TANE MEKUN 6
Catre Jë Mele Nyipici Koi Iehova!
‘Tha tro kö ni a kei kowe la ngazo, uti hë meci hë ni!’—IOBU 27:5.
NYIMA 34 Tro Jë Ngöne La Nyipici
MEKUN KA TRU *
1. Nemene la aqane catre mele nyipici hnene la köni Temoë Iehova?
PANE mekune jë la ewekë ka traqa kowe la köni Temoë Iehova. (1) Ame ngöne la hnaini, kola amekötine hnene la ketre porofesör ka hape, tro asë hi la itre nekönatr a sine la ketre feet. Atre hi la neköjajiny laka, tha ka ihmeku kö la feete cili memine la itre trepene meköti Iehova. Nyën a qaja cememine la metrötr kowe la porofesör ka hape, tha tro kö nyën a hane sin. (2) Ketre trejine thöth ka xoue atr, a cainöj ngöne la itre hnalapa trootro. Angeic a traqa kowe la hnalapa ne la ketre thöth, ka hnyima fë la Itretre Anyipici Iehova ngöne la hnaini. Ngo tha hnei angeice kö hna cil, hnei angeice pe hna tro troa fenafena la qëhnelö. (3) Ketre trahmany a huliwa, matre thupëne la hnepe lapa i nyidrë. Ngo ame la ketre ijin, hnene la maseta hna upi nyidrë troa kuca la ketre ewekë ka tha meköti kö, me huliwa atrekënö. Ngacama troa helë nyidrë, ngo hnei nyidrëti pe hna qaja la enyipiewekëne la troa thiina ka meköt, me metrötrëne la itre mus ke, celë hi aja i Akötresie.—Rom. 13:1-4; Heb. 13:18.
2. Nemene la itre hnying hne së hna troa ce wang, nge pine nemen?
2 Nemene la thiina hne së hna öhne thene lo lai köni trejin? Hnei angatr hna catr me nyipici. Ngo hetrenyi fe thei angatr la ketre thiina ka sisitria, ene la troa mele nyipici. Tha ajane kö angatr troa ena la ketre wathebo i Iehova. Angatr a ujë tune lai ke, angatr a ajane troa mele nyipici koi Nyidrë. Madrine catre Iehova la easa melëne la thiina cili. Nge ajan asë hi së troa amadrinëne la Keme së e koho hnengödrai. Haawe, nyipiewekë tro sa ce wang la itre hnying celë: Nemene la aliene la hna hape, troa mele nyipici? Pine nemene matre nyipiewekë troa mele nyipici? Nge nemene la aqane tro sa catre mele nyipici ngöne la itre drai ka akötr celë?
ALIENE LA HNA HAPE, TROA MELE NYIPICI
3. (a) Nemene la aliene la hna hape, troa mele nyipici? (b) Nemene la itre ceitune ka xatua së troa trotrohnine la hnaewekë cili?
3 Kola amamane tune kaa hnene la itre hlue i Akötresie laka, ka mele nyipici angatr? Angatr a hnimi Iehova cememine la hni ka pexej, nge pëkö ketre ewekë ka troa sewe angatr troa nyihlue i Nyidrë. Angatr a amë panëne la aja i Iehova ngöne la mele i angatr. Hanawang la aqane huliwane la hnaewekë “mele nyipici” e hnine la Tusi Hmitrötr. Ame la pane aliene la hnaewekë “mele nyipici,” tre, ka pexej maine ka pë ethan. * Ame ekö, angetre Isaraela a huujëne la itre öni koi Iehova. Thenge la Wathebo, nyipiewekë troa pexej la itre öni hna huujën. (Lev. 22:21, 22) Tha tro kö a huujëne la ketre öni ka pej, maine ka caa hnangenyë maine caa alamek, maine ka wezipo pena. Ka nyipiewekë koi Iehova troa pexej me pë ethan la öni. (Mal. 1:6-9) Easa trotrohnine la kepin, matre aja i Iehova troa pexej me pë ethan la itre huuj. Ame la easa itöne la wene sinöe, me itus, maine ketre zuti pena, easa xome la ka pexej, nge ka pë ethan. Tha aja së kö troa xome la ka kaqa maine sin pena. Ceitune hi lai me Iehova. Nyidrëti a ajane tro sa mele nyipici, me hnimi Nyidrë hnene la hni së ka pexej.
