TANE MEKUN 16
“Tro La Jini Eö a Mele Hmaca”!
“Öni Iesu jë hi [koi Maretha] ka hape: ‘Tro la jini eö a mele hmaca.’ ”—IOANE 11:23.
NYIMA 151 Tro Cilieti a Hë Elany
MEKUN KA TRU a
1. Hnei Matthew hna amamane tune kaa la lapaune i nyëne kowe la melehmaca?
HNA tithi Matthew hnene la ketre meci ka ngazo catr, nge anyimua xöji nyën hnei droketre. Ame lo ketre ijin, hnei nyën me fami nyën hna ce goeëne la ketre emisio ngöne JW Télédiffusion ka amamane la ketre nyima ka qeje melehmaca. b Ame hë la kola nyipune la emisio, hnei Matthew, ka 7 lao macatre, hna xolouthe la wanakoime ne la kem me thine i nyën, me hape: “Kaka me nenë, maine tro ni a mec, ke tro kö ni lai a mele hmaca. Treqe ni ju kö hnei epon!” Tru la madrine ne la kem me thine la nyidroti a öhne la ecatrene la lapaune i nyëne kowe la melehmaca!
2-3. Pine nemene matre nyipiewekë tro sa lapa mekune la mejiune së kowe la melehmaca?
2 Nyipiewekë tro palahi sa lapa mekun la mejiune së kowe la melehmaca. (Ioane 5:28, 29) Pine nemen? Pine laka, tro fe lai a tithi së hnei mec maine tro pena mec la ketre sinee së. (Ate cai. 9:11; Iako. 4:13, 14) Tro la mejiune së kowe la melehmaca a xatua së troa xomihnine la nöjei jol ka akötrë së. (1 Thes. 4:13) Öni Tusi Hmitrötr, atre pengöi easë hnyawa hi hnei Iehova, nge tru la ihnimi Nyidrëti koi së. (Luka 12:7) Eje hi, atre easë hnyawa hi hnei Iehova, ke e traqa ju së mec, atreine kö Nyidrëti amele së hmaca memine lo pengö së me itre mekuna së ekö. Ketre, tru la ihnimi Iehova koi së, ke aja i Nyidrë troa hamë së la mele ka pë pun, nge e traqa ju së mec, tro kö Nyidrëti a amele së hmaca.
3 Ame ngöne la tane mekune celë, tro sa pane ce wange la kepine matre nyipiewekë tro sa lapaune kowe la melehmaca. Nge tro fe sa ce wange la ketre hna melëne e hnine la Tusi Hmitrötr, lo hna xome qa ngöne la xötr ka nyitane la ini celë, hna hape: “Tro la jini eö a mele hmaca.” (Ioane 11:23) Nge e thupen, tro sa ce wange la aqane tro sa acatrene la lapaune së kowe la melehmaca.
KEPIN MATRE EASA MEJIUN KOWE LA MELEHMACA
4. Pine nemene matre easa mejiune kowe la ketre hna thingehnaean? Qaja jë la ketre ceitun.
4 Tro sa mejiune kowe la ketre hna thingehnaean, e xecie koi së laka, ame la atre ka qaja, ke hetre aja i angeic me atreine i angeic troa eatrëne la hnei angeic hna qaja. Pane mekune jë laka, hna angazone la hnalapa i epun hnene la ketre wene ka tru. Nge traqa pi hi la ketre sinee i epun troa qaja ka hape, angeic a pi xatua epun troa kuca hnyawane la uma. Öhne hi epun laka, aja i angeic troa xatua epun. Nge atreine hi angeic troa xatua epun, ke ka xupi uma angeic nge ka trene zuti. Haawe, tha luelue kö epun laka, tro kö angeic a kuca la hnei angeic hna qaja. Matre tune kaa fe la melehmaca hna thingehnaean hnei Iehova? Hetre aja i Nyidrëti kö, nge atreine kö Nyidrëti troa eatrëne lai?
5-6. Pine nemene matre xecie koi së laka, aja i Iehova troa amelene hmaca la itre ka mec?
