Ame e cili, ame kowe la ekalesia, kola nyipune la pane faipoipo i angeic ngöne la angeic hmaca a faipoipo me ketre föe qëmekene la itre mus. Pine nemen? Tro sa pane wang la hna qaja hnei Iesu göi troa seihnacil me faipoipo hmaca.

Ame ngöne Mataio 19:9, hnei Iesu hna qaja la kepin matre ijije hi troa seihnacil. Öni nyidrë: “Ame la atre sei hna cil me föe hmunë, ngo tha hna kuci ngazo kö, me xome hmaca la ketre föe, angeice hi lai a nyixetë.” Easa öhn e celë laka, (1) kuci ngazo hmekuje hi la nyipi kepin matre troa seihnacil, nge (2) maine tro la ketre trahmanyi a a trotrije la föi angeic ngo tha thenge kö lai kepine cili, me xome hmaca la ketre föe ke, angeice hi lai a nyixetë.

Hapeu, kolo kö lai a hape, maine tro la ketre trahmany a nyixetë me seihnacil ke, ijiji nyidrëti hë troa faipoipo hmaca me ketre föe? Waea. Ame la kola nyixetë hnene la trahmany, ijije hi tro la föi nyidrë a iën troa nue la ngazo i nyidrë. Ngo e maine xele kö la föe troa ce lapa me nyidrë, nge ase hë kapa hnei mus la hna seihnacil, haawe, ijiji nyidroti hë troa isa faipoipo me ketre atr.

Maine jë, aja ne la föe troa nue la ngazo ne la trahmany me ce lapa me nyidrë. Ngo tune kaa e xele kö nyidrë troa ce lapa me angeic me seihnacil? Pine laka, aja ne la föe troa nue la ngazo i trahmany me ce lapa me nyidrë, haawe, qëmekei Akötresie, tha ijiji nyidrëti kö troa faipoipo memine la ketre föe. Maine tro la trahmanyi a ena la wathebo i Tusi Hmitrötr me xome la ketre föe, angeice hi lai a nyixetë. Nge e cili, troa ameköti angeic hnene la itre qatre thup ne la ekalesia.—1 Kor. 5:1, 2; 6:9, 10.

Ame la trahmanyi a faipoipo memine la ketre föe, ngo tha ijiji nyidrëti pe thenge la hna qaja hnei Tusi Hmitrötr, tune kaa la aqane tro la ekalesia a goeëne la pane faipoipo i angeic memine la faipoipo ka hnyipixe? Hapeu, ka faipoipo palahi nyidrë memine lo pane föi nyidrë? Ijije pala kö tro la pane föe a iën troa nue la ngazo i nyidrë, maine triji nyidrëti pena? Hapeu, tro kö la ekalesia a qaja ka hape, nyidrëti a nyixetë memine la hnaaluene föi nyidrë?

Ame ekö, easë itre atrene la ekalesia a qaja ka hape, trahmanyi a nyixetë memine la hnaaluene föi nyidrë, e mele palakö lo pane föe hna nyixetë trij, nge tha faipoipo palakö angeic me kuci ngazo. Ngo ame lo Iesu a qejepengöne la seihnacil me faipoipo hmaca, tha hnei nyidrëti kö hna qaja la föe hna trotrij. Hnei nyidrëti pe hna qaja ka hape, maine tro la trahmanyi a seihnacil ngo tha thenge kö la hna qaja hnei Tusi Hmitrötr, me faipoipo pena memine la ketre  föe, angeice hi lai a nyixetë. Ame e cili, kolo hi lai a nyipune la pane faipoipo i angeic thupene la hna seihnacil me faipoipo hmaca (ame koi Iesu, kolo lai a nyixetë).

Ame la trahmanyi a seihnacil me faipoipo hmaca memine la ketre föe ke, tha tro hmaca kö lo pane föe hna nyixetë trij a nue la ngazo i nyidrë maine trotriji nyidrëti pena. Tha qa i angeice hmaca kö troa xome la mekune cili. Celë hi matre, tha tro kö la ekalesia a qaja ka hape, trahmanyi a nyixetë memine la hnaaluene föi nyidrë pine laka, mele palakö lo pane föe, nge tha ka faipoipo kö, maine hna kuci ngazo pena. b

Ame e caha, hnene la trahmany hna nyixetë me seihnacil memine la föi nyidrë. Ngo tune kaa e tro la trahmanyi a seihnacil ngo tha hna nyixetë kö, me xome pena la ketre föe? Tune kaa e hnei nyidrëti hna seihnacil me kuci ngazo e thupen memine la ketre föe, me faipoipo me angeic ngacama hna nue la ngazo i nyidrë hnene la pane föi nyidrë? Ame e cili, kola nyipune la pane faipoipo, ngöne la trahmanyi a seihnacil me faipoipo pena memine la ketre föe (kolo lai a nyixetë). Qëmekei mus, ka meköt la faipoipo i nyidrë memine lai hnaaluene föe. Tune lo hna qaja ngöne la Ita Ne Thup ne 15 Febuare 1980, götrane 31 me 32 (qene Wiwi), “maine kolo hmaca faipoipo la trahmany, ase hë nyipune lo pane faipoipo i angeic ngöne la angeic a seihnacil, me nyixetë, me xome la ketre föe.”

Nyipici, saze hë la aqane trotrohnine së la pengöne la troa seihnacil me faipoipo hmaca. Ame pe, tha tro kö sa thëthëhmine laka, ka hmitrötre koi Iehova la faipoipo, nge ketre ngazo ka tru la troa nyixetë. Maine tro la ketre trejine trahmanyi a seihnacil ngo tha thenge kö la hna qaja hnei Tusi Hmitrötr, me xome pena la ketre föe, tro la itre qatre thup a acile la ketre komite ne iameköti, ke angeic a nyixetë. (Maine ketre trejine fe la hnaaluene föi angeic, tro fe a acile la ketre komite ne iameköti koi angeic ke angeice fe a nyixetë.) Maine faipoipo hë nyidro, tha tro kö sa qaja ka hape, nyidroti palahi a nyixetë. Ame pe, tha tro kö la trejin trahmany a xomi hnëqa e hnine la ekalesia koi itre macatre, uti hë la ijine tha mekune hë la ngazo i angeic hnene la itre trejin ne la ekalesia. Qëmekene troa hamë hnëqa i angeic, tro la itre qatre thup a pane ce ithanatane la pengön ne lo pane föi angeic ekö, hna iaöne me hna nyixetë trij, memine la itre nekö i nyidro hna nuetrije lo co petre kö.—Mal. 2:14-16.

Atre hi së laka, tru la akötr ka xulu e troa seihnacil me faipoipo hmaca, ngo tha thenge kö la hna qaja hnei Tusi Hmitrötr. Celë hi matre, loi e tro sa goeëne la faipoipo tui Iehova laka, ketre ewekë ka hmitrötr.—Ate cai. 5:4, 5; Heb. 13:4.