TANE MEKUN 7
Aqane Troa Musi e Hnine La Ekalesia
“Keriso he ne la ekalesia, nge nyidrëti la atre amelene la ngönetrei cili.”—EFE. 5:23.
NYIMA 137 Itre Föe Ka Mele Nyipici, Itre Keresiano Föe
MEKUN KA TRU *
1. Pine nemene matre kola tingetinge me caas e hnine la lapa ka cahae i Iehova?
EASA madrine troa sine la lapa ka cahae i Iehova. Pine nemene matre kola tingeting me caas e hnine la lapa ka cahae i Nyidrë? Pine laka, easë isa ala caasi a thele troa drengethenge la itre hna amekötin hnei Iehova, göne la ka troa mus. Eje hi, maine tro sa trotrohnine hnyawa lai, tro hë sa caas.
2. Nemene la itre hnying nyine troa sa ngöne la tane mekun celë?
2 Tro sa ce ithanatane ngöne la tane mekun celë la aqane troa mus e hnine la ekalesia. Ngo tro sa pane ce wang la itre hnying celë: Nemene la hnëqa ne la itre trejine föe? Hapeu, tro kö la itre trejin trahmanyi a musinëne la itre trejine föe? Hapeu, ceitu kö la aqane tro la itre qatre thup a musi e hnine la ekalesia me ngöne la hnalapa? Tro sa pane ce wang la aqane tro sa goeëne la itre trejine föe.
AQANE TRO SA GOEËNE LA ITRE TREJINE FÖE
3. Tro sa amamane tune kaa la hni ne ole së kowe la itre trejine föe?
3 Easa wangatrune la itre trejine föe ke, angatr a nue trengecatr matre troa thupëne la fami angatr, me cainöjëne la maca ka loi, me xatuane la itre atrene la ekalesia. Ijije hi tro sa amamane la hni ne ole së kowe la itre trejine föe, ngöne la easa nyitipune la aqane waiewekë i Iehova me Iesu. Tro fe sa ce wang la aqane wangatrunyi angatr hnei Paulo aposetolo.
4. Nemene la aqane amamane hnei Tusi Hmitrötr laka, Iehova a wangatrune la itre föe tune la itre trahmany?
4 Tusi Hmitrötr a amamane laka, Iehova a wangatrune la itre föe tune la itre trahmany. Ame ngöne lo hneijine la itre pane Keresiano, hnei Iehova hna nunuëne la uati hmitrötre i Nyidrëti kowe la itre trahmany me kowe fe la itre föe. Hnei Nyidrëti hna aijijëne la itre föe troa kuca la itre ewekë ka tru, tune la troa qaja la itre xaa qene hlapa. (Itre hu. 2:1-4, 15-18) Jëne la uati hmitrötr, hnei Nyidrëti hna iëne la itre trahmanyi me föe matre troa ce musi me Keriso e hnengödrai. (Gal. 3:26-29) Nge itre trahmanyi me itre föe la ka mejiune troa mele palua e celë fen. (Hna ama. 7:9, 10, 13-15) Ketre, hnëqa ne la itre trahmanyi me itre föe troa cainöjëne la maca ka loi me inine la itre atr. (Mat. 28:19, 20) Kola qaja ngöne la tusi Itre Huliwa ka hape, hnei Perisila, ketre trejine föe me Akula, föi angeic, hna xatua Apolo, ketre atr inamacan, troa trotrohnine la nyipici.
5. Thenge la Luka 10:38, 39, 42, nemene la aqane goeëne Iesu la itre föe?
5 Iesu a wangatrun me metrötrëne la itre föe. Hnene la itre Faresaio hna methinëne la itre föe. Tha hnei angatre kö hna hane porotrik memine la itre föe qëmekei itre xan, me ithanatane la Itre Hna Cinyihan. Ngo ame Iesu, hnei nyidrëti hna hëne la itre föe troa ce ithanatane la itre hna qaja e hnine la Tusi Hmitrötr memine itretre drei nyidrë. * (E jë la Luka 10:38, 39, 42.) Hnei Iesu fe hna aijijëne la itre föe troa ce cainöj me nyidrë. (Luka 8:1-3) Nge hnei nyidrëti hna upe la itre föe troa thuemacanyine la itre aposetolo ka hape, hna amele nyidrëti hmaca.—Ioane 20:16-18.