5 Aja i Iehova kö troa amelene hmaca la itre ka mec? Öö. Hnei Nyidrëti lo hna upe la itre atr troa cinyanyine e hnine la Tusi Hmitrötre la itre hnei Nyidrëti hna thingehnaean göne la melehmaca elany. (Is. 26:19; Hos. 13:14; Hna ama. 20:11-13) Nge hnei Iehova palahi hna eatrëne la itre hnei Nyidrëti hna thingehnaean. (Ios. 23:14) Eje hi, tru la aja i Nyidrë troa canga amelene la itre atr ka mec. Hnei easë hna atre tune kaa?
6 Mekune hi epun lo hna qaja hnei Iobu? Xecie koi angeic laka, e tro angeic a mec, tru la aja i Iehova troa amele angeic hmaca. (Iobu 14:14, 15) Nge celë fe hi la aja i Iehova kowe la itre xaa hlue i Nyidrë ka mec. Nyidrëti a lapa treqene la ijine troa amele angatr hmaca, matre tro angatr a pexej me madrin. Ngo hapeue kowe la itre miliar lao atr ka mec, nge ka thatre Nyidrë? Tro fe Nyidrëti a hane amele angatr. (Itre hu. 24:15) Aja i Nyidrë tro angatr a hane nyisinee i Nyidrë me mele palua e celë fen. (Ioane 3:16) Haawe, tru la aja i Iehova troa amelene hmaca la itre ka mec.
7-8. Pine nemene matre xecie koi së laka, atreine hi Iehova amelene hmaca la itre ka mec?
7 Atreine kö Iehova amelene hmaca la itre ka mec? Öö! Nyidrëti hi la “ka Tru Trenge Men.” (Hna ama. 1:8) Haawe, atreine hi Nyidrëti ngaane la nöjei ithupëjia, uti fe hë la mec. (1 Kor. 15:26) Trenge nyipici hi lai ka thue trengecatr me akeukawanyi së. Hane hi la hna melen hnei Emma Arnold. Hna akötrë eahlo memine la fami eahlo ngöne lo Hnaaluene Isi Ka Tru. Nge hetre sinee i eahlo ka mec ngöne la itre camps de concentration. Hnei eahlo hna akeukawane la nekö i eahlo me qaja ka hape: “Maine atreine hi la mec troa othe paluane la atr, ke ka catre kö ej hui Akötresie.” Ngo, pëkö sai Iehova! Xecie koi së laka, atreine hi la Atre xup la mel, troa amelene hmaca la itre ka mec.
8 Ame la ketre kepin matre xecie koi së laka, atreine hi Akötresie amelene hmaca la itre ka mec, ke ka pë ifegone la mekuna i Nyidrë. Atre hi Nyidrë la isa ëjene ne la itre wëtresij. (Is. 40:26) Ketre, tha thëthëhmine kö Nyidrëti la itre ka mec. (Iobu 14:13; Luka 20:37, 38) Nge, atreine hi Nyidrë troa mekune hmaca la pengöne la itre atr hnei Nyidrëti hna troa amelene hmaca, tune la nöjei hnei angatr hna melën, me itre mekun me code génétique i angatr me itre xaa ewekë ju kö.
9. Pine nemene matre mejiune hi epun laka, tro kö Iehova a amelene hmaca la itre ka mec?
9 Ijije hi tro sa mejiune kowe la melehmaca, ke aja i Iehova nge atreine hi Nyidrë troa amelene hmaca la itre ka mec. Ngo, hetre ketre kepine kö matre easa mejiune kowe lai. Hnei Iehova ekö hna amelene hmaca lo itre ka mec. Hnei Nyidrëti hna aijijëne la itre xaa atr, tui Iesu, troa amelene hmaca la itre ka mec. Tro sa ce ithanatane la ketre atr hnei Iesu hna amelene hmaca ekö. Kola mama lai ngöne la tusi Ioane mekene 11.
