1. Nemene la itre loi hne së hna troa kapa jëne la thupene mel?

JËNE la thupene mel, ene la mele hna huujëne hnei Iesu, ijiji së troa kapa la itre manathith ka nyimutre. Ej a aijijëne la itre nekö i Adamu ka ajane la meköt troa hane nyi atrene elanyi la lapa i Akötresie. Ame la ketre manathithi tre, tro sa mele madrin epine palua. Ngo, hetre ketre ewekë ka sisitria kö hune lai. Ka hetre aliene fe la thupene mel kowe la nöjei xupuana i Iehova, e koho hnengödrai me e celë fen.—Heberu 1:8, 9.

2. (a) Nemene la itre ewekë ka tru e hnengödrai me e celë fen hnei Iesu hna qaja ngöne la thithi nyidrë? (Wange ju la pane iatr.) (b) Nemene la hne së hna troa ce ithanatane ngöne la tane mekune celë?

² Lue macatre qëmekene tro Iesu a mec, hnei nyidrëti hna inine la itretre drei nyidrë troa thith, me hape: “Tretretro huni e koho hnengödrai, epi hmitrötre la ëje i Cilie. Epi traqa pi la Baselaia i Cilie. Epi tro fe a eje la aja i Cilie e celë fen tune e koho hnengödrai.” (Mataio 6:9, 10, MN.) Tro sa ce wange la aqane ce tro la thupene mel memine la aqane ahmitrötrëne la ëje i Iehova, me musi ne la Baselaia i Akötresie, memine fe la aqane troa eatr la aja i Nyidrë.

3. Nemene la hna amamane hnene la ëje i Iehova? Nemene la aqane jele ngazone Satana la ëje i Iehova?

³ Hnei Iesu hna pane thithi thatraqane la ëje i Iehova, matre tro ej a hmitrötr. Kola amamane la pengöi Iehova hnene la ëje i Nyidrë. Pëkö atr ka catr, nge ka meköt hui Nyidrë, e koho hnengödrai me e celë fen. Hnei Iesu fe hna hë Nyidrë ka hape, “Tetetroti ka Hmitöt.” (Ioane 17:11) Pine laka ka hmitrötr Iehova, haawe, ame asë hi la itre hnei Nyidrëti hna kuca, me itre wathebo hnei Nyidrëti hna acil, ka hmitrötr asë hi. Ngo ame e Edena, hnei Satana, atre iaö, hna amejëne la luelu göne la emeköti Akötresie troa acili wathebo kowe la itre atr. Hnei angeic hna sili trenga thoi Iehova, me jele ngazone la ëje i Nyidrë.—Genese 3:1-5.

4. Nemene la aqane ahmitrötrëne Iesu la ëje i Akötresie?

⁴ Ketre, hnei Iesu hna hnine la ëje i Iehova, me isine troa ahmitrötrëne ej. (Ioane 17:25, 26) Jëne la aqane ujë i nyidrë, me itre ini hnei nyidrëti hna hamën, hnei nyidrëti hna xatuane la itre atr troa trotrohnine laka, ka meköt la itre wathebo i Iehova, nge ame asë hi la itre hnei Nyidrëti hna amekötine koi së tre, nyine loi koi së. (E jë la Salamo 40:8-10.) Ngacama hnei Satana hna thele jëne matre troa akötrë Iesu uti hë la mec, ngo hnei nyidrëti pala hi hna mele nyipici koi Iehova. Matre, nyidrëti a amamane e cili ka hape, ijije hi tro la atr ka pexej a drengethenge Iehova.

5. Nemene la aqane tro sa ahmitrötrëne la ëje i Akötresie?

⁵ Tro sa amamane tune kaa ka hape, easa hnine la ëje i Iehova? Tro sa amamane lai jëne la aqane ujë së. Iehova a ajane tro sa hmitrötr. (E jë la 1 Peteru 1:15, 16.) Kolo lai a hape, easa nyihlue i Nyidrë hmekuj, me drengethenge Nyidrë thenge la hni së ka pexej. Nge, e akötrë së jë, easa isine troa mel thenge la itre ini hne së hna kapa qaathei Iehova. Matre, celë hi aqane tro së lai a atrune la ëje i Iehova. (Mataio 5:14-16) Easë hi lai a amamane ka hape, ka lolo la itre wathebo i Iehova, nge ka thoi lae Satana. Itre atr ka tha pexeje kö së, matre tro së lai a tria. Ngo, e traqa ju së tria, loi e tro sa ietra, me isine matre tha tro hmaca kö sa kuca la itre ewekë ka adrone la ëje i Iehova.—Salamo 79:9.

