1, 2. (a) Nemene la eisapengönene la Itretre Anyipici Iehova memine la itre xa hmi? (b) Nemene la hne së hna troa ce wange ngöne la tane mekune celë me ngöne la tane mekune ka troa xulu?

HNA majemine hnyinge hnene la itre atre kowe la Itretre Anyipici Iehova ka hape, “Drei la mekene i epun?” Angatr a isa pi atre lai, ke nyimutre la itre hmi ka hetre meken, trahmanyi maine föe. Ngo ame easë, tru la madrine së troa qaja ka hape, ame la mekene së, tha atr kö ka tha pexej. Ame la mekene së, tre, Iesu Keriso. Nge nyidrëti a drengethenge la keme i nyidrë, ene Iehova.—Mataio 23:10.

² Hetrenyi la ketre neköi lapa ne la itre trahmanyi, hna hën ka hape “hlue ka nyipici me ka inamacan,” nge ka elemekene la nöje i Akötresie e celë fen enehila. (Mataio 24:45) Ngo, nemene la ka amamane ka hape, Iehova hi la ka eatrongë së jëne la nekö i Nyidrë? Tro sa ce wange la köni kepine matre ka xecie hnyawa lai koi së. Ngacama, hnei Iehova pala hi hna nue la itre atr troa elemekene la nöje i Nyidrë, ngo mama hnyawa hi laka, Iehova kö la Mekene la nöje i Nyidrë ekö, nge eje pala hi enehila.—Isaia 58:11.

3. Qaa kaa la trenge catre i Mose matre atreine angeic elemekene la nöje Isaraela?

³ Uati hmitrötr la ka hamë trenge catre kowe la itre ka nyi trenge ewekë i Akötresie. Hnei Iehova hna ië Mose troa elemekene la nöje Isaraela. Nemene la ka xatua angeice troa eatrëne hnyawane la hnëqa ka tru cili? Hnei Iehova hna nue koi angeic la ‘uati hmitrötre i nyidrë.’ (E jë la Isaia 63:11-14.) Matre, Iehova la ka elemekene la nöje i Nyidrë, ke, uati hmitrötre i Nyidrë la ka xatua Mose.

4. Nemene la ka amamane ka hape, thei Mose la uati hmitrötre i Akötresie? (Wange ju la pane iatr.)

⁴ Mama kö kowe la itre atr ka hape, thei Mose la uati hmitrötre i Akötresie? Eje hi. Hnene la uati hmitrötre i Iehova hna aijijë Mose troa kuca la itre iamamanyikeu, me mama fë la ëje i Akötresie koi Farao, joxu ka catre i angetre Aigupito. (Esodo 7:1-3) Hnene fe la uati hmitrötr hna aijijë Mose troa ketre mekene nöj ka ihnim me ka xomihni. Ketre pengöne kö angeice hune la itre xa mekene ka calogitr ne la itre xa nöj! (Esodo 5:2, 6-9) Mama hnyawa hi laka, Iehova la ka ië Mose troa elemekene la nöje i Nyidrë.

5. Drei la itre xa atr hnei Iehova hna nue kow la uati Nyidrëti matre troa elemekene la nöje i Nyidrë?

⁵ Drei la itre xa atr hnei Iehova hna nue kow la uati Nyidrëti matre troa elemekene la nöje i Nyidrë? Öni Tusi Hmitrötr: “Tiqa ha Iosua nekö i Nuna hnene la u ka inamacan.” (Deuteronomi 34:9) “Hna hetë Gideona hnene la Uati Iehova.” (Angete Amekötin 6:34) Nge, “hna traqa hui Davita la Uati Iehova.” (1 Samuela 16:13) Ame asë hi la itre atr celë, hnei angatr hna qale catre kowe la uati Akötresie matre tro angatr a atreine kuca la itre ewekë hna thatreine kuca hnene la sipu trenge catre i angatr. (Iosua 11:16, 17; Angete Amekötin 7:7, 22; 1 Samuela 17:37, 50) Eje hi laka, Iehova hi la Atre hamë mene i angatre troa kuca la itre ewekë ka tru, matre Nyidrë casi hi la nyine atrun.

