1. Nemene la hna kuca hnene la nöje i Iehova?

 HNA perofetan ekö e hnine la Tusi Hmitrötr ka hape, tro la nöje i Iehova a “hujë angate xane kö” ngöne la huliwa i Nyidrë me xötrethenge Iesu. (Sal. 110:3) Celë fe hi lai ka traqa enehila. Ame e nöjei macatre, nyimutre la itre hawa ne cainöj ne la itre hlue i Iehova. Angatr a nue la traeme i angatr me itre mo thatraqane la huliwa cili. Angatr a itö ithuecatrekeu me itö ixatua me acatrene la lapaunene la itre trejin koi Iehova. Ketre, itre trejin ka trene hnëqa a nue la traeme i angatr matre troa hnëkëne hnyawa la itre icasikeu matre inine la ekalesia. Pine nemen? Pine laka, angatr a hnimi Iehova me itre xan.—Mat. 22:37-39.

2. Thenge la Roma 15:1-3, nemene la tulu hna hamën hnei Iesu?

² Iesu la ketre tulu ka lolo. Hnei nyidrëti hna amë panëne la aja ne la itre xan, nge pine pë hë la itre aja i nyidrë. Celë hi matre, loi e tro sa catre nyitipu nyidrë. (E jë la Roma 15:1-3.) E cili, tro hë sa kepe thangane ka loi. Öni Iesu: “Sisitria catre kö la madrine ne la atre ham, hune la atre kapa.”—Itre hu. 20:35.

3. Nemene la hne së hna troa ce wang ngöne la tane mekun celë?

³ Ame ngöne la tane mekun celë, tro sa ce wange la aqane nyipiine Iesu la itre xan memine la nyine tro sa kuca matre troa nyitipu nyidrë. Tro fe sa ce ithanatane la aqane tro sa acatrene la aja së matre nyipiine la itre xan.

4. Tune kaa la aqane amë panëne Iesu la aja ne la itre xan, nge pine pë hë la itre aja i nyidrë?

⁴ Hnei Iesu hna nyipiine la itre xan, ngacama nyidrëti a kucakuca. Pane mekune jë së lo kola traqa hnene la ka alanyimu  hune la wetr e Kaperenauma. Eje hi, hnei Iesu hna thith ngöne la jidri ka pexej, matre kucakuca catre nyidrë. Ame pe, hnei nyidrëti hna utipine la itre ka pë ewekë me itre ka wezipo. E cili, hnei nyidrëti hna aloine la itre sine meci angatr, me hamë ithuecatre koi angatr jëne la Cainöje i nyidrë Hune La Wetr.—Luka 6:12-20.

5. Tune kaa la aqane nyitipu Iesu hnene la itre hene la fami, ngacama angatr a kucakuca?

⁵ Aqane nyitipu Iesu hnene la itre hene la fami. Pane mekune jë së la ketre kem ka traqa qa hna huliwa. Maine jë, nyidrëti a mekun troa uthe la Hmi Ne La Fami. Ngo hnei nyidrëti hna sipo ixatua koi Iehova matre hamë trengacatre koi nyidrë me kuca la ini tus. E cili, Iehova a sa la thithi nyidrë, nge angatr a kuca la Hmi Ne La Fami, tune lo hnei angatr hna majemin. Eje hi, tha sihngödri kö kowe la itre nekönatr laka, ka sisitria catre kowe la kem me thin la itre huliwa i Iehova, ke hnei nyidroti hna amë panëne itre ej ngöne la mele i nyidro.