6. Pine nemene matre ka meköti së xajawa i Iehova, ngacama itre atr ka tha pexeje kö së?

⁶ Maine ka lapaune së kowe la thupene mel, tro Iehova a nue la itre ngazo së, itre hna iëne ju hë së maine itre “xa mamoe” pena. Nyidrëti a kapa lo itre ka nue la mele i angatr koi Nyidrë. Nyidrëti a jele mekötin la itre keresiano hna iën ceitu me itre nekö i Nyidrë, nge ka meköti fe koi Nyidrë la “ite xa mamoe” ceitu me itre sinee i Nyidrë. (Ioane 10:16; Roma 5:1, 2; Iakobo 2:21-25) Celë hi matre, thupene mele hë enehila a aijijë së troa imelekeu hnyawa me Akötresie, me ahmitrötrëne la ëje i Nyidrë.

7. Nemene la itre manathithi hna aijijën hnene la thupene mel?

⁷ Öni Iesu ngöne la thithi ka hape: “Epi traqa pi la Baselaia i Cilie.” Nemene la aqane ce tro la thupene mel memine la Baselaia i Akötresie? Hna nyi atrene la Baselaia i Akötresie hnei Iesu me ala 144 000 hna iëne qa celë fen. Thupene mel la ka aijijëne la itre atr cili troa mele hmaca e hnengödrai. (Hna Amamane 5:9, 10; 14:1) Tro angatr a joxu me itretre huuj, me ce musi me Iesu kowe la fen koi ca thauzan lao macatre. Ame ngöne la ijine cili, tro Iehova a aparadraisone la fen, me xatuane la itre atr troa pexeje trootro jëne la Baselaia. Tro ha ca lapa hnene la itre hlue i Iehova e koho hnengödrai me e celë fen. (Hna Amamane 5:13; 20:6) Ame hë e cili, tro hë Iesu a apatrenyi Satana, me apatrene trij la nöjei jol ka traqa hnei angeic.—Genese 3:15.

8. (a) Nemene la aqane xatuane Iesu la itretre drei nyidrë troa trotrohnine la enyipiewekëne la Baselaia i Akötresie? (b) Nemene la aqane sajuëne së la Baselaia enehila?

⁸ Hnei Iesu hna xatuane la itretre drei nyidrë troa trotrohnine la enyipiewekëne la Baselaia i Akötresie. Thupene ju hi la hna bapataiso nyidrë, hnei nyidrëti hna cainöjëne “la maca ka loi ne la baselaia i Akötesie” ngöne la nöjei götran hnei nyidrëti hna tro ngön. (Luka 4:43) Hnei nyidrëti fe hna upe la itretre drei nyidrë troa qeje nyidrë “uti hë la cane la fene hnengödrai.” (Ite Huliwa 1:6-8) Enehila mina fe, jëne la huliwa ne cainöj, itre atr a atre la pengöne la thupene mel, me hane nyi jinine la Baselaia i Akötresie. Haawe, easa amamane ka hape, easë la itre jinine la Baselaia ka nyipici e hne së hna xatuane la itre keresiano hna iën troa cainöjëne la maca ka loi e cailo fen.—Mataio 24:14; 25:40.

9. Pine nemene matre xecie koi së ka hape, tro Iehova eatrëne la aja i Nyidrë kowe la itre atr?

⁹ Nemene la aliene la ithanata i Iesu la nyidrëti a qaja ka hape: “Epi tro fe a eje la aja i Cilie”? E qaja ha Iehova ka hape, hetre ewekë ka troa traqa, tro lai a traqa. (Isaia 55:11) Tha hnene kö la icilekeu i Satana hna sewe Iehova troa eatrëne la aja i Nyidrë. Nemene lo aja i Iehova kowe la ihnadro? Ame la aja i Nyidrëti ekö tre, troa tiqa la ihnadro hnene la itre nekö i Adamu me Eva ka pexej. (Genese 1:28) Maine meci ju Adamu me Eva, nge pëkö nekö i nyidro, tha tro kö a eatr lo aja i Akötresie göi troa atiqane la ihnadro hnene la itre nekö i nyidro. Matre hnei Iehova hna nue nyidro troa hetre nekönatr. Nge thupene mel la ka aijijëne la nöjei atr ka lapaun troa traqa elanyi kowe la atr ka pexej me mele epine palua. Atraqatre la ihnimi Iehova kowe la itre atr, nge aja i Nyidrë tro sa hetrenyi la mele ka lolo, lo hnei Nyidrëti hna hnëkën amë ekö koi së.