MECI HË LA KETRE SINEE I IESU
10. Nemene la ka traqa e Bethania lo Iesu a cainöj ngöne la götrane koië ne Ioridrano, nge nemene la hnei Iesu hna kuca? (Ioane 11:1-3)
10 E jë la Ioane 11:1-3. Pane mekune jë la ewekë ka traqa ngöne lo pune lo macatre 32 M.K. e Bethania, traone i Lazaro me lue xa i angeic, Maria me Maretha. (Luka 10:38-42) Angatr la itre sinee i Iesu. Seseu catr Maria me Maretha, ke tru la meci Lazaro. Hnei nyidroti hna iupi fë maca koi Iesu, lo nyidrë ngöne la götrane koië ne Ioridrano. Nge lue drai ne trongë ihnadro qaa Bethania a tro cili. (Ioane 10:40) Ngazo pe, hnei Lazaro hna mec lo Iesu a kapa la maca. Ngacama atre hi nyidrë laka, meci hë Lazaro, ngo hnei nyidrëti kö hna lapa e cili koi lue drai. Matre ame hë la nyidrëti a traqa e Bethania, ke foa ha lao drai hne meci Lazaro. Hetre ewekë hnei nyidrë hna troa kuca matre akeukawane la itre sinee i nyidrë me atrunyi Akötresie.—Ioane 11:4, 6, 11, 17.
11. Nemene la hna ini së hnene la hna melëne celë, göne la pengöne la itre nyipi sinee?
11 Kola ini së hnene la hna melëne celë, la pengöne la itre nyipi sinee. Tha hnei Maria kö me Maretha hna iupi fë maca koi Iesu matre troa thei nyidrë. Nyidroti hi a thuemacanyi nyidrë ka hape, wezipo catre Lazaro. (Ioane 11:3) Maine ju, ame la kola mec hnei Lazaro, ke tro hi Iesu a amele angeic qa gaa nany. Ngo hnei nyidrëti hna tro Bethania matre troa iöhny me Maria me Maretha. Hetre sinee i epuni kö ka canga nyinyape troa xatua epun, ngacama pëkö hnei epuni hna qaja? Haawe, xecie koi epuni laka, tro kö angeic a xatua epun “ngöne la itre ijine akötr.” (Ite edomë 17:17) Tui Iesu, hane jë amamane ka hape, itre nyipi sinee së! Tro sa ce wange la ka traqa e thupen.
12. Nemene la hnei Iesu hna qaja koi Maretha, nge hnauëne laka, ijiji nyidrëti hi troa qaja tune lai? (Ioane 11:23-26)
12 E jë la Ioane 11:23-26. Hnei Maretha hna dreng ka hape, ma Iesu hë lai. Matre hnei angeic hna canga nyape koi nyidrë me qaja ka hape: “Joxu, maine nyipëti ju e celë, tha tro kö a meci la jining.” (Ioane 11:21) Nyipici, maine ju tro hi Iesu a aloine la meci Lazaro. Ngo aja i nyidrëti troa kuca la ketre iamamanyikeu. Öni nyidrëti koi Maretha, ka hape: “Tro la jini eö a mele hmaca.” Öni nyidrëti hmaca jë hi: “Eni la mele hmaca me mel.” Nyidrëti a qaja lai matre troa acatrene la lapaune i angeic. Eje hi, hnei Iehova hna hamë nyidrë la atreine troa musinëne la mel me mec. Qëmekene lai, hnei Iesu hna amelene hmaca la ketre nekönatr jajiny, thupene ju hi la nyën a mec. Nge hnei nyidrëti fe hna amelene hmaca la ketre nekötrahmany, ngöne la drai ne meci angeic. (Luka 7:11-15; 8:49-55) Ngo hapeu, atreine kö nyidrë troa amelene hmaca la ketre atr thupene la foa lao drai, nge ka punepune hë la ngönetrei?
“LAZARO, LÖ PI!”
Tru la utipine i Iesu kowe la itre sinee i nyidrë ka meci sineen (Wange ju la paragarafe 13-14)
13. Thenge la Ioane 11:32-35, tune kaa Iesu la kola öhnyi Maria me itre xan a treij? (Wange ju fe la iatr.)
13 E jë la Ioane 11:32-35. Pane mekune jë la kola itrony me Iesu hnei Maria, lo ketre xa i Lazaro. Ceitu hi la ithanata i angeic me Maretha. Öni angeic ka hape: “Joxu, maine nyipëti ju e celë, tha tro kö a meci la jining.” Tru catre la hace i angeic memine la itre sinee ka ce tro me angeic. Ame la Iesu a öhne la aqane treije i angatr, ke akötre catre nyidrë. Tru la hnei nyidrëti hna utipi angatr, matre nyidrëti fe a hane treij. Trotrohnine hi nyidrë la akötr ka ej the së, ngöne la kola mec la ketre atr hne së hna hnim. Xecie koi së laka, aja i nyidrë troa apatrene la qaane la itre akötre së!