6. Qaja jë lo ijine Iesu a nue la traeme i nyidrë matre troa xatua itre xan.

⁶ Hnei Iesu a nue la traeme i nyidrë matre troa xatua itre xan. Pane mekune jë së la aliene hni Iesu ngöne lo nyidrëti a atre laka, hna humuthi Ioane Bapataiso. Eje hi, akötr me hleuhleu la hni Iesu. Kola qaja hnei Tusi Hmitrötr ka hape, hnei Iesu hna “tro pi qa ngöne la neköi he troa pane lapa cas.” (Mat. 14:10-13) Trotrohnine hi së la kepin matre Iesu a ajane troa lapa cas. Eje hi, nyimutre la itre atr ka ajane troa lapa cas matre troa treije piine la itre sinee i angatr ka mec. Ngo tha celë kö lai hna kuca hnei Iesu. Hnene la ka alanyimu hna canga traqa pa ngöne la götrane hna mekun troa tro kow hnei Iesu. Nemene la hnei nyidrëti hna kuca? Hnei nyidrëti hna hnimi angatr me “utipi angatr.” Öhne hnyawa hi Iesu laka, angatr a aja ixatua me ini qaathei Akötresie. Celë hi matre, hnei nyidrëti hna “ini angatr la itre ewekë ka nyimutre.”—Mar. 6:31-34; Luka 9:10, 11.

7-8. Qaja jë la ketre ceitun ka amamane la aqane nyitipu Iesu hnene la itre qatre thup ngöne la itre ijine jol.

⁷ Aqane nyitipu Iesu hnene la itre qatre thup ka ihnim. Tru la hni ne ole së kowe la huliwa hna kuca hnene la itre qatre thup!  Eje hi, tha öhne kö së la nöjei huliwa hnei angatr hna kuca thatraqane la ekalesia, tune la kola wezipo hnene la ketre trejin. Ame la itre qatre thup ka sine la Komite Ka Ixatua Göi Itre Ejolene e Pital ke, angatr a canga wange la trejin ka wezipo matre xatua angeic, ngacama angatr a tro e hnenyipajidr. Nyipici, tru la ihnim me utipine i angatr kowe la itre trejin ka wezipo. Angatr me itre fami angatr a amë panëne la aja ne la trejin ka akötr nge pine pë hë la itre aja i angatr.

⁸ Ketre, itre qatre thup a sine la huliwa ne Xupi Uma Ne Baselaia me saene matre ixatua ngöne la kola traqa la itre hulö. Angatre fe a nue la traeme i angatr troa inine me ithuecatr me xatuane la ekalesia. Celë hi matre, loi e tro sa amamane la hni ne ole së kowe la itre qatre thup me fami angatr. Epi tro Iehova a amanathithine la itre trengecatr hnei angatr hna nue thatraqai së! Ngo eje hi laka, loi e tro la itre qatre thup a atreine waiewekë. Tha tro kö la itre huliwa ne la ekalesia a xome asë la traeme i angatr. Loi e tro angatr a xomi ijin kowe la fami angatr, wanga troa hetre ethane koi angatr.

9. Thenge la Filipi 2:4, 5, nemene la nyine troa kuca hnene la itre Keresiano?

⁹ E jë la Filipi 2:4, 5. Ngacama tha ketre qatre thup kö së, ngo nyipiewekë tro sa nyitipu Iesu me nyipiine la itre xan. Tusi Hmitrötr a qaja ka hape, hnei Iesu hna “xome la pengö i hlu.” (Fil. 2:7) Pane mekune jë së la aliene la hna qaja e celë. Eje hi, ame la hlu ke, angeice a thele la itre nyine tro angeic a kuca matre troa amadrinëne la maseta. Ketre tu së fe, easa nyihlue  i Iehova memine la itre trejin. Celë hi matre, easa kuca la itre hne së hna atrein matre troa amadrinë angatr. Hanawange la itre xaa nyine tro sa kuca.