6. Pine nemene matre aja i Akötresie tro la itre hlue i Nyidrë a metrötrëne la itre mekene la nöje i Isaraela?

⁶ Maine mama ju kowe la angetre Isaraela ka hape, uati hmitrötre i Akötresie la ka hamë trenge catre i Mose, me Iosua, me Gideona, me Davita, nemene la aqane tro angatr a ujë? Tro la angetre Isaraela a metrötrë angatr. Ngo pane mekune ju lo hna qaja hnei Iehova lo kola qeje gele Mose hnene la itre atr, öni Nyidrë: “Tro la nöjei ate celë a methinë ni uti hë eu?” (Numera 14:2, 11) Kola mama laka, hnei Iehova hna iëne la itre atr celë troa elemekene la nöje i Nyidrë. Haawe, e tro la nöje i Iehova a drengethenge angatr, Iehova hi la hna xötrethenge, Mekene i angatr.

7. Nemene la aqane xatua Mose hnene la itre angela?

⁷ Hnene la itre angela hna xatuane la itre ka nyi trenge ewekë i Akötresie. (E jë la Heberu 1:7, 14.) Hnei Iehova hna xatua Mose jëne la itre angela. Hna pane “mama koi nyidëti [hnene la angela] ngöne la sinöe ka ithiny” me ahnithe koi angeic la ketre hnëqa, ene la troa thapa la angetre Isaraela qaa Aigupito me nyi mekene i angatr. (Ite Huliwa 7:35) Ame la hnaaluen, hnei Iehova hna hamë Mose jëne la itre angela la Wathebo matre troa inine la angetre Isaraela. (Galatia 3:19) Ame la hnaakönin, öni Iehova koi angeic: “Troja tro fë la nöje kowe la hnenge hna qaja koi ’ö ; hana wang, tro ha tro pa la angelang.” (Esodo 32:34) Tha hnei Tusi Hmitrötre kö hna qaja ka hape, hnene la angetre Isaraela hna öhne la angela e kuca la itre ewekë celë. Ngo kola mama ngöne la aqane inine Mose la nöj me eatrongë angatr ka hape, itre angela la ka xatua angeic.

8. Nemene la aqane xatua Iosua me Hezekia hnene la itre angela?

⁸ Drei la itre xa hna xatuane hnene la itre angela? Öni Tusi Hmitrötr, hnene la ketre angela, “tane ishi Iehova,” hna xatua Iosua troa hun ngöne la kola isi me angetre Kanana. (Iosua 5:13-15; 6:2, 21) Ame hë e thupen, lo ijine Hezekia Joxu a nyi mekene la nöje i Iehova, hnene la angetre Asuria hna mekune troa lep apatrenyi Ierusalema. Ame ngöne hi la ca jidr, “hna tropi la angela i Iehova me lepe ngöne la lapa i angete Asuria [la ala 185 000].”—2 Ite Joxu 19:35.

9. Nemene la nyine tro la angetre Isaraela ekö a kuca?

⁹ Maine nyipici laka, ka pexeje la itre angela, ngo ame la itre atr hnei angatre hna xatuan, tre itre ka tha pexeje kö angatr. Ame la ketre ijin, tha hnei Mose kö hna atrunyi Iehova. (Numera 20:12) Ame pena Iosua, tha hnei angeice kö hna hnyingë Iehova la nyine troa kuca, ngöne lo kola traqa troa isisinyikeu me angeic hnei angetre Gibeona. (Iosua 9:14, 15) Nge ame Hezekia, hna traqa la pi tru koi angeic. (2 Aqane lapa ite Joxu 32:25, 26) Ngacama itre atr ka tha pexeje kö angatr, ngo qa ne la angetre Isaraela troa drengethenge la mekene i angatr. Ketre, mama hi koi angetre Isaraela ka hape, Iehova a xatuane la itre atr cili jëne la itre angela. Matre, Iehova hi la ka elemekene la nöje i Nyidrë.

10. Nemene la aqane xötrethenge Mose la Wathebo i Akötresie?

¹⁰ Itre ka nyi trenge ewekë i Akötresie a xötrethenge la Wesi Ula i Akötresie. Tusi Hmitrötr a qaja la Wathebo hna hamën kowe la angetre Isaraela ka hape, “wathebo i Mose.” (1 Ite Joxu 2:3) Ngo Tusi Hmitrötr a amamane hnyawa ka hape, Iehova la Atre hamëne la Wathebo koi angetre Isaraela. Nge tro fe Mose a hane trongëne ej. (2 Aqane lapa ite Joxu 34:14) Thupene hë la hnei Iehova hna upi angeic troa cane la uma mano, “hnei Mose hna kuca thenge la nöjei ewekë asë hnei Iehova hna [amekötin] koi angeic.”—Esodo 40:1-16.

