1, 2. Nemene la ewekë ka mama kowe la ketre trejin, nge nemene la hnei angeic hna kuca?

HNA bapataiso Robert lo thöthi petre kö, ngo tha hnei angeice kö hna wangatrune la nyipici. Öni angeic: “Pëkö ngazo hnenge hna kuca, nge kösë ka loi hi la aqane imelekeung me Akötresie ke, eni a sine la nöjei icasikeu, me xome la huliwa ne pionie ka ixatua ngöne la macatre. Ngo, eni hi a inyitipu ngöne la ekalesia, nge pëkö madrineng.”

² Ame hë la Robert a faipoipo, mama pi hi la jol ka ej thei angeic. Hnei angeic me föi angeic hna majemine ijelaxötra qa ngöne la Tusi Hmitrötr. Atrepengöne hnyawa hi föi angeic la Tusi Hmitrötr, nge tha jole kö koi nyiidro troa sa la itre hnying. Ngo ame Robert, thatre kö e itre xa ijin la nyine troa sa, matre hmahma pi hë angeic. Öni angeic: “Kösë pëkö hnenge hna atre. Ame hnenge hna ketre qaja e kuhu hning ka hape, ‘Maine eni la he ne la hnepe lapa, nge qang troa amamai tulu ngöne la huliwa i Iehova ke, nyipiewekë tro ni a saze.’ ” Matre, öni angeic: “Hnenge hna inine la Tusi Hmitrötr, me thel ajuin. Matre, ketre atrepengöne hnyawa ha ni la aliene ej. Trotrohnine  hë ni, ngo ame la ka sisitria tre, hnenge hna acatrene la aqane imelekeung me Iehova.”

3. (a) Nemene la ini hne së hna xom qa ngöne la hna melën hnei Robert? (b) Nemene la hne së hna troa ce ithanatan?

³ Hetre ini hne së hna xom qa ngöne la hna melën hnei Robert. Nyipici laka, ka maca së troa qejepengöne la Tusi Hmitrötr, nge easa sine la nöjei icasikeu, me cainöje trootro, ngo tha kolo kö lai a hape, ka ce mekun së me Iehova. Maine jë, easa thele palahi troa ce mekun me Nyidrë, ngo ame la easa sipu waipengö së, kola mama laka, hetre ewekë palahi nyine tro sa kuca. Nge, itre ewekë lai ka troa aeasenyi së catr koi Nyidrë. (Filipi 3:16) Ame ngöne la tane mekune celë, troa sa la köni hnying, kola hape: (1) Nemene la aqane tro sa atre ka hape, easa ce mekun me Akötresie? (2) Nemene la nyine tro sa kuca matre tro palahi sa ce mekun me Akötresie? (3) Nemene la thangane lai kowe la mele së?

4. Thatraqai drei la eamo ngöne Efeso 4:23, 24?

⁴ Ame la easa atre Iehova, hne së hna saze la aqane mele së. Nge, easë palahi a amekötine la mele së thupene la hna xomi bapataiso. Öni Tusi Hmitrötr: “[Tro nyipunie a] . . . ahnyipixene hmaca la aqane mekune i nyipunie.” (Efeso 4:23, 24, MN) Pine laka, itre atr ka tha pexeje kö së, hetre ewekë nyine tro palahi a amekötin the së. Ngacama ekö hë së nyihlue i Iehova, ngo loi e tro palahi sa acatrene la aqane imelekeu së me Nyidrë.—Filipi 3:12, 13.

5. Nemene la aqane tro sa isa waipengö së kö?

⁵ Maine thöthi së, maine qatr, ngo loi e tro sa isa waipengö së, me hape: ‘Drenge kö ni laka, easenyi catre ni koi Akötresie? Tune kaa la thiinang, ka ihmeku palahi memine la thiina i Keriso? Nge tune kaa la pengöne la hning, me aqane ujëng ngöne la itre icasikeu, me ngöne la itre xa götran? Nemene la ka mama ngöne la itre porotrikeng? Nemene la ka mama ngöne la aqane heetreng me isej, memine la kola haji ni? Nemene la aqane ujëng la kola traqa la itupath? Hapeu, ka nyipi atre kö ni?’ (1 Korinito 14:20) Tro la aqane sa la itre hnying celë a amamane la ejuine la imelekeu së me Iehova.