4. (a) Pine nemene matre ijije hi troa mele nyipici la itre atr ka tha pexeje kö? (b) Tune la hna qaja ngöne Salamo 103:12-14, nemene la hnei Iehova hna ajane tro sa kuca?
4 Hapeu, ijije kö tro sa mele nyipici koi Iehova, nge tha ka pexeje kö së? Itre atr ka tha pexeje kö së, nge nyimutre la itre tria së. Tro sa ce wang la lue kepin ka amamane laka, tha nyipiewekë kö troa pexej, matre troa mele nyipici. Ame la hnapan, tre, tha Iehova kö a e la itre tria së. Öni Tusi Hmitrötr: “Ia fe Joxu, maine tro cilieti a ati hatene la ite ngazo, dei la ate troa cil?” (Sal. 130:3) Atre hnyawa hi Iehova laka, itre atr ka tha pexeje kö së, matre aja i Nyidrë troa nue la itre ngazo së. (Sal. 86:5) Ame la hnaaluen, tre, atre hi Iehova laka, hetre ifego së. Tha tro jë kö Nyidrëti a upi së troa kuca la itre hne së hna thatrein. (E jë la Salamo 103:12-14.) Nemene la aqane tro sa pexej me pë ethan xajawa i Iehova?
5. Pine nemene matre nyipiewekë tro la itre hlue i Iehova a hetrenyi la ihnim?
5 Ihnimi la ka upe la itre hlue i Iehova troa mele nyipici. Loi e troa pexej me pë ethan la ihnimi së koi Iehova, matre tro sa atreine mele nyipici koi Nyidrë, Keme së. Tro hë së lai a cile catr ngöne la itre itupath. (1 A. l. ite jo. 28:9; Mat. 22:37) Tro sa ce wang hmaca la hna melën hnene lo köni Temoë Iehova. Pine nemene matre angatr a ujë tune lai? Hapeu, ka tha ajane fe kö la neköjajinyi troa hane madrin ngöne la hnaini? Ame la nekötrahmany, angeice kö a thele troa hnyimasai angeic ngöne la qene qëhnelö? Nge tune kaa lo kem, nyidrëti kö a thele troa upi nyidrë qa ngöne la hna huliwa? Ohea. Atre hi angatr la itre trepene meköti Iehova, nge angatr a ajane troa amadrinë Nyidrë. Tru la ihnimi angatr koi Iehova, matre angatr a pane thele la aja i Nyidrë qëmekene troa axecië mekun. Angatre hi lai a mele nyipici koi Iehova.
NYIPIEWEKË TROA MELE NYIPICI
6. (a) Pine nemene matre nyipiewekë tro sa mele nyipici? (b) Nemene la ka amamane laka, tha hnei Adamu kö me Eva hna mele nyipici?
6 Pine nemene matre nyipiewekë tro sa mele nyipici? Pine laka hnei Satana hna icilekeu me Iehova, me tupathi së. Hna hë angeic ekö e Edena ka hape, Satana maine “Ka Icilekeu.” Hnei Satana hna qaja angazone la ëje i Iehova me sili ithanata ka hape, ka ngazo me ka pi tru Nyidrë, nge tha ka loi kö la aqane musi Nyidrë. Hnei Adamu me Eva hna drei Satana me icilekeu me Iehova. (Gen. 3:1-6) Maine ju, ijiji nyidroti hi ekö e Edena, troa acatrene la ihnimi nyidroti koi Iehova. Ngo ame pe, tha ka pexeje kö la ihnimi nyidro, ngöne lo kola icilekeu hnei Satana. Hapeu, ijije kö troa upe la atr hnene la ihnim, troa mele nyipici koi Iehova? Celë hi lo hnying hna amejën ekö göi Iobu.
