:20-23.

6. Nemene la ini hne së hna xom qa ngöne la tulu i Maria?

⁶ Tha tro kö sa lapa mekun la itre hne së hna thatrein. Ngo loi e tro pe sa catre kuca la hne së hna atrein matre tro sa madrin. Hanawang la hna melën hnei Maria. Hna tithi angeic hnei mec, matre tha ijiji angeice hë troa catre cainöj. Ame lo xötrei, hleuhleu me akötr la mele i Maria, ke angeic a mekune laka, tha ka nyipiewekë hmaca kö angeic. Ngo e thupen, hnei Maria hna atre laka, hetre trejine föe ne la ekalesia ka meköle pe hi hune la göhnë i eahlo. E cili, hnei Maria hna thele troa xatua eahlo. Öni angeic: “Hnenge hna sipone lai trejin troa ce cainöj me eni jëne telefon maine cinyanyi tusi pena. Tru catre la madrineng ke, hnenge hna xatua eahlo.” Ketre tu së fe, tha tro kö sa hnehengazo pine laka, thatreine hë së kuca la itre xaa ewekë. Loi e tro pe sa lapa mekune la itre hne së hna atreine kuca. E cili, tro hë sa madrin. Ngo tune kaa e hetre itre ewekë hne së hna atreine kuca nge ijije hi tro sa catre huliwa koi Iehova?

7. Nemene la eamo ka lolo hna hamën hnei Peteru aposetolo kowe la itre Keresiano?

⁷ Ame ngöne la pane tusi Peteru, hnei nyidrëti hna ithuecatre kowe la itre trejin troa huliwane la itre ahnahna, ene la itre hne së hna atreine kuca, matre troa xatuane la itre trejin ne la ekalesia. Öni Peteru: “Haawe, pine laka, ase hë së isa kepe ahnahna, isa huliwane jë hë thatraqai ketre me ketre, tune la itre hlue ka lolo nge ka  atreine huliwa, itre hlue ne la ihnimi gufa i Akötresie.” (1 Pet. 4:10) Eje hi, tha tro kö sa cile troa huliwane la itre ahnahna hne së hna kapa me mekune laka, tro itre xan a zalu maine kucakuca pena. Tro pe lai a sewe së troa kuca la hne së hna atreine koi Iehova.

8. Thenge la 1 Korinito 4:6, 7, pine nemene matre tha tro kö sa pi mama fë la itre ahnahna hne së hna kapa?

⁸ Loi e tro sa huliwane hnyawa la itre ahnahna hne së hna kapa. Ngo tha tro kö sa pi mama fë itre ej. (E jë la 1 Korinito 4:6, 7.) Maine jë, tha jole kö koi epuni troa canga nyiqaane ini tusi memine la ketre atr. Haawe, the cile kö troa huliwane la ahnahna cili! Ngo tha kolo kö a qaja ka hape, tro epuni a pi mama fë la atreine cili. Pane mekune jë laka, epuni a cainöj nge epuni a nyiqaane ini tusi memine la ketre atr. Epuni a ajane troa qaja kowe la itre atrene la gurupe i epun. Ngo traqa pi hi la ketre trejin nge angeic a qaja la aqane tro fë angeic la zonal kowe la ketre atr me nyiqaane ini tus. Nemene la hnei epuni hna troa kuca e cili? Maine jë, tro epuni a treqene la ketre ijin matre troa qaja la hnei epuni hna melën, wanga troa thapa la madrinene lai trejine föe. Celë hi lai ketre aqane tro epuni a meku angeic. Nge loi e tro palahi epuni a qaja kowe la itre atr troa hane inine la Tusi Hmitrötr. Haawe, maine hetre hnei epuni hna atreine kuca, huliwane jë!

9. Tune kaa la aqane tro sa huliwane la itre ahnahna hne së hna kapa qaathei Iehova?

⁹ Tha tro kö sa thëthëhmine laka, qaathei Akötresieti asë la itre hne së hna atreine kuca. Eje hi, tha tro kö sa pi mama. Ngo loi e tro pe sa huliwane itre ej matre troa xatuane la ekalesia. (Fil. 2:3) Maine tro sa nue la trengecatre së me itre hne së hna atrein matre troa kuca la aja i Akötresie, tro hë së lai a madrin. Ketre, tha easë kö a madrin ke, easë pi mama fë la itre hne së hna atrein. Ngo hnene laka, easa huliwane itre ej matre troa atrunyi Iehova.

10. Pine nemene matre tha tro kö sa goeëne la eisapengö së me itre xan?

¹⁰ Loi e tro thupën matre tha tro kö sa goeëne la eisapengö së me itre xan. Pane mekune jë së laka, ka maca la ketre trejin troa cile fë cainöj. Nge celë hi lai hnei angeice hna atreine kuca. Ame pe, angeic a wangacone la ketre trejin ka thatreine cile fë cainöj. Ngo ame la trejin cili ke, ka ikep me inine hnyawa la itre nekönatr me  catre cainöj. Drei la madrine ka tru koi së ngöne la kola huliwane hnyawa hnene la itre trejin, la itre ahnahna hnei angatr hna kapa qaathei Iehova matre troa nyihlue i Nyidrë me xatuane la itre xan!