11, 12. (a) (a) Nemene la nyine troa kuca hnei Iosua me itre xa joxu i angetre Isaraela? (b) Nemene la aqane amekötine la itre mekene la nöj hnene la Wesi Ula i Akötresie?

¹¹ Hetrenyi Iosua ekö la itre xa igötranene la Wesi Ula i Akötresie lo angeic a elemekene la nöj, nge öni Iehova koi angeic: “Tro eö a mekune ngön’ ej’ e lai me jid, mate thupëne me kuca asë tune la hna cinyihane ngön’ ej.” (Iosua 1:8) Qa ne fe la itre joxu ka mus kowe la nöje i Iehova e thupen, troa e la Wathebo e nöjei drai, me fejan ej, me trongëne “la nöjei tenge ewekë asë ne la wathebo celë, me ite hna acile celë, mate kuca it’ ej.”—E jë la Deuteronomi 17:18-20.

¹² Nemene la aqane xötrethenge la Wesi Ula i Akötresie hnene la itre ka elemekene la nöj? Pane mekune ju la tulu i Iosea Joxu. Ame hë la kola öhne la Wathebo i Mose, hnene la seketere i Iosea hna nyiqaane e koi angeic. * (Wange ju la ithuemacany.) “Dengë hë hnene la joxu la ite tenge ewekë ngöne la tusi wathebo, nyidëti a kuie zezene la ite ixete i nyidë.” Wesi Ula i Akötresie a upi Iosea jë troa lepe apatrene la itre idrola asë qa ngöne la nöj, me hnëkëne la ketre Paseka ka tru, nge pëkö ketre ka tun. (2 Ite Joxu 22:11; 23:1-23) Hnene laka, hna trongëne la Wesi Ula i Akötresie hnei Iosea me itre mekene la nöj ka nyipici, saqe hi angatr wenë amekötine la aqane troa huliwa hnene la nöje i Akötresie. Hnene la itre hna ahnyipixene cili hna xatuane la nöje i Akötresie troa drengethenge Nyidrë.

13. Nemene la eisapengönene la itre mekene la nöje i Akötresie, memine la itre mekene la itre xa nöj?

¹³ Ame la itre mekene la itre xa nöj, hna ameköti angatr hnene la inamacane i atr, nge ka hetre ifegone hi. Hnene la itre mekene i angetre Kanana, memine la itre atrene la nöje i angatr hna kuca la itre ewekë ka sisi catr tune la öni kuku, me trahmanyi ka ce meköl me trahmany, maine föe me ketre föe, me ce meköl me öni, me huujëne la itre nekö i angatr, me kuci idrola. (Levitiko 18:6, 21-25) Ketre, tha ceitune kö la itre wathebo göi aqane mel, hna trongëne hnene la angetre Babulona me angetre Aigupito, memine la hna trongëne hnene la nöje i Akötresie. (Numera 19:13) Ngo ame kowe la nöje i Akötresie, mama hnyawa hi koi angatr la aqane xatua angatr hnene la itre mekene i angatr troa pë ethan la aqane hmi angatr koi Iehova, me aporopëne la ngönetrei, me ananyine la thiina ka sis. Matre Iehova hnyawa hi la Atre Elemekene la nöje i Nyidrë.

14. Pine nemene matre hajine jë Iehova la itre xa mekene la nöje i Nyidrë?

¹⁴ Hetrenyi ekö la itre mekene la nöje i Akötresie ka tha trongëne kö la itre hna amekötin hnei Nyidrë. Hnei angatre hna xele ma kapa la ixatua ne la uati hmitrötr, memine la ixatua ne la itre angela, memine la fe la hna ahnith hnene la Wesi Ula i Nyidrë. Nge ame itre xa ijin, hnei Iehova hna haji angatr, maine pena hna nyihna i angatr. (1 Samuela 13:13, 14) Ame hë e thupen, tro hë Nyidrëti lai a acile la ketre atr ka pexej matre troa nyi mekene la nöje i Iehova.