7. Tune la hna qaja ngöne Iobu 1:8-11, nemene la aqane isa mekune i Iehova me Satana göne la aqane mele nyipici Iobu?
7 Ka mele Iobu ekö lo ijine angetre Isaraela e Aigupito. Pëkö ketre atr ekö ka mele nyipici tui Iobu. Ketre, tha ka pexeje kö Iobu, nge ka tria fe angeic. Ngo hnene laka, ka mele nyipici angeic, matre tru la ihnimi Iehova koi angeic. Hnei Satana hna jelengazone la aqane mele nyipici ne la atr. Celë hi matre, hnei Iehova hna qaja aloinyi Iobu. Hna jelethoi Satana hnene la aqane mele nyipici Iobu! Ka pexej la mejiune i Iehova koi Iobu, matre Nyidrëti a nue Satana troa tupathi angeic, enehmu i Nyidrë.—E jë la Iobu 1:8-11.
8. Nemene la aqane akötrë Iobu hnei Satana?
8 Ame Satana, tre, ka iakötrë catr angeic nge atre ihumuth. Hnei Satana hna lep apatrene la nöjei ewekë i Iobu asë, me humuthe la itre hlue i angeic. Hnei Satana hna thaipië Iobu, me humuth asë la 10 lao nekö i angeic, me lepi angeic hnene la ketre mec, piagotre ka ngazo, qane la lue hnatrapaca utihë la he. Tru catre fe la akötre ne la föe i Iobu, matre hnei eahlo hna upi Iobu troa nuetriji Akötresie, me jelengazo Nyidrë, me mec. Ngacama hnei Iobu hna ajane troa mec, ngo hnei angeic hna catre mele nyipici koi Iehova. Thupene lai, hnei Satana hna thele la ketre aqane troa tupathi Iobu. Hnei Satana hna upe koi Iobu la köni sinee i angeic koi nyimu drai. Tha hnei angatre kö hna ithuecatre koi Iobu. Hnei angatre pe hna jelengazo Iobu me akötrë angeic. Öni angatr, Akötresieti la qaane la itre akötre cili, nge tha Nyidrëti kö a wangatrune la aqane mele nyipici Iobu. Ame koi angatr, meköt troa traqa koi Iobu la itre jole cili ke, atr ka ngazo angeic!—Iobu 1:13-22; 2:7-11; 15:4, 5; 22:3-6; 25:4-6.
9. Nemene la hna kuca hnei Iobu ngöne la itre ijine akötr?
9 Nemene la hna kuca hnei Iobu, ngöne la kola traqa itrai la itre akötr? Eje hi laka, tha ka pexeje kö Iobu, matre hnei angeic hna elëhni me ithanata menu kowe la itre ka jelengazo angeic. Hnei Iobu hna sipu jelemeköti angeic, hui Akötresie. (Iobu 6:3; 13:4, 5; 32:2; 34:5) Ngacama tru la akötre i Iobu, ngo tha hnei angeice pi kö hna nuetriji Iehova Akötresie, me drenge la itre trengathoi ne la itre sinee i angeic. Öni angeic: ‘Loine eni a tha tro kö ni a jelemeköti nyipunie; tha tro kö ni a kei kowe la ngazo, uti hë meci hë ni!’ (Iobu 27:5) Kolo hi lai a amamane la aja i Iobu troa mele nyipici koi Iehova. Hnei Iobu hna cile catr, nge ijiji së fe hi troa hane kuca tun.
10. Pine nemene matre ka nyipiewekë fe koi së la hna qaja hnei Satana göi Iobu?
10 Pine nemene matre ka nyipiewekë fe koi së la hna qaja hnei Satana göi Iobu? Öni Satana, canga tro hi sa nuetriji Iehova ngöne la itupath ke, tëtë hi la ihnimi së koi Nyidrë. Öni angeic, thatreine jë kö së troa mele nyipici koi Iehova! (Iobu 2:4, 5; Hna ama. 12:10) Ka akötre lai koi së! Ngo nyipiewekë tro pe sa mekun ka hape, Iehova a mejiune koi së. Nyipici laka, Nyidrëti a nue Satana troa tupathi së, ngo ame pe, atre hi Iehova laka, tro kö sa mele nyipici koi Nyidrë me jelethoi Satana. Nge tro kö Nyidrëti a xatua së. (Heb. 13:6) Hapeu, tha ketre manathith ka tru kö lai laka, kola mejiune koi së hnene la Akötresieti Kapucatinasë? Trotrohnine kö së la enyipiewekëne troa catre mele nyipici koi Iehova? Celë hi ka troa xatua së troa cilëgöli Iehova memine la musi Nyidrë, me jelethoi Satana. Nemene la aqane tro sa catre mele nyipici koi Iehova?