6. Tune kaa la aqane amamane Paulo laka, nyidrëti a metrötrëne la itre föe?
6 Hnei Paulo aposetolo hna amexeje koi Timoteo la enyipiewekëne troa metrötrëne la itre föe. Hnei nyidrëti hna upi angeic troa wangatrune la “itre föe hmae kösë itre thin, me itre jajiny, kösë itre xa.” (1 Tim. 5:1, 2) Nyipici laka, hnei Paulo hna xatua Timoteo troa ketre Keresiano ka macaj. Ngo atre hi nyidrëti laka, thine i Timoteo me qaaqa i angeic la ka xatua angeic troa atre la itre hna cinyihane ka hmitrötr. (2 Tim. 1:5; 3:14, 15) Ame ngöne la tusi Paulo koi angetre Roma, hnei nyidrëti hna qaja la ëje ne la itre xaa trejine föe, me ibozu me angatr, me amamane la hni ne ole i nyidrë kowe la hnei angatre hna kuca.—Rom. 16:1-4, 6, 12; Fil. 4:3.
7. Nemene la lue hnying hne së hna troa sa?
7 Eje hi, tha hna qaja kö hnei Tusi Hmitrötr ka hape, sisitria kö la itre trejine trahmany hune la itre trejine föe. Ka nyipiewekë la itre trejine föe e hnine la ekalesia ke, ka tru ihnimi angatr me catre ham. Itre qatre thup a mejiune koi angatr laka, tro angatr a thele tingeting me caasi e hnine la ekalesia. Ngo nyipiewekë la lue hnying celë: Pine nemene matre Iehova a upe la itre trejine föe troa atu he e itre xaa ijin? Pine laka, itre trahmanyi hmekuje hi la ka ijij troa qatre thup me atre ixatua, hapeu, kolo lai a hape, angatre la ka musinën la itre trejine föe asë?
ITRE TREJIN TRAHMANYI KÖ A MUSINËNE LA ITRE TREJINE FÖE?
8. Thenge la Efeso 5:23, tro kö la itre trejin trahmanyi a musinëne la itre trejine föe? Qejepengöne jë.
8 Hapeu, tro kö la itre trejin trahmanyi a musinëne la itre trejine föe? Waea ke, Keriso la he ne la ekalesia. (E jë la Efeso 5:23.) Ame ngöne la fami, trahmanyi la he i föe. Ngo maine ka bapataiso la nekötrahmany, tha angeice kö la ka troa musinëne la thine i angeic. (Efe. 6:1, 2) Ketre, ame e hnine la ekalesia, hetre ifegone la musi ne la itre qatre thup kowe la itre trejin. (1 Thes. 5:12; Heb. 13:17) Ngo tune kaa la trejine föe ka tha faipoipo kö nge ka tha lapa hmaca kö e kuhu hnalapa? Tha angeice hmaca kö fene la musi kem. Ngo loi e tro palahi angeic a metrötrëne la kem me thine i angeic me itre qatre thupe fe. Ngo tune la itre xaa trejin e hnine la ekalesia, Iesu Keriso hmekuje hi la he i angeic.
Itre trejin ka tha fapoipo kö nge ka tha lapa hmaca kö e kuhu hnalapa ke, angatr a lapa fene la musi Iesu (Wange ju la paragarafe 8)
9. Pine nemene matre kola atu he hnei itre trejine föe?
9 Hnei Iehova hna ahnithe kowe la itre trejin trahmanyi troa eköthe la huliwa ne cainöj me inine la ekalesia. Ngo tha hna hamëne kö la hnëqa cili kowe la itre trejine föe. (1 Tim. 2:12) Pine nemen? Pine laka, tha aja i Nyidrëti kö troa gomegome la fami. Ngo maine tro la ketre trejine föe a xome la hnëqa thatraqane la itre trejin trahmany, loi e tro angeic a atuthe la he i angeic. * (1 Kor. 11:4-7) Tha kolo kö lai a thaipië angeic, ngo Iehova a ajane tro angeic a metrötrëne la itre wathebo hna acile göne la itre hnëqa. Tro sa ce wang la hnying celë: Nemene la itre ifego ne la musi ne la itre he ne fami me itre qatre thup?
