Ame la troa sisiny, tre, kola qaja la troa “axeciën, maine qaja hnyawane la ketre ewekë qëmekei Akötresie.” Ijije hi troa qaja maine cinyanyine pena.

Ame itre xan, angatr a mekun laka, tha tro kö a sisinyi pine laka, öni Iesu: “The sisinyi kö . . . Matre e öni eö jë ka hape, ‘Ö,’ loi e troa ö, nge e ‘Waea,’ waea, ke qaathei Diabolo la hna nyixan.” (Mat. 5:33-37) Atre hi Iesu laka, hetre hna sisinyi ngöne la Wathebo i Mose nge hetre itre xaa hlue i Akötresieti fe ka hane sisiny. (Gen. 14:22, 23; Eso. 22:10, 11) Ketre, atre hi Iesu laka, hnei Iehova fe hna hane sisiny. (Heb. 6:13-17) Celë hi matre, tha Iesu kö e celë a qaja ka hape, tha tro kö sa sisiny. Nyidrëti pe a qaja ka hape, tha tro kö sa sisinyi menu kowe la itre ewekë ka tha nyipiewekë. Iehova a ajane tro pe sa eatrëne la hne së hna qaja.

Haawe, nemene la nyine tro sa kuca e kola upi së troa sisiny? Ame la hnapan, loi e tro sa pane mekun laka, atreine kö së troa eatrëne la hna qaja. Maine tha ijije kö, tha tro kö sa sisiny. Öni Tusi Hmitrötr: “Loi e troa tha nyi xepu, ngo ngazo troa nyi xepu nge tha aeatene kö.” (Ate cai. 5:5) Ame la hnaaluen, loi e tro sa thele la itre trepene meköt ka qaja la troa sisiny, me ujë thenge la mekuthetheu së. Nemene la itre xaa trepene meköt ka troa xatua së?

Ame la itre xaa nyine sisiny ke, ka ihmeku memine la aja i Akötresie. Ame la itre Temoë Iehova ke, angatr a sisinyi ngöne la kola faipoipo. Lue trefën a thingehnaeane qëmekei Akötresie me itre atr laka, tro nyidroti a ihnimikeu me imetrötrë “e mele petre kö [nyidro].” (Tha celë kö la hna qaja hnene la itre xaa trefën ngöne la kola faipoipo, ame pe, nyidroti palahi a sisinyi qëmekei Akötresie.) Thupene lai, kola qaja ka hape, lue trefëne hë nyidro, nge hna othi nyidro uti hë mec. (Gen. 2:24; 1 Kor. 7:39) Celë hi isisinyikeu hna ajane hnei Akötresie.

Ame la itre xaa nyine sisiny ke, tha ka ihmeku kö memine la aja i Akötresie. Ame la nyipi Keresiano ke, tha tro kö angeic a sisinyi troa isigöline la nöje i angeic maine nue la lapaune i angeic. Itre ewekë lai hna wathebon e hnine la itre Trengewekë i Akötresie. Ame la itre Keresiano ke, itre “trenyiwa [angatr] kowe la fen,” matre tha tro kö angatr a sine la itre jole ne la fen.​—Ioane 15:19; Is. 2:4; Iako. 1:27.

Ame la itre xaa nyine sisiny ke, thenge pë hë la isa mekuthetheu së. Qëmekene tro sa sisiny troa kuca la ketre ewekë, loi e tro sa pane lapa mekun la eamo hna hamën  hnei Iesu ka hape, “hamëne pi koi Kaisara la ewekë i Kaisara, nge koi Akötresie la ewekë i Akötresie.”​—Luka 20:25.

Pane mekune jë së laka, ketre Keresiano a ajane troa lapa hut ngöne la ketre nöj me kuci passeport. Ame pe, loi e tro angeic pane sisinyi ka hape, tro angeic a drengethenge hmekuje hi la itre wathebo hna acile ngöne la nöje cili. Maine jë, itre wathebo i nöj a upi angeic troa kuca la itre xaa ewekë ka tha ihmeku kö memine la itre wathebo i Akötresie. E cili, troa huliwa la mekuthetheu i angeic hna inine hnei Tusi Hmitrötr. Ame pe, ijije hi tro la itre musi a nue angeic troa saze la hna sisiny, matre tha tro kö a huliwa la mekuthetheu i angeic.

Celë hi lai hna qaja ngöne Roma 13:1, ka hape: “Loi e tro la nöjei atr a drengethenge la itre mus.” Haawe, ijije hi tro angeic a sisinyi troa kuca la ketre ewekë hna upi angeic hnei Tusi Hmitrötr.

Ame itre xaa ijin, tro fe a upi së troa xome la ketre ewekë maine kuca la ketre ewekë ngöne la easa sisiny. Ame ekö, angetre Roma me angetre Sekuthia a xome la itre taua i angatr matre troa sisiny qëmekene la haze ne isi. Nge ame la angetre Geres, angatr a li ime matre troa sisiny. Celë hi lai aqane amamane angatr laka, hetre Akötresieti e hnengödrai ka öhne la itre hnei angatr hna qaja me kuca.

Eje hi, tha tro kö la itre hlue i Iehova a sisiny jëne la ketre ewekë i nöj, nge hna huliwane hnene la itre hmi ka thoi. Ngo tune kaa e easë ngöne hna kootr, nge kola upi së troa ketr la Tusi Hmitrötr me sisiny troa qaja la nyipici? Ame e cili, isa qanyi së pë hë troa iën. Eje hi, hnene la itre xaa hlue i Akötresieti ekö e hnine la Tusi Hmitrötr hna hane kuca la ketre ewekë matre troa sisiny. (Gen. 24:2, 3, 9; 47:29-31) Ngo tha tro kö sa thëthëhmine laka, qëmekei Akötresieti la easa sisiny troa qaja la nyipici. Haawe, ame la kola hnying koi së, loi e tro hmekuje hi sa qaja la nyipici.

Ame la ka sisitria catr koi së ke, ene la aqane imelekeu së me Iehova. Celë hi matre, qëmekene troa sisiny, loi e tro sa pane thith me pane mekun ka hape, ka ihmeku memine la Tusi Hmitrötr la ewekë hna troa sisiny. Nge ame la easa sisiny, loi e tro sa eatrëne la hne së hna qaja.​—1 Pet. 2:12.