1-2. (a) Pine nemene matre jole kowe la itre atr enehila troa mejiune kowe la itre ka trene mus? (b) Nemene la hne së hna troa ce wang?

 AME enehila, jole kowe la itre atr troa mejiune kowe la itre ka trene mus. Angatr a öhne la itre ka huliwa ngöne hnaakotr ka tru me itre ka kuci politik, kola wangatrune la itre ka trenamo me itre ka cilë hnëqa ka tru ngöne la nöj, me wangacone la itre ka pë ewekë. Öni Tusi Hmitrötr: “Kete ate a musinëne la kete mate angazo nyëne kö.” (Ate cai. 8:9) Ame fe la itre hene ne hmi ke, angatr a kuca la itre ewekë ka ngazo, matre tha mejiune hë itre xan koi Akötresie. Celë hi matre, ame la easa inine la Tusi Hmitrötr memine la ketre atr, loi e tro sa xatua angeic troa mejiune koi Iehova me kowe la itre hnei Nyidrëti hna acil.

² Ngo tha itre ka ini Tusi hmekuje kö la ka troa mejiune koi Iehova me kowe la organizasio i Nyidrë. Ngacama ekö hë së ngöne la nyipici, ngo loi e tro fe sa mejiune kowe la itre jë i Iehova. Ngo ame itre xaa ijin, ijije hi troa tupathe la lapaune së. Eje hi, troa tupathe la lapaune së ngöne la (1) easa e la itre hna melën e hnine la Tusi Hmitrötr, (2) easa kapa la itre ithuemacany qaathene la organizasio i Iehova, me ngöne la (3) easa cile kowe la itre jol ka tru elany.

3. Pine nemene matre nyipiewekë troa mejiune koi Iehova ngöne la easa e Tusi Hmitrötr?

 ³ Ame la easa e Tusi Hmitrötr, ijije hi tro sa hnying göne la aqane ujë i Iehova me aqane axecië mekune i Nyidrë.  Hanawang la ketre ceitun. Kola qaja ngöne la tusi Numera ka hape, hnei Iehova hna amekötin troa humuth la ketre atre Isaraela ka nyi sinöe e Sabath. Ngo ame pena ngöne la hnaaluene tusi Samuela, hnei Iehova hna nue la ngazo i Dravita joxu, lo nyidrëti a nyixetë me humuthe la ketre atr. (Num. 15:32, 35; 2 Sam. 12:9, 13) Maine jë, tro sa hnying ka hape, ‘Hnauëne la Iehova a amekötin troa humuthe la atre Isaraela, me nue pe la ngazo i Dravita joxu, ngacama tru catre kö la ngazo i nyidrë?’ Qëmekene troa sa la hnying, tro sa pane ce wang la köni ewekë nyine tro sa lapa mekun ngöne la easa e Tusi Hmitrötr.

4. Thenge la Genese 18:20, 21 me Deuteronomi 10:17, tune kaa la aqane tro sa acatrene la mejiune së kowe la itre hna amekötin hnei Iehova?

⁴ Tha Tusi Hmitrötre kö a qaja asë la itre ithuemacany. Atre hi së laka, hnei Dravita hna ietrane la itre ngazo i nyidrë. (Sal. 51:2-4) Ngo tune kaa lo atr ka ena la wathebo göi Sabath? Hnei angeice kö hna ietra? Hnei angeice hë ekö hna ena la ketre wathebo i Iehova? Hnei angeice kö hna kapa maine thipetrije pena la itre eamo hna hamën? Tha hna qaja kö hnei Tusi Hmitrötr. Ame pe, xecie koi së laka, ‘Akötesie ka nyipici Iehova, nge pë engazon.’ (Deu. 32:4) Eje hi, tha ceitui Iehova kö me easë. Nyidrëti a axecië mekun thenge la itre ewekë ka traqa me itre hna öhn. Ngo tha thenge kö la itre trengathoi hna sil maine hna drei gojenyine pena. (E jë la Genese 18:20, 21; Deuteronomi 10:17.) Celë hi matre, loi e tro sa atrepengöi Iehova hnyawa me itre trepene meköti Nyidrë. Tro hë lai a acatrene la mejiune së kowe la aqane ameköti ewekë i Nyidrë. Ngacama tha Tusi Hmitrötre kö a hamën asë la itre ithuemacanyi göne la itre xaa hna melën, ngo xecie koi së laka, ka “meköti Iehova ngöne la ite jë i nyidë asë.”—Sal. 145:17.

5. Nemene la ka troa ajolëne la aqane ameköti ewekë së? (Wange ju la hna eköhagen, hna hape “ Itre Atr Ka Ngazo Së Matre Tha Meköti Kö La Aqane Waiewekë Së.”)