14. Nemene la hna ini së göi Iehova ngöne la aqane ujë i Iesu la nyidrëti a öhnyi Maria e treij?
14 Nemene la hna ini së göi Iehova ngöne la aqane ujë i Iesu la nyidrëti a öhnyi Maria e treij? Akötresieti ka tru trenge utipine Nyidrë. Nemene la ka amamane lai? Tune lo hne së hna ce wange ngöne la tane mekune hnapan, casi hi la mekun memine la itre aliene hni nyidrë me Iehova. (Ioane 12:45) Tru la utipine i Iesu kowe la itre sinee i nyidrë matre hnei nyidrëti hna treij. Haawe, easa trotrohnine la pengöi Iehova laka, ame la easë a treij, ke tru la akötre i Nyidrë. (Sal. 56:8) Ka tru ihnimine la Akötresi së! Tha kolo kö lai a uku së troa easenyi koi Nyidrë?
Hnei Iesu hna amamane ka hape, atreine hi nyidrë amelene hmaca la itre ka mec (Wange ju la paragarafe 15-16)
15. Thenge la Ioane 11:41-44, nemene la hnei Iesu hna kuca ngöne la nyidrëti a traqa kowe la hua i Lazaro? (Wange ju fe la iatr.)
15 E jë la Ioane 11:41-44. Ame la Iesu a traqa kowe la hua i Lazaro, nyidrëti pa iupi jë troa hule la etë ka thinge la hnë lö. Hnei Maretha hna acilë Iesu, ke punepune hë la ngönetrei Lazaro. Öni Iesu jë hi koi angeic ka hape: “Tha hnenge kö lo hna qaja koi eö ka hape, maine tro eö a mejiun, tro hë eö a öhne la lolo i Akötresie?” (Ioane 11:39, 40) Thupene lai, nyidrëti a gala draië jë me thithi koi Iehova. Atre hi nyidrëti la ka troa traqa, nge aja i nyidrë troa atrunyi Iehova. Matre öni nyidrëti jë hi: “Lazaro, lö pi!” Ame hna lö pi hnei Lazaro! Hnei Iesu e celë hna kuca la ketre iamamanyikeu ka asesëkötrëne la itre atr. c
16. Kola acatrene tune kaa la lapaune së kowe la melehmaca hnene la hna melëne ngöne Ioane mekene 11?
16 Kola acatrene la lapaune së kowe la melehmaca hnene la hna melëne ngöne Ioane mekene 11. Pine nemen? Mekune hi epuni lo hna thingehnaean hnei Iesu koi Maretha? Öni nyidrë: “Tro la jini eö a mele hmaca.” (Ioane 11:23) Tui Iehova, aja i Iesu nge atreine hi nyidrë amelene hmaca la itre ka mec. Kola amamane hnene la itre trenge timidra i nyidrë laka, tru la aja i nyidrë troa apatrene la mec, me akötr qaathene la itre ka meci sineen. Nge ame lo Lazaro a lö pi qa ngöne la hua, kolo hmaca a amamane laka, atreine hi nyidrë amelene la itre ka mec. Öni Iesu lo koi Maretha ka hape: “Tha hnenge kö lo hna qaja koi eö ka hape, maine tro eö a mejiun, tro hë eö a öhne la lolo i Akötresie?” (Ioane 11:40) Celë hi matre xecie koi së laka, tro kö Iehova a amelene hmaca la itre ka mec. Nemene la nyine tro sa kuca matre troa acatrene la lapaune së kowe la hna thingehnaeane celë?
ACATRENE JË LA LAPAUNE SË KOWE LA MELEHMACA
17. Nemene la thangane koi së la hna lapa mekune la itre melehmaca qa hnine la Tusi Hmitrötr?
17 E jë nge lapa mekune ju la itre hna melëne e hnine la Tusi Hmitrötr ka qeje melehmaca. Hna qatrenge e hnine la Tusi Hmitrötr la 8 lao atr hna amelene hmaca. d Xomi ijine jë troa inin ajuine la itre hna melëne cili. Ame la epuni a inin itre ej, the thëthëhmine kö laka, ame angatre ke itre atre hi ka tu së. Xomi ini jë qa ngöne la itre hna melëne cili. Isa hnyinge jë ka hape: ‘Nemene la ka amamane ngöne la itre hna melëne celë laka, hetre aja i Iehova nge atreine hi Nyidrë troa amelene la itre ka mec?’ Ame la ka nyipiewekë catr, ke troa lapa mekune la melehmaca i Iesu. Alanyim la itre ka öhnyi Iesu lo mele hmaca nyidrë, nge celë hi ka nyitrepene la lapaune së.—1 Kor. 15:3-6, 20-22.