15. (a) Nemene la hna qaja hnene la itre perofeta göne la atr ka pexej ka troa nyi mekene la nöj? (b) Drei la mekene cili?

¹⁵ Nyimu macatre hë enehila hnei Iehova hna thingehnaean laka, tro Nyidrëti a acile la ketre atr ka pexej matre troa nyi mekene la nöje i Nyidrë. Öni Mose kowe la angetre Isaraela: “Tro Iehova Akötesi ’ö a axulune thatraqai ’ö la perofeta ka tunge qa thei ’ö qa thene la ite tejine me eö ; tro nyipunie a dei nyidë.” (Deuteronomi 18:15) Öni Isaia, tro nyidrëti a “mekene me ate musi.” (Isaia 55:4) Nge ame Daniela, hnei angeic hna qeje Mesia ka hape, tro nyidrëti a “Joxu [maine, Meken].” (Daniela 9:25) Kola mama laka, Iesu Keriso hi la “mekene” la nöje i Akötresie. (E jë la Mataio 23:10.) Canga saqe hi la itretre dreng xötrethenge nyidrë, nge xecie hnyawa koi angatr ka hape, celë hi atre lai hna iëne hnei Iehova. (Ioane 6:68, 69) Nemene la ka anyipicine koi angatr ka hape, Iesu Keriso hi la atr hna iëne hnei Iehova troa nyi mekene la nöje i Nyidrë?

16. Nemene la ka amamane ka hape, hna hamë trenge catre i Iesu hnene la uati hmitrötr?

¹⁶ Uati hmitrötr la ka hamë trenge catre koi Iesu. Ame lo ijine kola bapataiso Iesu, hnei Ioane hna öhne “la hnengödrai hna thawa, memine la [u]a kola sheshë hui anganyidë kösë piny.” Thupene ju hi lai, “hna canga upi anganyidëti hnene la [u]a kowe la hnapapa.” (Mareko 1:10-12) Ame ngöne lo ijine Iesu a kuca la huliwa i Akötresie e celë fen, hnene la uati hmitrötre i Akötresie hna hamë trenge catre i nyidrë matre troa inine la itre atr, me kuca la itre iamamanyikeu. (Ite Huliwa 10:38) Hnene fe la uati hmitrötr hna xatua Iesu troa melëne la itre thiina ka lolo, ene la ihnim, me madrin, me lapaune ka catr. (Ioane 15:9; Heberu 12:2) Pëkö ketre meken ka amamane ka hape, hetrenyi thei angeic la uati hmitrötre i Akötresie tune lai. Eje hi laka, Iesu hi la hna iën hnei Iehova troa nyi mekene la nöje i Nyidrë.

17. Nemene la hna kuca hnene la itre angela göi troa xatua Iesu?

¹⁷ Hnene la itre angela hna xatua Iesu. Tha qea ju kö thupene la kola bapataiso Iesu, “kola tropi la nöjei angela troa nyi hlue i nyidë.” (Mataio 4:11) Qëmekene tro nyidrëti a mec, “hna mamapi koi nyidëti la angela qa hnengödrai kola aegöcatenyi nyidë.” (Luka 22:43) Tha luelue kö Iesu laka, tro kö Iehova a upe la itre angela koi nyidrë e traqa ju nyidrë aja ixatua.—Mataio 26:53.

18, 19. Nemene la aqane eatrongëne la mele Iesu, memine la aqane hamë ini nyidrë hnene la Wesi Ula i Akötresie?

¹⁸ Hnei Iesu pala hi hna xötrethenge la Wesi Ula i Akötresie. Qaane la nyidrëti a kuca la huliwa i Akötresie uti hë la meci nyidrë hune la sinöe ne iaxösisi, hnei Iesu hna trongëne la itre hna amekötine hnene la Wesi Ula i Akötresie. Goi eatrëne fe nyidrë la itre hna perofetane göi Mesia qëmekene troa patre la hnamano i nyidrë. (Mataio 4:4; 27:46; Luka 23:46) Ngo, isapengöi Iesu catr memine la itre tane la hmi i angetre Iudra. Tha nyipiewekëne kö angatr la Wesi Ula i Akötresie, e tha ka ihmeku kö memine la itre ini hnei angatr hna hamën. Matre hnei Iesu hna amexeje la hna qaja hnene la Wesi Ula i Akötresie göi angatr, kola hape: “Ame la nöje celë, te, kola easenyi ni hnene la ite qe i angat, me atrunyi ni hnene la ite ukeineqë ; ngo ame la ite hni angat, te, iananyi me ini. Huliwapi hë angat’ a atrunyi ni, ngo inine pe la nöjei wathebo i ate.” (Mataio 15:7-9) Tha tro pi kö Iehova lai a iëne la itre atr ka tha trongëne kö la trenge ewekë i Nyidrë matre troa nyi mekene la nöje i Nyidrë.