HNËQA NE LA ITRE HE NE FAMI ME ITRE QATRE THUP
10. Pine nemene matre ketre qatre thup a acili wathebo thatraqane la ekalesia?
10 Ame la itre qatre thup, tre, angatr a hnimi Keriso. Nge tru catre fe la ihnimi angatr kowe la itre “mamoe” hna ahnithe hnei Iehova me Iesu. (Ioane 21:15-17) Maine jë, tro la ketre qatre thup a mekun laka, angeic la keme ne la itre atrene la ekalesia. Nge pine laka, itre he ne fami a acili wathebo matre thupëne la fami angatr, haawe, ijiji angeice fe troa acili wathebo, matre thupëne la itre mamoe i Akötresie. Nge maine jë, itre xaa trejin a sipo angeic troa axecië mekun thatraqai angatr. Ngo hapeu, ceitune kö la hnëqa ne la itre qatre thup me hnëqa ne la itre he ne fami?
Itre qatre thup a hnime me xatuane la ekalesia troa acatrene la lapaune i angatr. Nge hnëqa i angatre fe qaathei Iehova troa thupëne matre tro palahi a wië la ekalesia (Wange ju la paragarafe 11-12)
11. Nemene la itre ewekë ka ceitu ngöne la hnëqa ne la itre qatre thup me hnëqa ne la itre he ne fami?
11 Hnei Paulo hna qaja ka hape, hetre ewekë ka ceitu ngöne la hnëqa ne la itre qatre thup me hnëqa ne la itre he ne fami. (1 Tim. 3:4, 5) Iehova a ajane tro la itre atrene la fami a drengethenge la he ne la fami. (Kol. 3:20) Ketre tune fe, Nyidrëti a ajane tro la itre atrene la ekalesia a drengethenge la itre qatre thup. Ketre, aja i Nyidrë tro la itre he ne fami me itre qatre thup a acatrene la lapaunene la itre hnei angatr hna musi kow, me hnimi nyudren, me xatua nyudren ngöne la kola traqa la itre jol. (Iako. 2:15-17) Iehova fe a ajane tro la itre qatre thup me itre he ne fami a inine me sajuëne la itre trepene meköti Nyidrë, nge tro hmekuje hi a ‘kuca la hna cinyihan’ e hnine la Tusi Hmitrötr.—1 Kor. 4:6.
Itre he ne fami a eatrongëne me axecië mekun thatraqane la fami. Ngo qëmekene troa axecië mekun, loi e tro angatr a pane ce ithanatane memine la itre föe i angatr (Wange ju la paragarafe 13)
12-13. Thenge la Roma 7:2, nemene la ka isapengöne ngöne la hnëqa ne la itre he ne fami me hnëqa ne la itre qatre thup?
12 Hetrenyi fe la itre ewekë ka isapengöne ngöne la hnëqa ne la itre qatre thup me hnëqa ne la itre he ne fami. Hnei Iehova hna acile la itre qatre thup matre troa amekötin me upetröneëla itre ka tha ietra kö.—1 Kor. 5:11-13.
13 Ame ngöne la ketre götran, hnei Iehova hna ahnith kowe la itre he ne fami la ketre hnëqa ka tha eje kö thene la itre qatre thup. Hnei Iehova hna nue la itre kem troa acili wathebo me xatuane la fami angatr troa trongëne itre ej. (E jë la Roma 7:2.) Celë hi matre, ijije hi tro la kem a axeciëne la hawa ne tro la itre nekönatr a bëek e hej koi hnalapa. Nge ijije hi tro nyidrëti a ameköti nyudren ngöne la nyudreni a tha idrei. (Efe. 6:1) Ngo loi e tro angeic a pane ce ithanatane la itre wathebo cili memine la föe i angeic ke, “ca ngönetrei hë nyidro.” *—Mat. 19:6.
TROA METRÖTRËNE LA MUSI KERISO E HNINE LA EKALESIA
Iesu fene la musi Iehova, nge nyidrëti a hamë hna amekötin kowe la ekalesia (Wange ju la paragarafe 14)
14. (a) Thenge la Mareko 10:45, pine nemene matre hna ië Iesu hnei Iehova troa he ne la ekalesia? (b) Nemene la hnëqa ne la Lapa Ne Xomi Meköt? (Wange ju la hna eköhagen hna hape, “ Hnëqa Ne La Lapa Ne Xomi Meköt.”)