18. Tune kaa la aqane tro epuni a xomi ini qa ngöne la itre nyima së ka qeje melehmaca? (Wange ju la ithuemacany.)
18 Xomi ini jë qa ngöne la “itre nyima ne hmi” ka qeje melehmaca. e (Efe. 5:19) Tro itre ej lai a acatrene la lapaune së kowe la melehmaca. Drenge jë nge nyimane lapane jë itre ej. Ce ithanatane jë la aliene la itre trengewekë ngöne la epuni a hmi ne la fami. Amë hutine ju itre ej ngöne la mekun me hni epun. Matre e traqa ju mec la ketre sinee i epun, maine epun pena a cile kowe la ketre jol, ke tro la uati hmitrötr a amekunë epun la itre nyima cili, matre troa akeukawan me hamë trengecatre i epun.
19. Tro sa huliwane tune kaa la imagination së matre acatrene la lapaune së kowe la melehmaca? (Wange ju la hna eköhagen “Nemene La Hnei Epun Hna Pi Hnyingë Angatr?”)
19 Huliwane jë la imagination i epun. Jëne la atreine cili hnei Iehova hna hamë së, ijije hi tro sa öhne la pengöne la mele elany ngöne la paradraiso. Önine la ketre trejine föe: “Eni palahi a mekune la melenge ngöne la Paradraiso, matre kösë drenge hi ni la punepune ne la itre rouz ka eng.” Pane mekune jë laka, epuni a porotrik memine la itre hlue i Iehova ekö. Drei la hnei epun hna pi iöhnyi memin? Nemene la hnei epun hna pi hnyingë angeic? Pane mekune jë la ijine tro epuni a iöhnyi hmaca memine la itre sinee i epun ka mec. Tro epuni lai a pane ihaluth me itreijexom. Nemene la hnei epun hna troa qaja koi angatr?
20. Nemene la nyine tro sa isine troa kuca?
20 Easa olene koi Iehova la hna hamë së la mejiune kowe la melehmaca! Xecie koi së laka, tro kö Iehova a eatrëne lai, ke aja i Nyidrë nge atreine hi Nyidrë troa amelene hmaca la itre ka mec. Isine jë troa acatrene la lapaune i epun kowe la melehmaca. Tro epuni e cili a easenyi catre koi Iehova Atre sisinyi ka hape, ‘Tro la itre sinee i epun a mele hmaca!’
NYIMA 147 Mele Ka Pë Pune Hna Thingehnaean
a Maine hna mec la ketre sinee i epun, tro lai a akeukawanyi epun hnene la mejiune kowe la melehmaca. Tro epuni lai a qejepengöne tune kaa kowe la ketre atr laka, epuni a mejiun kowe la melehmaca? Nge tune kaa la aqane tro epuni a acatrene la mejiune i epun kowe la melehmaca? Tro la tane mekune celë a xatua së troa acatrene la mejiune së kowe la melehmaca.
b Kola mama la video cili hna hape, E Cili Hi Ezi Eö ngöne la emisio ne Nofeba 2016.
c Wange ju fe la Ita Ne Thup ne 1 Januare 2008, g. 31 (Qene Wiwi).
d Wange ju la hna eköhagen “Huit résurrections dont parle la Bible” ngöne la Ita Ne Thup ne 1 Ogas 2015 g. 4 (Qene Wiwi).
e Wange ju la itre nyima celë ngöne la itus “Nyima Madrine Jë Koi Iehova”: “Mekune Jë La Mele i ’ö Ngöne La Fene Ka Hnyipixe” (Nyima 139), “Lapa Mekune Pala Hi La Thupen!” (Nyima 144), me “Tro Cilieti a Hë Elany” (Nyima 151). Wange ju fe la itre nyima ngöne jw.org, “E Cili Hi Ezi Eö,” “Le monde nouveau” me “Tu verras.”