⁵ Itre atr ka tha pexeje kö së matre ijije hi troa ajolëne la aqane ameköti ewekë së.  Hnei Iehova hna xupi së hnaiji Nyidrë, matre tha madrine kö së la kola kuca la ketre ewekë ka tha meköti kö kowe la ketre atr. (Gen. 1:26) Ngazo pe, itre atr ka tha pexeje kö së, matre ijije hi troa ajolëne la aqane axecië mekune së. Pane mekune jë lo ka traqa koi Iona. Hnei angeic hna elëhni ke, tha trotrohnine kö angeic la aqane axecië mekune i Iehova. Eje hi, hnei Nyidrëti hna utipine la angetre Nineve. (Iona 3:10–4:1) Nemene la ka traqa e thupen? Hna sasaithe la 120 000 lao angetre Nineve ka ietra nge hna amelen. Nyipici, tha ka loi kö la aqane waiewekë i Iona, matre hnei Iehova hna ameköti angeic.

6. Pine nemene matre tha nyipiewekë kö tro Iehova a qejepengöne la aqane ameköti ewekë i Nyidrë?

⁶ Tha nyipiewekë kö tro Iehova a qejepengöne koi së la aqane ameköti ewekë i Nyidrë. Hnei Iehova ekö hna aijijëne la itre hlue i Nyidrë troa qaja la itre aliene hni angatr göne la itre mekuna i Nyidrë, me itre hnei Nyidrëti hna troa kuca. (Gen. 18:25; Iona 4:2, 3) Nge ame itre xaa ijin, hnei Nyidrëti hna qejepengöne la itre aqane axecië mekune i Nyidrë. (Iona 4:10, 11) Maine ju, tha nyipiewekë kö tro Iehova a kuca lai ke, Nyidrëti la Atre Xup. Eje hi, tha nyipiewekë kö tro sa qaja la itre mekuna së, göne la aqane axecië mekune i Iehova.—Is. 40:13, 14; 55:9.

7. Nemene la ketre jole hne së hna cile kow, nge pine nemen?

⁷ Atre hi së laka, ka meköti palahi la itre jë i Iehova. Ngo jole koi së troa mejiune kowe la itre ka elemeken la organizasio i Nyidrë. Tune lo hna qaja ngöne la  paragarafe 3, hna traqa la jole cili kowe la itre xaa hlue i Iehova ekö. Maine jë, hnene la itre sinee ne la trahmanyi ka nyi sinöe e Sabath hna hnying ka hape, ‘Hnei Mose kö hna hnyingëne la mekuna i Iehova, qëmekene troa ameköti angeic me humuthi angeic?’ Nge maine jë, hnene la ketre sinee i Uria, föi Batheseba, hna mekun laka, tha hna ameköti Dravita hnyawa kö ke, ketre joxu Dravita. Eje hi, thatreine kö tro sa mejiun koi Iehova nge tha mejiune pe së kowe la itre hnei Nyidrëti hna acil me mejiune kow.

8. Nemene la hna qaja ngöne Itre Huliwa 16:4, 5 ka ceitu memine la aqane trongene enehila la organizasio i Iehova?

⁸ Ame enehila, Iehova a xomiujine la organizasio i Nyidrë e celë fen jëne “la hlue ka nyipici me ka inamacan.” (Mat. 24:45) Tune ekö, Iehova a upe la hlue cili troa xomiujine la nöje i Nyidrë e cailo fen me hamëne la itre hna amekötin kowe la itre qatre thup. (E jë la Itre Huliwa 16:4, 5.) Nge angatre pë hë a trongëne la itre hna amekötin cili e hnine la itre ekalesia. Celë hi matre, maine tro sa mejiune kowe la itre hna amekötin hnene la organizasio Iehova me itre qatre thup, tro hë sa amamane laka, easa mejiune koi Iehova.

9. Eu la ijine kola jole koi së troa sajuëne la itre hna amekötin hnene la itre qatre thup, nge pine nemen?

⁹ Ame itre xaa ijin, jole koi së troa sajuëne la itre hna amekötin hnene la itre qatre thup. Eje hi, ame ngöne la itre macatre ka ase hë, hna saze la aqane eköth la itre ekalesia. Hnene la itre qatre thup hna sipone kowe la itre xaa trejin troa saze ekalesia, matre huliwane hnyawa la  itre Uma Ne Baselaia. Maine jë, celë hi lai ka traqa koi së, nge jole koi së troa nue la itre sinee së. Ngo hapeu, Iehova kö a qaja kowe la itre qatre thup la ekalesia hnë tro kow hnene la itre trejin? Waea. Celë hi matre, tha ka hmaloi kö koi së troa canga kapa me sajuëne la itre hna amekötin. Ame pe, Iehova a mejiune kowe la itre qatre thup, matre loi e tro fe sa mejiun kowe la aqane axecië mekune i angatr. *