6. Nemene la aqane tro sa atre ka hape, easa ce mekun me Akötresie?

⁶ Ame itre xa ijin, tro itre xan a xatua së matre mama pi ka hape, easa ce mekun me Iehova. Hnei Paulo aposetolo hna amamane laka, thatre kö la “ate ne ngönetei” la aqane troa amadrinë Iehova. Ngo, ame la “ate ne u,” canga öhne hi angeic la aqane waiewekë i Iehova. Atre hnyawa hi angeic laka, tha kapa kö Iehova la aqane mekun ne la “ate ne ngönetei.” (1 Korinito 2:14-16; 3:1-3) Ame la itre qatre thup, itre ka atre la aqane mekune i Keriso tre, canga mama hi koi angatr la trejin ka nyiqaane ujë ceitu me “ate ne ngönetei,” nge angatr a thel troa  xatua angeic. Maine kola thel troa xatua së hnene la itre qatre thup, tro kö sa kapa la ixatua i angatr, me thel troa saze? Maine celë hi la hne së hna kuca, easë hi lai a amamane ka hape, aja së tro palahi a ce mekun me Iehova.—Ate Cainöj 7:5, 9.

7. Nemene la tulu ka amamane ka hape, tha ene hmekuje kö la troa atrepengöne hnyawa la Tusi Hmitrötr matre troa ce mekun me Akötresie?

⁷ Tha hnene kö laka, atrepengöne hnyawa hi së la Tusi Hmitrötr, matre easë a ce mekun me Akötresie. Atrepengöi Iehova hnyawa hi hnei Solomona joxu, nge hetrenyi fe e hnine la Tusi Hmitrötr la itre trengewekë i angeic ka inamacan. Ngo, ame hë e thupen, kolo ha puje la imelekeu i angeic me Iehova utihë la trotriji Nyidrëti hnei angeic. (1 Ite Joxu 4:29, 30; 11:4-6) Matre, nyipiewekë tro sa acatrene la lapaune së. (Kolose 2:6, 7) Tro sa acatrene ej tune kaa?

8, 9. (a) Nemene la ka troa acatrene la lapaune së? (b) Nemene la aja së la easa ini Tusi Hmitrötr, me mekun ajuin? (Wange ju la pane iatr.)

⁸ Ame ngöne la ijine la itre pane keresiano, hnei Paulo hna thuecatre koi angatr troa ‘thele troa nyipi atr.’ (Heberu 6:1, MN) Nemene la aqane tro sa trongëne la eamo celë enehila? Loi e tro sa pane inine la itus hna hape, Thupë Nyipunieti Ju Kö Ngöne La Ihnimi Akötesie. Tro lai a xatua epun troa trotrohnine la aqane troa trongëne la itre trepene meköt ne la Tusi Hmitrötr ngöne la mele i epun. Maine ase hë epuni inine la itusi celë, hetre itre xa itus ka troa xatua epun troa acatrene la lapaune i epun. (Kolose 1:23) Ketre, nyipiewekë tro sa mekun ajuin la hne së hna inin, me sipo Iehova troa xatua së troa trongëne itre ej ngöne la mele së.

⁹ Ame la aja së ngöne la easa inine la Tusi Hmitrötr, me mekun ajuin tre, ene la troa amadrinë Iehova, me drengethenge Nyidrë. (Salamo 40:8; 119:97) Nge, easë mina fe a thel troa thipetrij la itre ewekë ka troa ajolëne la lapaune së.—Tito 2:11, 12.

10. Nemene la nyine tro la thöth a kuca matre tro palahi a ce mekun me Iehova?

¹⁰ Maine ketre thöth eö, hetre hnei eö kö  hna thel troa eatrën ngöne la huliwa i Akötresie? Hnene la ketre trejin ka huliwa ngöne Bethela hna majemine ithanata memine la itre thöth ka xötrei xomi bapataiso, me hnyingëne koi angatr la itre aja i angatr göne la huliwa i Iehova. Canga mama hi koi angeic laka, alanyimu hë la itre ka mekune hnyawa la nyine tro nyudreni a kuca matre troa nyihlue i Iehova elany. Itre xan a ajan troa huliwa i Iehova o drai, maine fek kowe la ketre götran gaa aja ixatua. Ngo, thatre kö la itre xan la nyine troa kuca. Hapeu, kolo lai a hape, pëkö hnei nyudreni hna ajan troa kuca ngöne la huliwa i Iehova? Maine eö la ketre thöth, thele jë ka hape: ‘Eni kö a sine la itre icasikeu, me cainöj ke, hna upi ni hnei kakati me nenë? Maine, hnene kö la aqane imelekeung me Iehova.’ Eje hi laka, thöthi ju hë maine qatr, ngo loi e tro asë hi së a hetre mekun nyine troa eatrën ngöne la huliwa i Iehova. Tro lai a xatua së matre tro palahi sa ce mekun me Iehova.—Ate Cainöj 12:1, 13.

11. (a) Nemene la nyine tro sa kuca matre troa ce mekun me Iehova? (b) Drei la tulu e hnine la Tusi Hmitrötr nyine tro sa nyitipun?