10. Nemene la itre hnying nyine tro sa mekun?

¹⁰ Loi e tro sa isa waipengö së. Nyipiewekë tro sa isa hnying ka hape: ‘Hapeu, eni kö a ajane troa nue la traem me trengecatreng matre troa xatua itre xan? Nemene la nyine tro ni a kuca, ngöne la kola upi ni troa wange la ketre trejin ka qatre hë nge ka lapa ngöne la uma thatraqane la itre qatr, maine tro pena trothenge la ketre trejin qatre föe kowe la itre icasikeu? Hapeu, eni kö a canga saen troa hane nyidrawane la Uma Ne Baselaia me ngöne ijine asabele?’ Loi e xecie koi së laka, tru la madrine i Iehova ngöne la easa nue la traem me trengecatre së, me itre mo së thatraqane la huliwa i Nyidrë me koi itre xane fe. Ngo nemene la nyine tro sa kuca e hetre nyine tro palakö sa saze?

11. Tune kaa la aqane xatua së hnene la thith matre troa nyipiine la itre xan?

¹¹ Loi e tro sa catre thith. Maine jë hetre nyine tro palakö sa saze, ngo pëkö aja me trengecatre së göne lai. Celë hi matre, nyipiewekë tro sa fe la aliene hni së koi Iehova. Loi e tro sa sipo Nyidrë matre “hetre aja me trengecatre [së] troa kuca.”—Fil. 2:13.

12. Tune kaa la aqane tro la ketre trejin nekötrahmanyi ka xötrei bapataiso a ixatua e hnine la ekalesia?

¹² Maine epuni la ketre trejin nekötrahmanyi ka xötrei bapataiso, loi e tro epuni a sipo ixatua koi Iehova matre hetre aja troa huliwa e hnine la ekalesia. Ame ngöne la itre xaa nöj ke, tru catre kö la itre qatre thup hune la itretre ixatua. Ketre, nyimutre la itretre ixatua ka thupëtresij maine qatre pena ha angatr. Eje hi, kolo palahi a kökötre la organizasio i Iehova, matre nyipiewekë tro la itre trejin nekötrahmanyi a ixatua matre thupëne la nöje i Iehova. Maine tro epuni a amamane la aja i epuni troa nyihlu me xatua itre xan, tro hë epuni a madrin. Pine nemen? Pine laka, epuni a amadrinë Iehova. Ketre, tro ha qaja aloinyi epun, nge tro hë epuni a madrin ke, epuni a ajane troa xatua itre xan.

13-14. Nemene la nyine tro sa kuca matre troa xatuane la itre trejin? (Wange ju la icetrön.)

¹³ Loi e tro sa wangatrune la itre hna ajan hnei itre xan. Hnei Paulo aposetolo hna qaja kowe la angetre Heberu, ka hape: “The thëthëhmine kö troa kuca la loi, me ce thawa me itre xan la hnei nyipunieti hna hetreny, ke Akötresieti a madrine kowe la itre huuje cili.” (Heb. 13:16) Drei la ketre eamo ka lolo! Thupene la hnei angatr hna kapa la itusi cili, hnene la itre Keresiano ne Iudra hna trotrije la itre hnalapa i angatr, me huliwa, me itre sinee, me “kötre kowe la itre wetr.” (Mat. 24:16) Celë hi lai ijine ka nyipiewekë koi angatr troa itö ixatua. Maine tro angatr a canga trongëne la eamo hna hamën hnei Paulo, me ce thawa me itre xan la itre hnei angatr hna hetreny, tro ha hmaloi koi angatr troa saze la aqane mele i angatr, me mejihnine la hnei angatr hna hetreny.

¹⁴ Ame itre xaa ijin, tha kolo kö a qaja koi së hnene la itre trejin la itre hnei angatr hna ajan. Pane mekune jë së la kola mecitrije la ketre trejin trahmanyi hnene la föe i angeic. Maine jë angeic a aja ixatua göi troa kuci xen, maine nyidrawa uma pena, me itre xaa huliwa ju kö. Ngo angeic a xou troa sipo ixatua koi së, ke  xele angeice troa ajolë së. Celë hi matre, loi e tro sa canga thele la aqane tro sa xatua angeic. E cili, tro hë angeic a hetre hni ne ole koi së me madrin. Ketre, tha tro kö sa mekun laka, hetre trejin ka xatua angeice hë, maine treqene pena tro angeic a sipo ixatua koi së. Loi e tro pe sa isa hnying ka hape, ‘Maine tro fe a hane traqa koi ni la jole cili, nemene la ixatua hnenge hna ajan troa kapa?’

