1. Hnauëne la easa hamë mekun ngöne la itre ijine icasikeu?

 HNAUËNE la easa sine la itre icasikeu? Ame la pane kepin, ke easa atrunyi Iehova. (Sal. 26:12; 111:1) Ketre, easa sine la itre icasikeu matre troa ithuecatrekeu, ke easa melëne la hneijin ka ngazo. (1 Thes. 5:11) Ame la easa hamë mekun, easë hi lai a atrunyi Iehova me ithuecatrekeu.

2. Eu la easa hamë mekun ngöne la itre ijine icasikeu?

² E nöjei wiik, ijije hi tro sa hamë mekun ngöne la itre ijine icasikeu. Ame ngöne la pune wiik, easa hamë mekun ngöne la ini Ita Ne Thup. Nge ame ngöne la icasikeu ne nyipine wiik, easë fe a hamë mekun ngöne la götrane hna hape, Sine Thel me Ini Tusi Hmitrötr Ne La Ekalesia, me ngöne la itre xaa götrane ju kö.

3. Nemene la lue jol hne së hna cile kow, nge kola xatua së tune kaa hnei Heberu 10:24, 25?

³ Aja i easë asë troa atrunyi Iehova me ithuecatr kowe la itre trejin jëne la itre mekun hne së hna hamën. Ngo hetre ewekë ka troa ajolë së. Maine jë, easa xou troa hamë mekun, maine pena, easa pi sa, ngo tha hna aijijë së kö troa hamë mekun. Nemene la aqane tro sa elë hune la lue jole celë? Kola sa la hnyinge ngöne la tusi Paulo koi angetre Heberu. Öni Paulo ka hape, ka nyipiewekë catr troa “ithuecatrekeu” ngöne la itre ijine icasikeu. (E jë la Heberu 10:24, 25.) Ame la easa trotrohnine ka hape, kola xatuan la itre atrene la icasikeu hnene la itre mekun  hne së hna hamën, tro lai a thue aja koi së troa liim. Ngacama tha ase kö aijijë së troa sa, ngo easa madrin kowe la itre mekun hna hamën hnei itre xan.​—1 Pet. 3:8.

4. Nemene la köni mekun hne së hna troa ce wang ngöne la tane mekune celë?

⁴ Ame ngöne la tane mekune celë, tro sa ce wang la aqane tro sa ithuecatrekeu ngöne la itre ekalesia ka co (ala xalaithe hi la ka sine la itre icasikeu) me ngöne la itre ekalesia ka tru (tru hnei itre ka liim). Nge tro fe sa ce wang la aqane tro la itre mekun hne së hna hamën a ithuecatr koi itre xan.

5. Nemene la aqane tro sa ithuecatrekeu e tha tru kö hnei atr ka sine la itre icasikeu?

⁵ Ame ngöne la itre ekalesia ka co maine itre neköi gurup, ke xalaithe hi la atr ka sine la itre icasikeu. Matre ame la kola hnying hnene la trejin, nyidrëti a pane itreqe, ke pëkö ka liim. Eje hi, traem a tro, nge pë pena kö ithuecatr hna hamën. Ame e cili, nemene la nyine tro epuni a kuca? The cile kö troa liim. Aqane tro hi epuni lai a thue aja koi itre xan troa hane hamë mekun.

6-7. Nemene la nyine tro sa kuca matre tha tro kö sa xou troa hamë mekun?

⁶ Nemene la nyine tro epuni a kuca e xou i epun troa hamë mekun? Tha epuni casi kö la ka xou. Ngo maine aja i epun troa ithuecatr kowe la itre trejin, ke hetre nyine tro epuni a kuca.

⁷ Thele jë la itre ixatua hna hamën ngöne la itre Ita Ne Thup hne së hë hna ce wang. b Hnëkë hnyawa jë. (Ite edomë 21:5) Maine trotrohnine hnyawa ha epun la ini hna hamën, ke tha tro hë epuni lai a xou troa liim. Ketre, ahopatrene ju hi la itre mekun hna hamën. (Ite edomë 15:23; 17:27) Maine ka hopatr la mekun hnei epuni hna hnëkën, ke hmaloi hi tro epuni a hamën. Nge canga tro hi la atrene la icasikeu a trotrohnine la mekun ka hopatr, hune la mekun ka qeadridri. Ame la easa hamën la itre mekun ka hopatr ngöne la aqane ithanata së, ke kolo hi lai a amamane ka hape, hne së hna hnëkë hnyawa, nge trotrohnine hnyawa hi së la ini.