¹¹ E öhne hë së la itre nyine tro sa saze, haawe, kuca jë hë! Ka nyipiewekë catr ke, jëne mele së hi lai. (Roma 8:6-8) Tha Iehova kö a thel tro sa pexej, Nyidrëti pe a hamë së la uati hmitrötr matre troa xatua së. Ngo eje hi lai laka, loi e tro fe sa isa catre huliwa. John Barr la ketre atrene la Lapa Ne Xomi Meköt ekö, hnei nyidrëti hna qejepengöne  la Luka 13:24, me hape: “Alanyim la itre ka kei, ke, tha hnei angatre kö hna catr.” Loi e tro sa tui Iakobo. Hnei nyidrëti hna ikuië memine la ketre angela utihë la amanathithi nyidrë. (Genese 32:26-28) Maine nyipici laka, easa madrin la easa inine la Tusi Hmitrötr, ngo tha tro pi kö a ceitu memine la itre xa itusi menu. Loi e tro pe sa catre thel la aliene la itre ini ka troa xatua së.

12, 13. (a) Nemene la ka troa xatua së troa trongëne la hna qaja ngöne Roma 15:5? (b) Nemene la ini hne së hna xome qa ngöne la hna qaja hnei Peteru, memine la tulu i angeic? (c) Nemene la nyine tro epuni a kuca matre tro palahi a ce mekun me Akötresie? (Wange ju la itre mekune hna eköhagen, “Aqane Troa Ce Mekun Me Iehova.”)

¹² Maine tro sa catre thel troa ce mekun me Iehova, tro hë la uati hmitrötr a xatua së troa amekötine la aqane mekune së. Tro ha casi la mekuna së me Keriso. (Roma 15:5) Tro la uati hmitrötr a xatua së troa xometrij la itre aja ka ngazo, me melën la itre thiina ka amadrinë Iehova. (Galatia 5:16, 22, 23) Maine easa öhne laka, easë ha wangatrune la itre mo, maine itre nyine madrin, thupëne kö ke, hmacahmaca pi. E cili, loi e tro sa sipo Iehova la uati hmitrötr matre troa xatua së troa wangatrune la itre ewekë ka lolo. (Luka 11:13) Mekune ju la tulu i Peteru aposetolo. Ame ngöne la itre xa ijin, isazikeu kö la aqane mekuna i angeic me Keriso. (Mataio 16:22, 23; Luka 22:34, 54-62; Galatia 2:11-14) Ngo, tha hnei angeice pi kö hna hmacahmaca. Celë hi matre kola xatua angeic hnei Iehova. Haawe, kolo ha casi la mekuna i Peteru me Keriso. Tu së fe, ijiji së hi troa hane tui Peteru.

¹³ Thupene lai, hnei Peteru hna amexeje la itre xa thiina ka troa xatua së. (E jë la 2 Peteru 1:5-8.) Loi e tro sa catre “xom’ acone” kola hape, troa xomehnöth, me “xomi hni,” me “ihnimi tejine,” me eëne la itre xa thiina ka loi. Ame ngöne la nöjei drai, easa isa hnying ka hape, ‘Nemene la thiina hnenge hna troa melën enehila, nge ka troa xatua ni tro palahi a ce mekun me Akötresie?’

14. Nemene la thangane kowe la mele së e hna ce mekun me Akötresie?

¹⁴ Maine casi hi la mekuna i epun me Keriso, tro hë lai a mama ngöne la hnë huliwa maine hna ini. Troa mama ngöne la aqane ithanata, me aqane axecië mekun e nöjei drai. Eje hi, tro la itre mekune hne së hna xom a amamane laka, easa thele troa nyitipu Keriso. Hnene laka, easa thele troa ce mekune me Akötresie, easa neëne la itre ewekë ka troa thë la aqane imelekeu së me Iehova. Nge tro fe sa cile hut, e traqa ju la itre itupath. Ketre, qëmekene tro sa axecië mekun, loi e tro sa pane cil me isa hnying, ka hape: ‘Nemene la itre trepene meköti ne la Tusi Hmitrötr ka troa xatua ni? Nemene la hna troa kuca hnei Iesu ngöne la jole celë? Nemene la aqane tro ni a amadrinëne la hni Iehova?’ Loi e tro palahi sa majemine hnyinge tun. Tro së enehila a pane wange la itre xa götrane la mele së. Nge ame e cili, tro sa wange la itre trepene meköti ka troa xatua së matre atreine së axecië mekune hnyawa.

15, 16. Nemene la ka troa xatua së troa axecië mekune hnyawa göne la (a) hna troa faipoipo memin? (b) itre sinee?