10. Nemene la thangane la thupene mel kowe la itre atr ka meci hë?

¹⁰ Tune kaa fe lo itre milio lao atr ka meci hë nge thatre Iehova kö angatr? Ame la aja i Iehova, tro la itre atr a mel. Matre, tro Nyidrëti a amelene hmaca elanyi la itre atr ka meci hë. Nge thupene mel la ka aijijëne lai. Tro hë angatr e cili a atre Iehova me hane mele epine palua. (Ite Huliwa 24:15) Iehova la qeqene mel. Matre, e hamëne hmaca jë nyidrëti la mel, Keme i angatre hë Nyidrë. (Salamo 36:9) Ame ngöne lo tulu ne thithi Iesu, öni nyidrë, Iehova la “Tretretro huni e koho hnengödrai.” (Mataio 6:9) Hnei Iehova hna nue koi Iesu la ketre hnëqa ka tru, ene la troa amelene hmaca la itre ka mec. Öni Iesu: “Ini hi la mele hmaca, memine fe la mel.”—Ioane 6:40, 44; 11:25.

11. Nemene la aja i Akötresie kowe “la ka ala nyimu”?

¹¹ Öni Iesu fe: “Ame la ate kuca la aja i Akötesie, celë hi tejine me ini, me xang, me thineng.” (Mareko 3:35) Aja i Iehova tro la itre atr ka nyimutre qa ngöne la nöjei nöj me tribu me qene hlapa a hane nyihlue i Nyidrë. Hna qeje angatre ka hape, “ka ala nyimu atraqat, lo ka tha ’teine kö kete ate e.” Angatr a lapaune kowe la thupene mel, nge hetre aja i angatr troa drengethenge Akötresie. Angatr a atrunyi Nyidrë me hape: “Ame la mele, te, qa thei Akötesi shë, ate [të hune] la theron, me qa thei Arenio.”—Hna Amamane 7:9, 10.

12. Nemene la itre ithuemacanyi hne së hna kapa qa ngöne la thithi Iesu?

¹² Tru pi hë la itre ithuemacanyi hne së hna kapa göi Iehova me göne la aja i Nyidrë kowe la itre atr qa ngöne la tulu ne thithi Iesu. Ame la ketre ithuemacany, nyipi ewekë tro sa isine troa ahmitrötrëne la ëje i Iehova me atrunyi Nyidrë. (Isaia 8:13) Hnene la thupene mel, ene la mel hna huujëne hnei Iesu hna hane aijiji së troa hane hetrenyi elanyi la mel, nge jëne eje fe, troa atrune la ëje i Akötresie. Ketre, ame la aliene la sipu ëje i Iesu, tre “Iehova La Iamele.” Ame la hnaaluene ithuemacany tre, jëne la Baselaia, tro la itre atr ka idrengethenge a kapa elanyi qaathei Iehova la nöjei manathith ka xulu qa ngöne la thupene mel. Ame la hnaakönin, ka xecie hnyawa koi së ka hape, pëkö ketre ewekë ka troa sewe Iehova troa eatrëne la aja i Nyidrë.—Salamo 135:6; Isaia 46:9, 10.

13. Pine nemene matre xomi bapataiso jë së?

¹³ Ame la ketre aqane tro sa amamane la ole së kowe la thupene mel tre, ene ma tro sa nue la mele së koi Iehova, me xomi bapataiso. Aqane tro hi së lai a amamane ka hape, easa lapaune kowe la thupene mel, nge “ite ate i Joxu [Iehova] shë.” (Roma 14:8) Ame la easa xomi bapataiso, easë lai a sipo Iehova troa hamëne koi së “la mekuthethewe ka loi.” (1 Peteru 3:21) Nge, tro së lai a kapa qaathei Nyidrë la itre manathithi ka xulu qa ngöne la thupene mel. Matre, xecie hnyawa koi së laka, tro së elanyi a kapa la nöjei ewekë hnei Nyidrëti hna thingehnaean.—Roma 8:32.