8. Tune kaa la aqane goeëne Iehova la itre trengecatr hnei epuni hna nu?

⁸ Ngo tune kaa e ase hë epun kuca la hna qaja e caha, ngo xou epuni palahi troa hamën la cas maine lue mekun? Ka tru koi Iehova la itre trengecatr hnei epuni hna nu matre kuca la hnei epuni hna atrein. (Luka 21:1-4) Tha aja i Iehova kö troa ahacenyi epun. (Fil. 4:5) Thele jë la itre ewekë hnei epuni hna atreine kuca, nge isine jë troa eatrën. Thithi jë matre troa lepetrij la xou i epun. Nge nyiqane jë troa hamëne la ketre mekun ka hopatre hi.

9. Nemene la itre jol ka traqa ngöne la itre ekalesia ka tru?

⁹ Maine alanyimu la itre trejin ngöne la ekalesia i epun, ke hetreny pena la ketre jol. Maine jë, alanyimu catr la itre ka liim, matre tha hane kö epuni sa. Ka tru koi Danielle troa hamë mekun ngöne la itre ijine icasikeu. c Ame koi eahlo, ketre  aqane tro hi lai a atrunyi Iehova, me ithuecatr koi itre xan, me amë hutin e kuhu hni eahlo la itre ini qa hnine la Tusi Hmitrötr. Ngo e thupen, hnei eahlo hna saze ekalesia, me tro kowe la ketre ekalesia ka tru. Matre xalaithe pe hi la itre mekun hnei eahlo hna hamën. Nge ame itre xaa ijin, pëkö ca mekun hna hamën ngöne la ijine icasikeu. Öni eahlo: “Tha madrine kö ni. Kösë lo kola thapa la ketre ewekë ka loi qaatheng. Hna tune pala hi ngöne la itre icasikeu, matre ame koi ni, kösë hna thë hi.”

10. Nemene la nyine tro sa kuca matre tro sa hane sa?

¹⁰ Hnei epuni kö hna hane melën la ka traqa koi Danielle? Maine jë, xele hë epuni ma sa, nge epuni pe hi a traqa troa dreng la itre icasikeu. Ngacama jole ju hë koi epun, ngo the cile kö troa liim. Nemene la nyine tro epuni a kuca? Loi e tro epuni a hnëkëne la nyimu mekun nyine troa sa ngöne la icasikeu. Matre e tha sa kö epun ngöne la kola nyiqane la ini, ijije palahi tro epuni a sa e thupen. Ame la epuni a hnëkëne la Ita Ne Thup, thele jë la aqane ce tro la itre paragarafe memine la tan. Celë hi lai ka troa xatua epun troa hamën la itre mekun ka ithuecatr. Ketre, hnëkëne hnyawane jë la itre paragarafe ka qaja la itre ini ka jui ne la Tusi Hmitrötr, nge ka jol troa qejepengön. (1 Kor. 2:10) Pine nemen? Pine laka, ala xalaithe hi la itre ka sa ngöne la itre paragarafe cili. Ngo tune kaa e ase hë epun trongëne la itre hna qaja e caha, ngo tha hna nue epuni kö troa hane sa? Qëmekene troa nyiqane la icasikeu, ijije hi tro epuni a qaja kowe la trejin ka troa cile fë la hnëqa, la hnying hnei epuni hna pi sa.

11. Nemene la ithuecatre hna hamëne hnei Filipi 2:4?

¹¹ E jë la Filipi 2:4. Hnei Paulo aposetolo hna ithuecatr kowe la itre keresiano troa thele la ka loi koi itre xan. Tro sa trongëne tune kaa la eamo celë ngöne la itre ijine icasikeu? Tha tro kö sa thëthëhmine laka, tui easë, ajane fe la itre xan troa hane qeje mekun.

12. Nemene la ketre aqane tro sa ithuecatr ngöne la itre ijine icasikeu? (Wange ju fe la iatr.)

 ¹² Pane mekune jë la: Ame la epuni a porotrik me itre sinee i epun, epun casi kö la ka ithanata? Waea! Aja i epun tro fe angatr a hane qeje mekun. Ketre tune mina fe ngöne la itre icasikeu, easa ajan tro asë hi la itre trejin a hane sa. Eje hi, ame la ketre aqane troa ithuecatr kowe la itre trejin, ke ene la troa hane nue angatr troa qaja la lapaune i angatr. (1 Kor. 10:24) Tro sa ce wang la nyine tro sa kuca.

13. Tune kaa la aqane tro sa hane nue la itre xan troa qeje mekun?

¹³ Ame la hnapan, loi e tro sa majemine ahopatrene la itre mekun, matre hetre ijin koi itre xan troa hane sa. Nyipiewekë tro la itre qatre thup me itre trejin ka macaj a amamai tulu. Ngacama hopatre hi la itre hnei epuni hna qaja, ngo tha tro kö a qaja asë la itre mekun. Maine tro epuni a qaja asë la itre mekun ka ej ngöne la paragaraf, ke pë hë nyine tro itre xan a sa. Ame ngöne la paragarafe celë, ke lue mekun: troa ahopatrene la itre mekun hna hamën, nge tha tro kö a qaja asë la itre mekun ngöne la paragaraf. Maine epuni la ka pane sa, qaja ju hi la ca mekun, nge nue pi pë hë lai ketre koi itre xan.

