Hne së hna mekune tune lai ekö pine la hna qaja ngöne Heberu 12:16, MN. Hna qaja göi Esau ka hape, hnei angeic hna “tha nyipine la itre ewekë ka hmitrötr,” me hamëne koi Iakobo “la edrö i angeice haetra troa itöne la trepe xen.” Matre, easë lo a mekun ka hape, pine laka hnei Iakobo hna kapa ‘la edrö ne haetra,’ hnei angeice fe hna kapa la ketre hnëqa ka tru, ene la troa ketre xötrapan ne la Mesia.—Mataio 1:2, 16; Luka 3:23, 34.

Ngo, kola mama e hnine la Tusi Hmitrötr laka, tha itre neköne haetra asë kö la itre xötrapan ne la Mesia. Tro sa ce wange lai:

Ame la neköne haetra i Iakobo me Lea tre, Reubena. Nge ame la neköne haetra i Iakobo me Rakela tre, Iosefa. Ngo, hnei Reubena “hna angazone la göhne ne la keme i angeic,” ame hna xom qaathei angeic la edrö i angeic haetra, me hamëne pena koi Iosefa. (Genese 29:31-35; 30:22-25; 35:22-26; 49:22-26; 1 Aqane lapa ite Joxu 5:1, 2) Ngo ame pe, tha ka xulu kö la Mesia qaathei Reubena maine Iosefa, ngo ka xulu qaathei Iuda, lo hnaafoane neköi Iakobo me Lea.—Genese 49:10.

Kola mama la faif lao xötrapan ne la Mesia ngöne Luka 3:32, nge itre neköne haetra angatr. Ame Boaza tre, keme i Obeda, nge ame Obeda tre, keme i Iese.—Rutha 4:17, 20-22; 1 Aqane lapa ite Joxu 2:10-12.

Ame Davita nekö i Iese, tha angeice kö la neköne haetra. Angeice pe la wene puhnene la eitre lao nekö i Iese trahmany. Ngo, angeice la xötrapan ne la Mesia. (1 Samuela 16:10, 11; 17:12; Mataio 1:5, 6) Ame la ketre xötrapan ne la Mesia thupei Davita tre, Solomona, ngo tha angeice kö la neköne haetra.—2 Samuela 3:2-5.

Tha kolo kö lai a qaja ka hape, tha nyipiewekë kö la neköne haetra. Hetre itre hnëqa  ka tru hna kapa hnene la neköne haetra, nge pëkö thene la itre xa trejin me angeic. Angeice la ka troa xome la hnëqa i kem e thupen, me kapa la lue edrö qa ngöne la itre ewekë i kem.—Genese 43:33; Deuteronomi 21:17; Iosua 17:1.

Ngo, ijije hi troa hamëne la hnëqa ne haetra kowe la ketre nekön. Ame lo Aberahama a upi Isamaela, kola xom e cili la hnëqa ne haetra qaathei angeic me hamën koi Isaaka. (Genese 21:14-21; 22:2) Tune la hne së hna ce wang e caha, hna xom la hnëqa ne haetra qaathei Reubena me hamën koi Iosefa.

Nga nemene kö la mekun hna hamën hnei Paulo ngöne Heberu 12:16, MN? Kola qaja ka hape: “Wanga hetre atre kuci ngazo, me ka tha nyipine kö la itre ewekë ka hmitrötr tui Esau, lo atre hamëne la edrö i angeice haetra troa itöne la trepe xen.”

Tha Paulo kö e celë a qaja la itre xötrapan ne la Mesia. Angeice pe a hmekën la itre keresiano. Öni Paulo koi angatr: “[Amekötine pi] la nöjei gojenyi nyine thatraqane la ite waca i nyipunie . . . wanga tha hetenyi kö kete la ihnimi gufa i Akötesie.” Tro angatre lai a traqa kow, e hnei angatr hna kei kowe la kuci ngazo. (Heberu 12:12-16) Nge, tro hë sa tui Esau laka, tha hnei angeice kö hna “nyipine la itre ewekë ka hmitrötr,” ngo hnei angeice pe hna kei thenge la itre sipu aja i angeice kö.

Thenge la hna majemine kuca ekö, hnei Esau hna hane tro fë huuj koi Iehova. (Genese 8:20, 21; 12:7, 8; Iobu 1:4, 5) Ngo ame la engazon, ka tru palaha koi Esau la itre sipu aja i angeice kö, ame hnei angeic hna iëne ju la trepe bona (lentilles), me nue pe la edrö ne haetra i angeic. Maine jë, tha ajane kö Esau troa hetrenyi la mele ne akötr, lo hna qaja amë hë hnei Iehova göne la itre matra i Aberahama. (Genese 15:13) Ketre, hnei angeic hna amamane ka hape, tha nyipine kö angeic la itre ewekë ka hmitrötr lo angeic a xomi lue föe wanaithihlë, nge celë hi ka ahleuhleune la hni keme me thin. (Genese 26:34, 35) Ka isapengöne catr angeic me Iakobo, atre thel troa faipoipo memine la ketre hlue i Iehova!—Genese 28:6, 7; 29:10-12, 18.

Nemene la hne së hna inin göne la itre xötrapane i Iesu e hnine la Tusi Hmitrötr? Tha itre neköne haetra asë kö la itre xötrapane i Iesu. Tha sihngödri kö lai kowe la angetre Iudra, nge pëkö engazon koi angatr. Kola mama lai ke, hnei angatr hna jelenyipicine ka hape, Keriso la ketre matra i Davita, lo wene puhnene pe lo haa nekö i Iese.—Mataio 22:42.