KA AJANE asë hi la nöjei atr troa madrin. Ngo, easa melëne la itre drai ne la pun, nge alanyim la itre atr ka cil kowe la itre jole ka tru. (2 Timoteo 3:1) Hnene la thiina ka tha meköti kö hna kuca koi angatr, maine hna tithi angatr hnei mec, maine kola luz la huliwa i angatr, maine kola mec la atr hnei angatr hna hnim matre pëhë madrine i angatr. Kola pë madrine i itre xan, ke, hetre ewekë ka ajolën la hni angatr, maine ahleuhleunyi angatre pena. Tro fe lai a hane kucakuca hnene la itre hlue i Iehova, me pë madrin. Maine celë hi ka traqa koi epun, nemene la aqane tro epuni a hetre madrine hmaca?

Maine aja së troa sa la hnyinge celë, loi e tro sa pane trotrohnine la aliene la nyipi madrin, memine la hna kuca hnei itre xan matre tro pala hi a hetre madrin, ngacama kola qëmeke kowe la itre jol. Thupene lai, tro sa ce wang la nyine tro sa kuca matre tro palahi sa hetre madrin, me akökötrene la madrine cili.

Tha hnene kö laka easa hnyimahnyima, matre kola hape, celë hi lai nyipi madrin. Pane mekune jë la ewekë celë: Ame la atr ka iji atrun la ka haitr tre, angeic a hnyima lapa. Ngo, e tha ka iji hë ke, tha hnyimahnyima ha angeic, nge angeice hmaca ha qëmeke kowe lo itre jol. Matre, tha nyipi madrine kö lo lai ijine hnyimahnyima cili.—Ite Edomë 14:13.

Ame la madrin tre, kola qaja la thiina ka ej e kuhu hni ne la atr. Hetre madrine la kola kapa maine treqene la ketre ewekë ka lolo. Eje palahi la thiina cili, ngacama ijine loi ju hë maine ngazo. (1 Thesalonika 1:6) Ame itre xa ijin, tro së lai a akötr, ngo ame pe, eje palahi the së la madrin. Hna thaucën ekö la ange aposetolo pine cainöjëne la ëje i Iesu. Ngo, kola qaja hnei Tusi Hmitrötr ka hape, hnei angatr hna “tropi qa ngöne la qëmeke ne la angete ieman, me madine ngöne laka hna meku angate laka ijije troa xomi hmahma pine la atesiwa.” (Ite Huliwa 5:41) Tha angatre kö lai a madrin pine la hna thaucë angatr. Ngo, angatre pe a madrine ke, hnei angatr hna mele nyipici koi Akötresie.

Tha hna hnaho së kö memine la madrin, nge tha ka xulu xan pena kö. Ame la nyipi madrin tre, ketre igötranene la wene la uati hmitrötre i Iehova. Uati hmitrötr la ka xatua së troa xetrëne la “ate ka hnyipixe,” ene mina fe la madrin. (Efeso 4:24; Galatia 5:22) Ketre, e hetrenyi the së la madrin, tro ha hmaloi koi së troa elë hune la itre jol.

Ame la aja i Iehova ekö, tre ene la troa tro loi la mel e celë fen, ngo tha ene kö la troa tro ngazo la fen tune enehila. Ngacama, ngazo ju hë la thiina ne la itre atr, ngo tha patre kö thei Iehova la madrin. Öni Tusi Hmitrötr: “Cate me madine ngöne la nö i nyidë.” (1 Aqane lapa ite Joxu 16:27) Ketre, ame la itre huliwa hna kuca hnene la itre hlue i Nyidrë, tre kola amadrinë Nyidrë.—Ite Edomë 27:11.

E ka madrine palahi së ngöne la itre ijin laka, tha eatre kö la aja së, easë hi lai a nyitipu Iehova. Tha tro kö sa hnehengazo menu, ngo loi pe tro sa wangatrun la itre ewekë ka loi  the së enehila, me treqene hnyawane la itre ewekë ka troa traqa elany, nge ka sisitria kö. *—Wange ju la ithuemacany.