10. Thenge la hna qaja ngöne Heberu 13:17, pine nemene matre nyipiewekë tro sa drengethenge la itre qatre thup?

¹⁰ Nyipiewekë tro sa drengethenge me sajuëne la aqane axecië mekun ne la itre qatre thup, ngacama tha celë kö la hne së hna ajan. Pine nemen? Pine laka, tro hë së lai a acatrene la caas ngöne la nöje i Iehova. (Efe. 4:2, 3) Eje hi, ketre manathith ka tru e tro sa sajuën la itre mekun hna xom hnene la lapa ne la itre qatre thup. (E jë la Heberu 13:17.) Nge ame la ka sisitria catr ke, easa amamane la mejiune së koi Iehova ngöne la easa drengethenge la itre hnei Nyidrëti hna acile matre thupë së.—Itre hu. 20:28.

11. Nemene la ka troa xatua së matre mejiune kowe la itre hna amekötin hnene la itre qatre thup?

¹¹ Ijije hi tro sa mejiun kowe la itre hna amekötin hnene la itre qatre thup. Angatr a thith me sipone la uati hmitrötre i Iehova, matre xatua angatr troa axecië mekun thatraqane la ekalesia. Angatre fe a trongëne la itre trepene meköt me itre hna amekötin hnene la organizasio. Angatr a ajane troa amadrinë Iehova me thupëne hnyawa la nöje i Nyidrë. Atre hi la itre qatre thup laka, aja i Iehova tro angatr a eatrëne hnyawa la itre hnëqa i angatr. (1 Pet. 5:2, 3) Ame enehila, kola aisane la itre atr hnene la han ne ngönetrei, me hmi, me politik. Ngo ame la nöje i Iehova, angatr a caas me ce atrunyi Nyidrë. Drei la ketre manathithi ka tru qaathei Iehova kowe la organizasio i Nyidrë!

12. Nemene la nyine troa kuca hnene la itre qatre thup matre öhne laka, ka ietra hnyawa la ketre atr?

¹² Hnei Iehova hna ahnithe kowe la itre qatre thup troa thupëne hnyawa la ekalesia. Maine ketre Keresiano a kuca la ngazo, itre qatre thup a waipengöi angeic ka hape, ka ietra hnyawa kö angeic nge ijije hi tro angeic a lapa e hnine la ekalesia. Maine jë, angeic a mekun laka, hnei angeice hë hna ietra. Ngo hapeu, hnei angeice kö hna thipetrije la itre ngazo hna kuca ekö? Nge maine hna ajojezi angeic hnei itre xan, hnei angeice kö hna amamane la aja i angeic troa iananyi me angatr? Eje hi, loi e tro la itre qatre thup a sipo ixatua ngöne la thith me e hnine la Tusi Hmitrötr. Tro hë angatr a atreine waiewekë hnyawa, me wang laka, ijije hi tro la trejin a lapa e hnine la ekalesia, maine tro pena a upetröneë angeic.—1 Kor. 5:11-13.

13. Pine nemene matre easa hnehengazo ngöne la kola upetröneë la ketre sinee së?

¹³ Nemene la ka troa tupathe la lapaune së? Ame la kola upetröneë la ketre trejin nge tha sinee së kö, canga kapa hi së la hna amekötin hnene la itre qatre thup. Ngo maine ketre sinee së, ijije hi tro sa mekun laka, tha hnei angatre kö hna xom asë la itre ithuemacanyi me axecië mekun thenge la mekuna i Iehova. Nemene la ka troa xatua së e cili?

14. Nemene la ka troa xatua së troa canga kapa la hna amekötin hnei itre qatre thup ngöne la kola upetröneë la sinee së?

 ¹⁴ Tha tro kö sa thëthëhmine laka, ame la kola upetröneë la ketre Keresiano ke, hna amekötine lai hnei Iehova. Nge nyine loi kowe la ekalesia me koi angeic. Maine tro palahi angeic a lapa ngöne la ekalesia, tro hë angeic a ajojezine la itre xaa trejin. (Gal. 5:9) Tro angeic a wangahmalohmaloeëne la ngazo i angeic. Nge tha tro kö angeic a saze la aqane mekun me aqane ujë i angeic. Ketre, celë hi ka troa xatua angeice troa bëeke koi Iehova. (Ate cai. 8:11) Celë hi matre, loi e tro sa mejiune kowe la itre qatre thup, ngöne la kola upetröneë la ketre Keresiano. Angatr a thele troa eatrëne hnyawa la hnëqa i angatr. Tune lo itretre iameköti ne Isaraela ekö, atre hi la itre qatre thup laka, tha angatre kö “a amekötine koi ate ngo koi Iehova.”—2 A. l. ite jo. 19:6, 7.