14 Jëne la thupene mel, hnei Iehova hna itöne la mele ne la nöjei trejin e hnine la ekalesia me itre xan ka mejiune koi Iesu. (E jë la Mareko 10:45; Itre hu. 20:28; 1 Kor. 15:21, 22) Celë hi lai kepin matre hnei Iehova hna ië Iesu troa he ne la ekalesia. Pine laka, Iesu la tane së, ijije hi tro nyidrëti a acili wathebo kowe la itre hlue i Akötresie, me itre fami, me kowe la ekalesia. Nge ijije fe tro nyidrëti a upi angatr troa drengethenge. (Gal. 6:2) Ngo tha Iesu hmekuje kö a acile la itre wathebo, nyidrëti fe a hamë göxeni koi së me thupë së.—Efe. 5:29.
15-16. Nemene la ini hne së hna xom qa ngöne la hna qaja hnei Marley me Benjamin?
15 Itre trejine föe a metrötrë Keriso ngöne la angatr a drengethenge la itre trahmanyi hna acil. Öni Marley qa Etazini: “Sisitria catre koi ni la hnëqa ne la föe memine la göhneng e hnine la ekalesia. Eni palahi a thele troa metrötrëne la itre ka cilë hnëqa. Ngo ka hmaloi hi ke, kola metrötrë ni hnene la föeng memine la itre trejin trahmanyi e hnine la ekalesia, nge angatr a olene la itre hnenge hna kuca.”
16 Ame la itre trejin trahmanyi ka trotrohnine la mekuna i Iehova göne la troa mus, tre, angatr a metrötrën me wangatrune la itre trejine föe. Öni Benjamin, ketre trejin qa Agele: “Nyimutre la itre ini hnenge hna xom qa ngöne la itre mekun hna hamën hnene la itre trejine föe ngöne la hna icasikeu. Hnei angatre fe hna xatua ni troa maca ngöne la aqane troa ini tus me cainöj trootro. Nyipici, ka nyipiewekë catre la huliwa i angatr.”
17. Pine nemene matre loi e tro sa metrötrëne la itre musi me itre hnëqa hna ahnithe hnei Akötresie?
17 Eje hi, maine tro la itre trahmanyi me itre föe, me itre he ne fami me itre qatre thup, a trotrohnine me isa metrötrëne la itre musi me itre hnëqa hna ahnithe hnei Akötresie, tro ha tingeting me caasi la ekalesia. Nge ame la ka sisitria ke, tro hë së lai a atrunyi Iehova, Keme së ka tru ihnimin.—Sal. 150:6.
NYIMA 123 Loi e Nyipici Me Trongën La Itre Hna Amekötine Qaathei Akötresie
^ Nemene la hnëqa ne la itre trejine föe e hnine la ekalesia? Hapeu, itre trejin trahmanyi la ka troa musi hune la itre trejine föe e hnine la ekalesia? Ka ceitu kö la aqane musi ne la itre qatre thup memine la itre he ne fami? Tro la tane mekun a sa la itre hnying celë, jëne la Tusi Hmitrötr.
^ Wange ju la paragarafe 6 ne la tane mekun hna hape, “Loi e Tro Sa Wangatrune La Itre Trejine Föe” ngöne la Ita Ne Thup ne Semitrepa 2020.
^ Wange ju fe la hna eköhagen hna hape, “ Eu La Ijine Tro La Itre Föe a Atu He?”
^ Maine jë, ketre fami a mekun troa saze ekalesia. Maine epuni a ajane troa atre la ka troa axecië mekun thatraqane lai, e jë la itre paragarafe 17-19 ne la tane mekun hna hape, “Troa Metrötrëne La Nöjei Atr e Hnine La Ekalesia,” ngöne la Ita Ne Thup ne Ogas 2020.
^ Maine epuni a aja itre xaa ithuemacany, wange ju la itus, “Thupë Nyipunieti Ju Kö Ngöne La Ihnimi Akötresie,” g. 209-212.
^ Maine epuni a aja itre xaa ithuemacany göne la hnëqa ne la Lapa Ne Xomi Meköt, tro jë kowe la Ita Ne Thup ne 15 Julai 2013, g. 20-25.