AQANE TRO SA CATRE MELE NYIPICI ENEHILA
11. Nemene la ini hne së hna xom qa ngöne la tulu i Iobu?
11 Catrehnine catre hë la aqane tupathe la itre hlue i Iehova hnei Satana “ngöne la ite drai hnapin.” (2 Tim. 3:1) Nemene la ka troa xatua së troa mele nyipici koi Iehova? Nyimutre la itre ini hne së hna xome qa ngöne la tulu i Iobu. Ka mele nyipici hë Iobu, ngöne la kola traqa lo itre itupath. Hanawang la köni ini hne së hna troa xome qa ngöne la tulu i Iobu, nge ka troa xatua së troa catre mele nyipici.
Nemene la itre nyine tro sa kuca, matre tro sa catre mele nyipici koi Iehova? (Wange ju la paragarafe 12) *
12. (a) Tune la hna qaja ngöne Iobu 26:7, 8, 14, nemene la ka acatrene la xou me metrötre i Iobu koi Iehova? (b) Nemene la aqane tro sa akökötren e kuhu hni së la xou e Akötresie?
12 Hnei Iobu hna catre hnimi Iehova me xoue Nyidrë. Hnei Iobu palahi hna goeëne la emingömingöne la itre ewekë hna xupe hnei Iehova. (E jë la Iobu 26:7, 8, 14.) Angeic a haine la aqane xupe la ihnadro me hnengödrai me itre iaw me hedreng. Atre hi Iobu laka, tru palakö la itre ewekë hnei angeic hna thatre. Ketre, ka mel e kuhu hni Iobu la itre trengewekë i Iehova. Öni angeic: “Hnenge hna nyipine la wesi ula ne la ineula i nyidë.” (Iobu 23:12) Atraqatre la xou me metrötre i Iobu koi Iehova. Tru la ihnimi angeic koi Iehova, matre aja i angeic troa amadrinë Nyidrë. Pëkö ketre ewekë maine atr ka atreine troa sewe Iobu troa mele nyipici koi Iehova. Nyipiewekë tro sa hane tui Iobu. Ame enehila, nyimutre la itre ewekë hna xup, hne së hna atre hune lo hneijine i Iobu. Nge kolo fe a xatua së hnene la Tusi Hmitrötr troa atrepengöi Iehova hnyawa. Itre ewekë lai ka akökötren e kuhu hni së la xou e Akötresie. Nge tro la xou me metrötr a acatrene la ihnimi së me aja së troa catre mele nyipici koi Iehova.—Iobu 28:28.
Easa acatrene la aja së troa mele nyipici, ngöne la easa sisine la itre iatr ka sis. Easë fe a thupëne la aqane goeëne së la itre mo, me acatrene la mejiune së göi elany (Wange ju la paragarafe 13) *
13-14. (a) Tune la hna qaja ngöne Iobu 31:1, nemene la aqane drengethenge Iehova hnei Iobu? (b) Nemene la aqane tro sa nyitipu Iobu?
13 Hnei Iobu hna drengethenge Iehova, matre angeic a mele nyipici koi Nyidrë. Atre hi Iobu laka, nyipiewekë la troa drengethenge Iehova, matre troa mele nyipici koi Nyidrë. Ame la easa drengethenge Iehova ke, easë hi lai a acatrene la aja së troa mele nyipici. Kola mama lai ngöne la aqane metrötrëne Iobu la itre föe. (E jë la Iobu 31:1.) Ketre, ka faipoipo angeic, nge atre hnyawa hi angeic laka, tha tro kö a meciune la ketre föe. Ame enehila, kola huli së hnene la fene troa kuca la itre huliwa ka sis. Hapeu, atreine kö së nyitipu Iobu laka, tha tro kö a meciune la ketre föe maine ketre trahmany pena? Tro kö sa thipetrij la itre film me itre iatr ka sis? (Mat. 5:28) Maine tro sa catre cil kowe la nöjei aja cili, haawe, tro hë lai a acatrene la aja së troa mele nyipici koi Iehova.