¹⁵ Troa iëne hnyawa la hna troa faipoipo memin. Hetre trepene meköti ka mama e hnine la Tusi Hmitrötr ngöne 2 Korinito 6:14, 15. (E jë.) Hnei Paulo hna amamane  hnyawa la eisapengönene la “ate ne u,” ene la atr ka ce mekun me Akötresie memine la “ate ne ngönetei.” Isapengöne catr la aqane waiewekë i nyidro. Nemene la aqane tro lai xatua epun troa iëne hnyawa la hna troa faipoipo memin?

¹⁶ Troa iëne hnyawa la itre sinee. Hetre trepene meköti ka mama e hnine la Tusi Hmitrötr ngöne Ite Edomë 13:20. (E jë.) Ame la atr ka ce mekun me Akötresie, tha angeice kö a nyisineene la itre atr ka troa ananazijëne la lapaune i angeic. Loi e tro sa thel la aqane tro sa trongëne la eamo celë ngöne la mele së! Maine jë tro sa ketre hnying ka hape: ‘Nemene la aqane tro lai a hmekë ni göi troa ithanata ngöne Ëternet? Maine pena, nemene la nyine tro ni kuca e traqa ju sipo ni hnene la itre trenyiwa troa elo ngöne Ëternet?’

17-19. Nemene la eloine qa ngöne la hna ce mekun me Akötresie göi (a) itre huliwa ka troa angazone la aqane imelekeu së me Iehova? (b) troa hetre aja nyine eatrën ngöne la huliwa i Akötresie? (c) troa iloi?

¹⁷ Itre huliwa ka troa angazone la aqane imelekeu së me Iehova. Hetre eamo hna hamën hnei Paulo ngöne Heberu 6:1, MN, kola hape: “Celë hi matre, e atre hë së la itre pane ini göi Keriso, haawe, thele jë së troa nyipi atr ; nge tha tro kö a ami ketre trepene hmaca hune la hna amë hë, ene la kola ietra fë la nöjei huliwa hna mecin, memine la lapaune koi Akötesie.” Nemene la aliene la kola hape, “nöjei huliwa hna mecin”? Kola qaja la itre huliwa ka sewe së troa imelekeu hnyawa me Akötresie. Tro la eamo celë a xatua së troa sa la köni hnying: ‘Ka hetre eloine kö la huliwa cili, maine ka aluzi traem? Tro kö ni a kapa la ketre jëne thele manie hna amë qëmekeng? Pine nemene matre tha tro kö ni a ce tro memine la itre atr ka thel troa saze la pengöne la fen?’

¹⁸ Troa hetre mekun nyine eatrën ngöne la huliwa i Akötresie. Ame ngöne la cainöje i Iesu hune la wetr, hnei nyidrëti hna amamane la itre mekun ka lolo nyine tro sa eatrëne ngöne la huliwa i Iehova. (Mataio 6:33) Ame la atr ka ce mekun me Iehova, angeic a amë panëne la Baselaia ngöne la mele i angeic. Tro la eamo celë a xatua së troa sa la lue hnying: ‘Tro kö ni a sisedrëne la itre ini ka tru? Tro kö ni a xom la huliwa celë?’

¹⁹ Troa iloi. Hnei Paulo hna hamë eamo kowe la itre keresiano ne Roma matre troa xatua angatr ngöne la kola iwesitrë. (Roma 12:18) Hetre aja së troa nyitipu Keriso, matre easa thel troa ‘lapa loi memine la nöjei atr asë.’ Nemene la aqane tro ni a ujë e tha itrotrohni kö ni me ketre? Jole jë kö koi ni troa kapa la mekuna i angeic? Maine pena, hna atre ni kö tune la atr ka thele tingeting?—Iakobo 3:18.

20. Pine nemene matre loi e troa ce mekun me Iehova?

²⁰ Hne së hna ce wang la itre trepene meköt ne la Tusi Hmitrötr nyine tro sa wangatrun ngöne la itre xa götrane la mele së. Nge, e hne së hna axecië mekun hnyawa, tro ha mama laka, uati hmitrötr la ka eatrongë së. E tro sa ce mekun me Iehova, tro sa mele madrin. Öni Robert, hna qaja ha e caha ka hape: “Ame la kola catre la aqane imelekeung me Iehova tre, kolo fe hi a acatrene la aqane imelekeung memine la föeng, me itre neköng. Tru catre la madrineng!” E tro sa thel tro palahi a ce mekun me Iehova, tro hë së lai a madrin, me kepe manathith. Nge, tro hë sa mele madrin enehila, me hetrenyi elanyi “la nyipi mel.”—1 Timoteo 6:19.