15. Nemene la nyine tro sa kuca matre nyipiine la itre xan?

¹⁵ Loi e tro sa amamane koi itre xan laka, ijije hi tro angatr a sipo ixatua koi së. Eje hi, atre hi së la itre trejin ka thele palahi troa xatuane la itre xan e hnine la ekalesia. Nge angatr a kuca itre ej cememine la hni ka ajan me ka madrin. Ketre, easa ajane troa nyitipu angatr. Atre hi së laka, ijije hi tro sa mejiune koi angatr ngöne la itre jol! Celë hi lai hna ajan hnei Alan, ketre qatre thup ka 40 lao macatre. Hnei angeice hna lapa mekun la tulu i Iesu, matre öni angeic: “Ngacama tru la huliwa i Iesu, ngo tha jole kö kowe la itre atr troa easenyi koi nyidrë me sipo ixatua. Öhne hnyawa hi angatr laka, Iesu a nyipi angatr. Celë hi lai kepin matre eni a ajane troa nyitipu Iesu. Eni a ajane tro itre xan a goeë ni ceitu me ketre atr ka lolo me thiina ka menyik, matre tro angatr a easenyi koi ni me hane sipo ixatua.”

16. Tune kaa la aqane xatua së hnene la hna qaja ngöne Salamo 119:59, 60 matre tro sa nyitipu Iesu?

¹⁶ Tha tro pi kö sa hnehengazo menu, e thatreine kö së troa xötrethenge hnyawa la tulu i Iesu. (Iako. 3:2) Pane mekune jë së la ka inin troa peidr. Eje hi, thatreine kö angeice troa peidre hnyawa tune la atre ini angeic. Ngo maine tro angeic a  xomi ini qa ngöne la itre tria i angeic, me thele troa nyitipun hnyawa la atre ini angeic, tro hë angeice lai a maca. Ketre tu së fe, loi e tro sa trongëne hnyawa la itre trepene meköti Iehova, me xomi ini qa ngöne la itre tria së. E cili, tro hë sa nyitipu Iesu me xötrethenge hnyawa la itre thupa ca i nyidrë.—E jë la Salamo 119:59, 60.

17-18. Nemene la itre eloin hne së hna troa kapa e tro sa nyitipu Iesu me nyipiine Iesu la itre xan?

¹⁷ Ijije hi tro la itre xan a nyitipune la aqane nyipiine së la xaa atr. Öni Tim, ketre qatre thup: “Hnene la itre trejin nekötrahmanyi hna nyitipune la itre xaa trejin ka nyipiine la itre xan. Celë hi matre, hna acilë angatr matre troa itretre ixatua e hnine la ekalesia, ngacama itre xötre ka co angatr. Eje hi, angatr a catre huliwa me sajuëne la itre qatre thup memine la itre trejin.”

¹⁸ Ame la itre atr enehila ke, angatr a pi mama me meku angatre hi. Ngo tha celë kö lai aqane ujë ne la itre hlue i Iehova. Eje hi, hna ketri së hnene la aqane nyipiine Iesu la itre xan. Celë hi matre, easa ajane troa nyitipu nyidrë. Ngacama thatreine kö së troa nyitipu nyidrë, ngo ijije hi tro sa ‘xötrethenge hnyawa la itre thupa ca i nyidrë.’ (1 Pet. 2:21) Haawe, loi e tro sa catre thele troa nyitipune la aqane nyipiine Iesu la itre xan. E cili, tro hë sa madrin nge tro ha kepe së hnei Iehova.