14. Pine nemene matre Iehova a upi së troa hnim la itre atr?

¹⁴ Ame la qaane la nöjei ewekë hnei Iehova hna kuca tre, hna nyi trepene hnene la ihnim ka tru i Nyidrë. Ame la aja i Nyidrë, tro la itre hlue i Nyidrë a nyitipu Nyidrë, me ihnimikeu. (1 Ioane 4:8-11) E hetre ihnimi së kowe la itre atr, easë hi lai a amamane hnyawa ka hape, hetre aja së troa hane ‘itre neköne la Tretretro së e koho hnengödrai.’ (Mataio 5:43-48) Ame la lue wathebo ka sisitria tre, ene la troa hnimi Iehova, nge ame la hnaaluen tre, ene la troa hnim la itre atr. (Mataio 22:37-40) Ame la ketre aqane troa hnim la itre atr tre, ene la troa tro fë koi angatr la maca ka loi ne la Baselaia i Akötresie. E tro sa xötrethenge la wathebo i Iehova, ene la troa hnim la itre atr, ene mina fe la itre trejin, tro ha pexej la ihnimi së koi Nyidrë.—1 Ioane 4:12, 20.

15. (a) Nemene la itre manathithi hne së hna kapa enehila qaathei Iehova? (b) Nemene la itre manathithi hne së hna troa kapa elany?

¹⁵ Iehova a amamane hnyawa koi së ka hape, jëne la lapaune së kowe la thupene mel, “troa köle tije” la itre ngazo së. Tro Nyidrëti a nue hnyawane la itre ngazo së. (E jë la Ite Huliwa 3:19-21.) Tune la hne së hna ce wange hë, thupene mel la ka aijijë Iehova troa iëne la itre xa atr matre troa nyi nekö i Nyidrë e koho hnengödrai. Hna hë angatr ka hape, itre keresiano hna iën. (Roma 8:15-17) Nyidrëti fe a könëne la itre atrene la “ite xa mamoe” troa hane sine la lapa i Nyidrë e celë fen. Ame hë la pexeje hë angatr elany, hetrenyi la ketre itupath tixenuë. E tro angatr a mele nyipici koi Iehova, tro hë Nyidrëti a nyi kuku angatre fe. (Roma 8:20, 21; Hna Amamane 20:7-9) Tro pala hi Iehova elany a hnim asë la itre nekö i Nyidrë. Nge, tro pala hi a hetre manathithi elanyi jëne la thupene mel. (Heberu 9:12) Hnei Iehova hna hamë së la ahnahna ka tru cili, nge pëkö ketre ka troa thapa lai qaathe së.

16. Tro la thupene mel a amele së tune kaa?

¹⁶ Hnei Iesu hna “a ca” meci pi thatraqai së. Matre hna itö mele së hnei Iesu, nge celë hi thupene mel ka eje hë. Haawe, e tro sa ietrane la itre ngazo së, pëkö ketre ewekë nyine tro Satana a kuca matre troa sewe së troa hane sine la lapa i Iehova. (Heberu 9:24-26) Hnei Adamu hna xulu fë la mec, ngo tro la huuje i Iesu a xulu fë elanyi la mel ka tha ase palua kö. Thupene mel la ka ijij troa thepe së qa ngöne la fene i Satana, memine la xoue mec.—Heberu 2:14, 15.

17. Nemene la aliene la ihnimi Iehova koi epun?

¹⁷ Eje hi laka, tro pala kö a eatr elanyi la itre hna thingehnaean hnei Akötresie. Tha ka saze kö la itre wathebo hna acil hnei Iehova ngöne la itre ewekë hnei Nyidrëti hna xup. Ketre tune mina fe, tha tro pi kö Iehova a saze. Tha tro pi kö Nyidrëti a ahleuhleunyi së. (Malaki 3:6) Tha mel hmekuje kö la hnei Iehova hna hamë së. Easë fe a kapa la ihnimi Nyidrë. “Hne shë hna ate me lapaune la ihnimi Akötesie koi shë. Akötesieti la ihnim.” (1 Ioane 4:16) Ka eatre pala hi la itre hnei Nyidrëti hna thingehnaean. Haawe, easenyi hë matre paradraiso pi la ihnadro. Tro ha nyitipu Iehova me ihnimikeu la nöjei xupuana i Nyidrë. Ame hë e cili, troa qaja hnene la itre hlue i Nyidrë asë, e hnengödrai me e celë fen ka hape: “Thatraqai Akötesi shë la qaja aloin, me lolo, me inamacan, me ole, me atrun, me men, me cat, epin’ epine palua. Amen.”—Hna Amamane 7:12.