¹⁹ Hnei Iesu mina fe hna inine la itre atr jëne la Wesi Ula i Akötresie. Ame la kola tupathi nyidrë hnene la itre tane la hmi, tha hnei nyidrëti pi kö hna sa koi angatr thenge la sipu inamacane i nyidrë, maine thenge la hnei nyidrëti hna melën. Hnei nyidrëti pala hi hna xome la Tusi Hmitrötr matre troa inine la itre atr. (Mataio 22:33-40) Ketre, tro hi nyidrëti ekö a mama fë la itre hnei nyidrëti hna melën e koho hnengödrai, memine la kola xupe la fen hnengödrai. Ngo pine laka, ka tru koi nyidrë la Wesi Ula i Akötresie, tru kö la aja i nyidrë troa ce thawa ej memine la itre atr. “Ame hnei nyidëti hna fepi la ite hni angat, mate tro angate a trotrohnine la hna cinyihan.”—Luka 24:32, 45.

20. (a) Nemene la aqane atrunyi Iehova hnei Iesu? (b) Nemene la eisapengöi Iesu me Heroda Ageripa I?

²⁰ Maine nyipici laka, itre atr a haine la aqane ithanata i Iesu, ngo hnei nyidrëti pala hi hna atrunyi Iehova, Atre Ini nyidrë. (Luka 4:22) Hnene la ketre atr trenamo hna thel troa atrunyi Iesu, me hape koi nyidrë “Ate ini fe ka loi.” Ngo ka hni ka ipië Iesu, öni nyidrë: “Ue lae eö a jele ka loi ni ? pëkö ka loi, ngo Akötesie casi hi.” (Mareko 10:17, 18) Thupene hë la 8 lao macatre, joxu Heroda Ageripa I pena ha la tane i angetre Iudra. Isapengöne catre kö la lue aqane ujë i nyidro! Ame la ketre ijine icasikeu, hnei Heroda hna mama fë la ketre iheetre i joxu ka tru thupen, nge nyine selën. Ame la itre atr a goeë angeic, me drei angeic, angatr a sue jë me hape: “Aqane ewekë ne haze la, ngo tha aqane ewekë i ate kö.” Hnene laka, ka ajane angeic troa atrunyi angeic, “ame hna canga lepi angeice hnene la angela i Joxu [Iehova], pine la tha hnei angeice hna atrunyi Akötesie ; ame hna xuji angeice hnei wanak, ene pe mecipi angeic.” (Ite Huliwa 12:21-23) Eje hi laka, tha hnei Iehova kö hna ië Heroda troa nyi mekene la nöj. Ngo ame Iesu hnei nyidrëti hna amamane ka hape, nyidrëti hi la hnei Akötresie hna iën. Ketre, tha mano kö nyidrë atrunyi Iehova, Mekene Ka Sisitria ne la nöje i Nyidrë.

21. Nemene la nyine tro sa ce ithanatane ngöne la tane mekune ka troa xulu?

²¹ Tha aja i Iehova kö tro Iesu a nyi mekene la nöje koi itre hnepe macatre hi. Thupene la kola amele Iesu hmaca, öni nyidrë kowe la itretre dreng: “Ase hë hamë ni la nöjei musi asë e hnengödrai me celë fen.” Öni nyidrëti hmaca jë: “Nge hana wang ini a ce me nyipunie ngöne la nöjei drai asëjëihë uti hë la pune la fene hnengödrai.” (Mataio 28:18-20) Ngo, nemene la aqane elemekene Iesu la nöje i Akötresie e celë fen, nge nyidrëti pe e hnengödrai? Drei la hnei Iehova hna acile matre troa mama sai Iesu e celë fen? Nge nemene la aqane tro la itre keresiano a atrehmekune la itre ka mama sai Iesu? Tro sa ce ithanatane la itre hnying celë ngöne la tane mekune ka troa xulu.