Hetre itre hlue i Iehova ekö ka madrin palahi, ngacama tru ju hë la itre jole hnei angatr hna cile kow; Aberahama la ketre. Ngacama hetre jol ka traqa kowe la föi angeic, nge kola thele iwesitrë me angeic hnene la itre xa atr, ngo tha patre kö thei angeic la madrin. (Genese 12:10-20; 14:8-16; 16:4, 5; 20:1-18; 21:8, 9) Hetre madrine i angeic ke, hnei angeic hna mekun palahi la mejiune i angeic, ene la troa mel elanyi fene la musi Iesu. (Genese 22:15-18; Heberu 11:10) Öni Iesu: “Aciacinë [maine madrine] hë Aberahama la keme i nyipunie troa goeëne la draing.” (Ioane 8:56) Easa nyitipu Aberahama la easa mekune lapane la madrine së elany ngöne la fen ka hnyipixe.—Roma 8:21.

Hnei Paulo fe me Sila hna catre lapaun, me madrin, ngacama kola traqa itrai la itre jol. Thupene la kola thaucë nyidro me kuië nyidro e hnine la kalabus, hnei nyidroti hna “thith, me nyima koi Akötesie.” (Ite Huliwa 16:23-25) Nyidroti a atreine elë hun la akötre cili ke, hnei nyidroti palahi hna mekun lo itre hna thingehnaean hnei Akötresie. Atre hnyawa hi nyidro laka, kola akötrë nyidro pine la ëje i Iesu, matre celë hi ka thue madrine i nyidro. Easa nyitipu Paulo me Sila la easa mekun la itre eloine qa ngöne la hna catre nyihlue i Iehova.—Filipi 1:12-14.

Ame enehila, alanyim la itre trejin ka qëmeke koi itre jol, ngo tha patre kö thei angatr la madrin. Ame lo Nofeba 2013, hnene la wene ka tru (Haiyan la ëjen) hna lepe la nöje Philippines, nge 1 thauzan me hetre munën lao hnepe lapa ka anyipici Iehova ka pëhë uman. Öni George, ketre trejin ka pëhë uman ngöne la traon Tacloban ka hape: “Ngacama hna traqa la jole cili, ngo ka hetre madrinene palahi la itre trejin. Thatreine kö ni qejepengöne la madrine the hun.” E tro sa mekun la itre ewekë hnei Iehova hna kuca thatraqai së, me hetre hni ne ole koi Nyidrë, tro hë sa hetre madrin, ngacama nyimutre la itre jol hne së hna cile kow. Nemene la itre xa ewekë hne së hna kapa qaathei Iehova, nge ka amadrinë së?

Ame la kepin ka tru matre easa madrin tre, ene la imelekeu së me Iehova. Pane mekune jë! Atrepengöne hë së la Joxu ne hnengödrai me fene hnengödrai. Nyidrëti la Keme së, me Akötresi së, me Enehmu së!—Salamo 71:17, 18.

Ketre, easa olene koi Iehova la mel, memine la itre loi hna kapa qa ngön. (Ate Cainöj 3:12, 13) Pine laka, hnei Nyidrëti hna e së koi Nyidrë, matre trotrohnine hë së la aja i Nyidrë, me göne fe la aqane tro sa mel. (Kolose 1:9, 10) Ngo, alanyimu la itre atr ka thatre kö la aliene la mele i angatr. Hnei Paulo hna amamane lai la kola hape: “ ‘Tha öhne kö hnei lue meke, me denge hnei lue hnangenyë, kete tha lö kö kowe la hni ate, la nöjei ewekë hnei Akötesie hna hnëkëne thatraqai angete ajane koi nyidë.’ Ngo ase hë Akötesie amamane koi shë hnene la [u]a.” (1 Korinito 2:9, 10) Haawe, jëne madrine ka tru koi së la troa trotrohnine la aja i Iehova, memine la hnei Nyidrë hna troa kuca elany.