15. Pine nemene matre nyipiewekë enehila troa mejiun kowe la itre hna amekötin hnei Iehova?

¹⁵ Calemi hë la pune la fene celë, matre nyipiewekë tro sa mejiune kowe la itre hna amekötin hnei Iehova. Pine nemen? Pine laka, ame ngöne la akötr atraqatr, tro sa kapa la itre xaa hna amekötin, nge hne së hna tha trotrohnin. Eje hi, tha tro kö Iehova a ithanata meköti koi së. Ngo tro Nyidrëti a hamëne la itre hna amekötin cili jëne la itre trejin hna acil. Tha tro kö sa qeje hune ithanata me luelu, maine hnyingën ka hape, ‘Qaathei Iehova kö la itre hna amekötin cili, maine qaathei angatre hi itre ka elemeken?’ Hapeu, tro kö sa mejiune koi Iehova me organizasio i Nyidrë ngöne la ijine cili? Maine tro sa mejiun me trongën enehila la itre hna amekötin hnei Iehova, tro hë sa kuca tun elanyi ngöne la akötr atraqatr.—Luka 16:10.

16. Nemene la ka troa tupath elanyi la mejiune së kowe la itre hna amekötin hnei Iehova?

¹⁶ Nyipiewekë tro sa canga mekun la aqane tro sa ujë, ngöne la kola troa hamë së la itre hna amekötin elany, ngöne la pune la fene celë. Ame enehila, easë palakö a mejiun laka, tro la nöjei atr, tune la itre sinee së, a hane nyihlue i Iehova. Ngo ame ngöne la isi Amagedro, tro Iehova, jëne Iesu, a ameköti angatr. (Mat. 25:31-33; 2 Thes. 1:7-9) Tha hnëqa së kö troa iëne la itre ka ijij troa kapa maine tha kapa la utipin me ihnimi Iehova. (Mat. 25:34, 41, 46) Hapeu,  tro kö sa mejiun kowe la itre hna amekötin hnei Iehova, maine tro pena sa nuetrij itre ej ke, tha celë kö mekuna së? Haawe, enehila hi la ijine troa acatrene la mejiune së koi Iehova, matre tro sa hane kuca tun elany.

17. Nemene la itre manathithi hne së hna troa kapa qa ngöne la hna trongëne la itre hna amekötin hnei Iehova ngöne la pune la fene celë?

¹⁷ Pane mekune jë la madrine së elany, ngöne la easa troa öhne la thangan ne la itre hna amekötin hnei Iehova. Ame ngöne la fene ka hnyipixe, tro ha paatre la itre hmi ka thoi, me itre ka salem, me itre he ne politik ka qanangazon la itre atr. Ketre, pëhë sine mec, nge tha tro hmaca kö sa qatre trootro me mec. Tro fe a othe me umë Satana koi 1 000 lao macatre. Eje hi, paatre hë la itre ethane qa ngöne la nöjei huliwa i angeic ka ngazo. (Hna ama. 20:2, 3) Drei la ketre manathithi ka tru troa mejiun me trongën la itre hna amekötin hnei Iehova!

18. Nemene la itre ini hne së hna xom qa ngöne la tulu ne la angetre Isaraela hna qaja ngöne Numera 11:4-6 me 21:5?

¹⁸ Hapeu, tro kö a tupathe la mejiune së kowe la itre hna amekötin hnei Iehova ngöne la fene ka hnyipixe? Pane mekune jë lo ka traqa kowe la angetre Isaraela, thupene la kola nuamele angatr qa Aigupito. Hnei itre xan hna eetr me mekune hmaca lo itre xen e Aigupito, me qaja angazone la mana qaathei Iehova. (E jë la Numera 11:4-6; 21:5.) Hapeu, tro kö lai a hane traqa koi së thupene la akötr atraqatr? Thatre palakö së la etrune la huliwa hne së hna troa kuca elany, matre troa nyidrawan me aparadraisone la ihnadro. Maine jë, troa tru hnei huliwa së elany. Ngo hapeu, tro kö sa eetr kowe la itre hna hamën hnei Iehova ngöne la ijine cili? Maine tro sa kapa madrin la itre ewekë qaathei Iehova enehila, tro ha hmaloi koi së troa kapa la itre xan elany.

19. Nemene la hne së hna ce wang ngöne la tane mekun celë?

¹⁹ Loi e xecie koi së laka, ka meköti palahi la itre jë i Iehova. Ketre, tro fe sa mejiune kowe la itre hnei Iehova hna acile troa hamëne la itre hna amekötin. Tha tro pi kö sa thëthëhmine la hna qaja hnei Iehova jëne Isaia perofeta, lo kola hape: “Tro nyipunie a egöcate hnene la tingetinge me lapaun.”—Is. 30:15.