Easa acatrene la aja së troa mele nyipici, ngöne la easa sisine la itre iatr ka sis. Easë fe a thupëne la aqane goeëne së la itre mo, me acatrene la mejiune së göi elany (Wange ju la paragarafe 14) *
14 Hnei Iobu mina fe hna drengethenge Iehova, göne la aqane troa goeëne la itre mo. Atre hnyawa hi Iobu laka, e tro angeic a hni kowe la itre mo ke, troa hetre pune ka ngazo koi angeic. (Iobu 31:24, 25, 28) Pine laka kola elë la aja mo enehila, haawe, nyipiewekë tro sa drengethenge la itre hnei Iehova hna amekötin. Celë hi ka troa xatua së troa catre mele nyipici.—Ite edomë 30:8, 9; Mat. 6:19-21.
Easa acatrene la aja së troa mele nyipici, ngöne la easa sisine la itre iatr ka sis. Easë fe a thupëne la aqane goeëne së la itre mo, me acatrene la mejiune së göi elany (Wange ju la paragarafe 15) *
15. (a) Nemene la ka xatua Iobu troa catre mele nyipici koi Iehova? (b) Nemene la thangan e tro sa mejiune laka, ka tru koi Iehova la aqane mele nyipici së?
15 Hnei Iobu hna catre mele nyipici ke, ka mejiun angeic kowe la itre manathithi qaathei Iehova. Atre hnyawa hi Iobu laka, öhne hi Iehova la aqane mele nyipici angeic. (Iobu 31:6) Ngacama nyimutre la itre jol, ngo ka catr la mejiune i Iobu laka, tro kö Iehova a amanathithi angeic. Celë hi ka xatua angeic troa catre mele nyipici. Atraqatre la madrine i Iehova, matre Nyidrëti a amanathithi Iobu, nge the qaja palaha la itre manathithi hna troa kapa elany! (Iobu 42:12-17; Iako. 5:11) Hapeu, easë kö a mejiune tui Iobu laka, tro Iehova a amanathithine la aqane mele nyipici së? Tha ka saze kö Iehova. (Mal. 3:6) Maine tro sa mejiune laka, ka tru koi Iehova la aqane mele nyipici së, haawe, troa xecie hnyawa koi së la mele së elany ka mingöming.—1 Thes. 5:8, 9.
16. Nemene la nyine tro sa catre kuca?
16 Haawe, catre jë së mele nyipici koi Iehova! Ame itre xaa ijin, easa mekune ka hape, easë caasi hi la ka mele nyipici koi Iehova. Ngo hetrenyi fe la itre hlue i Akötresie e cailo fen ka catre mele nyipici, itre milio la etrun. Ketre tune fe ekö, hetrenyi la itre hlue i Iehova ka mele nyipici, ngacama hna thele troa humuthi angatr. (Heb. 11:36-38; 12:1) Catre jë së isa ala caas troa mele nyipici koi Iehova tui Iobu, me hape: ‘Tha tro kö ni a kei kowe la ngazo!’ Epi troa atrunyi Iehova hnene la aqane mele nyipici së, epin epine palua!
NYIMA 124 Mele Nyipici Jë Së
^ par. 5 Nemene la aliene la hna hape, troa mele nyipici? Pine nemene matre Iehova a wangatrune la thiina celë thene la itre hlue i Nyidrë? Pine nemene matre nyipiewekë tro sa mele nyipici, easë isa ala caas? Jëne la Tusi Hmitrötr, tro la tane mekun celë a xatua së troa sa la itre hnying, me thue trengecatre së matre tro palahi sa mele nyipici. Nyimutre la itre manathithi hne së hna troa kapa.
^ par. 3 Ame la hnaewekë qene Heleni “pë ethan” hna qaja kowe la itre öni, tre, kolo fe a qaja la aqane “mele nyipici” ne la itre atr.
^ par. 50 GÖTRANE: Iobu a amamane kowe la itre nekö i angeic, la nöjei ewekë ka mingöming hnei Iehova hna xup.
^ par. 52 GÖTRANE: Ketre trejin a kötrene la itre sine huliwa i angeic ka goeëne la itre iatr ka sis
^ par. 54 GÖTRANE: angeice fe a xomehnöthe la aja i angeic troa itöne la ketre televizio ka tru nge ka tru thupen
^ par. 56 GÖTRANE: nge angeic a xomi ijin, troa thithi me lapa mekune la itre manathithi hna troa kapa elany ngöne la Paradraiso.