11. Pine nemene matre loi e tro sa xötrethenge la tulu i Iesu?

¹¹ Ngacama tha easë kö a goeëne la eisapengö së memine la itre xaa trejin, ngo ijije hi tro sa xomi ini qa ngöne la tulu i angatr. Hanawang la tulu i Iesu. Nyipici laka, ketre atr ka pexeje Iesu, ngo ijije hi tro sa xomi ini qa ngöne la itre thiina ka lolo i nyidrë me itre hnei nyidrëti hna kuca. (1 Pet. 2:21) Ame la easa kuca la hne së hna atrein matre troa xötrethenge la tulu i Iesu, easë hi lai a nyihlue i Iehova hnyawa me catre cainöj.

12-13. Nemene la ini hne së hna xom qa ngöne la tulu i Dravita joxu?

¹² Ame e hnine la Tusi Hmitrötr, hetrenyi la itre hlue i Iehova ekö ka catre nyihlue i Nyidrë, ngacama itre atr ka tha pexeje kö angatr. Ijije hi tro sa xomi ini qa ngöne la itre tulu i angatr. (Heb. 6:12) Hanawang la tulu i Dravita joxu. Ngacama tha ka pexeje kö angeic, ngo hnei Iehova hna qaja ka hape, ketre “atre amadrinëne la hning.” (Itre hu. 13:22) Nyipici, hnei Dravita hna kuca la itre ewekë ka ngazo. Ame pe, angeic la ketre tulu koi së. Pine nemen? Pine laka, ame lo kola haji Dravita, tha hnei angeice kö hna thele kepin la aqane ujë i angeic. Hnei angeice pe hna kapa la itre eamo me ietra. E cili, hnei Iehova hna nue la ngazo i angeic.​—Sal. 51:3, 4, 10-12.

¹³ Haawe, loi e tro sa isa hnying ka hape: ‘Tui Dravita, eni kö a canga kapa la itre eamo hna hamëne koi ni? Eni kö a thele kepin la itre hnenge hna kuca me upe zö itre xan? Eni kö a thele matre tha tro hmaca kö ni a kei kowe la ngazo?’ Nyipiewekë tro sa mekun la itre hnying celë ngöne la easa e la hna melën hnene la ketre hlue i Iehova e hnine la Tusi Hmitrötr. Hapeu, hnei angatre kö hna cile kow la itre jole hnei epuni hna melën? Nemene la itre thiina ka loi hnei angatre hna eënyin? Ketre, nyipiewekë tro sa isa hnying ka hape, ‘Tune kaa la aqane tro ni a nyitipu angatr?’

14. Nemene la thangan e tro sa xomi ini qa ngöne la tulu ne la itre trejin enehila?

¹⁴ Ijije fe hi tro sa xomi ini qa ngöne la tulu ne la itre trejin enehila, ngacama ka co angatr maine qatre hë. Maine jë, atre hi epuni la ketre trejin ka cile kowe la ketre  jol, tune la kola icilekeu hnene la itre sinee maine ka wezipo pena. Hapeu, hetre thiina ka loi kö hnei epuni hna öhn thene la trejin cili nge nyine troa nyitipun? Eje hi, maine tro sa xomi ini qa ngöne la tulu i angeic, tro lai a xatua së troa atreine cile kowe la nöjei pengöne jol. Drei la madrine ka tru koi së troa nyitipune la tulu ne la itre trejin ka catre lapaune koi Iehova enehila!​—Heb. 13:7; Iako. 1:2, 3.

15. Nemene la eamo hna hamën hnei Paulo aposetolo matre xatua së troa madrin me catre huliwa koi Iehova?

¹⁵ Loi e tro palahi sa hamëne la ka sisitria koi Iehova. E cili, tro ha tingeting me caasi la ekalesia. Hanawang la tulu ne la itre pane Keresiano ekö. Nyimutre la itre ahnahna me hnëqa hnei angatre hna kapa qaathei Iehova. (1 Kor. 12:4, 7-11) Ngo tha hnei angatre kö hna nue la itre ewekë cili troa thë la caasi e hnine la ekalesia. Hnei Paulo hna ithuecatre koi angatr troa kuca la hnei angatre hna atrein, matre troa “xupe draiëne la ngönetrei i Keriso.” Öni Paulo kowe la itre Keresiano ne Efeso: “Ame la kola isa huliwa hnyawa hnene la itre hnep, kolo hi lai a xatuane la ngönetrei asë troa tru trootro, nge ej a tru ngöne la ihnim.” (Efe. 4:1-3, 11, 12, 16) Celë hi matre, kola caasi me tingeting la nöjei ekalesia enehila.

16. Nemene la nyine tro sa kuca enehila? (Heberu 6:10)

¹⁶ Tha tro kö sa goeëne la eisapengö së me itre xan. Loi e tro pe sa xomi ini me xötrethenge la tulu i Iesu. Nyipiewekë tro fe sa xomi ini qa ngöne la tulu ne la itre hlue i Iehova ekö me enehila ka catre lapaun. Ketre, loi e tro palahi sa kuca la hne së hna atrein me mejiune laka, “thatreine kö [Iehova] thëthëhmine la itre huliwa” së. (E jë la Heberu 6:10.) Haawe, madrine jë së troa catre huliwa koi Iehova ke, Nyidrëti a wangatrune la itre trengecatre hne së hna kuca matre troa amadrinë Nyidrë.