14. Nemene la ka troa xatua së troa tuluth la aqane liim? (Wange ju fe la iatr.)

¹⁴ Troa atreine tuluth la aqane liim. Ame la easa liim lapa, kösë easë hi lai a ukune la trejin ka cile fë hnëqa troa nu koi easë troa sa, nge tha nue pë hë la itre xan troa hane qeje mekun. Tro lai a sewe itre xan troa liim.​—Ate cai. 3:7.

15. (a) Nemene la nyine tro sa kuca e tha hna nue së kö troa sa? (b) Tune kaa la aqane tro la trejin ka cile fë hnëqa a mekun la itre trejin asë? (Wange ju la hna eköhagen “ Ngöne La Eö a Cile Fë Hnëqa.”)

¹⁵ Ame ngöne la itre ijine icasikeu, tru hnei itre ka liim matre tha hna nue kö  koi së troa sa la easa liim. Nge ame itre xaa ijin, pëkö mekun hne së hna hamën. Ame e cili, tha madrine kö së. Ngo ame pe, the mekune pi kö ka hape, hnene la trejin hna thë.​—Ate cai. 7:9.

16. Nemene la aqane tro epuni a ithuecatr kowe la itre trejin ka sa?

¹⁶ Maine tha hna aijijë epuni kö troa sa, ke drenge hnyawa ju la itre mekun hna hamën hnene la itre xaa trejin, nge thupen la icasikeu, tro jë olene koi angatr. Ame la epuni a olene kowe la itre trejin ka hamë mekun ke, tro lai a ithuecatre koi angatr hune la itre mekun hnei epuni hna pi hamën. (Ite edomë 10:21) Eje hi, ame la ketre aqane troa ithuecatrekeu, ke ene la troa amamane la hni ne ole së.

17. (a) Nemene la aqane tro la itre keme me thin a xatuan la itre nekö i angatr troa hamë mekun? (b) Thenge la video, nemene la 4 lao aqane troa hnëkëne la nyine sa? (Wange ju fe la ithuemacany.)

¹⁷ Nemene la itre xaa aqane tro sa ithuecatrekeu ngöne la itre icasikeu? Maine hetre neköi epun, xatua nyudreni jë troa hnëkën la itre mekun ka hmaloi koi nyudren troa hamën. (Mat. 21:16) Ame la itre xaa tane mekun, ke kola ithanatan la itre jol hna melën hnene la itre trefën, maine pena itre huliwa ka sis.  Ngo thele jë la itre mekun ka ijije tro la nekönatr a qaja. Ketre, xatua nyudreni jë troa trotrohnin la kepin matre tha nue nyudreni kö troa sa, ngacama nyudreni a liim. Maine tro epuni a kuca lai, tha tro kö nyudreni a elëhni.​—1 Tim. 6:18. d

18. Nemene la ka troa sewe së troa qaja atrunyi së palaha ngöne la easa hamë mekun? (Ite Edomë 27:2)

¹⁸ Ijiji së asë hi troa hnëkëne la itre mekun ka ithuecatr kowe la itre trejin, nge ka atrunyi Iehova. (Ite edomë 25:11) Ame itre xaa ijin, easa qaja la hne së hna melën, ngo tha tro kö së a qaja atrunyi së palaha. (E jë la Ite Edomë 27:2; 2 Kor. 10:18) Loi e tro pe sa qaja atrunyi Iehova, me Tusi Hmitrötr, memine la itre hlue i Nyidrë. (Hna ama. 4:11) Ngo e kola upi easë ngöne la ketre paragarafe troa qaja la aliene hni së maine itre hne së hna melën, ke the cile kö troa ce thawa me itre xan. Celë hi hna upi epun troa kuca ngöne la paragaraf e thupen.

19. (a) Nemene la thangan e tro sa thele la loi koi itre xan ngöne la itre ijine icasikeu? (Roma 1:11, 12) (b) Nemene la kepin matre epuni a sa ngöne la itre icasikeu?

¹⁹ Pëkö hna amekötin göne la aqane troa hamë mekun, ngo loi e tro la itre mekun hne së hna hamën a ithuecatr koi itre xan. Kolo lai a hape, troa hamë mekun lapa. Maine pena, e aca sa hi easë, ke madrine jë, nge madrine jë fe kowe la itre xaa trejin ka hamë mekun. Maine tro sa thele la ka loi koi itre xan ngöne la itre icasikeu, ke tro së lai a madrin troa “itö ithuecatrekeu.”​—E jë la Roma 1:11, 12.