Hetre itre xa ewekë hna kuca hnei Iehova thatraqai së. Hnei Nyidrëti hna thelejëne matre troa nue la itre ngazo së. (1 Ioane 2:12) Hnei Nyidrëti hna thue mejiune koi së, ene la troa mel ngöne la fen ka hnyipixe, nge calemi hë. (Roma 12:12) Ame enehila, Iehova a hamë së la itre enehmu, itre ka nyihlue i Nyidrëti fe. (Salamo 133:1) Nyidrëti fe a thupë së matre tha tro kö sa kei kowe la itre nyinyithiina i Satana me itre dremoni angeic. (Salamo 91:11) E tro sa lapa mekun la itre manathithi celë qaathei Iehova, tro ha sisitria catre la madrine së.—Filipi 4:4.

Nemene la nyine tro la keresiano a kuca matre troa sisitria la madrine i angeic? Öni Iesu: “Ase hë ni qaja la tenge ewekë cili koi  nyipunie, mate ej’ e kuhu ite hni nyipunie la madineng, mate pexejejë la madine i nyipunie.” (Ioane 15:11) Ceitune hi la madrine ka ej the së memine la eë. Maine aja së troa mele catre la eë, loi e tro sa liin la itre xa sine sinöe. The thëthëhmine kö laka, uati hmitrötr la ka xatua së troa hetre madrin. Matre, e aja së troa hetre madrin, loi e tro palahi sa sipone la uati hmitrötr jëne la thith. Nge, nyipiewekë tro sa inin ajuin la Tusi Hmitrötr, lo hna cinyihane jëne la uati hmitrötr.—Salamo 1:1, 2; Luka 11:13.

Ame la ketre ewekë ka troa thue madrine së tre, ene la troa catr ngöne la itre huliwa ka amadrinë Iehova. (Salamo 35:27; 112:1) Pine nemen? Öni Tusi Hmitrötr: “Qouju e Akötesie, me trongëne la nöjei wathebo i nyidë ; ke celë hi qâne la nöjei ate asë.” (Ate Cainöj 12:13) Hna xupi së troa kuca la aja i Akötresie. Haawe, e tro sa nyihlue i Iehova, tro hë sa hetrenyi la nyipi madrin. *—Wange ju la ithuemacany.

Hetre itre xa eloin qa ngöne la troa hetre madrin. Tro së lai a amadrinë Iehova ke, easë a nyihlue i Nyidrë ngöne la madrin, ngacama kola traqa la itre jol. (Deuteronomi 16:15; 1 Thesalonika 5:16-18) Ketre, tro së lai a thipetrij la aja mo, me thel troa kuca asë la hne së hna atrein thatraqane la Baselaia i Akötresie. (Mataio 13:44) Ame la easa öhne la itre eloine hne së hna huliwa koi Iehova, tru catre la madrine së, tingetinge la hni së, nge madrine fe la itre xan.—Ite Huliwa 20:35; Filipi 1:3-5.

Ketre, e hetre madrine së ngöne la mele së enehila, tro lai a hetre thangane koi së. Öni Tusi Hmitrötr: “Ame la hni ka madin, te, kola ameune hnyawa.” (Ite Edomë 17:22) Hnene la atr ka inamacan, nge ka inin la pengöne la ngönetrei me itre sine mec ngöne la ketre uma ne ini ka tru e Nebraska (Etazini) hna kapa la mekun ne la Tusi Hmitrötr. Öni angeic: “E hetrenyi palahi thei epun la madrin, tro epuni a egöcatr elany.”

Ngacama jole catre la mele së enehila, ngo tro së lai a hetrenyi la nyipi madrin. Ka xulu la madrin qa ngöne la uati hmitrötr matre nyipiewekë tro sa thith, me inine la Tusi Hmitrötr, me mekun ajuin ej. Tro fe sa hetre madrin, e tro sa mekun la itre ewekë ka lolo hne së hna kapa qaathei Iehova, me xötrethenge la lapaune ne la itre hlue i Nyidrë, me kuca la aja i Nyidrë. Tro hë sa melën la hna qaja ngöne Salamo 64:10, kola hape: “Tro la ate ka meköti a madi Iehova, me lapaune koi nyidë.”